2 कुरिन्थियों 10
10
पौलुसा रा अधिकार
1हऊँ पौलुस मसीह री नम्रता कने कोमलता च तुहांजो विनती करी रां, हलाँकि मैं महसूस कित्या भई तुहें सोच्चां ये हऊँ तुहांरे सामणे डरपोक आ कने ताहली जे तुहांते दूर आ हऊँ निडर आ। 2किछ लोक ये बोलां ये भई अहें संसारा रे लोकां साई व्यवहार कराँ ये। इस खातर ताहली जे हऊँ तित्थी आऊँ, तां हऊँ उम्मीद कराँ भई हऊँ तिन्हांरे प्रति बीरता दस्सूं। हऊँ तुहांजो ये विनती कराँ भई ताहली जे हऊँ आऊँ, तां तुहांरे प्रति तेढ़ा व्यवहार नीं करने पौ।
3हलाँकि अहें बी त इसी संसारा च रैं, पर अहें अपणे दुश्मणा ने संसारा रे लोकां साई नीं लड़दे। 4काँह्भई तिन्हां हत्थियाराँ ने जे अहें लड़ाई लड़ां ये, सै संसारिक नींये, बल्कि तिन्हां च गढ़ां जो तहस-नहस करने रे खातर परमेशरा री शक्ति शामिल इ।
5कने इस खातर अहें लोकां रियां गल्लां रा कने तिस हरेक बिरोधा रा, सै जे परमेशरा रे ज्ञाना रे बिरोधा च खढ़िरा खण्डन कराँ ये; कने हर इक भावना जो कैद करीने मसीह रा आज्ञाकारी बणाई दें। 6ताहली जे तुहें पूरी तरह मसीह रे आज्ञाकारी हुई जांगे, तां हर तरह रा हुक्म नीं मनणे औल़े जो अहां सजा देणी।
पौलुस रे अधिकार
7तुहें सिर्फ सै जे सामणे आ तिसरे इ बाहरले रुपा जो देखां ये। जे किसी रा अपणे बारे च ये भरोसा भई सै मसीह रा, तां सै ये बी जाणी लो, भई तियां जे सै मसीह रा तियां इ अहें बी मसीह रे। 8कने जे हऊँ अपणे तिस अधिकारा रे बारे च किछ होर घमण्ड करूँ, सै जे प्रभुये तुहांरे विश्वासा जो बिगाड़ने रे खातर नीं बल्कि तुहांजो विश्वासा च मजबूत करने खातर अहांजो दित्तिरा, तां इसरे खातर हऊँ शर्मिन्दा निआं।
9हऊँ तुहांजो अपणी चिट्ठियां ने डराणे री कोशिश नीं करी रां। 10काँह्भई किछ लोक बोलां ये, “पौलुस रियां चिट्ठियां त गम्भीर कने प्रभावशाली आ; पर सै दिखणे च कमजोर आ कने तिसरी गल्ल बेकार इ।”
11येढ़यां लोकां जो समझी लेणा चाहिन्दा भई ताहली जे अहें दूर रैं कने अहें अपणी चिट्ठियां च सै जे लिखां ये तिसरे बिच कोई फर्क नीं हुन्दा, ताहली जे अहें तुहां सौगी हुआं ये तां अहें क्या करगे तिसच बी कोई फर्क नींआ।
पौलुस रे अधिकाराँ री सीमा
12अहें तिन्हां किछ लोकां सौगी अपणी तुलना करने री हिम्मत नीं करदे, सै जे खुद अप्पूँजो बड़ा खास समझां ये; कने अप्पूँजो मापदण्ड समझीने अप्पूँ चियें परखां ये, कने इक दुज्जे ने अपणी तुलना कराँ ये, सै मूर्ख ये।
13अहां किसी गल्ला रे खातर घमण्ड नीं करना तिसरे बारे च जे अहांजो घमण्ड करने रा अधिकार नींआ, पर अहां सिर्फ तिस कम्मा रे बारे च घमण्ड करना तिस्सो करने खातर जे परमेशरे अहांजो भेज्जिरा, कने तुहें तिस कम्मा रा हिस्सा ये। 14अहांजो जितना घमण्ड करना चाहिन्दा अहें उसते जादा नीं करदे, तियां जे भई अहें खुशखबरिया जो तुहांले लेईने नीं आईरे पर आखिर च अहें इ तुहांले मसीह री खुशखबरी लेईने आये थे।
15अहें सै काम्म जे दुज्यां कित्तिरा तिसरे बारे च घमण्ड नीं करदे, तियां जे भई अहें खुद सै काम्म कित्तिरे। पर अहांरी आशा येई भई तियां-तियां जे तुहांरा विश्वास बधदा जाणा, तियां इ तुहांरे बिच अहांरे अपणे कम्मां री सीमा बौहत बधणी, 16ताकि अहें तुहांरिया सीमां ते परे दूर-दूर इलाकयां च बी खुशखबरिया रा प्रचार करी सक्को। काँह्भई अहें नीं चाहन्दे भई अहें दुज्जेयां लोकां रे जरिये दुज्जे इलाके च पैहले कित्तिरे कम्मां पर घमण्ड करो।
17तियां जे पवित्रशास्त्र बोलां, जे तुहें घमण्ड करना चाँये तां सिर्फ प्रभुये रे बारे च घमण्ड करा। 18काँह्भई सै जे अपणी बडयाई कराँ, सै नीं पर तिसरी बडयाई जे प्रभु कराँ, सैई परमेशरा रे जरिये ग्रहण कित्या जां।
Právě zvoleno:
2 कुरिन्थियों 10: KFSNT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
This work is licensed under Creative Commons Attribution-ShareAlike 4.0 License.