ZAKKAARIYAASI 9
9
ISRAEELETE OLLAA IKKITINO GOSARA DAGGANNO YOO
1Hadiraakinna Demaasiqote Katami qorichishamannota Kaaliiqi coyi'rinohu yoote qaali aane nooho: Israeele calla ikkitukkinni, isi ille manna baalanka la'anno. 2Hadiraakira aantinotera Hamaatinna hayyoole Xiroosinna Sidoona katammano la"anno. 3Xiroosi umosi agadhara lowo qiisho qiishi'rino; kaxxine shalanqanni birranna culka duu'nino. 4Ikkollana kayinni, gamba assi'rinoha Kaaliiqi haa're hoolanno; jirosi baaru giddo hunanno; katamuno giirame buluulo ikkanno.
5Asiqeloona Katami konne coye lae waajjanno; Gaazu Katamino tenne ikkito lae, lowo geeshsha shetanno; Eqirooni Katamino hexxo mudhanno; Gaazu mootesi hooganno; Asiqeloona baattono ona ikkite gattanno. 6Ashidoodira karsu manni hee'ranno. Kaaliiqi, «Kore boonaleeyye Filisxeemoota shollisheemmo. 7Kunni ka'a mundeete ledo noo maala woy hoolloonni sagale baala di"ittanno; insa giddonni gattinori manni'ya ledo karsante, Yihudu ayidde ikkitanno. Eqirooni manni Iyaabuusootu gede manni'ya ledoha ikkanno. 8Gobba'ya agareemmo; olanto aanaseenni higge disa'anno; manni'ya mageeshshi geeshsha qarraminoro ani afoommona, kunni ka'a miiccannori manna'ya digadadissanno» yaanno.
TSIYOONI MOOTE
9Tsiyooni manna, hagiidhe!
Yerusaalamete manna, hagiirrunni ilillisse!
Kuneeti moote'ne ki'newa daanni no;
isi qeelinohonna bareedaho.
Joongillunni harricho,
harrichote ilmicho gulufe daanno.
10Ani Kaaliiqi olu faradi gaare Israeeletenni huneemmo;
faradono Yerusaalametenni hooleemmo;
olu bagadi baalunku hiiqqaqqamanno.
Moote'ne dagate mereero araara kalaqanno;
mootimmasino baaru qaccenni qaccete geeshsha iillitanno.
Gashshootisino Efiraaxisi Wayinni kayise,
gobbate qacce geeshsha iillanno.
MAGANU MANNI QAFADAMINOWIINNI HIGANNO
11Ani Kaaliiqi, kakkalote mundeenni ki'ne ledo eoommo gondoori daafira,
wayi nookki bale qafadonnite giddonni manna'ne haa're fushsheemmo.
12Qafadantine heedhinoonniri hexxote annuwa!
Kaajjado qiisho ikkiteenna keerunni heedhinanni gobba higge;
xaa geeshsha iillino'ne qarri daafira erote ero maasso eemmo'ne.
13Yihuda digaanu gede,
Israeeleno worbichu gede asse horoonsi'reemmo.
Giriikete bagadaano qasammora,
Tsiyooni bagadaano bisete gede asse soyemmo.
14Kaaliiqi mannaho aleenni hige leellanno;
digaanu worbichono banqote gede asse olanno.
Mootichu Kaaliiqi buudu xurumba ufuufanno;
Wodiidi hombobolatte gede asse diina gawajjanno.
15Olantote Mootichi Kaaliiqi mannisira gargaraancho ikkanno;
insano diinnansa corqaayyete worroonni kinnanni guddanno.
Kakkalote mundee kakkalote darga dunnannihu gede,
diininsa mundee ga'nite dimbinohu gede ikkite alaakkanno.
16Hakku barri iillanno woyite,
allaalaanchu ge'reewosi moyichuwiinni gatisannohu gede,
Kaaliiqi mannasi gatisanno.
Ayirrado ba'latto aana noo irri xawannohu gede,
insano gobbasira heedhe hatto xabbanno.
17Mannu gobbate danchummanna biinfille maala'lanno;
aju manni tenne dancha gobba sagalenninna,
haaro woyinete xajjenni kaajje lophanno.
Právě zvoleno:
ZAKKAARIYAASI 9: QulMax
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society of Ethiopia; Sidama Holy Bible BSE-UBS 262 P 2014