लूका 17
17
पाप कर्ना ओ माफ देना
मत्ती १८:६-७,२१-२२; मर्कूस ९:४२
1येशू आपन चेलन कल, “मनैन पापम फँसैना परीक्षा अइठा, तर औरजहन पापम फँसाइ खोज्ना मनैयह धिक्कार बा। 2महीह विश्वास कर्ना यी सबसे छुटी मानजैना मनैमध्ये एकजहन पापम फँसाइ खोजुइयक परमेश्वरसे पैना दण्डसे त, वाकर घ्याँचम चक्या झुलाक ओहीह समुद्रम फाँकदेना वाकर लाग मजा हुहिँस। 3उहओर्से होस करो।
“कौनो भैया पाप करी कलसे, ओहीह हप्काओ। यदि ऊ आपन पापी मन परिवर्तन कैक परमेश्वरकठे आई कलसे, ओहीह माफ देहो।#मत्ती १८:१५ 4एक दिनम सात फ्यारा पाप कर्लसे फे, यदि ऊ हरफ्यारा आक ‘मै गल्ती कर्नु, माफ करी’ कैक माफ मागी कलसे, ओहीह माफ देहो।”
5येशूक बाह्र जन प्रेरितहुँक्र कल, “प्रभु, हमार विश्वास बह्रादी।” 6येशू जवाफ देल, “टुन्हकठे राईक दाना बराबर विश्वास बा कलसे, यी टुटक रुक्खोह ‘उँखर्क समुद्रम लगाजा’ कबो त, ऊ टुन्हक कहल मन्नेबा।
7“मानिलेओ, खेत्वमसे काम कैक या भेँरी चह्राक टुन्हक कमारा आइल् कलसे, का टुह्र ओहीह आदर कैक ‘हाली आई ओ खाए बैठी’ कठो? 8बेनसे टुह्र असिक कठो, ‘जा, भन्सा ठीकठाक पार। लुगा फेर्क महीह खवाल्या त, पाछ टैँ खाइस।’ 9टुन्हक कहल मानलम, का टुह्र ओहीह धन्यवाद देठो? 10ओसहेँक टुह्र फे परमेश्वरक अह्राइल सक्कु काम कैक सेक्बो त, असिक कहहो, ‘हम्र त, प्रशंसा पैनायोग्यक नोकर नैहुइटी, आपन करपर्ना काम केल कैरख्ली।’”
दश जन कोररोगी चोखैलक
11येशू यरूशलेम जाइबेर सामरिया ओ गालील क्षेत्रक सिमानाओर्से गैल। 12एकठो गाउँम पैँठबेर कोररोग लागल दशठो मनै येशूह देख्ल। हुँक्र टनिक दूर ठह्र्याक 13जोरसे कल, “येशू गुरु, हमन दया करी।”
14येशू हुँकन हेर्क कल, “जाओ ओ पूजारीकठे अपन्हेह देखाओ।”#१७:१४ अपन्हेह देखाओ: मोशक व्यवस्था अनुसार, कौनो व्यक्ति कोररोगसे चोखाइल कि नाहीँ कैक पूजारीह प्रमाणित करपरन (लेवी १४:२, ३, ११; व्यवस्था २४:८)। उहओर्से येशू कोररोग लागल मनैन “पूजारीकठे जाक अपन्हेह देखाओ” कलह। जैटीजैटी डगरिएम हुँक्र कोररोगसे चोखागैल।#लेवी १४:१-३२
15हुँक्रमध्ये एकठो कोररोगसे चोखैलक थाहाँ पाइल त, बरा सोरले परमेश्वरक महिमा कर्टी घुम्क आइल्। 16ओ येशूक पाउ पर्क धन्यवाद चह्राइल। ऊ सामरिया क्षेत्रक मनैया रह।
17येशू कल, “का दश्यौ जन नैचोखैलह? और नौ जन कहाँ गैल? 18सामरिया क्षेत्रक यी तुच्छ मनैया बाहेक, परमेश्वरह प्रशंसा चह्राए और नौ जन काजे नैअइल?” 19येशू ओहीह कल, “उठो ओ आपन डगर लागो। आपन विश्वासले टुँ चोखैलहो।”
परमेश्वरक राज्यक बारेम
मत्ती २४:२३-२८,३७-४१
20एक दिन फरिसीहुँक्र येशूह पुछ्ल, “परमेश्वरक राज्य यी संसारम कैह्या सुरु हुई?”
येशू जवाफ देल, “परमेश्वरक राज्यक सुरु द्याख नैसेक्जाइट्। 21‘हेरो, परमेश्वरक राज्य अठे सुरु हुइल्’, या ‘ओठे सुरु हुइल्’ कैक कुई फे कह नैस्याकट्, काकरकि परमेश्वरक राज्य टुन्हक बीचम सुरु होस्याकल।”#१७:२१ यी पदक अर्थ “परमेश्वरक राज्य टुन्हक जीवनम सुरु होस्याकल” कना फे हुइसेकी।
22येशू आपन चेलन कल, “असिन समय आइटा कि टुह्र मै मनैयक छावक दिन द्याख पाजाइट् त, एकदम खुशी लग्नेरह कैक कबो, तर द्याख नैपैबो। 23मनै ‘मनैयक छावा अठे बा, हेरो’ या ‘ओठे बा, हेरो’ कैक कलसे फे, महीह उहाँ ख्वाज जिन जाओ, 24काकरकि जसहेँक आकाशम बद्री चिम्कलसे सक्कुओरसे देखपर्ठा, ओसहेँक मै मनैयक छावा यी संसारम घुम्क अइना दिनम सक्कुओरसे देखपरम। 25तर यी हुइनासे आघ महीह धेर दुःख भ्वागहे परी, ओ यी जमानक मनै महीह इन्कार करहीँ।
26“जसहेँक नोअक समयम मनै परमेश्वरसे अइना दण्डह नैपत्यैलरलह, मै मनैयक छावा घुम्क अइना दिन फे मनै ओसहेँक कर्टीरनेबाट।#उत ६:५-८ 27नोआ जहाजम नैपैँठट्सम मनै खैटिरलह, पिटीरलह, ओ भ्वाजकाज कर्टिरलह। तब परमेश्वरक कराइल जलप्रलय सबजहन नाश पर्लन।#उत ७:६-२४
28“लोतक समयम फे ओस्तै हुइल् रह। मनै खैनापिना, किनबेच कर्ना, बालीनाली लगैना ओ घर बनैना काम कर्टिरलह।#उत १८:२०–१९:२५ 29लोत सदोम सहरसे भग्लक दिन आकाशसे परमेश्वरक वर्षाइल आगी ओ गन्धक#१७:२९ गन्धक: गन्धक कलक पत्थ्राअसक पदार्थ हो जौन भारी तापसहित बर्ठा। सबजहन भसम पर्लन।
30“मै मनैयक छावा घुम्क अइना दिन फे मनै ओसहेँक कर्टीरनेबाट। 31उ दिनम घरक छतम रहुइयन आपन सरसामान लिह घरभित्तर जिन पैठहीँ, ओ खेत्वम रहुइयन आपन चिजबिज लिह घर नैजाक भग्ने करहीँ।#मत्ती २४:१७-१८; मर्क १३:१५-१६ 32लोतक गोसिनेक दशा का हुइलन कना बात सम्झो ना।#उत १९:२६ 33आपन प्राण अपन्हे बचैना कोसिस करुइया प्राण गुमाई। तर म्वार पाछ लाग्क आपन प्राण गुमुइयक जीवन सुरक्षित रहहीँस।#मत्ती १०:३९; १६:२५; मर्क ८:३५; लूक ९:२४; यूह १२:२५ 34उ रात एक्क बिस्तारम सुतल दुइ जनमध्येम एकठो लैजाजाई ओ औरजुन छोरजाई। 35सँगसँग पीठा पिस्टी-पिस्टी दुइ जन जन्नीमनैमध्ये एकठो लैजाजाई ओ और छोरजाई।#१७:३५ एकठो लैजाजाई ओ और छोरजाई: धेर बाइबल विद्वानहुँकन्हक विचारम यी पदक अर्थ का हो कलसे एकठो (परमेश्वरद्वारा स्वर्गम) लैजाजाई ओ और (दण्ड पाइक लाग) छोरजाई। (हेरी मत्ती २४:३१; मर्कूस १३:२७; लूका ३:१७; १ थेसलोनिकी ४:१७)। 36[खेत्वम काम कर गैल् दुइ जन मनैमध्ये एकठो लैजाजाई ओ और छोरजाई।]”
37येशू बट्वाक सेक्ल त, चेलावँ उहाँह पुछ्ल, “यी कहाँ हुई, प्रभु?”
येशू आहानम जवाफ देल, “डाङ्गर रहल ठाउँम गिढ पर्ठ।”#१७:३७ डाङ्गर रहल ठाउँम गिढ पर्ठ: येशू असिक कहअस देखपर्ठ: आपन-आपन पाप स्वीकार नैकर्ना ओ परमेश्वरम विश्वास नैकर्ना मनैन्हकम (हुँक्र डाङ्गरअस हुइट) दण्ड पर्ठन (गिढ परअस)।
Právě zvoleno:
लूका 17: thl
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2020, Wycliffe Bible Translators, Inc. All rights reserved.
