2 कुरिन्थियों 13
13
आखरी चेतावनी
1हुण हऊँ तिज्जी बार तुहांले आईराँ; तियां जे पवित्रशास्त्रा च लिखिरा भई दो या तिन्न गबाहां रे मुँआं ते हर इक्की गल्ला री सच्चाई साबित कित्ती जाणी। 2ताहली जे दुज्जी बार हऊँ तुहांजो था, मैं तुहांजो सावधान कित्या था कने हुण तां जे हऊँ तुहां ते दूर आ, हऊँ तुहांजो भीं ते सावधान कराँ, भई जे हऊँ फेरी भीं तुहांले औंगा, तां तिन्हे जे पैहले पाप कित्तिरे कने सै जे पाप करी रायें तिन्हां पर मांह दया नीं करनी।
3येढ़ा हऊँ इस खातर बोलीराँ भई तुहें इसा गल्ला रा सबूत चाँये भई हऊँ मसीह रे खातर बोलीराँ। ताहली जे मसीह तुहांजो ठीक कराँ तां सै तुहांरे प्रति कमजोर निआं, बल्कि तिसरा सामर्थ तुहांरे बिच काम्म कराँ। 4हलांकि मसीह कमजोर था ताहली जे तिस्सो क्रूसा पर लटकाया गया था, पर हुण सै परमेशरा रिया सामर्था रे जरिये जीवित आ। अहें कमजोर ये तियां जे मसीह था, पर तुहां देखणा भई अहां परमेशरा रिया सामर्था ने जीणा तियां जे मसीह जीवित आ।
5अप्पूँजो परखीने देक्खा भई तुहांरा विश्वासा सच्चा भई नीं। जे तुहें इम्तेहाना च पास हुआं ये तां तुहें जाणना भई यीशु मसीह तुहांरे अन्दर वास करी रां; जे येढ़ा निआं, तां तुहें इस इम्तेहाना च फेल हुये। 6मिन्जो भरोसा भई तुहां ये जाणना भई अहें इस इम्तेहाना च किस बी तरिके ने फेल नीं हुये।
7अहें परमेशरा ने प्राथना कराँ ये भई तुहें कोई बुराई नीं करो; इस खातर नीं भई अहें इस इम्तेहाना च पास ओ, बल्कि इस खातर भई तुहें सैई करा सै जे ठीक आ। चाये अहें इस इम्तेहाना च फेल हुन्दे हुये काँह नीं दिखो। 8हकीकत च अहें सच्चाईया रे बिरोधा च किछ करी नीं सकदे, पर अहें त सै जे कराँ यें, सच्चाईया रे खातर इ कराँ ये।
9ताहली जे अहें कमजोर ये कने तुहें बलबन्त ये, तां अहें खुश ये, कने अहें इसरे खातर इ प्राथना कराँ ये, ताकि तुहांरा स्वाभाव बदलदा जाओ। 10इस खातर तुहां ते दूर हुन्दे हुये बी हऊँ इन्हां गल्लां जो तुहांजो लिखिराँ ताकि ताहली जे हऊँ तुहांले आऊं, तां मिन्जो प्रभुरे जरिये दित्तिरे अधिकारा ने तुहांजो नुक्शान पहुँचाणे नीं बल्कि तुहांरी आत्मिक बढ़ौतरिया रे खातर तुहांजो सख्ती नीं बरतणी पौ।
शुभकामनां कने आशीर्वाद
11हुण आखिर च मेरे साथी विश्वासियो, हऊँ तुहांते बिदा लेआं। अपणा व्यवहार ठीक रखा; तियां इ करदे रौआ तियां जे मैं करने जो गलाया; इक्को जेआ सोच्चा; शान्तिया ने रौआ; कने परमेशर सै जे शान्ति कने प्यार देआं तुहांजो सौगी रैहणा। 12इक्की दुज्जे ने गल़े लगीने नमस्कार करा।
13सारे पवित्र लोक तुहांजो नमस्कार कराँ ये।
14प्रभु यीशु मसीह रा अनुग्रह, परमेशरा रा प्यार कने पवित्र आत्मा री सहभागिता तुहां सब्बी ने सौगी बणीरी रौ।
Právě zvoleno:
2 कुरिन्थियों 13: KFSNT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
This work is licensed under Creative Commons Attribution-ShareAlike 4.0 License.