SOFFOONIYAASI 2
2
KAALIIQIWA HIGATE KULLOONNI SOKKA
1-2Ki'ne saalfattinannikki gosa, hajajosi fultukkinni rahotenni mittowa gamba yiiyye. Hakkunni ka'a kayinni, galawu gede billaallitinanni. Giirate gede buwannohu Kaaliiqi hanqi daanno'ne; hakko barra aarisi dirranno'ne. 3Hajajosi wonshitinanniri, tenne baatto aana heedhinanniri, ki'ne jooguullu Kaaliiqiwa higgine, dancha looso loosse. Kaaliiqi albaanni umo'ne heeshshi asse; kunni garinni Kaaliiqi hanqosi leellishanno barra miteekkitine qorichunni gattinanniha ikkanno.
ISRAEELETE GAANGAAWIRA HEEDHANNO DAGA AANA DAGGANNO YOO
4Gaaza yinanni katami onanno; Asiqeloona yinanni katamino diigamanno; Ashidoodi katamira heedhannorino barru taalootira heedhannowiinni shorrantanno; Eqirooni mannino katamisinni buqqisame ba"anno. 5Ki'ne Kana"aani gobbara baaru gama heedhinannirira Kelitootaho yinanni Filisxeemootira aanne'e! Kaaliiqi, mittuno gattinikkinni co'o asse hunanno'ne. 6Baaru gama nooti baatto'ne baala saada hossannowa, allaalaasine galtannowanna saada galtanno hoowe ikkitanno. 7Qafadotewiinni gatinohu Yihudu manni baatto'ne ragi're saada hosiisi'rannowa assi'ranno; Asiqeloonaho nootera minnansara galanno. Kaaliiqi Maganinsano towatannonsa; qafadaminonsare baala daware riqiwannonsa.
8Olantote Mootichi Kaaliiqi, «Moaabinna Amooni manni manna'ya arrassanninna qacifatanni baattonsa adhara boollaqi'rinota macciishshoommo. 9Ani Israeelete Magani Olantote Mootichi Kaaliiqi heeshshonnihu su'miyanni xaareemmo. Moaabinna Amooni, Soddoomunna Gomooru gede ikkite ba'anno. Maxinete balenna ishinu guggushshinowa loonsannikki baatto gede ikkitanno. Qafadotewiinni gatinohu manni'ya jajjansa saamanno; baattonsano ragi'ranno. Kuni ikkanno gede ani Kaaliiqi heeshshonnihu su'mi'yanni xaareemmo» yii.
10Moaabinna Amooni manna kuni baalunku qarri amadannonsahu, giddonsa hettisamanna boo'na wo'miteenna Olantote Mootichi Kaaliiqi manna xontanni shollishshinohuraati. 11Baattonsara noota kaphu maganna duuchanta hune Kaaliiqi callu insawa waajjinoonniha ikkanno. Baattote aani daga baala noowa heedhe isira kumbuultanno.
12Ki'ne Itiyophiyootu bise'yanni murantinanni.
13Kaaliiqi aliyye mannira wolqasi leellishanno. Asoorino hunanno; Nennewe katamano wayi nookkiha moolanna diigamino katami gede mullicho darga assanno. 14Ge'reewunna meu, lalunna moyichu hosannowa ikkanno. Awulo diigammete giddo heedhanno; masikoottate aana heedhe raartanno. Haraqeeyyeno nafarrate raartanno. Minna minnoonni daguwino reqecci yaanno. 15Kuni katami, «Ane ka'a wolu dino!» yee hawaqi're keerunni hee'rino. Xa kayinni, moyichu hosannowa mulla darga ikke gatanno. Hakkaanni hige sa"annohu baalu addintanni maala'lanni umo shafanni fiiqanno.
Právě zvoleno:
SOFFOONIYAASI 2: QulMax
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society of Ethiopia; Sidama Holy Bible BSE-UBS 262 P 2014