मत्ती 12
12
दुःब न्हबे दीन्की प्रभु
(मर्कुस् २:२३-२८; ३:१-६; लुका ६:१-११)
1हुजु बेलोरी येसु दुःब न्हबे दीन्री व्ह म्रङ् ग्यम्से तज्यीम् स्येःजेत्टीब मुबल। थेङ्की डबमा ख्रेन्बल तज्यीम् व्हइ नम् टङ्ज्यीम् चज्यी। 2चु म्रङ्ज्यीम् फरीसीमाचे येसुत पङ्ज्यी, “स्हीःगो, थेङ्की डबमाचे मोसाचे ब्रीबे पर्मेस्वर्की नीयम्चे दुःब न्हबे दीन्री स्य्हेङ्ब अत पङ्बे लक् स्य्हेङ्टीब मुब।”
3तर थेङ्चे थेङ्यीमात जोहप् न्हङ्जेत्ज्यी, “दाउद्चे थेतेङ् थेइ र्होमा ख्रेन्बे बेलोरी ता स्य्हेङ्ज्यी, एङयीमाचे धर्म छ्येःरी खेत्पल अरे? 4थे पर्मेस्वर्की ज्यीद दीम्न्हङ् वङ्ज्यी, ओसेम् थेतेङ् थेइ र्होमाचे पर्मेस्वर्त पीन्बे गेङ् चज्यी। मोसाचे ब्रीबे नीयम् अनुसार् हुजु ग्येङ् लम्बुमा बीमम् ल्हो-ल्हो खल्चेएनो चब अतब मुबल। 5एङ्यीमाचे मोसाचे ब्रीबे नीयम्री खेत्पल अरे वुइ त? लम्बुचे दुःब न्हबे दीन्रीएनो पर्मेस्वर्की दीम्री लक् स्य्हेङ्ज्यीम् दुःब न्हबे दीन्की नीयम्त अङ्येन्! होलेतलेनो थेङ्यीमात दोस् अपीन्। 6ङ एङ्यीमात पङ्ब, पर्मेस्वर्की दीम् बीमएनो ङ्हच्छ्यङ् गी चुरी मुब। 7‘ङ एङ्यीमा ग्यम्से ठा अय्हीन्, तर दया स्य्हेङ्खइ म्हेन्ब’#होसे ६:६ पङ्बे फ्रोइकी अर्थ एङ्यीमाचे गोबल पङ्सम् दोस् अरेबे ङइ डबमात एङ्यीमाचे दोस् पीन्स्ये अरेबल। 8तलेपङ्सम् म्हीइ ज दुःब न्हबे दीन्लेएनो प्रभु य्हीन्ब।”
9ओसेम् येसु हुजु ग्लासे डोङ्जेत्ज्यीम् थेङ्यीमाकी यहुदीमा र्हुब् तबे दीम्री स्येःज्यी। 10हुजुरी या खर्बे म्ही गी मुबल, ओसेम् थेङ्त दोस् ल्हइतीबे सेम् लज्यीम् फरीसीमाचे ङ्योत्ज्यी, “दुःब न्हबे दीन्री नबे म्हीत फेन्न लब नीयम् अनुसार् तब वुइ अत?” 11येसुचे थेङ्यीमात सुङ्ज्यी, “एङ्यीमान्हङ्री खल्ल पङ्लेनो दुःब न्हबे दीन्री ग्युः गी व्हङ्न्हङ् तइज्यी पङ्सम्, एङ्यीमाचे हुजु ग्युःत अतेतो स्यीम्? 12ग्युः बीमम् म्ही य्हक्को सेइल य्हीन्ब। होत्तज्यीम् दुःब न्हबे दीन्री ज्यबे लक् स्य्हेङब नीयम् अनुसार् तब।” 13हुजु लीप्चे येसुचे या खर्बे म्हीत, “या स्येल् लो” बी सुङ्ज्यी। थेचे या स्येल् लज्यी ओसेम् थेइ या फेन्ज्यी। 14हुजु लीप्चे फरीसीमा डोङ्ज्यीम् य्हर्ज्यी, ओसेम् येसुत खले सेत्प पङ्ज्यीम् तम् डीःज्यी।
पर्मेस्वर्चे दम्जेत्पे योक्पो
(मर्कुस् ३:७-१२; लुका ६:१७-१९)
15येसुचे थेङ्की बीरुद्दरी तम् डीःबल खेम्ज्यीम् थेङ् स्येःजेत्ज्यी। य्हक्को म्हीमा थेङ्की लीप्चे ब्रज्यी, ओसेम् थेङ्चे थेङ्यीमातेङ् मुबे नबमा जम्मत फेन्न लजेत्ज्यी। 16ओसेम् थेङ्चे थेङ्यीमात थेङ्की बारेरी खल्तेएनो थस्येतो बी कुल्ज्यी। 17चोले पर्मेस्वर्चे अगम्बक्त यसैया ग्यम्से सुङ्बे फ्रोइ टोप् तखज्यी-
18“च्याको, ङचे दम्बे योक्पो चुनो य्हीन्ब,
थेत ङ य्हक्को म्होइब, थेतेङ् ङ य्हक्को तङ्बल मुब।
ङ ङइ आत्मा थेइ जोरी पीत्युस्ये मुब,
ओसेम् थेचेनो जम्म जात्की म्हीमात न्यायकी प्रचार् स्य्हेङ्स्ये मुब।
19थेचे न्ह बङस्ये मुब, न्ह क्रीङ्स्ये मुब, न्ह ग्यम्मारी थेइ केत् थ्येःस्ये मुब।
20थेचे कुक् तबे मएनो क्युत्स्ये अरे,
ओसेम् स्यीयम्टीबे मेतङ्एनो सेत्स्ये अरे,
ओसेम् थेचे न्यायत डाना लस्ये मुब।
21ओसेम् जातीमा जम्मचेनो थेइ मीन्री आस् थेन्स्ये मुब।”
येसुतेङ् सैतान्
(मर्कुस् ३:२०-३०; लुका ११:१४-२३)
22हुजु लीप्चे म्हङ् स्यप्ज्यीम् कनतेङ् लेम्ब तबे म्ही गीत म्हीमाचे येसुज बज्यी। येसुचे फेन्नलजेत्प बीसेम् हुजु म्हीचे म्रङ्बतेङ् तम् पङ्ब खम्ज्यी। 23ओसेम् म्हीमा जम्मनो तेःङेन् तज्यीम् पङ्ज्यी, “ता थेनो दाउद्की ज य्हीन्ब खम्ब?” 24चु थ्येःज्यीम् फरीसीमाचे पङ्ज्यी, “चु म्हीचे म्हङ्माकी ग्यल्बो बाल्जीबुल्की#१२:२४ बाल्जीबुल- बालजीबुल सैतान्की ल्हो-ल्हो मीन् य्हीन्ब। सक्ती ग्यम्चे म्हङ् तेत्प।”
25येसुचे थेङ्यीमाकी सेम्की तम् खेम्ज्यीम् सुङ्ज्यी, “खजु य्हुल् पङ्लेनो र्हङ्न्हङ् थीज्यी पङ्सम् हुजु य्हुल् र्हङ्नो नास् तब। ओसेम् सहर् वुइ म्हेम्यमा खजु पङ्लेनो र्हङ्न्हङ् थीज्यी पङ्सम् हुजुएनो नास् तब। 26होलेनो सैतान्चे सैतान्तनो तेत्लाज्यी पङ्सम् थे थीज्यीम् र्हङ्चे र्हङ्तनो बीरोद् स्य्हेङ्ब, ओसेम् थेइ य्हुल् खले थाम्दील? 27एङयीमाचे ङत बाल्जीबुल्की सक्ती ग्यम्से म्हङ्मा तेत्लाब पङ्ब पङ्सम्, एङ्यीमाकी डबमाचे खलइ सक्ती ग्यम्से म्हङ्मा तेत्लाब स्यीम्? होत्तज्यीम् एङ्यीमाकी डबमानो एङ्यीमाकी न्याय स्य्हेङ्बलमा तस्ये मुब। 28तर पर्मेस्वर्की आत्मा ग्यम्से ङचे म्हङ्मा ल्हब्लाब पङ्सम् पर्मेस्वर्की य्हुल् एङ्यीमाकी गुङ्री खज्यीन्बल मुब। 29ङोन्ग्यम् बङ्ज्येन् म्हीत अखीःज्यी पङ्सम् खल्चेएनो थेइ दीम्री वङ्ज्यीम् दीम्की स्हेःमा बोर् अखम्। हुजु बङ्ज्येन् म्हीत खीःज्यीम्कीनो थेइ दीम्की स्हेःमा य्हो लबोर्ब खम्ब।
30 “ङतेङ् बक्च्य अरेबलम् ङइ बीरोधी य्हीन्ब, ओसेम् ङतेङ् दुत्परी र्हो अलबलचे ङचे दुत्पलएनो ठम्लाब। 31होत्तज्यीम् ङ एङ्यीमात पङ्ब, म्हीमाचे खीसइतीज्यीम् स्य्हेङ्बे पाप्मा क्षमा तस्ये मुब, तर पबीत्र आत्माइ बीरुद्दरी खीसइतीबल क्षमा तस्ये अरे। 32म्हीइ जइ बीरुद्दरी पङ्बे पाप्मा क्षमा तस्ये मुब, तर पबीत्र आत्माइ बीरुद्दरी पङ्बे पाप्मी चु बेलोतेङ् खस्येकी बेलोरीएनो क्षमा तस्ये अरे।
दोङ्बोतेङ् दोङ्बोइ रोरो
(लुका ६:४३-४५)
33 “ज्यबे दोङ्बोरी ज्यबे रोरो रोःब, ओसेम् अज्यबे दोङ्बोरी अज्यबे रोरो रोःब। तलेपङ्सम् दोङ्बो खतेब बी रोरो ग्यम्सेनो स्येःब। 34ओ पुख्रीइ कोलमा! एङ्यीमा दुस्ट तज्यीम्एनो ज्यबे तम् खले पङ्ब खम्ब? तलेपङ्सम् सेम्री ता मुज्यी हुजुनो सुङ्चे थोल्ब। 35ज्यबे म्हीचे ज्यबे सेम् ग्यम्से ज्यबे तम्नो पङ्ब, ओसेम् अज्यबे म्हीचे अज्यबे सेम् ग्यम्से अज्यबे तम्नो पङ्ब। 36ङ एङ्यीमात पङ्ब, म्हीमाचे पङ्बे जम्मनो अतोःबे तम्माकी हीसाब कीताब् न्यायकी दीन्री पीन्थोस्ये मुब। 37तलेपङ्सम् एङ्यीमाचे पङ्बे तम्चेनो न्यायकी दीन्री एङ्यीमा दोसी य्हीन्ब वुइ अय्हीन् ङोन्स्ये मुब।”
योनाइ चीनो
(मर्कुस् ८:११-१२; लुका ११:२९-३२)
38हुजु लीप्चे डेत्-डेत् धर्म लोप्पोन्मातेङ् फरीसीमाचे येसुत पङ्ज्यी, “लोप्पोन्, ङ्यीमात थेङ्चे तेःङेन्की चीनो गी ङोन्जेतो, ङ्यीमाल च्याबे सेम् मुब।” 39ओसेम् येसुचे सुङ्ज्यी, “दुस्टतेङ् ब्यभीचारी पुस्तमाचेकीनो तेःङेन्की चीनो म्हइब। तर चु पुस्तात अगम्बक्त योनाइ चीनो बीम ल्हो-ल्हो चीनो पीन्स्ये अरे। 40तलेपङ्सम् खले योना ङ्हच्छ्यङ् तर्ङइ फोन्हङ् दीन् सोम् ओसेम् म्हुन् सोम् टीज्यी, होलेनो म्हीइ जएनो जम्बुलीङ्की फोरी दीन् सोम् ओसेम् म्हुन् सोम् टीस्ये मुब। 41न्यायकी दीन्री नीनबे सहर्की म्हीमाचे रप्ज्यीम् चु पुस्ताइ म्हीमात दोस् ल्हइतीस्ये मुब, तलेपङ्सम् योनाइ प्रचार् ग्यम्से थेङ्यीमाचे पस्चताप् स्य्हेङ्ज्यी। ङ एङ्यीमात पङ्ब, चुरी योना बीमएनो ङ्हच्छ्यङ् गी मुब। 42न्यायकी दीन्री लोःइ ग्यल्मोचे रप्ज्यीम् चु पुस्ताइ म्हीमात दोस् ल्हइतीस्ये मुब, तलेपङ्सम् सोलोमन् ग्यल्बोइ बुद्दीइ तम् ङ्येन्बरी थे य्हक्को थारीङ् ग्यम्चे खज्यी। ङ एङ्यीमात पङ्ब, चुरी सोलोमन् बीमएनो ङ्हच्छ्यङ् गी मुब।
दुस्ट आत्मा दोःज्यीम् खबल
(लुका ११:२४-२६)
43 “दुस्ट आत्मा म्ही ग्यम्से डोङ्य्हर्ब बीसेम् हुजु दुस्ट आत्मा खर्बे ग्लामा तज्यीम् दुःब न्हबे ग्ला म्हइब, तर अय्हङ्। 44ओसेम् हुजु आत्माचे पङ्ब, ‘ङ खनचे खज्यी हुजु दीम्रीनो दोःज्यीम् ङ्यीब।’ ओसेम् दोःखमम् हुजु आत्माचे हुजु दीम् थेन्-थेन् ओसेम् सङ्सेङ्ले ज्यनले थेन्बल यङ्ब। 45ओसेम् हुजु य्हर्ज्यीम् र्हङ् बीमम् य्हक्को अज्यबे आत्मा ङ्यीस् ङ्होत्ज्यीम् बब, ओसेम् थेङ्यीमा न्हङ्री वङ्ज्यीम् टीब। हुजु म्हील ङोन्ग्यम्ल बीम लीक्यम्की दस झेन् अज्यबल तब। चु दुस्ट पुस्तइ म्हीमातेएनो होतेबनो तस्ये मुब।”
येसुइ अमतेङ् अलेमा
(मर्कुस् ३:३१-३५; लुका ८:१९-२१)
46येसुचे म्हीमातेङ् तम् पङ्टीबे बेलोरी थेङ्की अमतेङ् अलेमा दोखज्यी। थेङ्यीमा येसुतेङ् तम् लथोबल मुब पङ्ज्यीम् दोरी ब्रेन्ज्यीम् रप्ज्यी। 47म्ही गीचे येसुत पङ्ज्यी, “स्हीःगो, थेङ्की अमतेङ् अलेमा थेङ्तेङ् तम् पङ्थोबल मुब पङ्ज्यीम् दोरी रप्टीबल मुब।” 48ओसेम् येसुचे सम्तर् बबे म्हीत, “ङइ अमतेङ् अलेमा खल् य्हीन्ब?” बी सुङ्ज्यी। 49हुजु लीप्चे थेङ्चे र्हङ्की डबमात ङोन्जेत्ज्यीम् सुङज्यी, “चुमानो ङइ अमतेङ् अलेमा य्हीन्ब, 50तलेपङ्सम् खल्चे ङइ स्वर्गरी मुबे अपचे पङ्बे तम् ङ्येन्ज्यी हुजुनो ङइ अले, अङ ओसेम् अम य्हीन्ब।”
Právě zvoleno:
मत्ती 12: WTDG
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2025 by Mother Tongue Translators Society, Nepal Bible Society
and Wycliffe Bible Translators, Inc.
