Matiu 20
20
Yesu magɛ namaga a tɩgɛ baga tɩntɩnnaa lɛ
1Ŋɩɩ nɛ Yesu bɩra magɛ namaga a pɩba a bʋl dɩ Wɩa kuorii-la nagɛ baal kʋbala sɩ kɛŋ ʋ baga nɛ. Chʋchʋɔ-fɩɛla ʋ lɩɩ chɩchɛ nɩaa dɩ ba mʋ pɛrɛ ʋ baga-la lɛ ka ʋ timba. 2Ba sɛɩ arɩ ba jaŋ mʋ pɛrɛ, ka ʋ timba warɩpʋla kʋbala. Ŋɩɩ nɛ ʋ leŋ ba mʋ ʋ baga-la a pɩpɛrɛ. 3Ʋ kʋ magɛ kerifi nibi, ʋ bɩra lɩɩ a na nɩaa dɔnsʋŋ dɩ ba chɩŋ yɔbɔ tʋɔŋ pɛɩ. Ba bɩ tɩntɩmɩɩ kala ka tɩŋ. 4Ŋɩɩ nɛ ʋ bʋla pɩba dɩ ba ma mʋ a pɛrɛ ʋ baga-la lɛ ka dɩ ʋ timba, dɩ ʋ jaŋ pɩba ŋɩɩ kala sɩ maga. Ŋɩɩ nɛ ba ma mʋ. 5Kerifi fii arɩ balɩa yi, ʋ bɩra lɩɩ a na nɩaa dɔnsʋŋ a ŋaa ba ma mʋ ʋ baga-la. Ʋ bɩra lɩɩ kerifi batori bʋa lɛ a bɩra na nɩaa dɔnsʋŋ a ŋaa ba ma mʋ ʋ baga-la. 6Ʋ bɩra kʋ kpagɛ kerifi banɔŋ, ʋ bɩra lɩɩ yɔbɔ tʋɔŋ a na nɩaa dɔnsʋŋ ma dɩ ba ha chɩŋ nɩmɛ. Ŋɩɩ nɛ ʋ pɩɛsɛba, “Bɛɛ nɛ tɩɩ ma chɩŋ daha pɛɩ chʋchʋɔŋ arɩ wɩɩhɛyɛ kala, ma bɩ tɩntɩmɩɩ kala ka tɩŋ?” 7Ŋɩɩ nɛ ba bʋla pʋ arɩ ba bɩ tɩntɩŋŋaa na dɩ ba tɩŋ. Ŋɩɩ nɛ ʋ bʋla pɩba dɩ ba ma mʋ a tɩŋ ʋ baga lɛ. Ba ma mʋ. 8Dɩdaanɩŋ sɩ yie, ŋɩɩ nɛ baga-la tɩɩna yɩrɛ nɩɩ-la sɩɩ beŋ ʋ baga-la dɩ ʋ yɩrɛ nɩalɩŋ sɩ tɩŋ ʋ baga-la lɛ a timba, dɩ ʋ suomi nɩalɩŋ sɩ to harɩŋ mʋ baga-la a timba aŋ-na mʋ yi nɩalɩŋ sɩ laa sɩpaaŋ mʋ baga-la. 9Nɩalɩŋ sɩ to harɩŋ mʋ baga-la, ʋ timba warɩpʋla kʋbala. 10Nɩalɩŋ sɩ laa sɩpaaŋ mʋ baga-la sɩ kɔ dɩ ba laa ba time, ba fa bɩɩna arɩ ba jaŋ laa kɩɩ nɩalɩŋ sɩ to harɩŋ, ama ba tiŋ ba ma magɛ ŋɩɩ nɛ. 11Ba laa moribie-la aŋ gʋgʋrɩmɛ wɩaa baga-la tɩɩna teeŋ. 12Ŋɩɩ nɛ ba bʋla pʋ, “Nɩaa deemba sɩ to harɩŋ kɔ, ba tɩŋ hawa kʋbala dʋndʋŋ nɛ, aŋ ka la-na tɩŋ chʋchʋɔŋ arɩ wɩɩhɛyɛ kala, aŋ ka ŋ tiŋ la kala magɛ dɔŋɔ.” 13Ŋɩɩ nɛ baga-la tɩɩna bʋla pɩ ba dɔŋɔ, “Jegile nɩɩ, mɩ bɩ ma gʋra. Ma sɛyɛ arɩ ma jaŋ tɩŋ dɩ wɩa jʋʋ nɛ aŋ laa warɩpʋla kʋbala. 14Má laa ma moribiee a viiri. Mɩɩ chɛ dɩ mɩ tiŋ baalaa deemba sɩ to harɩŋ kɔ ŋɩɩ tɩtɩa mɩ sɩ timma nɛ. 15Mɩ bɩ wombiiŋ kɛnɛ dɩ mɩ kɛŋ mɩ moribiee tɩŋ mɩ tʋɔtɔrɛ wɩaa? Koo ma yaraa bieru a tɩŋ mɩ sɩ kɛŋ zile wɩaa nɛ?” 16Ŋɩɩ nɛ Yesu bʋl, “Sɩpaalaaraa jaŋ bɩrɩmɛ harɩ-tooroo, dɩ harɩ-tooroo ma bɩrɩmɛ sɩpaalaaraa.”
Yesu bʋl ʋ sʋʋŋ wɩaa
Maak 10.32-34; Luuk 18.31-34
17Yesu sɩ bʋl ŋɩɩ dɩ ba hɛ wombiiŋ lɛ nɛ a mʋmʋ Jerusalɛm. Ŋɩɩ nɛ ʋ kɛŋ ʋ harɩ-tooroo fii arɩ balɩa dʋndʋŋa a sʋʋsa lɩɩ a bʋla pɩba wombiiŋ lɛ, 18“Má jegili mɩ teeŋ. Laa mʋ Jerusalɛm nɛ. Dɩ la nɛ yi nɩmɛ, ba jaŋ kɛŋ mɩ-na Nuhuobiine Bie a kaa mʋ pɩ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba. Ba jaŋ diimi sarɩya aŋ ŋaa dɩ ba kpʋmɛ 19aŋ kɛmmɛ kaa mʋ hɛ nɩalɩŋ sɩ bɩ Juu tɩŋŋaa ŋaa nɩsɩŋ lɛ. Ba jaŋ mɔmmɛ, a vɩɩrɛmɛ aŋ kpaasɛmɛ mɛrɛ daagɛsɛ nyuŋ, ka dɩ mɩ sii sʋʋŋ lɛ tapʋlaa batori chɛɛŋ.”
Zebidi haala sʋl Yesu a chɩchɛ dɩhɔnʋŋ dɩ ʋ pɩ ʋ biiriŋ balɩa
Maak 10.35-45
20Ŋɩɩ nɛ Zebidi haala kɛŋ ʋ biiriŋ balɩa kɔ Yesu teeŋ a kpirimi ʋ sɩpaaŋ aŋ sʋlʋ dɩ ʋ pɛ ʋ lɛ. 21Ŋɩɩ nɛ Yesu pɩɛsʋ, “Wʋbɛɛ nɛ ŋŋ chɛ dɩ mɩ ŋaa pɩŋ?” Ʋ bʋl, “Ŋ sɩ jaŋ dii Wɩa kuorii-la a hɔŋ ŋ kuoru kpasa nyuŋ, leŋ dɩ mɩ biiriŋ deemba balɩa ŋaa ŋ bʋbʋɔŋ hʋhɔnnɔɔ, dɩ dɔŋɔ hɔŋ ŋ nadiiŋ, dɩ dɔŋɔ ma hɔŋ ŋ nagʋa.”
22Ŋɩɩ nɛ Yesu bʋla pɩ ʋ biiriŋ, “Ma bɩ jɩŋ kʋ-la ma sɩɩ chɛ. Ma jaŋ wuo nyalɩma na hɛɛ-la mɩ sɩ jaŋ naa?
Ba sɩ: Oo, la jaŋ wuo.”
23Ŋɩɩ nɛ Yesu bʋla pɩba, “Wʋtɩtɩɩ nɛ ma bʋl. Hɛɛ-la mɩ sɩ jaŋ na, ʋ nɛ ma ma jaŋ na. Ama mɩ nadiiŋ arɩ mɩ nagʋa hʋhɔnnɔ-la, mɩ dee bɩ jaŋ tʋɔsɛba. Wɩa nɛ jaŋ lɩɩsɛba dɩ ba hɔŋ nɩmɛ.”
24Yesu harɩ-tooroo fii-la sɩ nɩɩ Jeems arɩ Jɔɔŋ sɩ bʋl wɩɩ-la, ba na baanɩŋ ba nyuŋ. 25Ŋɩɩ nɛ Yesu yɩrɛ ʋ harɩ-tooroo kala ba kɔ ʋ teeŋ. Ʋ bʋla pɩba, “Ma jɩma nɩalɩŋ sɩ bɩ Juu tɩŋŋaa ŋaa kuoroo hɔŋ nɩaa nyuŋ nɛ. Ba nɩhɩasɩŋ ma kɛŋ doluŋ ba nɩaa nyuŋ. 26Ama ʋ bɩ maga dɩ ma-na ŋɩŋaa ŋɩɩ. Ma tʋɔŋ nɩɩ-la sɩɩ chɛ ʋ ŋaa ma sɩpaalaara, ʋ maga dɩ ʋ nɛ tɩma pɩpɩma. 27Ma tʋɔŋ nɩɩ-la ma sɩɩ chɛ ʋ ŋaa ma kʋhɩaŋ, ʋ maga dɩ ʋ nɛ ŋaa ma tʋɔŋ yomo. 28Mɩ-na Nuhuobiine Bie, mɩ bɩ kɔ dɩ mɩ chɛ nɩaa dɩ ba tɩma pɩmɛ, mɩ kɔ dɩ mɩ tɩma pɩba nɛ a sʋʋ a laa nɩ-daŋ mɩɩsɩŋ pɩba.”
Yesu vaarɛ nyʋlɩmaa balɩa
Maak 10.26-52; Luuk 18.35-43
29Yesu arɩ ʋ harɩ-tooroo sɩ lɩɩ Jeriko lɛ, nɩ-daŋ to ba harɩŋ. 30Nyʋlɩmaa balɩa fa hɔŋ wombiiŋ niiŋ a nɩɩ dɩ Yesu nɩɩ bal. Ŋɩɩ nɛ ba faasa yɩrɛ a bʋla pʋ, “La Tɩɩna, Devit nihii, fá la nenige.”
31Ŋɩɩ nɛ nɩ-daŋ-la kpɩa ba lɛ dɩ ba kɛŋ goŋ. Ama ba faasa yɩrɛ a kɩɩ ŋɩɩ a bʋl, “La Tɩɩna, Devit nihii, fá la nenige.”
32Ŋɩɩ nɛ Yesu chɩŋ aŋ yɩrɛba a pɩɛsɛba, “Bɛɛ kʋŋ nɛ maa chɛ mɩ ŋaa pɩma?” 33Ba bʋl, “La Tɩɩna, laa chɛ dɩ ŋ suri la sɩaa nɛ.”
34Ŋɩɩ nɛ Yesu fá ba nenige a digi ba sɩaa lɛ. Ba sɩaa guu suri, ba tuto ʋ harɩŋ.
Právě zvoleno:
Matiu 20: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014
