यूहन्ना 16

1“हऊँ तुहांजो ये गल्लां इस खातर बोलां भई तुहांरा विश्वास नीं डगमगाओ। 2तिन्हां तुहांजो यहूदी सभा घराँ चते कडी देणा : सचमुच इ सै बगत आया रां ताहली जे तुहां चते किसी जो बी मारीने तिन्हां येई सोचणा, भई सै परमेशरा री ही इच्छा पूरी करया रायें। 3सै इन्हां गल्लां कने कम्मां जो इस खातर कराँ ये, काँह्भई सै नांत पिता परमेशरा जो जाणाँ ये कने नांई मिन्जो जाणाँ ये। 4हऊँ तुहांजो ये गल्लां इस खातर दस्यारां भई ताहली जे सै बगत औणा, तां जो किछ मैं इन्हां लोकां रे बारे च पैहले ते बोलीरा सै तुहांजो याद औणा।

पवित्र आत्मा रे काम्म

“शुरु ची मैं तुहांजो ये गल्लां नीं गलाईयां काँह्भई हऊँ तुहांजो सौगी था। 5हुण हऊँ अपणे भेजणे औल़े परमेशरा ले जाया राँ; हुण तुहां चते कोई बी मेरते ये नीं पुछी सकदा, भई हऊँ कितो जाईराँ? 6तुहें इस खातर दुखी ये काँह्भई मैं तुहांजो ये गल्लां दस्सी तियां। 7जो किछ हऊँ बोल्या राँ सै सच्च आ: मेरा जाणा तुहांरे भले रे खातर आ: जे हऊँ तुहांते दूर नीं जांगा, तां पवित्र आत्मा सै जे तुहांरा मददगार आ तुहांले नीं औणा; पर जे हऊँ जांगा, तां मांह तिस्सो तुहांलौ भेजी देणा। 8कने ताहली जे तिस औणा, तां पाप, धार्मिकता कने न्याय रे बारे च संसारा रे सब्बी लोकां जो सचेत करी देणा। 9पापा रे बारे च इस खातर भई सै माह पर विश्वास नीं रखदे; 10धार्मिकता रे बारे च इस खातर काँह्भई हुण हऊँ परमेशर पिता लौ जाईराँ कने तुहां मिन्जो नीं देखणा। 11न्याय रे बारे च इस खातर काँह्भई तिस लोकां जो इसा सच्चाईया रे बारे च दसणा भई परमेशरा तियां जे इस संसारा पर राज करने औल़े शैतान्ना जो सजा देणी, तियां इ परमेशरा लोकां जो तिन्हांरे पापां रे खातर सजा देणी।

12“हऊँ तुहांजो होर बी बौहत सारियां गल्लां दसणा चांह, पर हल्तियें तुहें इन्हां सारियां गल्लां जो समझी नीं सकदे। 13पर ताहली जे सच्चाईया रा आत्मा औआं, तिस परमेशरा री हरेक सच्चाईया च तुहांरी अगुवाई करनी तिसरी जे तुहांजो जाणने री जरूरत इ, काँह्भई तिस अपणिया तरफा ते किछ नीं बोलणा, पर जो गल्लां सै परमेशरा ते सुणां तिस तुहांजो दसणियां, इस खातर तिस तुहांजो हुणे औल़ियां गल्लां हुणे ते पैहले दसणियां। 14हऊँ कुण आ ये बोलीने कने जो किछ मैं कित्या तिस्सो तुहांजो दसणे रे जरिये पवित्र आत्मे मेरी महिमा करनी; कने जो किछ तिने माहते सुणया, सै तुहांजो समझाणा। 15जो किछ पिता रा सै मेरा इ हया; इस खातर मैं बोल्या, भई पवित्र आत्मे सैई दसणा सै जे मैं सुणया।

दुख सुखा च बदली जाणा

16“थोड़े बगता तक तुहां मिन्जो नीं देखणा, कने तिसते बाद, थोड़े बगता बाद तुहां मिन्जो फेरी देखणे लगणा।” 17तां तिसरे चेले अप्पूँ चियें गलाणे लगे, “ये क्या? सै जे अहांजो दस्यारां, थोड़े बगता तक तुहां मिन्जो नीं देखी सकणा; कने दवारा, थोड़े बगता बाद तुहां मिन्जो फेरी देखणे लगी जाणा, कने ये बी भई हऊँ पिता लौ जाया राँ?” 18फेरी सै बोलणे लगे, सै ये क्या गलाया राँ भई थोड़े बगता बाद? तिसरी बोल्ली री गल्लां अहांजो समझा नीं आया र दियां। 19यीशु समझी गया भई सै मेरियां गल्लां रा मतलब पुछणा चांये, इस खातर तिने तिन्हांजो गलाया, “हऊँ तुहांजो ये जे गलाया राँ, क्या इस पर वचार करया रायें, ‘थोड़े बगता तक तुहें मिन्जो नीं देखी सकगे, कने, थोड़े बगता बाद तुहां मिन्जो फेरी देखणे लगणा?’ 20हऊँ तुहांजो सच-सच गलाया राँ, मेरे मरने ते बाद तुहां रोणा कने दुखी हूणा, पर इस संसारा रे लोकां खुशियां मनाणियां। तुहांजो दुख हूणा पर ताहली जे तुहां मिन्जो जिऊंदा देखणा तिस वगत तुहांरा दुख खुशिया च बदली जाणा। 21ताहली जे जनाना बच्चा जणने लगां इ, तां तिसाजो बौहत पीड़ हुआं इ, काँह्भई तिसारी दर्दां लगणे री घड़ी आई गरी हुआं इ, पर ताहली जे सै तिस बच्चे जो जणी देईं, कने तिसाते संसारा च इक माहणुये रे औणे री खुशिया च सै इतणी खुश हुई जाईं भई सै सारियां पीड़ा जो भुल्ली जाईं। 22ठीक इयां इ हुण तुहांजो बी दुख हुणा: पर मांह तुहांजो फेरी मिलणा, कने तुहांरे दिल खुशियां ने भरी जाणे, कने तुहांजो तिसा खुशिया जो मनाणे ते कोई बी रोकी नीं सकदा। 23तिस वगत ताहली जे तुहां मिन्जो भीं देखणा तुहां मेरते कोई स्वाल नीं पुछणे। हऊँ तुहांजो सच-सच बोलां, भई जो किछ तुहां पिता ते मेरा चेला हुणे रे नाते मंगणा, तिस्सो सै सब किछ मिली जाणा। 24हूणा तक तुहें मेरा चेला हुणे रे नाते किछ नीं मंगया : परमेशरा ते मंगगे तां पांगे ताकि तुहांरी मौज पूरी हुईजो।

संसारा पर जय

25“ये सब गल्लां मैं तुहांजो कहाणिया रे जरिये दस्सियां : पर सै बगत आयाराँ ताहली जे माह उदाहरणा च तुहांजो किछ मनी गलाणा, पर पिता परमेशरा रे बारे च सारियां गल्लां साफ-साफ दसणियां। 26तिस वगत ताहली जे तुहां मेरा चेला हुणे रे नाते खुद मेरे पिता ते मंगणा: तिस बगत माह तुहांजो ये नीं बोलणा भई हऊँ तुहांरे खातर पिता ने प्राथना करगा। 27मेरा पिता परमेशर तुहांजो बौहत प्यार कराँ, काँह्भई तुहें मेरने बौहत प्यार कित्या, कने ये बी विश्वास कराँ ये भई हऊँ पिता रिया तरफा ते आईरा। 28हऊँ पिता परमेशरा ते प्रगट हुईने इस संसारा च आया; हुण फेरी भीं, हऊँ इस संसारा जो छड्डिने पिता परमेशरा लौ जाईराँ।”

29तिसरयां चेलयां गलाया, “देख तू हुण बगैर कहाणियां ते साफ-साफ गलाया राँ। 30हुण अहें समझीगे भई तू सब किछ जाणाँ, हुण किसी जो बी तेरते किछ बी पुछणे री जरूरत नीं, काँह्भई इसते अहांजो ये विश्वास हुईग्या भई तू परमेशरा रिया तरफा ते आईरा।”

31यीशुये तिन्हांजो जबाब दित्या, “क्या तुहांजो हुण विश्वास हुईग्या? 32सुणो, सै बगत आया रां, पर आईग्या, ताहलूं जे तुहां सब्बीं लग-लग हुई जाणा, मिन्जो कल्हे जो छड्डिने, अपणे-अपणे घराँ जो चली जाणा। फेरी भीं हऊँ कल्हा निआं, काँह्भई मेरा पिता मेरने सौगी आ। 33मैं तुहांजो ये सब गल्लां इस खातर बोलियां भई तुहांजो मेरते शान्ति मिलो। संसार तुहांजो दुख देआं, हिम्मत रखा! मैं संसारा जो जित्तिल्या।”

Právě zvoleno:

यूहन्ना 16: KFSNT

Zvýraznění

Kopírovat

Porovnat

Sdílet