प्रेरितां 22
22
भीड़ा रे सामणे पौलुसा रा भाषण
1“हे भाईयो कने पित्रो मेरा जवाब सुणा, सै जे माह हुण तुहांरे सामणे देणा।”
2सै ये सुणी ने भई इस अहां ने इब्रानी भाषा च गलाणा, कने बी चुप हुईगे। तां तिने गलाया :
3“हऊँ त यहूदी माहणु आ, मेरा जन्म किलिकिया प्रदेशा रे तरसुस नगरा च हुईरा; पर इस नगरा च गमलीएल रे पैराँ च बैठीने पढ़या, कने पूर्वजां री व्यवस्था जो खरिया रितिया पर सखाया गया; कने परमेशरा खातर येढ़ि लगाईरी थी, तेढ़ी जे तुहां सब्बीं जो आज्ज लगी री। 4मैं तां क्या माहणु क्या जनानां दुईं जो बन्ही-बन्हीने जेलखान्ने च पाईने, यीशु मसीह पर विश्वास करने औल़यां जो येत्थी तका सताया भई तिन्हांजो मरवाई बी दित्या। 5इस गल्ला खातर महायाजक कने महांसभा रे सब बजुर्ग गवाह ये भई तिन्हांते हऊँ यहूदी भाईयां रे नौआं पर चिट्ठियां लईने दमिश्क नगरा जो जाया राँ था, भई सै जे तित्थी हो तिन्हांजो बी सजा दिलाणे खातर बन्हीने यरूशलेम जो ल्याऊं।
अपणे मन बदलने रा बर्णन
(प्रेरितां 9:1-19; 26:12-18)
6“ताहली जे हऊँ चलदे-चलदे दमिश्क नगरा रे नेड़े पुज्जया, तां येढ़ा हुआ भई दपैहरा रे बगता इकदम इक बड्डी ज्योति अम्बरा ते मेरे चऊँ पासयां चमकी। 7कने हऊँ धरतिया पर पई गया कने येढ़ि अवाज़ सुणी, ‘हे शाऊल, हे शाऊल, तू मिन्जो काँह सताया राँ?’ 8मैं जवाब दित्या, ‘हे प्रभु, तू कुण आ?’ तिने मेरने गलाया, ‘हऊँ नासरत नगरा च रैहणे औल़ा यीशु आ, तिस्सो जे तू सताया राँ?’
9“मेरे साथियें ज्योति चमकदी त देखी, पर सै जे मेरने गलाया राँ था तिसरी अवाज़ सुणी, पर सै ये नीं पैहचाणी पाये भई क्या बोल्या। 10तां मैं गलाया, ‘हे प्रभु, हऊँ क्या करूँ?’ प्रभुये मेरने गलाया, ‘उट्ठीने दमिश्क नगरा च जा, कने जो किछ तेरे करने खातर ठहराईरा तित्थी तिज्जो सै सब दस्सीत्या जाणा।’ 11तां जे तिस ज्योतिया रे तेज्जा रिया वजह ने मिन्जो किछ नीं दुस्या, तां मैं अपणे साथियां रे हत्थां पकड़ीने दमिश्क नगरा जो आया।
12“तां हनन्याह नौआं रा व्यवस्था रे मुतावक इक परमेशरा रा डर मनणे औल़ा माहणु, सै जे तित्थी रैहणे औल़यां सब यहूदियां च ईज्जतदार था, मेरले आया, 13कने खड़े हुईने मेरने गलाया, ‘हे भाई शाऊल, फेरी देखणे लग।’ तिस इ घड़िया हऊँ तिस्सो देखणे लायक हुईग्या।
14“तां तिने गलाया, ‘अहांरे पूर्वजां रे परमेशरे तिज्जो इस खातर ठहराईरा भई तू तिसरिया इच्छा जो जाणो, कने तिस धर्मिये जो देखो कने तिसरे मुँआं ते गल्लां सुणो। 15काँह्भई तू तिसरिया दुखा ते सब्बीं माहणुआं रे सामणे तिन्हां गल्लां रा गवाह हूणा सै जे तैं देख्या कने सुणेया। 16हुण देर काँह करया राँ? उट्ठ बपतिस्मा लै, कने यीशु मसीह पर विश्वास कर ताकि परमेशर तेरे पाप माफ करो’।”
अन्यजातियां च प्रचार
17“ताहली जे हऊँ फेरी यरूशलेम च आईने मन्दरा च प्राथना करया राँ था, तां मैं इक दर्शणा च, 18तिस्सो देख्या भई सै मेरने गलाया राँ, ‘छोड़े करीने यरूशलेम ते झट निकल़ी जा; काँह्भई तिन्हां मेरे बारे च तेरी गवाही नीं मन्नणी।’
19“मैं गलाया, ‘हे प्रभु, सै त अप्पूँ जाणाँ ये भई हऊँ तेरे पर विश्वास करने औल़यां जो जेलखान्ने च पान्दा कने जगें-जगें यहूदी सभा घर च कुटावां था। 20तां जे तेरे गवाह स्तिफनुसा रा खून बगया राँ था तां हऊँ बी तित्थी खढ़िरा था कने इसा गल्ला च सहमत था, कने तिस्सो मारने औल़यां रे कपड़यां री रखवाली करया राँ था।’ 21कने प्रभु यीशुये मेरने गलाया, ‘चली जा : काँह्भई माह तिज्जो अन्यजातियां ला दूरा-दूरा जो भेजणा।’ ”
22लोक इसा गल्ला तका तिसरी सुणदे रये तां बड्डिया अवाज़ा च रड़ाये, “येढ़े माहणुये जो खत्म करो इसरा ज्यूंदा रैहणा ठीक निआं।” 23ताहली जे सै रड़ांदे कने कोट सट्टदे कने गुस्सा जाहिर करने रे खातर अम्बरा च धूड़ डुवांदे रै; 24तां पलटना रे सरदारे गलाया, “इस्सो गढ़ा च लई जाओ, कने कोड़े मारीने पता लाओ, भई हऊँ जांणूं भई लोक किस वजह ते इसरे विद्रोहा च येढ़े रड़ाया रायें।”
25ताहली जे तिने तिस्सो चमड़े रिया पेट्टिया ने बन्हया, तां पौलुसे तिस सुबेदारा जो सै जे सौगी खढ़िरा था, गलाया, “क्या ये ठीक आ भई तुहें इक्की रोमी माहणुये जो, कने सै बी बिणा दोष साबित हुये, कोड़े मारो?” 26सुबेदारे ये सुणी ने पलटना रे सरदारा ला जाईने गलाया, “तू ये क्या करया राँ? ये तां रोमी माहणु आ।”
27तां पलटना रे सरदारे तिसला आई ने गलाया, “मिन्जो दस्स क्या तू रोमी आ?” तिने गलाया, “हाँ।” 28येढ़ा सुणी ने पलटना रे सरदारे गलाया, “मैं तां रोमी हुणे रा पद मते पैसे देईने लईरा।” पौलुसे गलाया, “हऊँ तां जन्मा तेई रोमी आ।” 29तां सै जे लोक परखणे लगे थे, सै ताहलूं इ तिसला ते हटीगे; कने पलटना रा सरदार बी येढ़ा जाणीने भई ये रोमी आ कने मैं तिस्सो बन्हीरा डरी गया।
बड्डिया पंचैती रे सामणे पौलुस
30दुज्जे दिन तिने असली गल्ल जाणने रिया इच्छा ते भई यहूदी तिस पर काँह दोष लाया रायें, तिसरे बन्धन खोल्लीते; कने मुखियायाजकां कने सारी महासभा जो कट्ठा हुणे रा हुक्म दित्या, कने पौलुसा जो थल्ले नेईने तिन्हांरे सामणे खड़ा करित्या।
Právě zvoleno:
प्रेरितां 22: KFSNT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
This work is licensed under Creative Commons Attribution-ShareAlike 4.0 License.