Abharuumi 11
11
Waryubha ataraanga Abhaisiraeri bhatabha abhantu bhaaye
1Mbe, ndabhuurya ega, bhoono, Waryubha yaangiri abhantu bhaaye? Tiigo-ha kora ahake, kwa okubha oni nonse m-Mwisiraeri, okurwa kurwibhuro rwa Abhurahamu, okurwa kwikabhira rya Bhenjamini. 2Waryubha ataanga abhantu bhaaye, bhanú yaasora okurwa ekyaro kitarabhumbwa. Kasi mutamanyiri kinú Amangʼoore Amarabhu garagamba eguru ya omurooti Eriya, kya ego yaamwingʼeheererya Waryubha eguru ya Abhaisiraeri? Akagamba ega, 3“Omukuru, abhantu bhanu bheeta abharooti bhaaho, na bhahaanywiri ahasi ha okumwensera. Oni naatamiri omwenego, na kora oni nonse bhareenda okunyita!”#11:3 Maaha mukitabho kya 1 Abhakama 19:10, 14. 4Nawe, Waryubha yaamukyukya egaki? Yaamukyukya ega, “Nisagiirye abhantu ebhiku muhungati, bhanú bhatakumusyengera Bhaari.”#11:4 Maaha mukitabho kya 1 Abhakama 19:18.
5Kora bhoonwego niigo eringi, bhatamiri abhantu abhake ego bhanú Waryubha yaabhasora kwa eriruguto ryaye. 6Bhaasorwa kwa eriruguto rya Waryubha, kwa ego bhatakutuuribhwa kwa ekisigo kya amakorwa gaabho. Nyoore bhakaatuuriibhwe kwa ekisigo kya amakorwa gaabho, mbe, eriruguto ritakaabheeri eriruguto kweki. 7Kwa ego, amangʼana garingi ega, Abhaisiraeri bhaatuna okubha abhaheene embere ya Waryubha, nawe, bhataanyoora. Bhanú bhaanyoora m-banú Waryubha yaasora abheenego. Abhandi bhonsego bhanú bhataanyoora, Waryubha akabhakora okubha na emitwe emikongʼu. 8N-kya ego Amangʼoore Amarabhu garagamba ega,
“Waryubha yaabhakora bhabhe na emitima emikongʼu,
yaabharibha ameeso, naho bhatarora,
kweki yaabharibha amatwi, naho bhateegwa.
Niigo bharingi nawanyareero.”#11:8 Maaha mubhitabho bhya Obhuhiituki bhwa Amaragiriryo 29:4; Isaaya 29:10.
9Na omukama Daudi yaagamba ega,
“Hanú bharakora eginyangi gyabho,
Waryubha agikyukye gibhe omutego gwa okubhagwatya,
na omutego gwa okugwisya,
na gibhe obhujibhu kubheene.
10Ameeso gaabho geemwe endingaasi,
naho bhatarora kyokyonse kweki,
na emigongo gyabho gigendererye okwikumba,
okurekana na eginyanko gyabho.”
Okwanga kwa Abhaisiraeri kubheeri enonkwekubhanú bhataringi Abhaisiraeri
11Bhoono, kweki ndabhabhuurya ega, Abhaisiraeri bheekuujura, naho bhagwe na okusika kimwi? Tiigo-ha kora ahake! Nawe, nu-kurekana na okwanga kwabho kwa Omutuurya, obhutuurya bhwangʼaanyira kubhantu bhanú bhataringi Abhayahudi, naho Abhaisiraeri bhabhe na erihari rya okutuuribhwa. 12Bhoono, nyoore abhantu bhanú bhataringi Abhaisiraeri, bhaanyoora eriruguto erinene kwa okubha Abhaisiraeri bhaamwanga Omutuurya, mbe, bharinyoora eriruguto erinene bhukongʼu, hanú Abhaisiraeri bhonsego bharibha bhatuurikiri.
13Bhoono, ndagamba na bheenyu, abhantu bhanú mutaringi Abhaisiraeri. Maheene Waryubha yaantuma mbe omutumwa kurusumo rwa abhantu bhanú bhataringi Abhaisiraeri. Ndeeruusya bhukongʼu kumirimu ginú ngʼeerwe. 14Ndeesiga ega, okuhitira emirimu gyani, Abhaisiraeri abharikyani bhabhe na erihari rya okunyoora obhutuurya bhunú bheenyu mwanyoora, naho gati yaabho bhonse bhatuuribhwe. 15Maaha, hanú Abhaisiraeri bhaamwanga Omutuurya, Waryubha wonse akabhaanga, akeekiriranʼya na abhantu bhanú bhataringi Abhaisiraeri. Kwa ego, hanú Waryubha aribheekirirya Abhaisiraeri kweki, eribha muna abhaku bhahyukiri!
16Nyoore omuntu aramuruusirya Waryubha ekimwenso kya omugeso gwa mbere gwa ebhyakurya bhyaye, mbe, ebhyakurya bhyaye bhyonsego, bhiribha n-kurusumo rwa Waryubha. Kweki, nyoore omuntu aramuruusirya Waryubha emiri gya emijeituni, mbe, kora amasagi gaagyo gonsego garibha n-kurusumo rwa Waryubha.#11:16 Abhasomi abhaaru bharagamba ega, ekimwenso kya omugeso na emiri gya emijeituni m-bajaaji bha Abhaisiraeri, mbo Abhurahamu, Esaaka na Yakobho. 17Bhoono, gati ya amasagi gaageejwa, na amasagi agandi ga omujeituni gwa mwisisi gaahambirirwa ahasi ha amasagi ganú gaageejwa. Amasagi gonsego garanyoora ebhyakurya okurwa kumiri giryagirya gya omujeituni. Bheenyu, mbo amasagi ga emijeituni gya mwisisi ganú gaahambwa gatigati ya amasagi ga mbere. 18Kwa ego, mutajeera amasagi ganú gaageejwa. Muteeheema, na muhiituke ega, emiri gitakubheesigira bheenyu, nawe, bheenyu mbo mureesigira emiri.
19Eribhaga erindi muratura okugamba ega, “Amasagi gayo gaageejwa, naho oni nhambirirwe ahasi haago.” 20Riyo m-maheene. Amasagi gayo gaageejwa kwa okubha gateekirirya, na uuwe oringi kya ego oringi kwa okubha oreekirirya. Kwa ego, wiyangararire, oteeheema, nawe omoobhohe Waryubha. 21Waryubha yaajibhya Abhaisiraeri bhanú bharingi amasagi ga obhusimuka bhwa emijeituni. Kwa ego, kora uuwe wonse, aratura okukujibhya.
22Mumaahe kya ego Waryubha arakorera obhujomu abhantu abhandi, na kya ego arajibhya abhantu abhandi kwa obhujibhu obhururu. Arajibhya bhanú bhaanga okumwikirirya, na arakukorera obhujomu uuwe, nyoore oragendererya okwikirirya obhujomu bhwaye. Nawe, nyoore oratiga okumwikirirya, uuwe wonse origeejwa. 23Nyoore Abhaisiraeri bhayo bhariihunjura na okumwikirirya Waryubha, bharihambirirwa kweki kumujeituni gwabho, kwa okubha Waryubha yaana obhuturo bhwa okubhahambirira kweki. 24Uuwe unú otaringi Omwisiraeri, uuwe n-kya erisagi rya omujeituni gwa mwisisi. Waageejwa na okuhambirirwa kumujeituni gunú gwahambwa na abhantu, onyoora kiyo n-kintu ekigeni okukoreka. Bhoono, omanye ega, gutaringi omurimu omukongʼu ku Waryubha okuhunjukira okuhambirira Abhaisiraeri bhanú bharingi kya amasagi ga emijeituni, kumuti gwabho guyo.
Waryubha araabhira abhantu bhonsego
25Abhahiiri bhaani kuimani, ndeenda mumanye eguru ya ekinyerera kya Waryubha kinú akare kyaringa kiibhisiri, naho mutariija okwirora muuna obhungʼeeni bhukongʼu. Mumanye ega, m-Baisiraeri nyabhurebhe mbo bhaaringa na emitima emikongʼu, nawe, n-kuhikira eribhaga rinú Waryubha ariikirirya endengo yonsego ya abhantu bhanú bhataringi Abhaisiraeri okunyoora obhutuurya. 26Kwa enjira iyo, ekyaro kyonsego kya Isiraeri kirituuribhwa. N-kya ego Waryubha yaagamba mu Mangʼoore Amarabhu ega,
“Omutuurya ariija okurwa Sayuni,
arikora abheebhurwa bha Yakobho bhatige okumwanga Waryubha.
27Rinu ndyo eriragano rinú ndikora nabho,
hanú ndibhaabhira obhusarya bhwabho.”#11:26-27 Maaha mubhitabho bhya Isaaya 27:9, 59:20-21; Jeremia 31:33-34.
28Hanú Abhaisiraeri bhaaringa bharaanga Amangʼana Amajomu eguru ya Yeesu Kiristu, bheekora okubha abhasigu bha Waryubha. Nawe, eringʼana riyo, ribheeri kwa obhwera bhwenyu, bheenyu abhantu bhanú mutaringi Abhaisiraeri. Kora ego, Waryubha akyahanjiri Abhaisiraeri, kwa okubha yaaringa asoreri bhajaaji bhaabho, na okukora nabho eriragano. 29Waryubha akaasora abhantu bhaaye na okubhanonka, atakutura okwihunjura.#11:29 Maaha mukitabho kya Abharuumi 9:4-5.
30Akare, bheenyu mutaaringa muramwigwa Waryubha, nawe bhoono, munyooreri ekyabhira kya Waryubha, kwa okubha Abhaisiraeri bhataaringa bharamwigwa Waryubha. 31Egoego bhonse bhaajeema, naho kwa okwabhirwa kwenyu bhonse bhaabhirwe. 32Waryubha ngʼo yaatiga abhantu bhonsego bhagendererye okwanga okumwigwa na okubhohwa mubhusarya bhwabho, naho abhamaahire ekyabhira abhantu bhayo bhonsego.
Waryubha agungibhwe
33Niwi unú aratura okumanya kya ego bhuringi obhuniibhi, egintungwa na obhumanyi bhwa Waryubha? Bhiragendererya okwanga okumanyikana kubheetu! Atariho omuntu unú aratura okumanya obhwamuri bhwaye, kasi okugigamba eginjira gyaye. 34N-kya ego Amangʼoore Amarabhu garagamba ega,
“Niwi unú amanyiri ganú Omukuru Waryubha areeganirirya?
Niwi unú aramutongera?”#11:34 Maaha mukitabho kya Isaaya 40:13.
35“Niwi unú yaamukopesya Waryubha ekintu
kinú areenderwa okuhunjukya?”#11:35 Maaha mukitabho kya Ayubhu 41:11.
36Waryubha ngʼo yaabhumba ebhintu bhyonsego.
Nu-kuhitira kumwene ega, ebhintu bhyonsego bhiragendererya okubha-ho,
na ebhintu bhyonsego bhiriho kurusumo rwa obhukuru bhwaye.
Waryubha agungibhwe koko! Amina.
Právě zvoleno:
Abharuumi 11: Kabwa
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.