Amakorwa ga Abhatumwa 2
2
Okuuja kwa Omutima Omurabhu orusiku rwa Epentekosite
1Orusiku rwa enyangi ya Epentekosite#2:1 Epentekosite. N-dusiku rwa mirongo etaanu okurwa kunyangi ya Epasaka na emikaate ginú gitakutuurwa-mo ekimera. Kweki rwaringa orusiku rwa enyangi ya erigesa. hanú rwahika, abheekirirya bhonsego bha Yeesu, bhaaringa bheekumeenʼye munyumba eimwi. 2Rumwigo, bhakeegwa eriisi rirahirira kya omuyaga omuhaari, okurwa murwire. Eriisi riyo, rikeejura munyumba yonsego munú bhaaringa bheekeeri. 3Nho ebhintu kya egindimi gya omururo, bhikabheebhukira. Ebhintu bhiyo, bhikataana, bhikeetuuma eguru ya kira oumwi waabho. 4Bhonsego bhakeejuribhwa Omutima Omurabhu, bhakaamba okuhaira kira omuntu kwa ekigambo ekindi kinú kitaringi ekyaye, kya ego Omutima Omurabhu uyo, yaabhoorokereryanga.
5Mbe, Yerusaremu hayo, bhaaringa-ho Abhayahudi bhanú bhaamusuukanga Waryubha. Abhayahudi bhayo, bhaaringa bharwiri mubhyaro bhyonsego.#2:5 Abhayahudi bhayo, bhaaringa bharwiri mubhyaro bhyonsego. Kwibhaga riyo, Abhayahudi abhaaru bhaaringa bhanyarageeni mubhyaro ebhindi. 6Hanú bheegwa eriisi rya amangʼana gayo, omuganda omunene gwa abhantu bhakeekumanʼya hamwi. Bhonsego bhakaheema bhukongʼu, kwa okubha kira oumwi waabho yeegwa ekigambo kyaye kiragambwa na abheekirirya bha Yeesu bharya. 7Eribhaga bhaaringa bhakyaruguura na okuheema, bhakabhuuranʼya ega, “Mwigwe! Abhantu bhanu bhonsego, bhataringi bha Gariraaya? 8Bhoono erabha egaki, bheetu bhonsego turabheegwa bharahaira ebhigambo bhyetu bhya obhusimuka? 9Na gati yeetu, bhariho abhantu okurwa mubhyaro bhya Pariti, Medi, Eramu. Na abhandi okurwa mubhyaro bhya Mesopotamia, Yudea, Kapadokia, Ponto, na Asia,#2:9 Asia. Eriina rinu ensonga yaaye niiga, ekyaro kya Asia kubhutungi bhwa Ekiruumi. Bhoonwego ekyaro kiyo kirabhirikirwa Bhuturuki. 10Furigia, Pamufiria, na Misiri. Na abhandi okurwa mbaara gya mukyaro kya Ribhia, ginú giringi haangʼi na omugi gwa Kirene. Abhandi bharwiri mumugi gwa Ruumi. Gati yaabho bhariho Abhayahudi, na abhandi bhanú bhaasoha mudini ya Abhayahudi. 11Abhandi m-Bakirete, na abhandi m-Baarabhu. Nawe, bheetu bhonsego, turabheegwa bharamugungya Waryubha kwa ebhika bhyaye ebhikuru, mubhigambo bhyetu!”
12Abhantu bhonsego, bhakabha bharabhaabhahira bhukongʼu na bhataamanya ega, niki kyaringa kirakoreka. Bhakabha bharabhuuranʼya ega, “Ensonga ya ganu niki?” 13Nawe, abhandi gati yaabho, bhakabhaseka abheekirirya bhayo, bharagamba ega, “Bhareherwe edivai!”
Petero areehigirya abhantu orusiku rwa Epentekosite
14Nho, Petero akeemirira hamwi na abhatumwa abharikyaye ekumi na umwi bharya. Akakeerya omuganda gwa abhantu bhayo, kwa eriisi erinene ega, “Bheenyu Abhayahudi bha Yerusaremu hanu, na bheenyu Abhayahudi bha okurwa mubhyaro ebhindi, munyitegeerere bhujomu, mbatondere! 15Abhantu bhanu bhatareherwe, kya ego muramanya. Kukyari nyenkyo bhukongʼu, ni-nsa esatu bhoonwego! 16Nawe, amangʼana gayo, ngo garya, Waryubha yaagamba okuhitira kumurooti waaye Joeri, ega,
17‘Kuginsiku gya obhuteero,
ndiituumya Omutima Omurabhu waani eguru ya abhantu bhonsego.
Abhamura na abhahara bheenyu bhariruusya obhurooti,
abhaana bheenyu bharirora obhurori,
na abhakaruka bhariroota ebhirooto.
18Kuginsiku giyo, ndiituumya Omutima Omurabhu waani,
kora kubhagaya bhaani, bha ekisaaja na bha ekikari,
bhonsego bhariruusya obhurooti.
19Ndikora ebhiruguuryo, eguru murwire,
na ebhimanyiiriryo mukyaro munu.
Abhantu bharirora ebhimanyiiriryo bhya amanyinga, omururo,
na ekime kya engesi.
20Eryubha ririihunjura okubha ekisunte,
na omweri guribha omukangaaru ka kya amanyinga.
Gayo gonsego, garikangata okukoreka mbere,
orusiku orunene na orwa obhukuru rwa Omukuru Waryubha rukyari.
21Eribhaga riyo, kira omuntu unú arasabha kwa okwisigira eriina rya Omukuru, arituuribhwa.’#2:17-21 Maaha mukitabho kya Joeri 2:28-32.”
22Petero akagendererya okugamba ega, “Bheenyu abhantu bha Isiraeri, mwitegeerere! Waryubha omwene yaabhoorokya ega, arakora emirimu okuhitira ku Yeesu wa Najareeti. Yaakoranga ego, kwa enjira ya ebhika, ebhiruguuryo, na ebhimanyiiriryo ebhyaru bhinú yaakoranga gati yeenyu. Bheenyu abheene mumanyiri gayo gonsego. 23Yeesu unu yaatuurwa mumabhoko geenyu, kya ego Waryubha omwene yaaringa yaamwiri okurwa kubhwambiro. Na bheenyu mukamwitira kumusarabha, kwa enjira ya abhantu abhasarya.#2:23 Abhantu abhasarya. Ensonga eindi eratura okubha ega, abhantu bhanú bhataringi Abhayahudi. 24Nawe, Waryubha yaamuhyukya okurwa mubhaku, yaamuruusya mubhururu bhwa oruku, kwa okubha, etakaaturikeeni oruku rumubhohe! 25Kora omukama Daudi, yaaruusya obhurooti eguru ya Yeesu ega,
‘Naaringa ndamurora Omukuru Waryubha embere waani, eribhaga ryonsego.
Na kwa okubha aringi orubhaara rwani rwa obhuryo, ntarisingisibhwa.
26Kwa ego, omutima gwani guuna obhujomerwa bhukongʼu,
kweki orurimi rwani rurakiririrya.
Kora omubhiri gwani, guriganyirira obhuhoru,
27kwa okubha uuwe Omukuru Waryubha, otarintiga mukyaro kya abhaku.#2:27 Mukyaro kya abhaku. Ekiyunani kiragamba ega, kujimu.
Otariikirirya omubhiri gwani, oni omugaya waaho omurabhu wa omutima, gugundire eyo.
28Uuwe omariri okunyorokya eginjira gya obhuhoru.
Oringʼaana obhujomerwa bhukongʼu, kwa okubha oringi haangʼi na oni.’#2:25-28 Maaha mukitabho kya Egijabhuri 16:8-11.”
29Petero akagendererya okugamba ega, “Abhahiiri bhaani, ndeenderwa okubhakeerya kwa obhwisige eguru ya jaaji weetu omukama Daudi. Weeki yaakwa na okubhiikwa, na embihira yaaye ekyari hanu, nawanyareero. 30Nawe, kwa okubha Daudi yaaringa omurooti, yaaringa amanyiri ega, Waryubha yaamuraga kwa okuteena ega, arimukora omuntu oumwi okurwa murwibhuro rwaye, okubha omutungi wa obhukama bhwaye. 31Daudi yaarora amangʼana ganú gariibhuka, yaagamba eguru ya obhuhyuki bhwa Kiristu Omutuurya#2:31a Kiristu Omutuurya. Ekiyunani kiragamba ega, Kiristu. Ensonga ya eringʼana rinu niiga, m-muntu unú yaasorwa na Waryubha okutuurya abhantu okurwa munyanko. Maaha Kiristu mu Moonjooro eguru ya Amangʼana Amakongʼu. ega, weeki ataatigwa mukyaro kya abhaku na omubhiri gwaye gutaagunda.#2:31b Maaha mukitabho kya Egijabhuri 16:10. 32Yeesu uyo, Waryubha yaamuhyukya okurwa mubhaku, na bheetu bhonsego m-beemiririri bha eringʼana riyo. 33Waryubha yaamwinura na okumuhaana obhukuru, bhoono yeekeeri orubhaara rwa obhuryo rwa Waryubha Esewaabho. Waryubha, yaamuhumirira Omutima Omurabhu waaye, kurusumo rwetu, kya ego yaaringa amuragiri. Ego, Yeesu wonse yaatuhumirira Omutima waaye Omurabhu uyo, kya ego murarora na okwigwa bhoonwego. 34Daudi omwene ataariina na okusoha murwire, nawe, yaagamba ega,
‘Omukuru Waryubha yaamukeerya Omukuru waani#2:34 Omukuru waani. Hanu erahairira Masiha, yaani Kiristu Omutuurya. Maaha Kiristu mu Moonjooro eguru ya Amangʼana Amakongʼu. ega,
“Ikara orubhaara rwani rwa obhuryo,
35okuhikira hanú ndituura abhasigu bhaaho hansi ya amaguru gaaho,
bhabhe kya ekitumbi kyaho kya okutaja-ko amaguru.”’#2:34-35 Maaha mukitabho kya Egijabhuri 110:1.”
36Petero akamariisya kwa okugamba ega, “Kwa ego, Abhaisiraeri bhonsego, mumanye obhuheene ega, Waryubha yaamukora Yeesu okubha Omukuru na Kiristu Omutuurya. Nawe, bheenyu mweeta uyouyo, kwa okumubhamba kumusarabha!”
37Mbe, abhantu bhayo, hanú bheegwa amangʼana gayo, bhakabhaabhahira bhukongʼu. Kimwi, bhakamubhuurya Petero na abhatumwa abhandi ega, “Abhahiiri bheetu, bhoono tukore egaki?” 38Petero akabhakeerya ega, “Kira oumwi weenyu atige obhusarya bhwaye, amwihunjurire Waryubha, na abhatiijwe kwa eriina rya Yeesu Kiristu, naho yaabhirwe obhusarya, na arihaanwa Omutima Omurabhu. 39Mumanye ega, endago inú Waryubha yaaturaga, yaaringa kurusumo rwenyu, orwibhuro rwenyu, na abhantu abhandi bhanú bharingi ahare. Ensonga yaaye niiga, bhonsego bhanú Omukuru Waryubha weetu, aribhabhirikira.”
40Petero akagendererya okubhakeerya amangʼana agandi amaaru ga okubhakemera, enu arabhakomererya ega, “Mumusabhe Waryubha abhatuurye okurwa kurwibhuro orubhiibhi runu, naho atariija okubhabhuturira ekiina!” 41Orusiku ruyo, abhantu muna ebhiku bhisatu bhakageekirirya amangʼana ganú Petero yaabhakeerya, bhakabhatiijwa. Kimwi, bhakoongeribhwa mumuganda gwa abheekirirya bha Yeesu. 42Abheekirirya bhonsego, bhaaguma okwihigira okurwa kubhatumwa bha Yeesu. Bhaagwatana ekigwatani, bhaabhanga bharasuunura omukaate hamwi,#2:42 Bhaabhanga bharasuunura omukaate hamwi. Ryakorekanga eribhaga rya Emeja ya Omukuru. Bhaahaanananga bhararya bhonsego kurusumo rwa okumuhiituka Omukuru Yeesu. na bhaabhanga bharasabha hamwi.
Obhumwi bhwa abheekirirya bha Yeesu
43Abhatumwa bhayo, bhaaringa bharakora ebhimanyiiriryo na ebhiruguuryo ebhyaru. Kora kira omuntu yaagwatwanga na obhoobha. 44Mbe, abheekirirya bhonsego bhaabhanga na obhumwi, bhaagabhananga ebhintu bhyabho. 45Bhaaringa bharagurya ebhintu bhyabho, na egimbirya ginú bhaanyooranga, bhaagigabhanʼyanga, okuringʼaana na kya ego kira oumwi yeendanga. 46Kira orusiku bhaasikananga murubhanja rwa erisyengerero erikuru rya Waryubha.#2:46 Erisyengerero erikuru rya Waryubha. Maaha eringʼana rinu mu Moonjooro eguru ya Amangʼana Amakongʼu. Nawe, eribhaga rya okusuunura omukaate, bhaasikananga muginyumba gyabho, bhararya hamwi kwa obhujomerwa na omutima gwa obhuserenʼya, 47bhaamutogoonʼyanga Waryubha, bhakahanjwa na abhantu bhonsego. Na kira orusiku, Omukuru Yeesu yaaringa aroongerya abhantu bhanú bhaamwikiriryanga kwa okubhatuurya.
Právě zvoleno:
Amakorwa ga Abhatumwa 2: Kabwa
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.