1 कुरिन्थियों 11
11
1तुहें मेरे साई चाल चला, तियां जे हऊँ मसीह रे साई चाल चलां।
अराधना च सिर ढकणा
2हऊँ तुहांरी तारीफ कराँ, काँह्भई तुहें मिन्जो हर वगत याद करदे रैं; कने सै जे शिक्षायें मैं तुहांजो दित्ति रियां, तिन्हांरा सावधानिया ने पालन करया राँये। 3पर हऊँ चांह भई तुहें ये जाणी लो भई हरेक माहणुये रा सिर मसीह आ, कने जनानां रा सिर माहणु आ, कने मसीह रा सिर परमेशर आ। 4सै जे माहणु सिर ढक्कीने प्राथना या भविष्यवाणी कराँ, सै मसीह रा अपमान कराँ सै जे सिर आ।
5पर सै जे जनाना बिणा सिर ढक्कीने प्राथना या भविष्यवाणी कराँ इ, सै अपणे सिरा रा यनि अपणे पतिये रा अपमान कराँ इ, काँह्भई ये गंजी हुणे रे बराबर इ। 6जे जनाना चादरु नीं ओड्डो तां बाल़ बी कटाई लो; जे जनाना खातर बाल कटाणा या सिर मुंडवाणा अपमान्ना री गल्ल इ, तां तिसाजो चादरु ओड्डणा चाहिन्दा।
7इक्की माहणुये जो अपणा सिर ढकणा ठीक निआं, काँह्भई सै परमेशरा रे स्वरूपा च बणाया गईरा कने तिसरी महिमा इ; पर जनाना माहणुये री महिमा इ। 8काँह्भई पैहला माहणु जनाना ते नीं आया, पर पैहली जनाना माहणुये ते आई; 9कने माहणु जनाना खातर नीं बणाया गया, पर जनाना माहणुये खातर बणाईरी। 10इस खातर स्वर्गदूतां रिया वजह ते जनाना जो अपणी अधीनता दिखाणे खातर अपणे सिरा जो ढक्कीने रखणा चाहिन्दा।
11फेरी बी प्रभु च जनाना माहणुये ते लग नीं कने माहणु जनाना ते लग नींआ। 12हलाँकि परमेशरे पैहलिया जनाना जो पैहले माहणुये ते बणाईरा, पर हुण जनाना माहणुये जो जन्म देईं; कने सब चिज़ां परमेशरा तेई हईयां। 13तुहें खुद बचार करा: क्या जनाना जो बिणा सिर ढक्के परमेशरा ते प्राथना करना ठीक आ? 14क्या प्रकृति खुद तुहांजो ये शिक्षा नीं देन्दी भई लम्बे बाल रखणा माहणुये रे खातर अपमान्ना री गल्ल इ, 15जबकि जनाना रे खातर लम्बे बाल़ रखणा शोभा इ? काँह्भई बाल तिसाजो चादरुये रे रुपा च दित्तिरे। 16पर जे कोई इस बारे च बैहस करना चाओ, तां सै ये जाणी लो भई नां अहांरी कने नां परमेशरा रिया कलीसियां री ये प्रथा इ।
प्रभु-भोज्जा रे बारे च
(मत्ती 26:26-29; मरकुस 14:22-25; लूका 22:14-20)
17पर ये हुक्म देन्दे हुये हऊँ तुहांजो नीं सराँदा, इस खातर भई तुहांरे कट्ठे हुणे ते भलाई नीं, पर नुक्शान हुआं। 18काँह्भई पैहले त हऊँ ये सुणां, भई तंजे तुहें कलीसिया च अराधना करने खातर कट्ठे हुआं ये, तां तुहां च फूट इ, कने हऊँ इस पर थोड़ा-थोड़ा विश्वास बी कराँ। 19पर बटवारा बी तुहां च जरूर हुंगा, इस खातर भई सै लोक जे तुहां च खरे निकली रे सै सामणे आई जाओ!
20ताहली जे तुहें अहांरे प्रभु यीशु मसीह रिया मौती जो याद करने खातर कट्ठे हुआं ये, तां ये प्रभु भोज खाणे रे खातर नीं, 21काँह्भई खाणे रे बगत इक दुज्जे ते पैहले अपणा खाणा खाई लेआं, तां कोई भूखा रैआं कने कोई मतवाला हुई जां। 22क्या खाणे-पीणे रे खातर तुहांरे घर नींये? या परमेशरा री कलीसिया जो घटिया जाणाँ ये, कने तिन्हांले जे किछ निआं तिन्हांजो बेज्जत कराँ ये? हऊँ तुहांजो क्या बोलूं? क्या इसा गल्ला च तुहांरी तारीफ करूँ? नां, हऊँ तारीफ नीं करदा।
23काँह्भई मैं सै जे प्रभुये ते पाया सैई तुहां तक पहुँचाया: भई प्रभु यीशु तिसा राति जे पकड़वाया गया, रोटी लई, 24कने धन्यवाद करीने सै तोड़ी कने तिने बोल्या, “ये मेरी देह इ, सै जे तुहां खातर इ : मिन्जो याद करने खातर येढ़ा करया करो।” 25इसा इ रितिया ते तिने तिसते बाद कटोरा बी लया कने गलाया, “ये कटोरा मेरे खून्ना च नई वाचा ई: ताहली जे कदीं पीओ, तां मिन्जो याद करने खातर येढ़ा इ करया करा।”
26काँह्भई ताहली जे कदीं तुहें ये रोटी खांये कने इस कटोरे चते पींये, तां तुहें प्रभुये रे औणे तक तिसरिया मौती रा प्रचार कराँ ये।
27इस खातर सै जे कोई गल़त तरिके ने प्रभुये री रोटी खाओ या तिसरे कटोरे चते पीओ, तां सै प्रभुये री देह कने खून्ना रा दोषी हूणा। 28इस खातर माहणु अप्पूँजो परखी लौ कने इसा रितिया ते इसा रोटिया चते खाओ, कने इस कटोरे चते पीओ। 29काँह्भई सै जे खान्दे-पीन्दे बगता प्रभुये री देहा जो नीं पछयाणो, तिसरे इस खाणे कने पीणे ते परमेशरा तिसजो सजा देणी। 30इस वजह ते तुहांरे बिच बौहत सारे लोक कमजोर कने रोगी ये, कने बौहत सारे मरी बी गये। 31जे अहें अप्पूँजो परखदे तां दण्ड नीं पान्दे। 32पर प्रभु अहांजो सजा देईने अहांरी ताड़ना कराँ, इस खातर भई अहें संसारा सौगी सजा रे भागी नीं हो।
33इस खातर, अरे मेरे साथी विश्वासियो, तंजे तुहें खाणे खातर कट्ठे हुआं ये, तां इक्की दुज्जे खातर इन्तजार करा। 34जे कोई भूखा हो तां अपणे घरा च खाई लो, ताकि तुहांरा कट्ठा हूणा सजा री वजह नीं बणो। बाकी गल्लां जो हऊँ आईने ठीक करगा।
Právě zvoleno:
1 कुरिन्थियों 11: KFSNT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
This work is licensed under Creative Commons Attribution-ShareAlike 4.0 License.