गलातियां 6
6
इक दुज्जे री सहायता करा
1मेरे साथी विश्वासियो, तुहां चते जे कोई माहणु कोई पाप करदे हुये पकड़ोई जाओ, तां तुहें सै जे आत्मिक लोक ये नम्रता सौगी तिसजो धर्मा रे रस्ते पर बापस लौणे च मदद करा। पर खुद बी सावधान रौआ भई किति तुहें बी किसी इम्तेहाना च नीं पैई जाओ। 2तुहांजो इक्की दूये री मदद करनी चाहिन्दी ताहली जे तुहां चते कोई दुखां च हो, इस तरिके ने तुहें मसीह री व्यवस्था जो पूरा करगे।
3जे कोई माहणु खास नीं हुन्दे हुये बी खुद अप्पूँजो खास समझां तां सै अप्पूँजो धोखा देआं। 4पर अपणे कम्मां री जाँच-पड़ताल़ हरेक माहणुये जो खुद करना चाहिन्दा, येढ़ा करने ते तिस्सो खुद अप्पूँ पर किसी दूये ने फर्क कित्ते बगैर, गर्व करने रा अवसर मिलणा। 5काँह्भई हर इक माहणु अपणे व्यवहारा खातर खुद जिम्मेवार आ।
6तिने जे परमेशरा रा वचन सिक्खीरा, तिस्सो बधिया चीजां तिसजो देणी चाहिन्दा सै जे तिस्सो सखां। 7धोखा नीं खावा; परमेशरा जो कोई बुद्धु नीं बणाई सकदा, काँह्भई माहणुये तेढ़ा जे बाहणा, तेढ़ा इ लुणना। 8काँह्भई सै जे अपणे पापी स्वभावा रे मुतावक जीआं, तिसरा तिसरे पापी स्वभावा रिया वजह ने नाश हूणा, पर सै जे पवित्र आत्मा रिया अगुवाईया च चलां, तिस पवित्र आत्मा रिया वजह ने अनन्त जीवन पाणा।
9इस खातर औआ अहें भलाई करदे कदीं मनी थक्को, काँह्भई जे अहें भलाई करदे इ रैहन्गे, तां सही बगत औणे पर अहांजो तिसरा ईनाम मिलणा। 10इस खातर तियां जे कोई मौका मिलो, अहांजो सारयां ने भलाई करनी चाहिन्दी, खास कर अपणे विश्वासी भाईयां सौगी।
आखरी चेतावनी कने नमस्कार
11देक्खा, मैं खुद अपणे हत्थां ने तुहांजो कितणे बड्डे-बड्डे अखराँ च लिखिरा। 12जितने लोक यहूदियां जो खुश करना चांये, सै तुहांजो खतना कराणे रे खातर मजबूर कराँ ये, पर सै येढ़ा सिर्फ इस खातर कराँ ये ताकि तिन्हांजो मसीह रे क्रूसा रिया वजह ने सताव नीं झेलणे पौ। 13काँह्भई सै खुद बी तिन्हांरा जे खतना हुई चुक्कीरा, व्यवस्था रा पालन नीं करदे, पर फेरी बी सै चाँये भई तुहें खतना कराओ ताकि सै इसा गल्ला पर घमण्ड करी सक्को भई तुहांरा खतना तिन्हां रिया वजह ने हुईरा।
14पर येढ़ा नीं हो भई हऊँ सिर्फ अहांरे प्रभु यीशु मसीह रे क्रूसा ते इलावा किसी होरी गल्ला पर घमण्ड करूँ। काँह्भई तिस क्रूसा रिया वजह ने हऊँ संसारा रे खातर कने संसार मेरे खातर मरया। 15काँह्भई नांत खतने रा कोई महत्व हाया कने नां बगैर खतने रा, जे महत्व हाया तां सै नौंईयां सृष्टिया रा। 16कने जितने लोक इस नियमा रा पालन कराँ ये तिन्हां सब्बीं जो परमेशरा शान्ति देणी कने आशीषित करना। सै परमेशरा रे लोक ये।
17चिट्ठिया जो खत्म करदे हुये हऊँ तुहांजो विनती कराँ भई हुण मिन्जो कोई होर दुख मता देन्दे, काँह्भई सै दाग जे मेरे शरीरा पर ये सै ये दस्सां ये भई हऊँ यीशुये रा दास आ। 18मेरे साथी विश्वासियो, अहांरे प्रभु यीशु मसीह रा अनुग्रह तुहां सब्बीं सौगी रौ। आमीन।
Právě zvoleno:
गलातियां 6: KFSNT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
This work is licensed under Creative Commons Attribution-ShareAlike 4.0 License.