Amakorwa ga Abhatumwa 13
13
Bharinabha na Sauri bharahaanwa emirimugya okunyaraganʼya eringʼana rya Waryubha
1Mwikanisa rya mumugi gwa Antiokia bhaaringa-ho abharooti na abheehigirya. Abhantu bhayo m-banu, Bharinabha, Simeoni unú yaabhirikirwanga Nigeri,#13:1 Nigeri. Ensonga yaaye niiga, omuntu omumwamu. Rukio okurwa mumugi gwa Kirene, Manaeni unú yaaringa arererwe hamwi na omukama Herode Antipa, na oundi yaaringa Sauri. 2Hanú bhaaringa bharamusyengera Omukuru Waryubha na okwiyima okurya ebhyakurya, Omutima Omurabhu akabhakeerya ega, “Munsorere Bharinabha na Sauri kumirimu ginú mbabhirikiriri.” 3Mbe, hanú bhaamara okwiyima okurya ebhyakurya na okusabha Waryubha, bhakatuura amabhoko gaabho eguru ya Bharinabha na Sauri. Kimwi, bhakabheekiririrya bhagye.
Bharinabha na Sauri bharagenda Kipuro
4Bharinabha na Sauri bhaaringa bhatumirwe na Omutima Omurabhu, bhakagenda bhakahiringita okuhikira mumugi gwa Serukia. Okurwa hanu bhakeemuka na obhwato, bhakagenda kwiginga rya Kipuro. 5Hanú bhaahika kwiginga, mumugi gwa Sarami, bhakaamba okuraarikira abhantu eringʼana rya Waryubha mumasinagogi ga Abhayahudi. Kweki bhaaringa na Yoana Mariko, unú yaaringa omubheeri waabho.
6Hanú bhaamara okuhita mubhyaro bhyonsego bhya Kipuro, bhakahika mumugi gwa Pafo. Hanú bhaahika, bhakasikana na Omuyahudi umwi omurogi. Omuyahudi uyo, yaaringa omurooti wa obhubheehi, eriina ryaye yaabhirikirwanga Bhar-Yeesu. 7Omuntu uyo, yaaringa aramubheera omwanangwa Serugio Pauro, omutungi wa kwiginga kurya, omuntu wa egintungwa. Omwanangwa uyo, yaabhabhirikira Sauri na Bharinabha bhagye owaaye, kwa okubha yeendanga okwigwa amangʼana ga Waryubha. 8Nawe, omurogi Bhar-Yeesu, unú yaaringa arabhirikirwa Erima mu Kiyunani, akahakaananʼya nabho, yaaringa areenda okumukora omwanangwa atige okumwikirirya Yeesu.
9Nho, Sauri, unú yaabhirikirwanga Pauro,#13:9 Sauri, unú yaabhirikirwanga Pauro. Sauri ni-riina rya Ekiebhurania, na ensonga yaaye niiga, unú yaasabhwa ku Waryubha. Eriina rya Pauro ryaringa rya Ekiruumi, na ensonga yaaye niiga, omuke. akabha yeejwiri Omutima Omurabhu, akamutunurira ameeso Erima omurogi, 10akamukeerya ega, “Uuwe omwana wa Erisambwa!#13:10 Erisambwa. Maaha eringʼana rinu mu Moonjooro eguru ya Amangʼana Amakongʼu. Uuwe omusigu wa gonsego ganú garingi ga obhuheene embere ya Waryubha! Wijwiri obhungʼeenererya na obhukorokombanʼya, otaritiga okugihabhya eginjira gya Omukuru Waryubha ginú giimiri! 11Bhoono, itegeerera! Omukuru arikujibhya. Oribha omuhoku, otarimaaha obhurabhu bhwa eryubha kwa eribhaga.”
Rumwigo, ekitu na ekisunte bhikamuribha, akagya akataamataama, akatuna omuntu wa okumugwatirira okubhoko, naho amoorokye enjira.
12Omutungi wa kwiginga kurya hanú yaarora ganú geebhukiri, akamwikirirya Omukuru Yeesu. Kweki, akabha araruguura bhukongʼu ameehigiryo ganú yeegwiri eguru ya Omukuru Yeesu.
Pauro na Bharinabha mumugi gwa Antiokia ya Pisidia
13Nho, Pauro na abharikyaye bhakariina mubhwato bhakagenda orugendo okurwa Pafo, bhakahika mumugi gwa Perige mukyaro kya Pamufiria. Nawe, Yoana Mariko akabhatiga hayo, akahunjuka Yerusaremu. 14Okurwa Perige bhakagendererya okuhikira mumugi gwa Antiokia ya mukyaro kya Pisidia. Orusiku rwa Esabhato#13:14 Orusiku rwa Esabhato. Ku Bhayahudi n-dusiku rwa okumusyengera Waryubha na okumuunya. Maaha Esabhato mu Moonjooro eguru ya Amangʼana Amakongʼu. bhakasoha mwisinagogi, bhakeekara. 15Hanú bhaamara okusoma mubhitabho bhya amaragiriryo ga Musa na mubhitabho bhya abharooti, abhakuru bha mwisinagogi riyo, bhakabhatumira amangʼana ega, “Abhahiiri bheetu, nyoore muuna eringʼana rya okubhateremya abhantu bhanu, turasabha murigambe.”
16Pauro akeemirira, akabhanungira okubhoko na okugamba ega, “Bheenyu Abhaisiraeri abharikyani, na bheenyu bhonsego bhanú muramwigwa Waryubha, munyitegeerere! 17Waryubha wa abhantu bha Isiraeri ngʼo yaabhasora bhajaaji weetu. Kwibhaga rinú bhaaringa bhareekara kya abhageni mukyaro kya Misiri eyo, yaabhakora okubha erikabhira erinene bhukongʼu. Kwa obhuturo obhwaru akabhoorokererya na okubharuusya mukyaro kirya. 18Kwa eribhaga rya emyaka mirongo ena akabheekongʼererya amakorwa gaabho hanú bhaaringa kukibhara. 19Wonse eribhaga rya okugasikya amakabhira muhungati ganú gaaringa gamenyeri mukyaro kya Kanaani, akahaana Abhaisiraeri ekyaro kiyo, kibhe engabho yaabho. 20Amangʼana gayo gonsego gaagega eribhaga rya emyaka magana gane na mirongo etaanu (450) ego.
“Eribhaga rya amangʼana gayo, Waryubha akabhahaana abhabhuturi bha ekiina okutunga abhantu, okuhikira hanú ryahika eribhaga rya omurooti Samweri. 21Nho, abhantu bhakasabha ega, bhahaanwe omukama. Waryubha wonse akabhahaana Sauri, omwana wa Kishi, wa erikabhira rya Bhenjamini. Wonse akabha omukama wa emyaka mirongo ena. 22Hanú Waryubha yaamuruusya Sauri kubhukama, akamwimirirya Daudi#13:22a Daudi. Maaha eringʼana rinu mu Moonjooro eguru ya Amangʼana Amakongʼu. okubha omukama waabho. Waryubha akagamba eguru yaaye ega, ‘Mmuruuji Daudi omwana wa Yeese. Unu aranjomera omutima gwani, araakunaanʼye obhwendi bhwani bhonsego.’#13:22b Maaha mubhitabho bhya Egijabhuri 89:20; 1 Samweri 13:14.
23“Okurwa muhamati ya Daudi mmo, Waryubha abhareeteeri Abhaisiraeri Omutuurya Yeesu, kya ego yaabharaga. 24Eribhaga Yeesu yaaringa akyari okwamba emirimu gyaye, Yoana Omubhatiiji yaaringa abhanyaraganiirye abhantu bhonsego bha Isiraeri ega, bhatige obhusarya bhwabho, bhamwihunjurire Waryubha, na bhabhatiijwe. 25Yoana hanú yaaringa aramariisya emirimu gyaye, yaagamba ega, ‘Bheenyu muramanya oni niwi? Oni ntaringi Kiristu Omutuurya#13:25a Kiristu Omutuurya. Maaha Kiristu mu Moonjooro eguru ya Amangʼana Amakongʼu. unú muraganyirira! Munyitegeerere! Weeki araaja enyuma waani. Ntakwenderwa kora okubha omugaya waaye, wa okusibhura egingoye gya eginkeeto gyaye!’#13:25b Okusibhura egingoye gya eginkeeto gyaye. Kuginsiku girya, nyoore omugeni arasoha munyumba, omugaya wa insi bhukongʼu yaaringa aramusibhura eginkeeto na okoogya amaguru gaaye.
26“Abhahiiri bhaani, abhantu bha oruganda rwa Abhurahamu,#13:26 Abhurahamu. Maaha eringʼana rinu mu Moonjooro eguru ya Amangʼana Amakongʼu. na bheenyu Abhayunani, bhanú muramwigwa Waryubha, amangʼana ga obhutuurya bhunu n-kurusumo rwetu! 27Abhamenyi bha Yerusaremu na abhatungi bhaabho, bhataaringa bhamanyiri ega, Yeesu ngʼo Omutuurya. Kora bhataamanya amangʼana ga abharooti ganú gaasomwanga kira orusiku rwa Esabhato. Bhaakunaanʼya amangʼana gayo kwa okumubhuturira ekiina Yeesu. 28Onyoora bhataanyoora ekisigo kyokyonse kya okumubhuturira ekiina okukwa, bhakamusabha Pirato yeekirirye, naho Yeesu yeetwe. 29Hanú bhaamara okukora amangʼana gonsego ganú gaangʼoorwa eguru yaaye, bhakamwituumya okurwa kumusarabha na okumubhiika mumbihira. 30Nawe, Waryubha akamuhyukya okurwa mubhaku. 31Yeesu wonse, kwa eginsiku eginjaru, akabha areebhukira abhantu bhanú bhaaringa bharagenda orugendo hamwi nawe, okurwa Gariraaya, okugya Yerusaremu. Bhoono, bhayo mbo bhabheeri abheemiririri bhaaye, kubhantu bha Isiraeri.
32“Bheetu turabhareetera Amangʼana Amajomu ganú Waryubha yaaraga bhajaaji weetu,#13:32 Maaha mukitabho kya Amakorwa ga Abhatumwa 13:23. 33bhoono agahikirye kubheetu, abhaana bhaabho, kwa okumuhyukya Yeesu. Eringʼana riyo n-kya ego ryangʼoorwa mu Jabhuri eya kabhiri ega,
‘Uuwe m-Mwana waani,
oni reero mbeeri Eseweenyu.’#13:33 Maaha mukitabho kya Egijabhuri 2:7.
34Kweki Waryubha yaamuhyukya Yeesu okurwa mubhaku, naho atagunda kweki. Eguru ya riyo, Waryubha yaagamba ega,
‘Ndibhahaana bheenyu eginonkwe gya obhuheene,
ginú naamuraga Daudi.’#13:34 Maaha mukitabho kya Isaaya 55:3.
35Kya ego yaagambwa mu Jabhuri eindi ega,
‘Otaritiga omubhiri gwa omugaya omurabhu wa omutima waaho gugunde.’#13:35 Maaha mukitabho kya Egijabhuri 16:10.”
36Pauro akagendererya okugamba ega, “Eribhaga Daudi yaahikya amangʼana gonsego ganú Waryubha yaaringa amuragiriirye akore kwibhaga rya orwibhuro ryaye, akakwa, akabhiikwa haangʼi na bhajaaji waabho, omubhiri gwaye gukagunda. 37Nawe, urya Waryubha yaamuhyukya okurwa mubhaku, ataagunda.
38“Kwa ego abhahiiri bhaani, ndeenda bheenyu mumanye ega, kwa okuhitira ku Yeesu, okwabhirwa kwa obhusarya kuraraarikwa kubheenyu. 39Kwa okuhitira weeki, kira omuntu unú aramwikirirya Yeesu, arabharirwa obhuheene. Eringʼana rinu ritakuturika kwa okugwata amaragiriryo ga Musa. 40Kwa ego mwiyangararire, gatabhanyoora amangʼana ganú gaagambwa na abharooti, ega,
41‘Mwiyangararire, bheenyu bhanú murajeera!
Muruguure, muraasike,
kwa okubha ndakora eringʼana eribhaga ryenyu,
rinú mutariikirirya, kora omuntu hanú aribhakeerya!’#13:41 Maaha mukitabho kya Habhakuki 1:5.”
42Mbe, Pauro na Bharinabha, hanú bhaaringa bharahuruka kibhara wa erisinagogi, abhantu bhakabhasabha bhahaire nabho kweki, eguru ya amangʼana gayo ku Esabhato eindi inú eraaja. 43Eribhaga rya abhantu okusanga mwisinagogi hanú ryahwa, Abhayahudi abhaaru na abhandi bhanú bhaasoha mudini ya Abhayahudi kwa okumwigwa Waryubha, bhakabhasoorana Pauro na Bharinabha. Bhonse bhakahaira nabho na okubhakomererya bhagendererye okwisigira eriruguto rya Waryubha.
44Orusiku rwa Esabhato inú yaaja, haangʼi abhantu bhonsego bha mumugi guyo bhaaja okwitegeerera eringʼana eguru ya Omukuru Yeesu. 45Nawe, Abhayahudi hanú bhaarora omuganda omunene gwa abhantu, bhabheeri na orwango na okugamba amangʼana ga enjabhuro eguru ya ganú Pauro yaaringa aragamba. 46Kora ego, Pauro na Bharinabha bhakabhakyukya kwa obhwangarariri, bharagamba ega, “Yeenderwanga muraarikirwe eringʼana rya Waryubha mbere. Nawe, kwa okubha muryangiri, mwibhuturiiri ekiina bheenyu abheene ega, mutakwenderwa obhuhoru bhwa koko. Bhoono turabhata kubhantu bhanú bhataringi Abhayahudi. 47Kwa ensonga inu, Omukuru Waryubha aratukeerya ega,
‘Nkukoreri okubha endingaasi kubhantu bhanú bhataringi Abhayahudi,
naho abhantu bhanyoore obhutuurya mukyaro kyonsego.’#13:47 Maaha mukitabho kya Isaaya 49:6.”
48Mbe, abhantu bhanú bhataringi Abhayahudi, hanú bheegwa amangʼana gayo, bhakajomerwa, na okurigungya eringʼana eguru ya Omukuru Yeesu. Bhonsego bhanú bhaaringa bhareenderwa okubha na obhuhoru bhwa koko, bhaamwikirirya Omukuru Yeesu.
49Eringʼana eguru ya Omukuru Yeesu ryanyaragananga mukyaro kiyo kyonsego. 50Nawe, Abhayahudi bhakagwatanʼya abhakari abhasuukwa bhanú bhaamwigwanga Waryubha, na abhatungi bha omugi. Bhakabhanyankya Pauro na Bharinabha na okubhakenyia bharwe mukyaro kyabho. 51Kwa ego, Pauro na Bharinabha bhakakungʼunta oruteeri okurwa kumaguru gaabho, naho okubhakaanʼya, kimwi bhakagya mumugi gwa Ikonio. 52Nawe, abheekirirya bha Yeesu bhanú bhaatama Antiokia ya Pisidia eyo, bhakabhanga bharajomerwa bhukongʼu na okwijura Omutima Omurabhu.
Právě zvoleno:
Amakorwa ga Abhatumwa 13: Kabwa
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.