Jeremiah 10
10
Milim Biakna le Biakpiakna Maan
1Israel mite awng, note atu in Topa’ thupuak sia ngai vun. 2Ama in,
“Minam dangte omzia zui heak vun;
minam dangte in van ah a lamdang a kimute
kiita in lau hikale note in na thin nawngkaisak heak vun.
3Hi mite ii biakna sia mannung ngawl hi.
Duisung ah thingkung khat kiphuk a;
tua sia thingngel thiampa in a hiamh zakte taw sui in
4ngunn le khamh taw zeam hi.
A puk ngawl natu in thikpim taw kilh hi.
5Tua milimte sia tangmai lo sungah
lohunnate taw kibang hi;
tua milimte pau thei ngawl a;
lampai thei ngawl ahikom puak kul hi.
Tuate kiita heak vun:
Na siat natu uh bangma vawt thei ngawl a,
na phat natu bangma vawt thei ngawl hi,” ci hi.
6 Topa awng, nang taw a kibang
kuama om ngawl hi;
nang na thahat a, na min lian in vaang nei hi.
7Minam theampo ii kumpipa ahi nang sia,
akua in zakta ngawlin a om tu ziam?
Nang sia zatakna piak tu in na kilawm hi.
Minamte ii mipilte theampo sung pan hikale
amate ii kumpite sung pan hikale nang taw a kibang kuama om ngawl hi. #Tpl 15:4
8Amate theampo ngoai in mawmaw uh hi.
Thing taw kivawt milimte kung pan amate in bang sin thei tu ziam?
9A milimte sia Spain ngam pan a piang ngunn taw,
Uphaz ngam pan a piang khamh taw kituam a,
limsuai thiamte ii vawt veu hi siat hi;
tuate sia thiamtak thiamte ii a taa puan sandupciik le
puan sandupte kisilhsak hi.
10Ahihang Topa, nangma in Pathian tatak na hi a,
a nungta Pathian le tawntung kumpipa na hi hi.
Na thin uuk ciangin leitung liing a;
minamte in na thin uukna thuak zo ngawl uh hi.
11(Lei le van a vawt ngawl pathiante sia kisiacipsak tu hi ci in no mihingte in amate son tu nu hi. Amate sia leitung koima ma ah om nawn ngawl tu hi.)
Pathian Pokna Biakna La khat
12 Topa in a vaangletna taw leitung vawt a;
a ciimna taw leitung bitphua in vantungte zalh hi.
13Ama ii thupiakna taw in van ii tungsia ah a om tuite hawk hi;
ama in leimong panin meeite hong paipui hi.
Ama in nguatui sungah khualeng sakin a vanh kholna sung panin vuivasak hi.
14Hi thu a mu uh ciang, mihingte mawmaw kisa in lung amh uh hi;
tua milim a vawtte in a maan sia mu uh hi;
banghang ziam cile amate vawt pathiante maan ngawl a, nuntakna nei ngawl uh hi.
15Tuate sia mannung ngawlin kinomu tu hi;
Amate thukhenin Topa hong pai ciang amate kisusia tu hi.
16Jacob ii Pathian sia amate bang hi ngawl hi;
ama in na theampo a vawt pa hi a, ama mi tatak tu in Israel mite teal zo hi.
Ama min sia Vaanglianbelpa, Topa ahi hi.
Hong tung tu Saltanna
17Jerusalem mite awng, note sia hong ki uumci hi! Na neisate uh kaikhawm vun. 18Topa in hi ngamsung pan note hong lawnthal tu hi; khat zongh kikhe ngawl dongin hong sucip tu hi. Topa in ci zo hi.
19Jerusalem mite in, “Nasia takin ih liam hi! ih liammate dam ngawl tu hi.
Hite sia ih thuak zawk tu khat po hi vak ci in ih ngaisun hi!
20Ih puan bukte kisia zo a;
a sawmna khaute tattan zo hi.
Ih tate uh le tai siat zo a;
ih puan bukte hong saksak kik tu kuama om nawn ngawl hi;
A kongkha puante uh a khaisak tu kuama om ngawl hi,” ci in au uh hi.
21Keima in, “Ih lampuite mawmaw a;
lamlak tu in Topa thu dongh ngawl hi.
Tuasia hu in amate nguallelin, ih mite kithethaang hi.
22Ngai vun! Thu khat hong theng zo hi!
Saksang ngam khat sungah buaina lian khat om hi;
a ngalkaphon in Judah ngam khuapite sia
ngiate teenna sennealngam suaksak tu hi,” ci in ka zo hi.
23 Topa awng, kuama in ama ii maisang nuntakna
a zeak thei ngawl hunlam ka he hi;
kuama in ama nuntakna uk ngawl hi.
24 Topa awng, na mite hong puua ta'n;
ahihang a nasia lei in hong hi heak in,
tua hibuale na thin uuk ciang daan hong pia heak in;
tuabang nong hi le thi tu khu hi.
25Na thin uukna sia nang
hong bia ngawl minamte tung le
nang hong nial mite tungah tungsak in.
Amate in na mite that a;
ko hong susia cipin ko ngam
a sia sa in nusia uh hi.
Právě zvoleno:
Jeremiah 10: SCB2
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Siyin Chin Bible © Bible Society of Myanmar, 2016