Amakorwa ga Abhatumwa 21
21
Orugendo rwa Pauro okugya Yerusaremu
1Hanú twamara okuragana na abhakangati bha erikanisa rya Efeso bhayo, tukariina mubhwato, tukagya kimwikimwi tukahika kwiginga rinú ryabhirikirwanga Kosi. Hanú bhwakya, tukagya kwiginga rinú ryabhirikirwanga Rodo. Okurwa hayo, tukagya kweki tukahika mumugi gwa Patara. 2Hayo, tukanyoora obhwato obhundi bhunú bhwambukanga okugya mukyaro kya Foinike. Tukariina-mo tukagya nabho. 3Hanú twahika ahasi hanú twaringa turarora eriginga rya Kipuro, tukahita orubhaara rwa taragweta, tukagendererya tukahika mukyaro kya Siria. Hanú twahika mumugi gwa Tiro, tukeeka mubhwato bhuyo, kwa okubha, hayo nho bheetuumiryanga emijigo.
4Eyo, tukanyoorana na abheekirirya bha eyo, tukeekara nabho eginsiku muhungati. Abheekirirya bhayo, bhakoorokereribhwa na Omutima Omurabhu#21:4a Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. bhakamukeerya Pauro ega, atagya mumugi gwa Yerusaremu.#21:4b Yerusaremu. Maaha eringʼana rinu mu Moonjooro eguru ya Amangʼana Amakongʼu. 5Hanú eginsiku gyetu gya okubha hayo gyahwa, tukeemuka okugendererya na orugendo rwetu. Abheekirirya bhonsego bha hayo, abhasaaja hamwi na bhamukaabho na abhaana bhaabho, bhakatuheregesya okuhikira kibhara wa omugi guyo. Tukatema ebhiru kumurambo hayo, tukamusabha Waryubha. 6Kimwi tukaragana, tukariina mubhwato bhuyo, bheeki bhakahunjuka iika.
7Tukagendererya na orugendo rwetu okurwa Tiro hayo, tukahika mumugi gwa Toremai. Tukabhakeeranʼya abheekirirya bha hayo, tukeekara nabho orusiku rumwi. 8Ejo wendeko, tukagya okuhikira mumugi gwa Kaisaria. Tukeekara munyumba ya Firipo, unú yaaringa omuraariki wa Amangʼana Amajomu eguru ya Yeesu. Na weeki yaaringa oumwi wa abhabheeri muhungati bha emirimu, bhanú bhaaringa bhasorerwe Yerusaremu erya. 9Firipo uyo, yaaringa na abhahara bhane, bhanú bhaaringa bhataratetwa na bhaaringa na obhuturo bhwa okuroota.
10Hanú twaringa twikeeri eginsiku nyabhurebhe Kaisaria hayo, yaaja-ho omurooti umwi, okurwa mukyaro kya Yudea. Omurooti uyo, yaabhirikirwanga Agabho.#21:10 Maaha mukitabho kya Amakorwa ga Abhatumwa 11:27-28. 11Agabho uyo, akatuujira akagega omuchipi gwa Pauro, akeebhoha kumaguru na kumabhoko gaaye omwene. Kimwi akagamba ega, “Omutima Omurabhu agambiri ega, ‘Ego niigo Abhayahudi bharimubhoha omwene omuchipi gunu Yerusaremu eyo, na okumugwatya kubhantu bhanú bhataringi Abhayahudi.’”
12Mbe, hanú tweegwa ego, bheetu hamwi na abheekirirya bha hayo, tukamukomererya Pauro bhukongʼu ega, atariina okugya mumugi gwa Yerusaremu. 13Nawe, Pauro akatukyukya ega, “Ndasabha mutige okunkuurira na okunyita omutima. Oni niseemerye okubhohwa kora okukwira Yerusaremu hayo, kurusumo rwa Omukuru Yeesu.” 14Hanú twarora atakwigwa obhutongeri bhwetu, tukakira, turagamba ega, “Obhwendi bhwa Omukuru bhukoreke.”
15Amangʼana gayo hanú gaahwa, tukeeseemya, tukariina okugya Yerusaremu. 16Abheekirirya abhandi bha Kaisaria hayo, bhakasoorana na bheetu, bhakagega na Omunasoni unú twagyanga okwikara owaaye. Omunasoni uyo yaaringa omuntu wa kwiginga rya Kipuro, na yaaringa oumwi wa abheekirirya bha okwamba.
Pauro arasoha Yerusaremu
17Hanú twahika Yerusaremu hayo, abheekirirya abharikyetu bhakatugenihya kwa obhujomerwa. 18Ejo wendeko, tukagya na Pauro okusikana na Yakobho. Na abhakangati bhonsego bha erikanisa bhaaringa-ho. 19Pauro akabhakeeranʼya, akamara akabhakeerya amangʼana gonsego, eringʼana rimwi rimwi, ganú Waryubha yaaringa akoreri emirimu kubhantu bhanú bhataringi Abhayahudi kwa okuhitira kumirimu gyaye.
20Hanú bheegwa amangʼana gayo, bhakamugungya Waryubha. Kimwi bhakamukeerya Pauro ega, “Omuhiiri weetu, orarora kya ego Abhayahudi ebhiku na ebhiku bhaamwikirirya Yeesu. Bhayo bhonsego, bhaana ekituunyo bhukongʼu okugwata amaragiriryo ga Musa. 21Nawe, bhakeeriibhwe eguru yaaho ega, oreehigirya Abhayahudi bhonsego bhanú bhamenyeri mubhyaro bhya abhantu bhanú bhataringi Abhayahudi, bhaange amaragiriryo gayo. Kweki ega, orabhakaanʼya bhatige okusaara abhaana bhaabho, kora bhatige okugwata egimiira gya Ekiyahudi. 22Bhoono tukore egaki? Maheene mbareegwe ega, oringi hanu. 23Kwa ego, okore eringʼana rinú turakukeerya. Gati yeetu hanu, bhariho abhasaaja abhane, bhanú bhariiri emuuma embere ya Waryubha. 24Ego, ogwatane nabho, wiraame hamwi nabho, obharihire bhamwegwe egintuukya gyabho. Kwa okukora ego, kira omuntu aramanya ega, amangʼana ganú bhaakeeribhwa eguru yaaho, gataringi ga obhuheene. Na kweki ega, uuwe oragwata amaragiriryo ga Musa. 25Nawe, kurubhaara rwa bhanú bhataringi Abhayahudi, bhanú bhaamwikirirya Yeesu, twabhangʼoorera eguru ya amangʼana ganú twaamura. Twaamura ega, bhatarya ebhyakurya bhinú bhimwenseerwe ebhisusano, bhatarya amanyinga, kora bhatarya enyama ya entugo inú ebhuutirwe, na bhatakora obhusimbe.”
26Nho ejo wendeko, Pauro akahira abhasaaja abhane bhayo, akeeraama hamwi na nabho. Akasoha mwisyengerero erikuru,#21:26a Mwisyengerero erikuru. Maaha Erisyengerero erikuru rya Waryubha mu Moonjooro eguru ya Amangʼana Amakongʼu. naho okuraarika orusiku runú okuraamwa kwabho kurihwa, na ekimwenso#21:26b Ekimwenso. Maaha eringʼana rinu mu Moonjooro eguru ya Amangʼana Amakongʼu. kikaaruusiibhwe eguru ya kira oumwi waabho.
Pauro aragwatwa
27Hanú eginsiku muhungati gya okuraamwa gyaringa haangʼi okuhwa, Abhayahudi abhandi okurwa mukyaro kya Asia, bhakamurora Pauro mwisyengerero rya Waryubha. Bhaasiigirirya omuganda gwa abhantu bhonsego, bhakamugwata. 28Bhakajiirira ega, “Bheenyu Abhaisiraeri abharikyetu, mutubheere-ko! Omuntu unu ngʼo urya, areehigirya abhantu bhonsego bha kira ahasi ega, bhabhenga bharatujeera na okujeera amaragiriryo ga Musa, kora na erisyengerero rinu. Okutiga gayo gonsego, yaasoherye Abhayunani mwisyengerero, kwa ego yaakonerye ahasi aharabhu hanu.” 29Bhaagamba ego, kwa okubha bhaaringa bhamuruuji Pauro mumugi, hamwi na Turofimo. Kwa ego, bhaakanya ega, Pauro yaaringa amusoherye mwisyengerero. Turofimo uyo, yaaringa omuntu wa Efeso.#21:29 Turofimo uyo, yaaringa omuntu wa Efeso. Eteenderwanga omuntu unú ataringi Omuyahudi okusoha mwisyengerero erikuru rya Waryubha. Turofimo uyo, ataaringa Omuyahudi.
30Kwa ego, omugi gwa Yerusaremu gonsego gukeejura eriihe. Abhantu bhakaaja bharakenya okurwa mbaara gyonsego, bhakamugwata Pauro. Kimwi bhakamungʼuura okurwa mwisyengerero muyo. Rumwigo, ebhiseku bhya erisyengerero bhikasiikwa. 31Na hanú bhaaringa bhareenda okumwita, amangʼana gakamuhikiira Omukuru wa abhasirikare bha Ekiruumi ega, omugi gwa Yerusaremu gonsego gwijwiri eriihe. 32Rumwigo, akagega abhasirikare bhaaye, hamwi na abhakuru abhandi bha abhasirikare, bhakahiringita nkenyo okugya kwiihe eyo. Abhantu bharya bhaakoranga eriihe hanú bhaamurora omukuru uyo na abhasirikare bharaaja, bhakatiga okumutema Pauro.
33Kimwi omukuru uyo, akasuntara akamugwata Pauro, akaamura ega, abhohwe na eminyororo ebhiri. Akamara akabhuurya ega, “Unu niwi? Na akoreri-ki?” 34Rumwigo, abhantu abhandi gati ya omuganda gurya, bhakajiirira bhukongʼu, abhandi bharagamba rinu, abhandi rirya. Omukuru uyo, akarora ega, atakutura okumanya obhuheene bhwa kinú kibheeri, akaamura ega, Pauro ahirwe munkambi ya abhasirikare. 35Pauro hanú yaahika kungaji, abhasirikare bhakamugegera eguru, kwa okubha eriihe rya abhantu bharya, ryaringa ryaruhiri bhukongʼu. 36Omuganda gurya gwamuseetanga, gukagendererya okujiirira ega, “Omwite uyo!”
Pauro areebhagirira embere ya Abhayahudi
37Pauro hanú yeendanga okusohibhwa munkambi ya abhasirikare muyo, akakeerya omukuru uyo ega, “Ndatura okukukeerya eringʼana rimwi?” Kimwi omukuru uyo, akamukyukya ega, “Wonse omanyiri Ekiyunani! 38Uuwe otaringi Omumisiri unú kuginsiku gya bhwangu hanú yeebhukya eriihe, na okoorokererya abheeti ebhiku ebhina, okugya kukibhara?”
39Pauro akamukyukya ega, “Oni m-Muyahudi, omwibhurwa wa omugi gwa Tarso mukyaro kya Kirikia. Omugi guyo gumanyikeeni bhukongʼu. Ndakusabha unyikiririrye ngambe na abhantu bhanu.” 40Mbe, omukuru uyo akamwikiririrya, Pauro akeemirira kungaji, akabhanungira abhantu bhayo okubhoko, naho bhakire. Bhonsego bhakakira, Pauro akahaira nabho, kwa ekigambo kyabho kya Ekiebhurania. Akagamba ega,
Právě zvoleno:
Amakorwa ga Abhatumwa 21: Kabwa
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.