Abharuumi 12
12
Mwiruusye obhuhoru bhwenyu mumukorere Waryubha emirimu
1Bhoono, abhahiiri bhaani kuimani, mumanyiri kya ego Waryubha aratumaahira ekyabhira. Kwa ego mbe, ndabhakomererya ega, mwiruusye obhuhoru bhwenyu ku Waryubha. Mubhe kya ebhimwenso ebhihoru, ebhirabhu, ebhijomu, bhinú bhiramungʼarira Waryubha. Okukora ego, nko enjira ya heene ya okumusyengera Waryubha. 2Muteehigira obhusimuka bhwa abhantu bha ekyaro kinu, nawe, mutige Waryubha ahunjure emitima gyenyu, naho mubhe na ameetegeerero amahya. Hayo nho, mureehigire okumanya ganú Waryubha arabheendera. Na hayo nho muraamanye m-mangʼana-ki amajomu, ganú garamungʼarira, kweki ganú gakuneeni.
3Bhoono, Kiristu yangʼeeri eriruguto mbe omutumwa waaye. Kwa ego, ndakeerya kira oumwi weenyu ega, ateerora ega, yaana obhwera okukira kya ego aringi, nawe, abhe na egintungwa. Kira omuntu aheerwe endengo yaaye ya eimani na Waryubha.#12:3 Kira omuntu aheerwe endengo yaaye ya eimani na Waryubha. Ensonga eindi eratura okubha ega, Kira omuntu yeerenge okuringʼaana na eimani yaaye. 4Kya ego mumanyiri ega, omubhiri n-gumwi, nawe, guuna ebhiroobhero ebhyaru, na kira ekiroobhero kiina omurimu gwakyo. 5Ego niigo na bheetu. Bheetu turingi abhaaru, nawe, tubheeri omubhiri ogumwi kwa okugwatana kwetu na Kiristu. Kumubhiri gwaye, kira omuntu n-kiroobhero kumurikyaye, na yaana omurimu gwaye.
6Kwa ego, tuuna ebhibharo amanga amaaru, kya ego Waryubha yaatuhaana kwa eriruguto ryaye. Omuntu unú aheerwe ekibharo kya okuruusya obhurooti, atumire ekibharo kiyo okuringʼaana na eimani yaaye. 7Omuntu unú aheerwe ekibharo kya okukorera emirimu abharikyaye, abhakorere emirimu bhujomu. Na omuntu unú aheerwe ekibharo kya okwihigirya, yeehigirye bhujomu. 8Omuntu unú aheerwe ekibharo kya okuhorisya abharikyaye, akore ego bhujomu. Omuntu unú aheerwe ekibharo kya obhuserenʼya kubhantu, aserenʼye kwa omutima gonsego. Omuntu unú aheerwe ekibharo kya obhutungi, atunge kwa ekituunyo kyonsego. Na omuntu unú aheerwe ekibharo kya ekyabhira, yaabhire abhantu kwa obhujomerwa.
Muhanjane
9Obhuhanje bhwenyu bhutabha bhwa orwambe, mubhihirirwe amabhiibhi na mubhenga muragwata rinú riringi erijomu eribhaga ryonsego. 10Muhanjane bheenyu abheene kwa abheene kwa obhuhanje bhwa abhahiiri kuimani, na okwiganirirya mbere abhandi kwa obhusuuku. 11Mutabha abharosu kukukora emirimu gya Waryubha, nawe, mubhe na ekituunyo mumitima gyenyu kukumukorera Omukuru emirimu.#12:11 Mubhe na ekituunyo mumitima gyenyu kukumukorera Omukuru emirimu. Ensonga eindi eratura okubha ega, moorokereribhwe na Omutima Omurabhu, naho muture okumukorera Omukuru emirimu kwa ekituunyo. 12Mujomerwe kuganú Waryubha yaabharaga, mubhenga mureegumirirya muginyanko, na mugume kumasabho. 13Mubhabheere abheekirirya abharikyenyu okuringʼaana na obhwendi bhwabho, na mubhenga muragenihya abhageni muginyumba gyenyu.
14Mumusabhe Waryubha abhanonke bhanú bharabhanyankya, kora mutabha murabhasabhira ega, bheehiimwe. 15Mujomerwenga hamwi na bhanú bharajomerwa, na mukuurenga hamwi na bhanú bharakuura. 16Mwikare hamwi kwa ensonga eimwi. Mutabha mureegungya, nawe, mwiyituumye, mubhe na obhugwatani na abhantu bha insi. Muteerora ega, bheenyu abheenego muuna obhungʼeeni.
17Hanú abhantu bharabhakorera obhubhiibhi, mutabhariha ekisiiyomba. Nawe, mukore ganú garamaahikana ega, m-majomu kubhantu bhonsego. 18Mukore ekituunyo kya okubha na omurembe na abhantu bhonsego. 19Abhahanje bhaani, mutariha ekisiiyomba, nawe, mutigire Waryubha yaamure kya okukora. Ndagamba ego, kwa okubha mu Mangʼoore Amarabhu, Omukuru Waryubha aragamba ega, “Oni nooni ndiriha ekisiiyomba.”#12:19 Maaha mukitabho kya Obhuhiituki bhwa Amaragiriryo 32:35. 20Kweki mutariha ekisiiyomba, nawe, mukore kya ego Amangʼoore Amarabhu garagamba ega,
“Nyoore omusigu waaho yaana omweko, omuhaane ebhyakurya.
Na nyoore yaana enyonta, omuhaane amanji.
Okaakora ego, oribha muna okumeenʼye amakara ga omururo omutuuriiri kumutwe gwaye.”#12:20 Okaakora ego, oribha muna okumeenʼye amakara ga omururo omutuuriiri kumutwe gwaye. Abhasomi abhaaru bharagamba ega, ensonga yaaye niiga, Okaakora ego, oribha omusuukirye eguru ya obhubhiibhi bhwaye kwa obhujomu bhwaho. Maaha mukitabho kya Egimesaari 25:21-22.
21Otahigwa na obhusarya bhunú abhantu bharakukorera, nawe, ohige obhusarya bhuyo, kwa okubhakorera amajomu.
Právě zvoleno:
Abharuumi 12: Kabwa
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.