མཱར་ཀུ་ལེའུ་ 9

1ད་རུང་ཡེ་ཤུ་གིས་ང་གིས་ཁྱེད་ལུ་དོན་དག་རང་སླབ་དོ་ ནཱ་ལོང་སྡོད་མིའི་གྲལ་ཁ་ལས་ ལ་ལུ་ཅིག་གིས་ དཀོན་མཆོག་གི་རྒྱལ་སྲིད་དབང་ཤུགས་དང་བཅསཔ་སྦེ་ འོང་ས་མ་མཐོང་མ་ མི་ཤི་ཟེར་གསུངས་ནུག།

ཡེ་ཤུ་གིས་སྐུ་གཟུགས་བཀྱག་འགྱུར་བའི་སྐོར།

2ཉིནམ་དྲུག་གི་ཤུལ་ལས་ཡེ་ཤུ་གིས་ པེ་ཏྲོ་ ཡ་ཀོབ་དང་ ཡོ་ཧ་ནཱན་ གསུམ་འཁྱིད་དེ་ ཡར་སྒང་མཐོ་ས་ལུ་བྱོན་ཏེ་ ཁོང་རང་རྐྱངམ་གཅིག་སྦེ་བཞུགས་པའི་བསྒང་ དེ་ཁ་སློབ་མ་ཚུ་གི་གདོང་ཁར་ ཡེ་ཤུ་གིས་སྐུ་གཟུགས་བཀྱག་འགྱུར་ཏེ། 3ན་བཟའ་འདི་འཛམ་བུ་གླིང་འདི་ནང་ ག་ཅི་དང་དོ་འགྲན་མ་ཚུགས་པའི་འོད་ཅེམ་ཅེ་སྦེ་དཀརཔོ་ལུ་འགྱུར་ནུག 4དེ་འཕྲོ་ལས་དཔྱད་རིག་མེད་སི་སི་སྦེ་ ཨེ་ལི་ཡ་དང་ མོ་སཱེས་ཐོན་ཏེ་ ཡེ་ཤུ་དང་གཅིག་ཁར་ གསུང་གྲོས་གནང་ས་ ཁོང་སློབ་མ་གསུམ་གྱིས་མཇལ་ནུག 5པེ་ཏྲོ་གིས་ཡེ་ཤུ་ལུ་ རབ་བི་ལགས་ ང་བཅས་ནཱ་དང་གཅིག་ཁར་ ནཱ་ཡོད་ནི་དེ་གིས་ལེགས་ཤོམ་སོང་ཡི་ ང་བཅས་ཀྱིས་དབུ་གུར་གསུམ་སྤུབ་གེ་ གཅིག་ནཱ་གི་དོན་ལུ་ གཅིག་ མོ་སཱེས་ཀྱི་དོན་ལུ་ གཅིག་ ཨེ་ལི་ཡ་གི་དོན་ལུ་ཟེར་ཞུ་ནུག 6དེ་འབདཝ་ད་ ཁོ་རང་གནམ་མེད་ས་མེད་འདྲོགས་ཏེ་ ག་ཅི་སླབ་དྲག་ག་མ་ཤེས་པས། 7དེ་ལས་ཁོང་གི་གུ་ལས་མར་ ས་སྨུག་སྤུར་འོངས་ཏེ་ འདི་ནང་ལས་གསུང་སྐད་གཅིག་གིས་དེ་སྦེ་གསུངས་ནུག་ ཨ་ནི་ངེ་གི་བུ་གཅེས་ཤོས་ཕངས་ཤོས་དེ་ཨིན་ ཁོ་གིས་སླབ་མིའི་ཁ་ལུ་ཉན་ཞིག་ཟེར་གསུངས་ནུག 8དེ་འཕྲོ་ལས་ཁོང་གིས་ཕར་དང་ཚུར་ག་ཏེ་བལྟ་རུང་ ཁོང་དང་གཅིག་ཁར་ཡོད་མི་ཡེ་ཤུ་རྐྱངམ་གཅིག་མ་གཏོགས་ གཞན་ག་ཡང་མ་མཐོང་པས། 9དེ་ལས་ཁོང་སྒང་གུ་ལས་མར་འབབ་པའི་སྐབས་ལུ་ ཡེ་ཤུ་གིས་ཁོང་ལུ་ མིའི་བུ་ཤི་ས་ལས་གསོན་པོ་སྦེ་མ་ལོང་པའི་བར་ན་ ཁྱེད་ཀྱིས་མཐོང་མི་འདི་ མི་ག་ལུ་ཡང་མ་སླབ་ཟེར་བཀའ་གནང་ནུག 10ལོ་རྒྱུས་འདི་ག་ར་ཁོང་རང་གི་སེམས་ཁར་བཞག་ཅི་ དེ་འབདཝ་ད་ གཤགས་ས་ལས་གསོན་པོ་སྦེ་ ལོང་ནི་ཟེར་མི་འདི་ ག་ཅི་སྨོ་ཟེར་ཁོང་རང་གཅིག་གིས་གཅིག་ལུ་དྲིས་ནུག 11ཁོང་གིས་ཡེ་ཤུ་ལུ་ ཨེ་ལི་ཡ་ཧེ་མ་ལོག་འོང་དགོ་ཟེར་ བཀའ་ཁྲིམས་ཀྱི་སློབ་དཔོན་ཚུ་གིས་ག་ཅི་འབད་སླབ་སྨོ་ཟེར་དྲི་བ་ཞུ་ནུག 12དེ་ལས་ཡེ་ཤུ་གིས་ ཨེ་ལི་ཡ་ཐད་རི་བ་རི་ཧེ་མ་ལོག་འོངས་ཏེ་ ག་ར་ཉམས་བཅོས་འབད་ གྲ་སྒྲིག་བརྐྱབ་འོང་ དེ་འབདཝ་ད་ མིའི་བུ་ལུ་ སྡུག་བསྔལ་ལེ་ཤ་མྱོང་དགོཔ་དང་ ག་གིས་ཡང་མི་དགའ་ཟེར་མི་འདི་ ཁྱེད་ཀྱིས་འབད་བ་ཅིན་ གསུང་རབ་ནང་ག་ཅི་འབད་འབྲི་འབྲིཝ་སྨོ། 13ད་ང་གིས་ཁྱེད་ལུ་སླབ་དོ་ ཨེ་ལི་ཡ་དེ་ཧེ་མ་ལས་འོང་ཚར་ཡི་ གསུང་རབ་ནང་ཁོ་གི་སྐོར་ལས་ག་བྲིས་བཞག་དོཝ་བཟུམ་སྦེ་རང་ མི་ཚུ་གིས་ཁོ་ལུ་འབད་དགོ་མནོ་མི་འདི་ ཁོང་གིས་ཁོ་ལུ་འབད་ནུག།

འདྲེ་གདོན་འཛུལ་མིའི་བུཚ་གཅིག་དྲགཔ་མཛད་པའི་སྐོར།

14ཡེ་ཤུ་དང་ཁོང་སློབ་མ་གསུམ་ སྒང་གུ་ལས་མར་འབབ་སྟེ་ སློབ་མ་གཞན་ཚུ་སྡོད་སར་འབྱོནམ་ད་ མི་ཚོགས་སྦོམ་དང་ བཀའ་ཁྲིམས་ཀྱི་སློབ་དཔོན་ཚུ་གིས་ སློབ་མ་གཞན་ཚུ་བསྐོར་རི་བརྐྱབས་ཏེ་ ཁོང་དང་མཚན་ཉིད་རྐྱབ་སྡོད་ས་གཟིགས་ནུག 15མི་དམངས་ག་ར་གིས་ཡེ་ཤུ་མཇལཝ་ད་ ཧ་ལས་ཏེ་ཁོ་གི་སྐུ་མདུན་ལུ་བརྒྱུགས་འོངས་ཏེ་ གུས་ཞབས་ཀྱི་ཐོག་ལས་སྐུ་གཟུགས་བཟང་པོ་ཟེར་ཞུ་ནུག 16ཡེ་ཤུ་གིས་སློབ་མ་ཚུ་ལུ་ ཁོང་དང་གཅིག་ཁར་ ཁྱེད་ག་ཅི་གི་མཚན་ཉིད་རྐྱབ་སྨོ་ཟེར་དྲི་བ་གསུངསམ་ད། 17མི་དམངས་ཀྱི་སྦུག་ལས་མི་གཅིག་གིས་ སློབ་དཔོན་ལགས་ ངེ་གི་བུ་ འདྲེ་གདོན་འཛུལ་ཏེ་ཁ་སླབ་མ་ཚུགས་པར་ ནཱ་གི་སྐུ་མདུན་ལུ་འཁྱིད་འོང་ཡི། 18དུས་ནམ་རང་འབད་རུང་འདྲེ་གདོན་དེ་གིས་ ཁོ་ལུ་གནོད་པ་བཀལ་བའི་བསྒང་ལས་ ཁོ་མར་ས་ཁར་བརྡབ་སྟེ་ ཁ་ལས་ལྦ་ག་ཐོན་ ཤི་ཤིཝ་བཟུམ་སྦེ་སྲ་ཀྲག་འགྱོ་སྟེ་སྡོདཔ་མས་ ང་གིས་ནཱ་གི་སློབ་མ་ཚུ་ལུ་འདྲེ་གདོན་བཏོན་བདའ་གནང་ཟེར་ཁོང་ལུ་སླབ་ཅི་ དེ་འབདཝ་ད་ ཁོང་གིས་བཏོན་བདའ་མ་ཚུགས་ཟེར་ཞུ་ནུག 19ཡེ་ཤུ་གིས་ དད་པ་མེད་པའི་མི་རབས་ཁྱེད་ ང་ཁྱེད་དང་གཅིག་ཁར་ག་དེམ་ཅིག་ཚུན་ཚོད་སྡོད་ནི་ དུས་ཚོད་ག་དེམ་ཅིག་ཚུན་ཚོད་བཟོད་པ་བསྒོམ་སྡོད་ནི་སྨོ་ ད་བུཚ་འདི་ནཱ་ང་སྡོད་སར་འཁྱིད་ཤོག་ཟེར་གསུངསམ་ད། 20ཁོང་གིས་བུཚ་འདི་འཁྱིད་འོངམ་ད་ འདྲེ་གདོན་འདི་གིས་ཡེ་ཤུ་མཇལཝ་ཙམ་གྱིས་ བུ་འདི་གནམ་མེད་ས་མེད་གསིག་སྟེ་ མར་ས་ཁར་འགྱེལ་སྦེ་ ཁ་ལས་ལྦ་ག་ཐོན་ སྒལ་རིལ་མར་རིལ་བསྒྱུར་ཏེ་འགྱོ་ནུག 21ཡེ་ཤུ་གིས་ཁོ་དེ་སྦེ་ནམ་ལས་ན་ནཝ་སྨོ་ཟེར་ ཨ་པ་འདི་ལུ་གསུངསམ་ད་ ཁོ་ཆུང་ཀུ་བསྒང་ལས་རང་དེ་སྦེ་ན་སྟེ་ཨིན་ཟེར་ཞུ་ནུག 22འདྲེ་གདོན་འདི་གིས་ཁོ་ལུ་བསད་ནི་གི་དོན་ལུ་ ལོག་ཅི་ལོག་ཅི་རང་མེ་དང་ཆུ་ནང་བརྡབ་བཏངམ་མས་ལགས་ ནཱ་གིས་དྲགཔ་མཛད་ཚུགས་པ་ཅིན་ ང་བཅས་ལུ་སྐྱིད་སྡུག་གཟིགས་ཏེ་ གྲོགས་རམ་མཛད་གནང་ཟེར་ཞུ་ནུག 23དེ་ལས་ཡེ་ཤུ་གིས་ཁྱོད་ཀྱིས་ང་ལུ་ག་ཅི་འབད་ འབད་ཚུགས་པ་ཅིན་ཟེར་སླབ་སྨོ་ དད་པ་བསྐྱེད་མི་གི་དོན་ལུ་ག་ར་འབད་ཚུགས་ཟེར་གསུངསམ་ད། 24དེ་འཕྲོ་ལས་བུ་གི་ཨ་པ་འདི་གིས་སྐད་བརྐྱབས་ཏེ་ ང་དད་པ་བསྐྱེད་ནི་ཨིན་ དེ་འབདཝ་ད་ ང་དད་པ་མེད་པའི་སེམས་ལུ་ དད་པ་བསྐྱེད་ཚུགས་པའི་གྲོགས་རམ་མཛད་གནང་ཟེར་ཞུ་ནུག 25ཡེ་ཤུ་གིས་ མི་ཚོགས་དེ་ཚུ་བརྒྱུགས་ཏེ་ ཁོ་གི་སྦོ་ལོགས་ཁར་འོང་ས་གཟིགསཔ་ད་ ཁོ་གིས་རྣམ་ཅོག་གོ་ནི་མེད་མི་དང་ ཁ་སླབ་ནི་མེད་པའི་འདྲེ་གདོན་ཁྱོད་ བུཚ་འདི་ནང་ལས་ཕྱི་ཁར་ཐོན་སོང་ ནམ་ཡང་ལོག་སྟེ་ཁོ་གི་ནང་མ་འཛུལ་ཟེར་ ང་གིས་ཁྱོད་ལུ་བཀའ་བཀྱོན་གནང་དོ་ཟེར་གསུངསམ་ད། 26དེ་ལས་འདྲེ་གདོན་འདི་སྐད་སྦོམ་སྦེ་བརྐྱབས་ཏེ་ བུཚ་འདི་གནམ་མེད་ས་མེད་ སྒལ་རིལ་མར་རིལ་བསྒྱུར་ཏེ་ བཀོག་བཞག་སྦེ་འདྲེ་གདོན་དེ་ཐོན་སོང་ནུག་ དེ་ལས་བུཚ་འདི་ཤི་ཤིཝ་བཟུམ་སྦེ་ཐལ་ཏེ་ མི་ཚུ་གིས་བུཚ་འདི་ཤི་སོང་ཡི་ཟེར་སླབ་ནུག 27དེ་འབདཝ་ད་ཡེ་ཤུ་གིས་ བུཚ་འདི་གི་ལགཔ་བཤེད་དེ་ཡར་ལྷོང་གནངམ་ད་ བུཚ་འདི་ཡར་ལོང་སྟེ་ཆགས་ནུག 28དེ་ལས་ཡེ་ཤུ་གཟིམ་ཅུང་ནང་འབྱོནམ་ད་ སློབ་མ་ཚུ་གིས་མི་གཞན་ག་ཡང་མེད་པའི་སྐབས་ལུ་ ང་བཅས་ཀྱིས་ག་ཅི་འབད་ འདྲེ་གདོན་བཏོན་བདའ་མ་ཚུགསཔ་སྨོ་ཟེར་དྲི་བ་ཞུཝ་ད། 29ཡེ་ཤུ་གིས་ཁོང་ལུ་ ཨ་ནི་བཟུམ་གྱི་འདྲེ་གདོན་ལུ་ སྨོན་ལམ་གྱིས་མ་གཏོགས་གཞན་ག་ཅི་གིས་ཡང་ བཏོན་བདའ་མི་ཚུགས་ཟེར་གསུངས་ནུག།

ཁོ་རང་གཤགས་ཏེ་གསོན་པོ་སྦེ་བཞེངས་ནི་ཟེར་མངོན་ཤེས་གསུངས་པའི་སྐོར།

30ཡེ་ཤུ་དང་ཁོ་རང་གི་སློབ་མ་ཚུ་དེ་ཁར་ལས་ཐོན་བྱོན་ཏེ་ ག་ལི་ལི་གི་ལུང་ཕྱོགས་ལས་འབད་འབྱོནམ་ད་ ཁོང་ག་ཏེ་ཡོདཔ་ཨིན་ན་ ག་གིས་ཡང་ཤེས་མ་བཅུག་ནི་གི་ཐུགས་བསམ་བཞེས་ནུག 31ག་ཅི་སྨོ་ཟེར་བ་ཅིན་ ཡེ་ཤུ་ཁོ་རང་གི་སྐོར་ལས་ སློབ་མ་ཚུ་ལུ་རྐྱངམ་གཅིག་ སྟོན་ནི་གི་ཐུགས་བསམ་ཡོདཔ་ཨིན་མས་ དེ་ལས་ཁོ་གིས་ མིའི་བུ་ལུ་ མི་ཚུ་གི་ལག་པར་སྤྲོད་དེ་ ཁོང་གིས་ཁོ་བསད་འོང་ ད་རུང་ཁོ་བསད་ཚར་བའི་ཤུལ་ལས་ ཉིནམ་གསུམ་པ་ལུ་གསོན་པོ་སྦེ་ལོང་ནི་ཨིན་ཟེར་གསུངས་རུང་། 32ཁོ་གིས་སྟོན་གནང་མིའི་དོན་དག་འདི་ ཁོང་གིས་ཧ་མ་གོ་བར་ དྲི་བ་ཞུ་ནི་ཡང་ཁོང་འདྲོགས་ཏེ་སྡོད་ནུག།

དྲགས་ཤོས་འབད་དགོ་པ་ཅིན་ག་ར་ལས་ཉམ་ཆུང་འབད་དགོ་པའི་སྐོར།

33ཡེ་ཤུ་དང་ཁོ་རང་གི་སློབ་མ་ཚུ་ ཀ་ཕཱར་ནུམ་ལུ་ལྷོད་དེ་ ཁྱིམ་ནང་བཞུགས་པའི་སྐབས་ལུ་ ཡེ་ཤུ་གིས་ཁོང་ལུ་ ཁྱེད་ལམ་བདའ་སྟེ་ག་ཅི་གི་སྐོར་ལས་མཚན་ཉིད་བརྐྱབས་ཏེ་འོངམ་སྨོ་ཟེར་གསུངསམ་ད། 34ཁོང་ཁུ་སིམ་སི་སྦེ་སྡོད་ནུག་ ག་ཅི་སྨོ་ཟེར་བ་ཅིན་ ལམ་བདའ་སྟེ་ ཁོང་རང་གཅིག་གིས་གཅིག་ལུ་ ང་བཅས་ཀྱི་སྦུག་ལས་དྲག་ཤོས་ག་སྨོ་ཟེར་ མཚན་ཉིད་རྐྱབ་རྐྱབ་ཨིན་མས། 35ཡེ་ཤུ་མར་བཞུགས་སྦེ་སློབ་མ་བཅུ་གཉིས་གདོང་ཁར་འབོ་སྦེ་ མི་ག་ར་འབད་རུང་དྲག་ཤོས་དང་ ཨང་དང་པ་སྦེ་འཐོན་དགོ་མནོ་བ་ཅིན་ དེ་གིས་ག་ར་གི་ཤུལ་ལས་སྡོད་དེ་ གཡོགཔོ་འབད་དགོ་ཟེར་གསུངས་ནུག 36དེ་ལས་ཡེ་ཤུ་གིས་ ཁོང་ཆ་ཁྱབ་ཀྱི་སྦུག་ལུ་ཨ་ལོ་གཅིག་ལུ་ལྷོང་སྟེ་ ཁོ་རང་གི་སྐུ་ཕང་ལུ་བསྣམས་སྦེ། 37ག་ར་འབད་རུང་ངེ་གི་མིང་ནང་ ཨ་ནི་བཟུམ་གྱི་ཨ་ལོ་གཅིག་ལུ་ངོས་ལེན་འབད་བ་ཅིན་ ང་ལུ་ཡང་འབདཝ་ཨིན་ ང་རྐྱངམ་གཅིག་གིས་མ་ཚད་པར་ ང་ལུ་གཏང་གནང་མི་དེ་ལུ་ཡང་ གདན་འདྲེན་ཞུཝ་ཨིན་ཟེར་གསུངས་ནུག 38དེ་ལས་སློབ་མ་ ཡོ་ཧ་ནཱན་གྱིས་ སློབ་དཔོན་ལགས་ ནཱ་གི་མཚན་ནང་ མི་གཅིག་གིས་འདྲེ་གདོན་བཏོན་བདའ་ས་ ང་བཅས་ཀྱིས་མཐོང་ཅི་ དེ་འབདཝ་ད་ ཁོ་ང་བཅས་ཀྱི་གྲལ་ཁ་ལས་མེན་ནི་འདི་གིས་ ང་བཅས་ཀྱིས་ཁོ་ལུ་ དེ་སྦེ་འབད་ནི་མེད་ཟེར་བཀག་ཅི་ཟེར་ཞུཝ་ད།

39ཡེ་ཤུ་གིས་ ཁོ་ལུ་དེ་སྦེ་འབད་ནི་མི་འོང་ ག་ར་འབད་རུང་ ངེ་གི་མིང་ནང་ལུ་ རྫུ་འཕྲུལ་བཏོན་མི་འདི་གིས་ དེ་འཕྲོ་ལས་ང་ལུ་ཚིག་ངན་མི་སླབ། 40ག་ར་འབད་རུང་ ང་བཅས་ལུ་བྱང་ཕྱད་མ་འབད་བ་ཅིན་ དེ་ང་བཅས་ཀྱི་ཆ་རོགས་ཨིན། 41ཁྱོད་ཁིརཱིས་ཀྱི་ཨིན་མས་ཟེར་མནོ་སྟེ་ ཆུ་ཕོརཔ་གང་བྱིན་པ་ཅིན་ དེ་གིས་ཐད་རི་བ་རི་གསོལ་རས་འདི་ མ་ཐོབ་པར་མི་སྡོད་ཟེར་གསུངས་ནུག།

དད་པ་བསྐྱེད་མི་ཚུ་ལུ་བཀག་མ་རྐྱབ་ཟེར་བའི་སྐོར།

42ག་ར་འབད་རུང་ ཨ་ནི་དད་པ་བསྐྱེད་མི་ཨ་ལོ་ཆུང་ཀུ་ཚུ་གི་གྲལ་ཁ་ལས་ གཅིག་ལུ་ཡང་སྡིག་པ་འབད་བཅུག་པ་ཅིན་ མི་འདི་གི་ཨོལ་ལྐོག་གུ་ རང་འཐག་གི་རྡོ་སྦོམ་གཅིག་བཏགས་ཏེ་ རྒྱ་མཚོ་ནང་བཀོག་དཔ་དྲག་ཟེར་གསུངས་ནུག 43ཁྱེད་ག་ར་འབད་རུང་རང་གི་ལགཔ་གིས་ སྡིག་པ་འབད་བཅུག་པ་ཅིན་ ལགཔ་དེ་བཏོག་བཀོག་ད་ ལགཔ་གཉིས་དང་གཅིག་ཁར་ ཤི་ནི་མེད་པའི་དམྱལ་བའི་མེ་ནང་འགྱོཝ་ལས་ ལག་རྡུམ་སྦེ་མཐའ་མེད་པའི་ཚེ་ནང་འཛུལཝ་དྲག 44#༩:༤༤། ཧེ་མ་གི་བློ་གཏད་ཚུགས་མི་དེབ་ཚུ་ནང་ལུ་ ཚིག་བཅད་༤༤་དེ་མིན་འདུག 45ཁྱེད་ག་ར་འབད་རུང་རང་གི་རྐངམ་གིས་ སྡིག་པ་འབད་བཅུག་པ་ཅིན་ རྐངམ་འདི་བཏོག་བཀོག་ད་ རྐངམ་གཉིས་དང་གཅིག་ཁར་དམྱལ་བར་འགྱོཝ་ལས་ ཞབོ་འགྱུར་ཏེ་མཐའ་མེད་པའི་ཚེ་ནང་འཛུལཝ་དྲག 46#༩:༤༦། ཧེ་མ་གི་བློ་གཏད་ཚུགས་མི་དེབ་ཚུ་ནང་ལུ་ ཚིག་བཅད་༤༦་དེ་མིན་འདུག 47ཁྱེད་ག་ར་འབད་རུང་རང་གི་མིག་ཏོ་གིས་ སྡིག་པ་འབད་བཅུག་པ་ཅིན་ མིག་ཏོ་འདི་བཏོན་བཀོག་ད་ མིག་ཏོ་གཉིས་དང་གཅིག་ཁར་དམྱལ་བར་འགྱོཝ་ལས་ མིག་ཏོ་ཡ་གཅིག་སྦེ་ དཀོན་མཆོག་གི་རྒྱལ་སྲིད་ནང་འཛུལཝ་དྲག་ཟེར་གསུངས་ནུག 48དམྱལ་བ་ནང་ རོ་ཟ་མིའི་འབུབ་དང་མེ་ནམ་ཡང་མི་ཤི། 49མཆོདཔ་དེ་ཚྭ་གིས་འདགཔ་བཟོཝ་བཟུམ་སྦེ་ མི་ཡང་མེ་གིས་འདགཔ་བཟོཝ་ཨིན། 50ཚྭ་འདི་ལེགས་ཤོམ་ཨིན་ དེ་འབདཝ་ད་ ཚའི་བྲོཝ་འདི་ཡལ་བ་ཅིན་ ཚྭ་གི་བྲོཝ་ཡོདཔ་སྦེ་ག་དེ་སྦེ་བཟོ་ཚུགས་ནི་ ཁྱེད་རང་ཆ་ཁྱབ་ཚྭ་བཟུམ་སྦེ་འགྱུར་ཏེ་ གཅིག་གིས་གཅིག་ལུ་འཆམ་མཐུན་ཏེ་སྡོད།།

Právě zvoleno:

མཱར་ཀུ་ལེའུ་ 9: dzoD

Zvýraznění

Kopírovat

Porovnat

Sdílet