प्रेरितां 11
11
पतरसा रे जरिये अपणे कम्मां रा स्पष्टीकरण
1फेरी प्रेरितें कने होर विश्वासी भाईयें सै जे यहूदिया प्रदेशा रे कई लाकयां च रैयां थे ये सुणया, भई अन्यजातियां बी परमेशरा रे वचना पर विश्वास करी लरा। 2इस खातर तां जे पतरस यरूशलेम च आया, तां खतना कित्तिरे लोक तिसने बहस-बाजी करने लगे, 3“तेरा सिर्फ होरीं जातिया रे लोकां ले जाणा ही गल़त नींआ, पर तिन्हां सौगी खाणा बी गल़त आ।”
4तां पतरसे तिन्हांजो शुरु ते बारो-बरतिया बोलीने सुणाया: 5“हऊँ याफा नगरा च प्राथना करया राँ था, कने बेसुध हुईने इक दर्शण देख्या भई इक बड्डिया चादरा साई चऊँ कुणयां ते लटकाई रा, अम्बरा ते उतरी ने मेरले आया। 6तां जे मैं तिस पर ध्यान कित्या, तां तिसच धरतिया रे चऊँ खुराँ औल़े कने जंगला रे पशु कने धरतिया पर रगड़ीने चलने औल़े जन्तु कने अम्बरा रे पंछी देखे; 7कने ये अवाज़ सुणी, ‘हे पतरस उट्ठ, मार कने खा।’ 8मैं गलाया, ‘नां प्रभु, नां; काँह्भई कोई अपवित्र कने अशुद्ध चीज़ मेरे मुँआं च कदीं मनी गईरी।’ 9इसरे जवाबा च अम्बरा ते दुज्जी बार अवाज़ आई, ‘जो किछ परमेशरे शुद्ध बणाईरा, तिस्सो अशुद्ध मत बोलदा।’ 10तिन्न बार येढ़ा इ हुआ; तां सब किछ अम्बरा परा खंजोईग्या।
11“फेरी ताहलूं इ तिन्न माहणु सै जे कुरनेलियुसे कैसरिया नगरा ते मेरला भेज्जीरे थे, तिस घरा च तिसच जे अहें रुकीरे थे, आईने खड़ीगे। 12तां पवित्र आत्मे मिन्जो तिन्हांने बिणा शक कित्ते जाणे जो गलाया, कने छे भाई बी मेरे सौगी-सौगी आये; कने अहें तिस माहणुये रे घरा जो गये। 13तिने अहांजो दस्या, भई तिने इक्की स्वर्गदूता जो अपणे घरा च खढ़िरा देख्या तिने जे तिसने गलाया, ‘याफा च माहणु भेज्जीने शमौना जो तिस्सो जे पतरस बोलां ये, सद्दी ले। 14तिस तुहांजो येढ़ियां गल्लां बोलणियां, तिन्हांते जे तू कने तेरे घरा रे सारे लोक परमेशरा बचाणे।’
15“ताहली जे हऊँ गल्लां करने लगया, तां पवित्र आत्मा तिन्हां परा तिसा इ रितिया ते तियां इ उतरया तियां जे शुरु च पिन्तेकुस्त रे त्योहारा पर अहां पर उतरया था। 16तां मिन्जो प्रभुये रा ये वचन याद आया; सै जे तिने गलाया, ‘यूहन्ने त पाणिये ने बपतिस्मा दित्या, पर तुहां पवित्र आत्मा ते बपतिस्मा पाणा।’
17“इस खातर तां जे परमेशरे तिन्हांजो बी सैई दान दित्या, सै जे अहांजो प्रभु यीशु मसीह पर विश्वास करने ते मिलया था; तां हऊँ कुण था सै जे परमेशरा जो रोकी सकुं?” 18येढ़ा सुणी ने यहूदी विश्वासी चुप रै, कने परमेशरा री बडयाई करीने बोलणे लगे, “तां परमेशरे अन्यजातियां जो बी अनन्त जीवना खातर मन फराणे रा दान दित्तिरा।”
अन्ताकिया री कलीसिया
19स्तिफनुस रे मारे जाणे ते बाद बौहत सारे विश्वासी लोक यरूशलेम छड्डिने बिखरी गरे थे कने फिरदे-फिरदे फीनीके प्रदेश कने साइप्रस टापुये कने अन्ताकिया नगरा च पुज्जे; पर यहूदियां जो छड्डिने किसी होरी जो परमेशरा रा वचन नीं सुणांदे थे। 20पर तिन्हां चते किछ विश्वासी साइप्रसवासी कने कुरेनी वासी थे, सै अन्ताकिया नगरा च आईने यूनानियां जो बी प्रभु यीशुये रिया खुशखबरिया रियां गल्लां प्रचार करने लगे। 21परमेशरा रा सामर्थ तिन्हां पर था, कने बौहत सारे अन्यजातियां रे लोकें तिन्हांरे सन्देशा पर विश्वास कित्या कने प्रभु यीशुये री तरफ फिरे। 22ताहली जे तिन्हांरी चर्चा यरूशलेम रे विश्वासियें सुणी, तां तिन्हें बरनबास जो अन्ताकिया नगरा च भेजित्या। 23सै तित्थी पुज्जी ने कने परमेशरा रा अनुग्रह देखीने खुश हुआ, कने सबनीं जो ये उपदेश दित्या भई तन-मन लाईने प्रभुये ने चिपकी रे रौआ। 24सै इक भला माहणु था, कने पवित्र आत्मा कने विश्वासा ते भरीरा था; कने होर बौहत सारे लोक प्रभुये च आईगे। 25फेरी बरनबास अन्ताकिया नगरा जो छड्डिने शाऊला जो टोलणे खातर तरसुसा नगरा जो चलिग्या। 26कने ताहली जे सै तिसने मिलया तां तिस्सो अन्ताकिया नगरा जो लैई आया; कने येढ़ा हुआ भई पौलुस कने बरनबास इक्की साल्ला तका कलीसिया ने सौगी मिलदे कने बौहती लोकां जो प्रभु यीशु मसीह रा उपदेश देन्दे रै; कने सब्बीं ते पैहले अन्ताकिया बिच लोकें चेलेयां जो मसीही बोल्या।
27तिन्हां दिनां च किछ विश्वासी सै जे भविष्यवक्ता थे यरूशलेम ते अन्ताकिया च आये। 28तिन्हां चते अगबुस नौआं रे इक्की भविष्यवक्ते खड़ीने पवित्र आत्मा रिया प्रेरणा ते ये दस्या भई संसारा रे बौहत सारयां देशां च नकाल़ पौणा, कने सै नकाल़ कलौदियुस बादशाह रे बगता च हुया। 29तां चेलयां ये फैसला कित्या भई सब अपणे-अपणे धना रे मुतावक यहूदिया प्रदेशा च रैहणे औल़े मसीह विश्वासिया रे खातर अपणिया सामर्थय रे मुतावक सहायता करें। 30तिने येढ़ा इ कित्या; कने बरनबास कने शाऊला रे हथें प्राचीनां ला किछ पैसा भेजित्या।
Právě zvoleno:
प्रेरितां 11: KFSNT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
This work is licensed under Creative Commons Attribution-ShareAlike 4.0 License.