Kejadian 45
45
Yusuf kastau de pu sodara dong kalo de tu Yusuf
45:1-15
1Dengar Yehuda bilang begitu, Yusuf su tra bisa tahan de pu hati depan de pu orang-orang kerja lagi. Jadi, de suru dong smua kluar kas tinggal de deng de pu sodara dong sendiri. Jadi, trada orang lain waktu Yusuf de kastau de pu sodara dong kalo de tu Yusuf, dong pu sodara. 2Habis itu, Yusuf de mnangis hancur sampe orang Mesir yang di luar ruangan tu, dong juga dengar de mnangis. Sampe orang-orang di raja pu istana juga su dengar kabar kalo Yusuf de ada mnangis.
3Trus Yusuf bilang de pu sodara dorang, “Sa ini Yusuf! Bapa betul masi hidup to?” Tapi waktu Yusuf de pu sodara dong dengar de bilang begitu, dong langsung jadi takut skali sampe dong tra bisa buka mulut untuk jawab apa yang Yusuf de tanya. 4Trus Yusuf bilang dorang, “Mari, dekat sa sini!” Trus dong maju ke dekat Yusuf. Yusuf bilang lagi,
“Sa ni Yusuf, kam pu sodara yang waktu itu kam jual ke Mesir. 5Tapi kam jang rasa brat begitu, jang kas sala kam pu diri juga karna su jual sa dulu. Karna Allah De yang kirim sa duluan dari kam, untuk kas slamat orang-orang pu hidup skarang ni. 6Klaparan ni baru dua taun. Nanti trakan ada orang yang bisa tanam ka panen ka, dalam lima taun ke depan ini. 7Itu jadi, knapa Allah bawa sa kesini duluan dari kam, supaya sa bisa liat kam pu hidup deng kam pu anana cucu di bumi ni, trus kas slamat tong pu hidup deng cara luar biasa begini. 8Jadi, bukan kam yang bikin sa sampe kesini, tapi Allah yang bikin sampe sa bisa ada disini. Allah De yang bikin sampe, sa bisa jadi orang penting yang raja de percaya skali. Raja Mesir kasi sa kuasa untuk urus de pu istana deng smua tana Mesir ini.
9Skarang, kam pulang cepat trus bilang begini ke bapa, ‘Bapa pu anak Yusuf bilang begini: Allah su bikin sampe sa jadi orang paling penting di Mesir. Jadi skarang juga, mari datang kesini suda! Jang tunggu lama lagi. 10Bapa nanti tinggal di daera Gosyen, dekat deng saya. Bapa, anana cucu dorang, kambing domba, sapi, deng smua barang apa saja yang bapa punya. 11Kalo bapa su di Gosyen, sa nanti jaga bapa. Klaparan ni masi tetap ada sampe lima taun lagi. Itu jadi, biar sa yang nanti jaga liat bapa pu kluarga smua, deng bapa pu binatang-binatang piara, supaya trakan kurang apapa lagi.’ ”
12Trus Yusuf bilang lagi,
“Skarang kam su liat sendiri to, Benyamin ko juga, sa yang ada bicara ni saya suda, kam pu sodara Yusuf. 13Jadi, kam pigi bilang bapa suda kalo sa ni pu kuasa yang besar skali di Mesir sini. Smua yang kam su liat di Mesir sini juga tu, kastau bapa dia. Baru kam cepat bawa bapa de kesini.”
14Yusuf de langsung polo Benyamin baru de mnangis. Benyamin juga ikut mnangis di Yusuf pu bahu langsung. 15Masi mnangis-mnangis, Yusuf de polo de pu sodara dong smua trus de cium dorang, baru dong mulai crita-crita deng dia.
Yakub deng kluarga dapa suru ke Mesir
45:16-23
16Waktu raja pu satu istana dong dengar kalo Yusuf pu sodara-sodara ada datang, raja deng de pu orang-orang kerja dong juga rasa snang. 17Trus raja Mesir bilang Yusuf begini,
“Suru ko pu sodara dong bikin begini, ‘Taru gandum ni di atas binatang-binatang tu, trus pulang ke Kanaan. 18Jemput kam pu bapa sama orang-orang yang satu ruma deng kam juga, baru pinda kesini. Nanti sa kasi kam tana di Mesir sini yang paling bagus. Karna tana tu de subur jadi, kam bisa dapat hasil yang paling bagus nanti.’
19Trus ko harus bilang dong untuk bikin begini, ‘Bawa kreta brapa dari Mesir sini untuk pigi jemput kam pu anana yang masi kecil deng kam pu istri-istri, jemput juga kam pu bapa baru bawa datang kesini. 20Tra usa rasa sayang deng barang-barang yang kam kas tinggal itu, karna nanti disini kam dapat barang-barang paling bagus yang Mesir punya.’”
21Jadi suda, Yakub#45:21 Yakub ‒ Bahasa Ibrani: Israel. Ada juga di Kejadian 45:28. Liat catatan di Kejadian 37:3. pu anana dong bikin sperti yang raja Mesir printa dong bikin. Yusuf kasi dong kreta sperti yang raja suru, trus de juga kasi dong makanan untuk nanti dong makan di jalan. 22De kasi dong masing-masing pakean baru satu-satu pasang, tapi de kasi Benyamin uang perak 300 deng pakean baru lima stel. 23Yusuf juga kirim kledai jantan spulu deng barang-barang paling bagus di Mesir di atas kledai-kledai itu untuk de pu bapa, waktu dong balik ke Mesir. Baru de kasi kledai betina spulu lagi yang nanti pikul gandum deng roti sama makanan lain juga.
Yakub dapa kastau kalo de pu anak Yusuf masi hidup
45:24-28
24Habis itu smua, Yusuf suru de pu sodara dong pulang baru bilang dong begini, “Kam jang baku mara di jalan eh!”
25Jadi Yusuf de pu sodara dong kas tinggal Mesir baru dong pulang ke dong pu bapa Yakub. Pas sampe di Kanaan, 26Yusuf pu sodara dong bilang dong pu bapa, “Bapa, Yusuf de masi hidup! Baru skarang ni Yusuf de su jadi raja pu wakil yang pu kuasa untuk smua Mesir!” Tapi Yakub de cuma diam saja, de tra percaya sama dorang. 27Tapi pas Yusuf pu sodara dong kastau sama bapa Yakub smua yang Yusuf suru dong kastau tu, tamba lagi waktu Yakub de liat kreta yang Yusuf kirim untuk bawa de ke Mesir, langsung bapa Yakub ni de jadi smangat lagi. 28Trus Yakub de bilang, “Sa pu anak Yusuf masi hidup! Sa harus pigi liat de dulu seblum sa mninggal, cuma itu saja yang sa mau.”
Právě zvoleno:
Kejadian 45: MPapua
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 (Active), Wycliffe Bible Translators, Inc. All rights reserved.