मत्ती 2
2
ज्योतिषी रा पूर्व देशा न ऐणा
1ज़ैबै हेरोदेस राज़ा यहूदिया प्रदेशा न राज़ केरदा लागा ती, तैबै बैतलैहम नगरा न यीशु रा जन्म हुआ। यीशु रै पैदा होंणै न किछ़ बौगता बाद पूर्व दिशा न कई ज्योतिषी लोका यरूश्लेम शैहरा न एज़िया पुछ़दै लागै। 2“यहूदी रा राज़ा ज़ौसरा जन्म हुआ, सा कौखै सा? किबैकि आसै पूर्व दिशा न तेइरै जन्मा रा तारा हेरू सा होर आसै तेइरी आराधना केरदै आऐ सी।” #गिण. 24:17.
3ऐ शुणिया हेरोदेस राज़ा होर यरूश्लेम शैहरा रै बोहू सारै लोका डौरै। 4तैबै तेइयै यरूश्लेम शैहरा रै सारै मुख्यपुरोहिता होर शास्त्रियै न कठै केरिया पुछ़ू, “मसीह रा जन्म कौखै होंणा चेहिऐ ती?” 5तिन्हैं तेइबै बोलू, “तेई बैतलैहमा शैहरा न पैदा होंणा,” ज़ो यहूदिया प्रदेशा न सा, “किबैकि भविष्यवाणी केरनु आल़ै मिकै बोहू पैहलै पवित्र शास्त्रा न लिखू सा:
6“ ‘ओ बैतलैहमा रै लोको, ज़ो यहूदा देशा न सी,
तू कौसी भी रीतियै यहूदै रै अधिकारी न होछ़ा नी ऑथि;
किबैकि तौ न एक राज़ा निकल़णा
होर तेई मेरी प्रजा इस्राएलै री हेर शुण केरिया तिन्हरी अगुवाई केरनी।’ ”
7तैबै हेरोदेस राज़ै च़ुप केरदै ज्योतिषी लोका शाधिया तिन्हां न पुछ़ू, कि तारा ठीक कैबै कुणी बौगतै पैहली बार हेरूआदा ती। 8तैबै तेइयै ते ऐण्ढै बोलिया बैतलैहम नगरा बै भेज़ै कि, “ज़ाईया तेई शोहरू रै बारै न ठीक-ठीक पता केरा होर ज़ैबै सौ मिलला ता मुँभै खबर देइत् ताकि हांऊँ भी ज़ाइआ तेइबै प्रणाम केरनु।”
9तैबै ज्योतिषी राज़ै री गैल शुणिया बैतलैहम शैहरा बै नौठै होर हेरा, ज़ो तारा तिन्हैं पूर्व दिशा न हेरू ती सौ फिरी तिन्हां आगै-आगै च़लू; होर ज़ौखै सौ शोहरू ती तेई घौरा हागै पुजिआ रुकु। 10तेई तारै बै फिरी हेरिया ते बोहू खुश हुऐ, होर तारै रा पिछ़ा केरू। (लूका 2:20) 11होर तेई घौरा न पुजिआ सौ शोहरू तेइरी आमा मरियमा सैंघै हेरू, होर टुँबड़ै पौड़िया तेइबै प्रणाम केरु होर आपणै-आपणै झोल़ै खोलिया तेइबै सूना, लोबान होर गन्धरसै री भेंट च़ढ़ाई। 12होर सुपनै न ऐ च़िताऊणी पाईआ कि हेरोदेसा हागै वापस हेरीत् ज़ाँदै, ते होरी बौतै आपणै देशा बै नौठै।
मिस्र देशा बै ज़ाणा
13ज्योतिषी ज़ाणै न बाद हेरा परमेश्वरा रै एकी स्वर्गदूतै सुपनै न यूसुफा बै हेरूइया बोलू, “उठ, तेई शोहरू होर तेइरी आमा बै लेइया मिस्र देशा बै भग; होर ज़ैबै तैंईंयैं हांऊँ तौभै नी बोलनू, तू तौखै रौही; किबैकि हेरोदेस ऐई शोहरू बै तोपणू आल़ा सा कि ऐईबै मारिया खत्म केरला।”
14तैबै यूसुफ रातियै उठिया शोहरू होर तेइरी आमा लेइया मिस्र देशा बै नौठा। 15होर हेरोदेस मौरनै ढौई तौखै रौहू कि सौ वचन ज़ो प्रभुऐ भविष्यवाणी केरनु आल़ै होशे द्वारा बोलू ती कि “मैं आपणा बेटा मिस्रा न शाधु सौ पूरा होला।” #होशे 11:1.
हेरोदेस रा होछ़े शोहरु बै मरवाणा
16ज़ैबै हेरोदेसै ऐ हेरू, कि ज्योतषियै मूँ सैंघै धोखा केरू, तैबै सौ झ़िका सैंघै भौरूआ होर सपाई बै भेज़िआ ज्योतिषी न पुछ़ूऐदै ठीक-ठीक बौगता रै मुताबक बैतलैहम होर औरलै पौरलै सारै शोहरू ज़ो दुई बौर्षै रै ती, होर ऐथा न होछ़ै ती मारनै द्याऐ। 17तैबै ज़ो वचन यिर्मयाह भविष्यवाणी केरनु आल़ै बोलू ती सौ पूरा हुआ।
18“रामाह नगरा न एक बड़ी आवाज़ शुणुई,
बड़ा विलाप होर रोणां शुणुआ,
राहेल आपणै शोहरू री तैंईंयैं रोंदी लागी ती
होर शान्त नी ती होंणा च़ाँहदी,
किबैकि ते मूँऐ ती।”
मिस्र देशा न नासरता बै वापस ऐणा
19हेरोदेसै रै मौरनै न बाद प्रभु रै स्वर्गदूतै मिस्रा न यूसुफा बै सुपने न हेरूइया बोलू, 20कि “उठ, शोहरू होर तेइरी आमा बै लेइया इस्राएलै रै देशा बै ज़ा; किबैकि ज़ो शोहरू रै प्राण लेणा चाहा ती, ते मूँऐ।”
21यूसुफ उठु, शोहरू होर तेइरी आमा लेइया इस्राएलै रै देशा बै आऊ। 22पर ऐ शुणिया कि अरखिलाउस आपणै बापू हेरोदेसै री ज़ैगा यहूदिया पैंधै राज़ केरदा लागा सा सौ तौखै ज़ाणै न डौरू होर सुपनै न च़िताऊणी पाईआ गलील ज़िलै बै नौठा। 23होर नासरत नगरा न रौंहदा लागा, ताकि सौ वचन पूरा होला, ज़ो भविष्यवाणी केरनु आल़ै रै ज़रियै बोलूआ ती, “तेई यीशु नासरी कहलाइणा।” #लूका 18:7.
Právě zvoleno:
मत्ती 2: KFX-NT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
This work is licensed under Creative Commons Attribution-ShareAlike 4.0 License.