Secunnu Matteu 19
19
1E successi, ca comu Gesù finiu sti discursi, partiu di Galilia, ed arrivau a li confini di la Giudia addabanna lu Giurdanu,
2E cci jeru d’ appressu turbi assai, e li sanau ddà stissu.
3E jeru a truvarlu li Farisei pri tentarlu, e cci dissiru: È licitu a l’ omu ripudiari la mugghieri, pri qualunqui motivu?
4Iddu rispusi, e cci dissi: Nun aviti liggiutu, ca cui fici in principiu l’ omu, li fici masculu e fimmina? e dissi:
5Pri chistu lassirrà l’ omu lu patri, e la matri, e starrà cu so mugghieri, e li dui sarrannu una carni sula.
6Nun sunnu dunca cchiù dui, ma una carni. Ora chiddu, chi Diu junciu, l’ omu nun lu spartissi.
7Chiddi dicinu: Pirchì dunca Mosè ordinau di dari lu libellu di lu ripudiu, e di spartirisi?
8Cci dissi: Pirchì Mosè pri la durizza di lu vostru cori vi permisi di ripudiari li vostri mugghieri: ma in principiu nun fu accussì.
9Iu però vi dicu, ca cui ripudiirrà la sua mugghieri, eccettu pri casu di furnicazioni, e si nni pigghirrà un’ autra, cummetti adulteriu: e chiddu, chi si maritirrà cu la ripudiata, cummetti adulteriu.
10Cci dicinu li discipuli soi: Si chista è la posizioni di l’ omu cu la mugghieri, nun cunveni maritarisi.
11Ed iddu cci dissi: Nun tutti cumprenninu sta palora, ma chiddi, a li quali è statu cuncessu.
12Giacchì cci sunnu eunuchi, ca sunnu nasciuti accussì di la ventri di la matri: e cci sunnu eunuchi, chi sù stati fatti di l’ omini: e cci sunnu eunuchi, ca si sunnu castrati iddi stissi pri causa di lu regnu di li celi. Cui pò cumprenniri cumprennissi.
13Allura cci foru presentati picciriddi, acciocchì cci mittissi di supra li manu, e prigassi. Ma li discipuli l’ arriprinnianu.
14Gesù però cci dissi: Lassati stari li picciriddi, e nun li mpiditi di veniri versu di mia: giacchì di chisti tali è lu regnu di li celi.
15Ed avennucci misu di supra li manu, si nni jiu di ddà.
16Ed eccu unu, ca si cci accustau, e cci dissi: O bonu Maistru, chi farrò iu di bonu pri otteniri la vita eterna?
17Lu quali cci dissi: Pirchì mi dumanni di lu bonu? Unu è bonu, Diu. Perciò si voi arrivari a la vita, osserva li cumannamenti.
18E quali? cci dissi. E Gesù rispusi: Nun ammazzirrai: Nun farrai adulteriu: Nun arrubbirrai: Nun farrai testimonianza fausa:
19Rispetta a to patri, e a to matri, ed ama lu prossimu to comu te stissu.
20Lu giuvini cci dissi: Tutti sti cosi l’ aju osservatu di la prima etati, chi mi manca ancora?
21Gesù cci dissi: Si voi essiri perfettu, va, vinniti chiddu, chi hai, e dunalu a li poviri, ed avirrai un tesoru ’n celu: e veni appressu a mia.
22Avennu lu giuvini ntisi sti palori, si nni jiu afflittu: giacchì avia multi possessioni.
23Ma Gesù dissi a li soi discipuli: In virità vi dicu, ca lu riccu difficilmenti trasirrà ntra lu regnu di li celi.
24E di cchiù vi dicu, ca è cchiù facili, ca un gamiddu passassi pri un funnu d’ agugghia, ca un riccu trasissi ntra lu regnu di li celi.
25Ntisi sti cosi, li discipuli si maravigghiavanu assai, dicennu: E cui dunca si putrà salvari?
26Ma Gesù guardannuli, cci dissi: Pri l’ omini chistu è impossibili: pri Diu però tuttu è possibili.
27Allura Petru rispunnennu, dissi: Eccu ca nui avemu lassatu tuttu, e semu vinuti appressu a tia: chi sarrà dunca di nui?
28E Gesù cci dissi: In virità vi dicu, ca vuautri, ca siti vinuti appressu a mia, a lu tempu di la rigenerazioni, quannu lu Figghiu di l’ omu sidirrà supra lu tronu di la sua maistà, sidirriti puru vuautri supra dudici troni, e giudichirriti li dudici tribù d’ Isdraeli.
29Ed ognunu, chi avrà abbannunata la casa, o li frati, o li soru, o lu patri, o la matri, o la mugghieri, o li figghi, o li tirreni pri amuri di lu nomu miu, ricivirrà centu pri unu, e possedirrà la vita eterna.
30E tanti primi sarrannu ultimi, e tanti ultimi primi.
Právě zvoleno:
Secunnu Matteu 19: SCN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
First published in 1860 and 1861.
