Amakorwa ga Abhatumwa 18
18
Pauro mumugi gwa Korinto
1Amangʼana gayo hanú gaahwa, Pauro akarwa Atene hayo, akagya mumugi gwa Korinto. 2Eyo, akasikana na Omuyahudi umwi. Omuyahudi uyo, yaabhirikirwanga, Akira, omumenyi wa mukyaro kya Ponto. Akira uyo, hamwi na omukari waaye Pirisikira, bhaaringa bharwiri mumugi gwa Ruumi, mukyaro kya Itaaria kuginsiku giyogiyo. Bhaarwa eyo, kwa okubha Kaisari Kiraudio, yaaringa yaamwiri ega, Abhayahudi bhonsego, bharwe mumugi guyo. Ego, Pauro akabhakeeranʼya Akira na omukari waaye Pirisikira. 3Na kwa okubha Pauro yaaringa arakora emirimu gya okutuma amabhuru kya abheene, akeekara owaabho, bhakabha bharakora emirimu hamwi. 4Kira orusiku rwa Esabhato, Pauro yaasohanga mwisinagogi rya Abhayahudi, akabha arahaira nabho eguru ya Yeesu. Yaaringa arasakya okubharuta Abhayahudi na Abhayunani, naho bhonse bhamwikirirye.
5Siira na Timoteo hanú bhaahika hayo, okurwa Makedonia, Pauro akaamba okuruusya eribhaga ryaye ryonsego, okwihigirya eringʼana rya Waryubha ku Bhayahudi, akabhakomererya ega, Yeesu ngʼo Kiristu Omutuurya. 6Nawe, Abhayahudi bhayo, bhakaamba okumuhakaanʼya na okumutuka. Weeki akabhakungʼuntira emyenda gyaye, okoorokya ega, areeyahura nabho, enu arabhakeerya ega, “Amanyinga geenyu, garibha eguru yeenyu abheene! Oni ekiina kyani n-kirabhu, mmariri okukora agaani ganú ndeenderwa okukora. Okwambira bhoonwego, ndagya kubhantu bhanú bhataringi Abhayahudi.”
7Kimwi Pauro akarwa mwisinagogi riyo, akasoha munyumba ya omuntu umwi. Omuntu uyo, yaabhirikirwanga Tiito Yusito, na yaaringa Omuyunani unú aramwigwa Waryubha. Enyumba yaaye yaaringa haangʼi na erisinagogi riyo. 8Kora omukuru wa erisinagogi riyo, eriina ryaye Kirisipo, wonse akamwikirirya Omukuru Yeesu, hamwi na abhantu bhonsego bha iika owaaye. Abhakorinto abhandi abhaaru bhanú bheegwa amangʼana ga Pauro, bhakamwikirirya Yeesu, bhakabhatiijwa.
9Orusiku rumwi obhutiku, Omukuru Yeesu akamukeerya Pauro mubhurori ega, “Otoobhoha, gendererya okwihigirya otakira. 10Oni ndingi hamwi na uuwe, kora atariho omuntu unú araakukuunʼye, naho akunyahaare. Niina abhantu abhaaru mumugi gunu, bhanú bhaakanyihunjurire.” 11Kwa ego, Pauro akeekara Korinto eyo, eribhaga rya omwaka gumwi na etuugati, areehigirya abhantu eringʼana rya Waryubha.
12Eribhaga Gario yaaringa omwanangwa wa ekyaro kya Akaya, Abhayahudi bhonsego hamwi, bhakamugwata Pauro. Bhakamuhira embere ya abhabhuturi bha ekiina bha amaragiriryo, 13bhakamujongera ega, “Omuntu unu, arangʼeenererya abhantu bhamusyengere Waryubha kwa enjira inú etakwenderwa mumaragiriryo geetu.”
14Pauro hanú yeenda okugamba, Gario akabhakeerya Abhayahudi bhayo ega, “Bheenyu Abhayahudi, nyoore mukaamujongeeri omuntu unu kwa okukora obhusarya bhwa okukyuka amaragiriryo, nho nkaabheetegeereeri. 15Nawe, kwa okubha nihaka eguru ya amangʼana ageenego, amariina, na amaragiriryo geenyu, mwamure bheenyu abheene. Oni ntakubha omubhuturi wa ekiina wa amangʼana gayo.” 16Kimwi Gario akabhakenyia embere ya abhabhuturi bha ekiina bhayo. 17Nho bhonsego, bhakamugwata Sositene. Sositene uyo, ngʼo yaaringa omukuru wa erisinagogi, bhakamutemera hayohayo embere ya abhatungi bha omugi. Nawe, gayo bhaakora, Gario yaagajeera.
Pauro arahunjuka mumugi gwa Antiokia mukyaro kya Siria
18Pauro akoongerya eginsiku egindi eginjaru mumugi gwa Korinto. Hanú yaamara, akaraga abheekirirya abharikyaye bha hayo, akagya mumugi gwa Kenkirea, akakasa omutwe gwaye kya ego yaaringa ariiri emuuma.#18:18 Akakasa omutwe gwaye kya ego yaaringa ariiri emuuma. Abhayahudi hanú bhaamaranga okukora amangʼana ganú bhaaryanga emuuma ku Waryubha, bhaakasanga emitwe gyabho, naho okoorokya ega, emuuma iyo ehweri. Kimwi weeki hamwi na Pirisikira na Akira, bhakariina mubhwato, bhakaamba orugendo okugya mukyaro kya Siria. 19Hanú bhaahika mumugi gwa Efeso, Pauro akabhatiga eyo Pirisikira na Akira. Weeki akasoha mwisinagogi akahaira na Abhayahudi. 20Abhayahudi bhayo, bhakamusabha Pauro yoongerye eginsiku egindi gya okubha nabho hayo, nawe ateekirirya. 21Hanú yaabharaga, akabhakeerya ega, “Hanú Waryubha arihanja, ndihunjuka kweki.” Kimwi akarwa Efeso hayo kwa obhwato.
22Pauro hanú yaahika mumugi gwa Kaisaria, akariina mumugi gwa Yerusaremu, okukeeranʼya abhantu bha erikanisa rya eyo. Akamara akahiringitira mumugi gwa Antiokia. 23Hanú yaaringa amariri eginsiku nkego, akarwa hayo, akabha arahitira mubhyaro bhya Garatia na Furigia, yaaringa arabhakongʼya abheekirirya bhonsego.
Emirimu gya Apooro mumugi gwa Efeso
24Kwibhaga riyo, Omuyahudi umwi yaahika mumugi gwa Efeso. Omuyahudi uyo, yaabhirikirwanga Apooro, omwibhurwa wa mumugi gwa Arekisandiria. Apooro uyo, yaaringa na obhuturo obhunene bhwa okuhaira na okumanya Amangʼoore Amarabhu. 25Omuntu uyo, yaaringa yeehigiriibhwe Enjira ya Omukuru Yeesu. Na kwa okubha omutima gwaye gwaringa gurooka, akaamba okugamba na okwihigirya kwa obhuheene amangʼana eguru ya Yeesu. Nawe, kurubhaara rwa obhubhatiijo, yaaringa amanyiri eguru ya obhubhatiijo bhwa Yoana obhwenego. 26Apooro akasoha mwisinagogi rya Abhayahudi, akaamba okwihigirya abhantu kwa ekituunyo bhukongʼu. Pirisikira na Akira, hanú bhaamwigwa areehigirya, bhakamugega, bhakamoonjoorera enjira ya Waryubha kwa obhuheene bhukongʼu.
27Eribhaga erindi, Apooro akeenda okugya mukyaro kya Akaya. Abheekirirya abharikyaye bhakamwikiririrya, bhakangʼoorera abheekirirya abharikyabho bha eyo enyarubha ega, bhamugenihye bhujomu. Hanú yaahika eyo, akabha arabhabheera bhukongʼu bhanú bhaaringa bhamwikiriirye Yeesu kwa eriruguto rya Waryubha. 28Apooro yaabhabheera kwa okubhahiga Abhayahudi, embere ya abhantu. Yaabhoorokya Abhayahudi bhayo, okurwa mu Mangʼoore Amarabhu ega, Yeesu ngʼo Kiristu Omutuurya.
Právě zvoleno:
Amakorwa ga Abhatumwa 18: Kabwa
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.