मती 20
20
मंजुरियाकूराः अउल-तउल कहड़ी
1“निनिंदावा निंदावा अनँयग अंगूर बगइचारे बुता लगा मंजुरियाकू सपा लगाय सेनेडा हाँयग अंगूर बगइचारीग मालिक इया इदा भगवानराः राइज। 2हाँय हँकुःआ मंजुरियाकू लगा मी दिनराः बुता बनी एमे लगा हँकू सुदाय रायनेना। हनते हाँय हँकुःआ होड़कू अनँयग बगइचारे बुता लगाय वारगोतेडकू।
3हाँयग मालिक मी डांग बेर देगनेना हना बेला बजाररेय सेनेडा। हंडा तोनोंग तोनोंग होड़कू इसने चड़ाँतोकू दोहोना। 4हँकू ञेलतेडखन हाँयग मालिक कतातेड, अपे हों ईंगराः अंगूर बगइचारे बुता लगापे सलाव जुवाः अरू अपेराः बुता बनी बड़ाँःतना हनामिनिंग एमेवापेता। 5दो हँकू हों तोराकू।
हनते हाँय तिकिन बेलारे अरू ढड़काः बेलारे हों सेनेडखन हनन इयाय एचेतेरा। 6हेचेर-हेचेर बेर दोहोनेन मेला हाँय बजार अगी अरूय सेनेडा अरू हनमेला हों तोनोंग तोनोंग होड़कू इसने चड़ाँत ञेलतेडकूखने होंबोरतेडकुःआ, अपे ननंडा दिन भइर चिला लगा इसने चड़ाँत इदानपेःआ?
7दो हँकू कता कुदातेरा, अले तोनोंगीग बुता लगा मेरकू उदुःवागाडले। हनालगा अले इसने ननंडा इदानलेःआ।
दो हाँय हँकू एचेरेय कतातेड, अपे हों सेनेकियानखन ईंगराः अंगूर बगइचारेपे बुता।
8सिंगाड़यान दो हाँयग मालिक अनँयगरीग सेवकियाय राःतेरा अरूय कतातेरा, जमा मंजुरियाकू लगा अँनकूराः बुता बनीम एमेवाकू। तयोमरेकू वेगनेना हँकुःआ होड़कू लगा मड़ंगमे एमेय अरू हना तयोमरे मड़ंगरेकू वेगनेना हँकुःआ होड़कूम एमेवा।
9हँकू वेगनेना दो मी घंटाकू बुतानेना हँकुःआ होड़कू मेमेड होड़ मेमेड होड़ लगा मी दिनराः बनीय एमेवातेडकुःआ। 10दो मड़ंगरे बुता लगाकू हेलावनेना हँकुःआ होड़कू ओंगोलतेरा, अबू बगराबू पवाःता, माःआन। 11हँकू बनीकू पवावनेन दो ढिबुवा ञेलतेडखन मालिक एचेरे कुरबुराः घड़ीनकू कतातेरा, 12नँकुःआ होड़कू अले अते तयोमते बुता लगाकू हेलावनेना अरू मिनी घंटा लगाकू बुताकिया। मनदो आम दिन भइर सितोंग सितोंगले बुताकेरा अले बरोबइर नँकुःआ होड़कू होंम बड़ाँवगोतेडकुःआ जा?
13मनदो हाँयग मालिक हँकुःआ होड़कू अते मी होड़ एचेरेय कतातेरा, ने सउंगता, ईंग आम सुदा तोनोंगाः गारबार मेरिंग एचेगरा। आम ईंग सुदाम रायनेना हनानाः बुता बनी ईंग मेरिंग एमेवागडमेःआ जा? 14अपे अँननपेराः बुता बनीपे गोःया। अपेयिंग एमेवारा हिनिनमिन तयोमतेकू वेगकिया हँकू हों एमेवा लगा ईंगराः ओंगोल इदा। 15ईंग इनिंगराः आन-धानते ईंग चहाःतना हन इया ओरोयिंग एचे अवेतेरा जा? ईंग मयादार इदानिंगा अते गेरा मेडतेपे ञेलिंगता जा?
16ननन इया तयोमरे इदानकुःआ हँकुःआ होड़कू मड़ंग जुवाःता अरू मड़ंगरे इदानकुःआ हँकुःआ होड़कू तयोम जुवाःता।”
ईसू अनँयग गुजुः बदीरे अरूय कतातेरा
(मरकूस 10:32-34; लूका 18:31-34)
17ईसू एरुसलेम सेन मेला आँयगरिकुःआ बारहगोटोंग चेलाकू, होड़कू अते एटाःतेडकूखने कतावाडकू, 18“अबू एरुसलेम सहर अगीबू सलाःतना। अरू हंडा मरंग पुजउरीकू अरू नियम चेडदार होड़कूराः तिःईरे मनुवारीग बेटातकू एचे सबेयता। अरू ञेड एंडागे लगाकू फड़ियावगेयता, 19अरू बेगर एहूदाकूराः तिःईरेकू जिमागेयता अरू लंदा एरंगवा घड़ीनकू ञेडेयता अरू कुरूसरेकू ठोंकाव गोजेयता। मनदो पेय दिनरेय जियाव रिमुःता।”
मी होड़ एंगातराः अरजी
(मरकूस 10:35-45)
20हनते जबदीरिकिनाः बेटाकिनरीग एंगात बेटाकिनतेन सुदा ईसू एचेरेय सेनेडा अरू ईसू मड़ंगरे उकुड़ोमकियानखन हाँय एचेरे तोनोंगाःय असेतेरा।
21दो ईसू हाँय एचेरेय होंबोरतेरा, “आम चिलाम चहाःतना?”
दो हाँयग अइमी कतातेड, “नँकिनाः बेटाकिनतिंग आमराः राइजरे मी होड़ आमराः खउना तिःई गतर अरू मी होड़ आमराः दिरही तिःई गतर दुड़ुः लगाम ओवाकिन।”
22दो ईसू हँकिनाः चेलाकिनतेने कतावातेड, “अबा मेरबा सुसुदीतना अबा चिलाबा असेतना। ईंगके ञूय लगा इदा हना कटसियाराः डुबहातेबा ञू अवेयता जा?”
दो हँकिन कतातेड, “अलिंग ञू अवेयता।”
23दो ईसू कतातेड, “अबा ईंगराः कटसियाराः डुबहातेबा ञूयता, मनदो ईंगराः खउना अरू डिरही तिःई गतर तोनोंगीग एचे दुड़ुःगेयराः हातपात ईंगके कोवानेःआ। ईंगराः बनर परोम दुड़ुः लगा ईंगरीग अपांग भगवान सपड़ाव दोहोकेडकिना, हँकिनाः होड़किन लगा इदा।”
24नाःआ बड़रा अयूमतेडखन ईसूरिकुःआ एटाः दसगोटोंग मूक चेलाकूतेन एहुना अरू एकूब सुदाकू रीसा। 25मनदो ईसू चेलाकूतेन जमाकू आँयग एचेरे राःतेडकूखने कतावाडकू, “अपे सुसुदीतना, बेगर एहूदाकूरिकुःआ राजाकू हँकू एचेरेकू राइजगेता अरू मरंग होड़कू अँननकूरिकुःआ होड़कू एचेरेकू हातपातगेता। 26मनदो अपे सुदा नाःआ इया अलो होयाः। अपे अते तोनोंगीग मरंग बड़ाँः लगाय चहाःतना दो, हाँय अपेरीग सेवादारे बड़ाँः, 27अरू जमाकू अते मरंग बड़ाँः लगाय चाहाःतान दो, हाँयग होड़ अपेरीग बेगारी होड़े बड़ाँः। 28मनुवारीग बेटा अनँयग एचे सेवान लगा मेरेय वेगगना। मनदो हाँय जमा होड़कूय सेवा लगा अरू अनँयग जीव एमे अटूकेडखन होड़कू सडावकू लगाय वेगकिया। हनन इया अपे हों एटाःकूपे सेवाकू।”
अंधा होड़किनराः मेड ईसू नपायतेरा
(मरकूस 10:46-52; लूका 18:35-43)
29मी दिन ईसू अरू चेलाकूतेन एरीहो सहर अते उडुंगनेनखनकू सलाःआ हनमेला, मुरुक बगरा होड़कू हँकू देह दूरकू ओतोंग सेना। 30अरू बार होड़ अंधा होड़किन दूर कुटीरेकिन दुड़ुःकुःआ। ईसू नाःआ दूरतेय सलाःतना माःआनकिन अयूमतेरा दो हँकिन मुरुक सटी खिररी घड़ीनकिन कताया, “ने परबू, ने दाऊद राजारीग नइड़-बाँस होड़, अलिंगमे सोगावा।”
31दो होड़कू कलेकालकिन दोहोन लगाकू डंटावकिना। मनदो हँकिन अनउर हुमइसके खिररी घड़ीनकिन कताया, “ने परबू, ने दाऊद राजारीग नइड़-बाँस होड़, अलिंगमे मयावा।”
32दो ईसू चड़ाँनेन अरू हाँय हँकिन राःतेडखने होंबोरतेड, “ईंग अबा लगा चिलायिंग एचे?”
33दो अंधा होड़किन ईसू एचेरेकिन कतातेड, “ने परबू, अलिंग ञेल लगालिंग चहाःतना।”
34ईसू हँकिने सोगावातेडकिना अरू हँकिनराः मेडे टोँवावतेरा अरू हनानाः मेला बना होड़राः मेड नपाययान अरू हँकिन ईसूराः देह दूर तोराकिन।
Právě zvoleno:
मती 20: kfp
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© (Active) Wycliffe Bible Translators, Inc. All rights reserved.
