HAGAƖ 1
1
Ba yɩrɛ nɩaa dɩ ba kʋ saa La TƖƖNA dɩɩ-balɩŋ
1Daarus sɩ dii Pɛsɩa tinteeŋ kuoru-balɩŋ, ʋ jɩ-lɩa, chɛŋ-dʋ tapʋl-bumbuŋ lɛ nɛ, La TƖƖNA to ʋ wʋlaabʋlla Hagaɩ lɛ a bʋl wɩaa pɩ Zerubabɛl arɩ Josua. Zerubabɛl nɛ fa ŋaa nɩɩ-la sɩɩ beŋ Juda tinteeŋ, ʋ nyɩmma nɛ Sɩalɩtɩɛl. Josua ma nɛ fa ŋaa Wɩɩsʋllɩ sɩpaalaaraa nɩhɩaŋ, ʋ ma nyɩmma nɛ Jehozadak.
2Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Nɩaa deemba sɩ, ‘Bʋa-la ha bɩ yie dɩ la paa La TƖƖNA dɩɩ-balɩŋ saa.’ ”
3Ŋɩɩ nɛ La TƖƖNA to ʋ wʋlaabʋlla Hagaɩ lɛ a bʋl:
4“Bʋa deeŋ lɛ nɛ maga dɩ ma jʋjʋʋ dɩɩ zɔŋŋɔɔ, ka mɩ dɩɩ-balɩŋ pɩŋ jikpeeŋ?”
5Wɩɩ-la La TƖƖNA doluŋ kala Tɩɩna bɩra sɩ bʋla nɛ ŋ-la, “Má fɩɛlɛ ma sɩaa a kɛŋ ma wʋŋaalaa bɩɩna na.
6Ma duu kɩaa a yʋgɛ nɛ, ama kɩalɩŋ ma sɩ kʋma bɩ wɩɩ maga. Ma yie dii kɩaa, ama ma bɩ vɔgɛ. Ma yie nyʋa kɩaa, ama ma bɩ vɔgɛ. Ma yie laalɛ gɛnnɩŋ, ama ba bɩ ma waarɩŋ ka tɔ. Ma yie laa time, ʋ dɛrɛ a nagɛ ma joŋo hɛ gɛrɩ-fehe sɩ luro lɛ nɛ.”
7Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Má fɩɛlɛ ma sɩaa a kɛŋ ma wʋŋaalaa bɩɩna na.
8Má jɩl peelee a keri doloo kaa tuu a paa mɩ dɩɩ-bal-la saa, dɩ mɩ tʋɔŋ tɔrɛ ʋ nyuŋ, dɩ nɩaa chʋchʋɔlɛmɛ nɩmɛ. Mɩ-na ma TƖƖNA nɛ bʋla.
9Ma faa yɩɛlɛ dɩ ma na ma baga kɩaa a yʋgɛ nɛ, aŋ mɩɩra na mʋa. Mʋa-la ma ma sɩ kaa kɔ dɩa, mɩ ŋmooba ta nɛ. Bɛɛ nɛ tɩɩ? Mɩ-na ma TƖƖNA doluŋ kala Tɩɩna nɛ pɩɛsa. Mɩ dɩɩ-bal-la sɩ pɩŋ jikpeeŋ, ka nʋʋkala fɩɛsɛ sɩɩŋ ʋ tɩtɩa dɩa wɩaa nɛ tɩɩ.
10Ŋɩɩ wɩaa nɛ tɩɩ duonuŋ bɩ nɩɩ, ma kʋduuloo ma bɩ wasɛ.
11Mɩ leŋe hɩlɩŋ chɩŋ ma bagɩsɩŋ arɩ peelee lɛ nɛ, mɩaa, tɩɩnɛnɛɛ sɩnɩŋ arɩ olif nʋʋŋ nyaa tinteeŋ lɛ. Hɩl-la chei nuhuobiinee arɩ pʋsʋŋ kala nɛ arɩ tɩntɩmɩɩ kala ma sɩɩ tɩŋ.”
12Ŋɩɩ nɛ Sɩalɩtɩɛl nanʋala Zerubabɛl arɩ Jehozadak nanʋala Josua sɩ ŋaa Wɩɩsʋllɩ sɩpaalaaraa nɩhɩaŋ arɩ nɩkaana-la kala sɛɩ ba TƖƖNA Wɩa niiŋ arɩ wɩalɩŋ Wɩa wʋlaabʋlla Hagaɩ sɩ bʋla, bɛɛ wɩaa ba TƖƖNA Wɩa nɛ tɩmʋ. Ŋɩɩ nɛ nɩalɩŋ fa fɩfá La TƖƖNA.
13Ŋɩɩ nɛ Hagaɩ, nɩɩ-la La TƖƖNA sɩ tɩma, joŋ tɩndaarɩ-la La TƖƖNA sɩ bʋla pʋ a to pɩ nɩalɩŋ. La TƖƖNA sɩ, “Mɩ hɛ ma teeŋ nɛ.”
14Ŋɩɩ nɛ La TƖƖNA joŋ tʋɔbɩɩnaa hɛ Zerubabɛl lɛ, nɩɩ-la sɩɩ beŋ Juda tinteeŋ arɩ Josua ma sɩ ŋaa Wɩɩsʋllɩ sɩpaalaaraa nɩhɩaŋ arɩ nɩkaanaa kala lɛ. Zerubabɛl nyɩmma nɛ fa Sɩalɩtɩɛl, Josua ma nyɩmma nɛ fa Jehozadak. Ba kʋ suomo tɩtɩŋ ba TƖƖNA doluŋ kala Tɩɩna dɩɩ-bal-la tɩntɩŋŋaa. 15Dɩ Daarus sɩ dii Pɛsɩa tinteeŋ kuoruŋ, ʋ jɩ-lɩa chɛŋ-dʋ tapʋlaa mara arɩ banɛsɛ lɛ nɛ ŋɩɩ.
Právě zvoleno:
HAGAƖ 1: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014