2 Makabe 9
9
Nga zɛlɛ ba Antiɔkɛ Epifanɛ
(1 Mak. 6.1-17; 2 Mak. 1.11-17)
1Do 'da fala ni, nɛ nwa Antiɔkɛ nɛa bolo ngɔ nù Pɛrsɛ, nɛ a si li bole ni do sape. 2A si do sape mba gɔ, a nɛa we hɔ tɛ le Pɛrsepolisi, nɛ a yamba we ba ma, nɛ a te tɛ zũ omɛnɔ kɔ tɔa sambala di ni ni. Nɛ dã ba Owele lenɔ, nɛ wa kala bolo dɛ kɔ̃ wa, nɛ wa ndaka a, nɛ a yu, nɛ a si do sape. 3Hã a nɛa we kɔlɔ do le Ɛkbatanɛ, nɛ a zele mɛ ma dɛa Nikanɔrɛ, do Timote, do osodanɔ 'da wa ni. 4Nɛ dã ba a wena, nɛ a na, ɛ kɔ̃a we nɛ we gese nu mɛ Opɛrsɛ wa ndaka ɛ, nɛ sape ba li ɛ ni hã Oyudanɔ. Nɛ a tɔ̃a hã wi ba ngilingili 'da a na, a la ndĩi dɛ Yeruzalɛmɛ, da dɛ kɔ a yóló nù gɔ. Nɛ a ma ngɔ tɔ̃ do wali na: “Mi hɔ tɛ Yeruzalɛmɛ i, nɛ mi mi sɛ Oyudanɔ vɛ̃ dɛ di ni, dɛ kɔ zunu kpo.”
Kɛ a tɔ̃ ni, nɛ ta zu a ila ngɔ kɛ na, Gale ó yala gɔ ni do'do. 5Ma kɛ a nɛa we fi nu a nù, nɛ NWA Gale 'da Oyudanɔ, kɛ a zɔ mɛnɔ vɛ̃ ni, a lua a do zɛlɛ kɛ Owele wa fa gulu nɛ zãa, nɛ ina nɛ 'bɔ bina ni. Kɔ zã Antiɔkɛ ma ngɔ zɛlɛ nganda wena, nɛ nde ma mbɔkɔ mbe fala kpo gɔ. 6Gale dɛa do a ni gbãlã we, tua kɛ a ba zi ngamɔ hã ogele winɔ wena. 7Gɛnɛ kɔ na mɛ ni, nɛ nde zɛlɛ mbɔ̀kɔ̀ ngatɛ 'da a gɔ, nɛ a 'bana dɛ gã zu fai. Nɛ ɔ nɛ kɛ dã ba a dɛ tɛ Oyudanɔ nganda wena ni, nɛ a ba nu a hã wi ba ngilingili 'da a na, a yu nganda. Kɔ a nɛ gbanga nɛ, nɛ a yolo kɔ ngilingili kɛ giti nɛ dɔ̃lɔ̃ tɛ yu nganda wena ni, nɛ a te fala kpo dɛ nù nga. Nɛ tɛ̃ a gbini kisi kisi, tua kɛ a tia nganda wena.
8Ĩ na, a dɔnggɔ sɔ tɛ̃ a dati nɛ ge nde ni. Nɛ a lengge na, ɛ nganda nɛa ngɔ owinɔ vɛ̃, nɛ ɛ wia we ba nu ɛ hã ngele gba lìnɔ, nɛ ma zele, tabi ɛ wia we kala ogba ngala kalanɔ, nɛ ɛ we dĩ nɛ ngɔ kilo. Nɛ nde ngangga ni, a ɔ dɛ bulu nù, nɛ ogele wele wa ba a ngɔ nzangba. Nɛ mɛ dɛa a ni bia hã owinɔ vɛ̃ na, Gale nganda wena.
9Nɛ 'dã nwa ni fè do ti gɔ. Nɛ nde tɛ̃ a zɛlɛ zi la mɔ vɛ̃. Mulu tɛ̃ a mbulu, nɛ ma ma ngɔ ɛ̃lɛ̃ dɛ nù. Nɛ obe dɔkɔ wa kua ti gbali a. Nɛ mbulu daninɔ tɛ̃ a ni únú zi osodanɔ 'da a de gɔ, nɛ wɔ tɛ̃ a zi 'bɔ tɛ wa bina. 10Ĩ na, zi dati, a lengge zi na, ɛ wia we kũ li nza, nɛ ɛ kala osɔlanɔ ɔ nɛ kɛ ɛ kɔ̃a ni. Nɛ nde ngangga ni, fo 'bɔ wi kɔlɔ do a we 'be tɛ̃ a bina, we kɛ daninɔ tɛ̃ a ni unu nɛ ge nde ni.
11Nɛ Antiɔkɛ zɔa na, zɛlɛ mɛ 'dɛ ɛ kũ dɛ dati kũ fai, nɛ a mbɔka vɛ̃. Nɛ a ma ngɔ ĩ ti mɛ ma dɛ a ni ngboo na, Gale a hã etumbu hã ɛ, nɛ a la fala dɛ ngatɛ. 12Nɛ do ndɔti nɛ vɛ̃, nɛ fala tɛ̃ a wele nɛ únú 'bɔ a de gɔ, nɛ a na: “Ma wè na, wele, kɛ a a fio iko ni zɔ tɛ̃ ɛ na, ɛ wia kɔ̃ do Gale gɔ, nɛ nde a ba tɛ̃ a dɛ nù dati Gale.” 13Nɛ nde Gale wè zi 'bɔ we dɛ 'bako hã Antiɔkɛ, 'dã wi gbɛ winɔ ni gɔ. Nɛ gɛnɛ kɔ Antiɔkɛ kpua mbulu hã Gale na: 14“Mi wɛlɛ zi tɛ mi dɛ Yeruzalɛmɛ, le kɛ ma santo ni na, mi 'danga ma vɛ̃, nɛ mi mi Owi kɔ nɛ vɛ̃ dɛ kɔ zunu kpo iko. Kɔ ngangga ni, mi tɔ̃a na, mi dɛ́ sɛ 'bɔ 'dã mɔ do Owi Yeruzalɛmɛ gɔ. 15Mi handa zi na, mi gbɛ sɛ Oyudanɔ do obenɔ 'da wa, nɛ mi la wɔlɔ wa hã osa'de zamɛnɔ na, wa nyɔngɔ, nɛ onɔɛnɔ wa gɔmɔ ma, tua kɛ mi zɔ zi na, wa a gbãlã wele do kɛ wa mi wɔlɔ wa mi gɔ. Nɛ nde ngangga ni mi kɔ̃a na, wa ɔ do dɔ̃lɔ̃ li, do dĩ ɔ nɛ Owi Atɛnɛ ni. 16Mi kala zi okpamɛnɔ kɔ Tɛmpɛloe, kɛ ma santoe ni. Kɔ di dɔ̃ ni, mi nɛ hã omɔ kɛ ma de wena ni na, wa 'dafa do Tɛmpɛloe ni dɛ olo nɛ. Nɛ mi a sɛ 'bɔ mbé mɔ dɛlɛ wena, we e ma hã Gale, dɛ olo kɛnɔ mi kala zi ni. Nɛ mbili oso do dɔnggamɛnɔ we Tɛmpɛloe, mi hã sɛ a mbili 'da mi ngboo. 17Nɛ dɛ ngɔ nɛ, mi dɔnggɔ sɛ Gale 'da Oyudanɔ, nɛ mi yɛnggɛ ngɔ nùnɔ vɛ̃, kɛ Owele wa tɛ nɛ boe ni, we tɔ̃ sako ngawi 'da Gale hã wa.”
Antiɔkɛ Epifanɛ dɛa mbɛti hã Oyudanɔ
18Gɛnɛ kɔ na mɛ ni, nɛ nde zɛlɛ mɛ 'da Antiɔkɛ gɛ̃́ mbe fala kpo gɔ, tua kɛ Gale hã etumbu hã a gã wena, nɛ ma wia olo o'dã mɛnɔ a dɛa ni. Ma kɛ a zɔa na, ɛ kpásá sɛ 'bɔ gɔ, nɛ a dɛa mbɛti hã Oyudanɔ, we ala nu a hã wa. A dɛa mbɛti ni na:
19“Mi Antiɔkɛ, kɛ mi a nwa nɛ mi 'bɔ a gã wi ngɔ osodanɔ ni, mi fana nɛ, onya mi, obe Yuda. E kɔ nɛ kpa dia mɔ wena, nɛ tɛ nɛ ɔ do nga.
20“Nɛ mi kɔ̃a na, nɛ do obenɔ 'da nɛ, nɛ dungu do nga tɛ wi, nɛ nɛ kpa odia mɔ wena. Nɛ mi hã iɔ̃nae hã Gale we duzu nɛ, tua kɛ mi gbini zã mi do a. 21Fala kɛ ta zu mi gba ngɔ kɛ nɛ kɔ̃a do gɛnɛ mi, nɛ nɛ zele nu mi wena ni, nɛ nde mi do kɔ̃a zã dɛ 'da nɛ wena.
“Mi yula zi ngɔ nù Pɛrsɛ, nɛ si mɔ́ mi, nɛ mi tia do zɛlɛ nganda wena, nɛ mi ɔ dɛ nù iko, mi 'bɔ do ngawi bina. Ma kɛ sila mi ɔ ngɔ wena we duzu nɛ, owinɔ 'da mi na, dɔ bolo bí nɛ gɔ. 22Nɛ kafi bina, gɛnɛ kɔ na mɛ ni, nɛ nde mi 'bana tɛ lengge fai na, mi kpasa sɛ. 23Nɛ nde ta zu mi 'bana ngɔ kɛ na, 'da fala baa mi nɛa zi we bi olenɔ tɛ ngɔ kalanɔ i ni, nɛ a do tɛ̃ a ngboo, a sa zi li wi kɛ a wia sɛ we ba to nwa olo a ni. 24A dɛa na mɛ ni na, fala kɛ ngamɔ hɔ, tabi fala kɛ owinɔ 'dɛ ɛ wa zele 'dã sako dɛ ngɔ ɛ nde, nɛ dɔ wa ɔ́ do kili gɔ. Mba gɔ, wa ĩ ti wi kɛ nwa la tonɔ olo ɛ dɛ kɔ̃ a ni ia. 25Dɛ ngɔ nɛ, mi ĩ na, onwa ngɔ nùnɔ kɛ zã nùi 'da mi gɛ wa tɛ 'bɔ 'da ngba soe kɛ wa wia we dɛ do nùi 'da mi ɔ nɛ zã wa kɔ̃a ni. Wa 'bɔ we zɔ mɛ ma nɛ hɔ sɛ hã mi ni iko. Gulu nɛ a mi sa li be 'da mi Antiɔkɛ na, a dungu sɛ nwa olo mi. Nɛ 'da falanɔ vɛ̃ kɛ mi nɛ zi we bi olenɔ ngɔ kalanɔ i ni, nɛ dati la mɔ mi, nɛ mi be zi a hã nɛ bia fai. Nɛ nɛ tɔlɔ sɛ kpo mbɛti kɛ mi dɛa hã a ni dɛ kɛ zã li kɛ mi kɔma hã nɛ gɛ.
26“Nɛ nde mɛ mi gɔ kɔ̃ nɛ ni, mɛ a kɛ gɛ: Ta zu nɛ tɛ èlè ngɔ dia mɛnɔ mi dɛa zi hã owinɔ 'da nɛ, do kɛnɔ mi dɛa hã wele kpo kpo sanga nɛ ni gɔ. Nɛ da dɛ kɔ nɛ ɔ́mɔ́ sɛ tɛ be dia zã hã mi do be 'da mi gɔ. 27Nɛ mi ĩ 'bɔ na, a dɛ sɛ dia mɔ hã nɛ wena, ɔ nɛ kɛ mi dɛ zi ni, nɛ nɛ zele sɛ ngba nɛ do a do dia nɛ.”
28Na mɛ ni, nɛ a Antiɔkɛ, 'dã wi kɛ a mɔmɔ zi Gale nɛ ge nde ni, a kpa zɛlɛ tɛ wena, kpasaa ɔ nɛ kɛnɔ a hã zi hã ogele winɔ ni. Nɛ a fia fio 'bako dɛ tɛ ngɔ kalanɔ tɛ ngɔ gele nù. 29Nɛ Filipɛ, kɛ wa dala zi a do nwa Antiɔkɛ fala nɛ kpo ni, a ba wɔlɔ Antiɔkɛ, nɛ a si do ma dɛ Antiɔsɛ i. Nɛ nde Filipɛ kɔ̃̀ zi gɛnɛ be olo Antiɔkɛ gɔ, ma hã a kulu ngɔ, nɛ a la dɛ 'da nwa Petoleme Filometɔrɛ, tɛ ngɔ nù Ezipeto i.
Právě zvoleno:
2 Makabe 9: NGB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ngbaka DC Bible (We Nu Gale) Version © Bible Society of the Democratic Republic of Congo, 1995.