मत्ती 15

शुद्ध ओ अशुद्ध

मर्कूस ७:१-२३

1तब कुछ फरिसी ओ शास्‍त्रीहुँक्र यरूशलेम सहरसे येशूकठे आक कल, 2“अप्‍नक चेलावँ रीत अनुसार हाँठ बिना धुइल खैठ। काजे हुँक्र पुर्खासे चल्‍तीआइल परम्‍परा नैमन्‍ट?”

3येशू हुँकन कल, “काजे टुह्र आपन परम्‍परा कायम करक लाग परमेश्‍वरक आज्ञह नैमन्‍टो? 4परमेश्‍वर कैरख्‍ल, ‘आपन डाई-बाबक आदर करो। आपन डाई-बाबक विरोधम दुष्‍ट बात बट्‌वैना मनैया मुवापाई।’#प्रस २०:१२; २१:१७; व्‍य ५:१६; लेवी २०:९ 5तर टुह्र त मनै आपन डाई-बाबह असिक कहल ठीक मन्‍ठो, ‘मै टुँहन सहायता कर नैसेक्‍लकम दुःख जिन मनहो, काकरकि मै टुँहन देहपर्ना चिज परमेश्‍वरह देना प्रतिज्ञा कैसेक्‍नु।’ 6असिक टुह्र आपन परम्‍परा मानक लाग परमेश्‍वरक आज्ञह रद्द कर्ठो। 7टुह्र कपटीहुँक्र, यशैया अगमवक्तक लिखल बात टुन्‍हकम ठ्‌याक्‍क मिल्‍ठा। ऊ परमेश्‍वरक कहल बात लिख्‍ल,

8‘यी मनै महीह मुहले केल आदर कर्ठ,

तर हुँकन्‍हक मन महीसे धेर दूर बाटन।

9महीह करल हुँकन्‍हक आराधना त बेकार बाटन,

काकरकि हुँक्र म्‍वार शिक्षा सिखाइपर्ना ठाउँम मनैन्‍हक शिक्षा सिखैठ।’”#यशै २९:१३

10येशू भीडक मनैन आपनठे बलाक कल, “म्‍वार बात ध्‍यान देक सुनो ओ बुझ्‍ना कोसिस करो। 11मुहओर्से भित्तर जैना खानले किहुह अशुद्ध नैबनाइट्‍, तर मुहओर्से बाहर निक्रना खराब वचनले हुँकन अशुद्ध बनैठा।”

12पाछ चेलावँ उहाँकठे आक कल, “अप्‍नक वचनले फरिसीन्‍हक चित्त दुःखल बाटन कैक का अप्‍न थाहाँ पारख्‍ली?”

13येशू कल, “स्‍वर्गम रना म्‍वार बाबक नैलगाइल हरेक बुट्‌टा उँखारजाई। 14हुँकन्‍हक कुछु मतलब जिन करो, हुँक्र आन्‍धर मनैन डोर्‍यैना आन्‍धर अगुवन हुइट ओ हुँक्र सबजन खटाहम हर्बरुइयाबाट।”#लूक ६:३९

15पत्रुस उहाँह कल, “यी आहानक अर्थ हमन जनादी।”

16उहाँ कल, “का टुह्र आम्‍ही फे अबुझ बाटो? 17हमार खाइल चिज प्‍याटिम जैठा, ओ शरीरमसे निकरजैठा कना बात का टुँहन थाहाँ नैहो? 18तर मुहओर्से निक्रना वचन मनमसे अइठा, ओ उह वचनले मनैन अशुद्ध बनैठा। 19काकरकि मनमसे खराब विचार, हत्‍या, व्‍यभिचार, चोरी, झूट साक्षी ओ अपमान निक्रठा। 20मनैन अशुद्ध बनैना चिज यिह हो। तर रीत अनुसार हाँठ बिना धुइल खैटिम मनै अशुद्ध नैहुइट।”

कनानी जन्‍नीमनैयक विश्‍वास

मर्कूस ७:२४-३०

21तब येशू ओठेसे उठ्‍ल, ओ टुरोस ओ सीदोन सहरओर गैल। 22उ ठाउँसे एकठो कनानी जन्‍नीमनैया अइली ओ चिच्‍यैटी कहलग्‍ली, “हे प्रभु, दाऊदक सन्‍तान, महीह दया करी। म्‍वार छाईह भूत्‍वा जातसे सँताडारल।”

23येशू ओहीह कुछु जवाफ नैदेल। तर उ जन्‍नीमनैया उहाँहुँकन्‍हक पाछपाछ लग्‍लरली ओ चिच्‍यैटीरली। तब उहाँक चेलावँ अइल ओ उहाँह बिन्‍ती कर्ल, “यहीह पठादी।”

24उहाँ कल, “परमेश्‍वर महीह इस्राएलीन्‍हकठे केल पठारख्‍ल। हुँक्र हेराइल भेँरीअस बाट।”

25उ जन्‍नीमनैया आउर लग्‍घ अइली ओ येशूक पाउ पर्क कली, “हे प्रभु, महीह सहायता करी।”

26उहाँ कल, “लर्कन्‍हक रोटी कुक्‍कुरीन्‍हक आघ फँक्‍ना ठीक नैहो।”

27ऊ कली, “हो प्रभु, तर कुक्‍कुर फे त आपन मालिकन्‍हक खसाइल टुक्रिटुक्रा खैठ।”

28तब येशू हुँकहीन कल, “हेरो बाबु, टुँहार विश्‍वास भारी बा। टुँहार कहलअस ह्‍वाए।” तबहेँ हुँकहार छाई चोखागैली।

धेर बेरम्‍हेन चोखैलक

29येशू ओठेसे गैल ओ गालील समुद्रक किनार-किनार हुइटी पर्वत्‍वम चिहुर्ल ओ बैठ्‍ल। 30तब मनैन्‍हक भारीभारी भीड नाङ्‌गर, लुल, आन्‍धर, लाट ओ और धेर बेरम्‍हेन लेक उहाँकठे अइल। हुँक्र उ सबजहन उहाँक आघ ढैदेल ओ उहाँ सबजहन चोखादेल। 31यिहाँसम कि, लाट मनैन ब्‍वालल्, लुल मनैन चोखाइल, नाङ्‌गर मनैन न्याङ्‌गल, ओ आन्‍धर मनै देख्‍नाहा हुइल् देख्‍क सारा भीडक मनै छक्‍क पर्ल। ओ हुँक्र इस्राएलीन्‍हक परमेश्‍वरक महिमा कर्ल।

चार हजार मनैन खवैलक

मर्कूस ८:१-१०

32तबदोस्र येशू चेलन आपनठे बलाक कल, “यी मनै म्‍वारठे रहल आज तीन दिन होसेक्‍लन, ओ हिँकन्‍हकठे खैना चिज कुछु फे बाँकी नैहुइटन। उहओर्से हिँकन देख्‍क महीह स्‍वाग लागटा। हिँकन भुँख्‍ल घर पठैना हो कलसे, हिँक्र डगरीहम मूर्च्‍छा पर फे सेकहीँ।”

33चेलावँ उहाँह कल, “यी गाउँबस्‍ती नैरहल ठाउँम अत्रा धेर जन्‍हक लाग कहाँसे खाना जुटैना हो?”

34येशू हुँकन पुछ्‌ल, “टुन्‍हकठे कैठो रोटी बा?”

हुँक्र कल, “सातठो रोटी ओ डान्‍चे छुटीछुटी मच्‍छी बाट।”

35उहाँ भीडक मनैन भूइँयम बैठ्‌ना आज्ञा देल। 36उहाँ सातठो रोटी ओ मच्‍छी लेक परमेश्‍वरह धन्‍यवाद देल। उहाँ रोटी खन्‍टिखन्‍टा पर्ल ओ चेलन देल। हुँक्र उ रोटी मनैन बाँटदेल। 37हुँक्र सबजन अघाअघा खैल, ओ उब्रल खन्‍टिखन्‍टा रोटी बराबरा छिट्‌टोक सात छिट्‌वा उठैल। 38रोटी खउइया, जन्‍नीमनै ओ लर्कापर्का छोर्क, पुरुषहुँक्र केल चार हजार रलह। 39तब येशू भीडक मनैन बिदा देल, ओ अप्‍नजुन लाऊम चिहुर्क मगादान क्षेत्रओर गैल।

Právě zvoleno:

मत्ती 15: thl

Zvýraznění

Kopírovat

Porovnat

Sdílet