DANƖƐL 7
7
Danɩɛl duoso na baga kɩaa banɛsɛ
1Bɛlɩsaza sɩ dii Babɩlɔŋ kuoruŋ, ʋ jɩ-bumbuŋ lɛ nɛ tɩtaŋ kʋbala Danɩɛl pɩŋ a duoso na wɩaa, a ŋmʋnsɛ duoso-la bil.
2Danɩɛl sɩ, “Mɩ duosoo tʋɔŋ tɩtaŋ-la, mɩ na pel-duoŋ sɩ lɩɩ wɩa-nyuŋ kʋ tuu dʋnɩa loŋgorunuŋ banɛsɛ kala a kɛŋ mʋgʋ-balɩŋ vuugi. 3Baga kɩaa kʋbalaa banɛsɛ sɩ bɩ dɔŋɔ naga, lɩɩ mʋgʋ-bal-la tʋɔŋ kʋ lɩɩ.
4Bumbuŋ kʋa nagɛ naachigiŋ aŋ kɛŋ kachuuŋ kɩŋkɛnsɩŋ. Mɩɩ benu ka ʋ kɩŋkɛnsɩ-la kala churi, ka ba kɛnʋ chʋʋla kɩɩ ʋ hui-naasɩŋ balɩa nyuŋ a nagɛ nuhuobiine. Ba joŋ nuhuobiine tʋɔbɩɩnaa hɛ ʋ lɛ.
5Mɩ bɩra na baga kʋlɩamɩŋ, ʋ nagɛ lʋgʋmʋŋ. Ʋ sii chɩŋ ʋ hui-naasɩŋ nyuŋ, aŋ ka ʋ chɛbɛ sɛnpɛrɩ-biee haŋgbelee batori ʋ niiŋ lɛ. Ba bʋla pʋ, ‘Sii chaŋ nammɩa a magɛ ŋɩɩ kala ŋ sɩɩ chɛ.’
6Ʋ ŋɩɩ harɩŋ mɩ bɩra na baga kʋa dɔŋɔ mɩ sɩpaaŋ, ʋ ma nagɛ kpeye. Kɩŋkɛnsɩŋ banɛsɛ hɛ ʋ duguno lɛ a nagɛ diibie kɩaa. Baga kʋa deeŋ fa kɛŋ nyusuŋ banɛsɛ nɛ, ba joŋ doluŋ pʋ dɩ ʋ dii kuoruŋ.
7Mɩ duoso-la tʋɔŋ tɩtaŋ-la mɩ bɩra na baga kʋnɛsɩmɩŋ mɩ sɩpaaŋ, sɩ kɛŋ fawʋllʋŋ a fufugisi nɩaa a kɛŋ doluŋ ma woruŋ. Ʋ nyɩlaa fa ŋaa hɔɔnʋŋ nɛ aŋ barɩmɛ, ʋ kaa dɩŋ ʋ dʋndɔŋŋɔɔ yɛrɛ liliŋ aŋ nʋɔsɛ kʋkaanaa bʋrɩgɛ. Ʋ dɩ bumbuŋ baga kɩalɩŋ kala fa bɩ dɔŋɔ naga. Ʋ fa kɛŋ nyilliŋ fii nɛ.
8Mɩ fa sɩɩ beŋ nyilli-la, nyil-bie kʋbala kʋ lɩɩ ba tʋtʋɔbaanɩŋ, a churi nyilli-la batori sɩ laa sɩpaaŋ hɛ nɩmɛ. Nyile deeŋ fa kɛŋ sɩaa nɛ ba nagɛ nuhuobiine sɩaa a kɛŋ niiŋ a bʋbʋl babiibal wɩaa.
9Mɩ sɩ bene,
mɩ na dɩ ba bil kuoru kpasɩnɩŋ.
Nɩɩ-la sɩ hɛ nɩmɛ faafaa kala hɔŋ ʋ kuoru kpasa nyuŋ.
Ʋ gɛnnɩŋ fa pʋlla nɛ a nagɛ kuŋkunuŋ.
Ʋ nyu-pʋnaa ma pʋllɛ a nagɛ pie-pʋnaa.
Ʋ kuoru kpasa-la faa chol nyiniŋ nɛ,
ʋ gɩrɩŋgɩrɩmba kala ŋaa nyiŋgeliŋ.
10Ka nyiniŋ nagɛ fuoŋ a pɩpɛllɛ,
a lɩlɩɩ ʋ sɩpaaŋ.
Nɩaa bʋɩ-bʋɩba tɩma pʋpʋ,
ka nɩaa bʋɩ-bʋɩba fii bʋbʋɔ-bugoo bʋɩ fii chɩŋ ʋ sɩpaaŋ.
Ba suomi dɩ ba dii nɩaa sarɩya
a suri tenniŋ.
11Ŋɩɩ nɛ mɩ ha bibeŋ a tɩŋ babiibal wɩalɩŋ nyil-bie-la fa sɩɩ bʋl wɩaa. Mɩ faa beŋ ŋɩɩ nɛ halɩɩ, ka ba kpʋ baga kʋnɛsɛ-la a chei ʋ kala a paa yuo hɛ nyiŋgeliŋ lɛ. 12(Ka ba kɛŋ baga kɩalɩŋ dɔnsʋŋ ma doluŋ laa, aŋ leŋ ba ha hɛ ba mɩɩsɩŋ lɛ a magɛ magɩna dɔŋ.)
13Mɩ duoso-la tʋɔŋ tɩtaŋ-la, mɩ bɩra beŋ a na kʋŋ sɩ nagɛ nuhuobiine dɩ ʋ to duoŋ-bɩlɩmbaanaa tʋɔŋ kʋʋ tuu. Ʋ sɩ kʋ kpagɛ nɩɩ-la sɩ hɛ nɩmɛ faafaa kala, ba kɛnʋ kaa mʋ ʋ teeŋ. 14Ʋ joŋ doluŋ, yɩrɩŋ arɩ kuoruŋ doluŋ pʋ. Nɩaa kala, tinteyee nɩaa arɩ yikoro na-kala nɩaa dɩdɛnnʋ. Ʋ doluŋ ŋaa dol-la sɩ bɩ dɛrɛ nɛ, ʋ bɩ lɛl. Ʋ kuoruŋ ma ŋaa kʋŋ nʋʋ sɩ bɩ jaŋ wuo chei.
Duoso-la bʋbʋɔŋ
15Mɩ-na Danɩɛl sɩ duoso na wɩalɩŋ, ba chaasa walɩmɛmɛ nɛ woruŋ. 16Mɩ mʋ nɩalɩŋ fa sɩ chɩŋ nɩmɛ dɔŋɔ teeŋ a pɩɛsʋ dɩ ʋ dagɛ wɩalɩŋ bʋbʋɔŋ tɩtɩa pɩmɛ.”
Ŋɩɩ nɛ ʋ dagɛ wɩaa deemba bʋbʋɔŋ pɩmɛ. 17Ʋ sɩ, “Baga kɩaa kʋbala-la banɛsɛ ŋaa kuoru-gentisiŋ banɛsɛ nɛ sɩ jaŋ hɛ dʋnɩa lɛ a kɛŋ doluŋ. 18Ama Wɩa sɩ kɩɩ kʋŋkala nɩaa jaŋ laa kuorii-la a diiu a kaa mʋ wuu.” 19Ŋɩɩ nɛ mɩ chɩchɛ dɩ mɩ jɩŋ baga kʋnɛsɛ-la bʋbʋɔŋ. Ʋ nɛ fa bɩ dɔnsʋ-la naga ŋɩɩ aŋ kɛŋ fawʋllʋŋ kɩŋkɛŋ. Ʋ nyɩlaa ŋaa hɔɔnʋŋ, ʋ naanii-fʋlaa nagɛ kɔlɩɩŋ. Ʋ nɛ dɩŋ ʋ dʋndɔŋŋɔɔ yɛrɛ liŋ aŋ nʋɔsɛ kʋkaanaa bʋrɩgɛ ŋɩɩ. 20Mɩ fa bɩra chɩchɛ dɩ mɩ jɩŋ nyilli-la fii sɩ hɛ ʋ nyuŋ lɛ arɩ nyile-la ma dɔŋɔ sɩ kʋ lɩɩ bʋbʋɔŋ, ka nyilli-la batori-na churo tel. Nyile-la nɛ kɛŋ sɩaa arɩ niiŋ a bʋbʋl babiibal wɩaa ŋɩɩ. 21Mɩ fa sɩɩ beŋ, mɩ na dɩ nyile-la kɛŋ Wɩa nɩaa yuo laalɩŋ a yuo didiiba, 22a kaa mʋ yi bʋa-la lɛ Nɩɩ-la sɩ hɛ nɩmɛ faafaa kala sɩ kʋ lɩɩ dii sarɩya a laa pɛ Wɩa sɩ kɩɩ kʋŋkala nɩaa lɛ. Bʋa-la yie nɛ dɩ ba laa kuorii-la dɩ ʋ ŋaa ba kʋŋ.
23Wɩɩ-la ʋ sɩ bʋla pɩmɛ nɛ ŋ-la, “Baga kʋnɛsɛ-la ŋaa kuori-gentiŋ-nɛsɛ nɛ sɩ jaŋ dii kuoruŋ dʋnɩa lɛ. Ʋ dɩ kuori-gentisi-la dɔnsʋŋ wɩaa bɩ jaŋ nagɛ dɔŋɔ, ʋ jaŋ kpʋ dʋnɩa nɩaa a nʋɔsɛba bʋrɩgɛ. 24Nyilli-la fii ŋaa kuoroo fii nɛ sɩ jaŋ lɩɩ kuori-gentine deeŋ lɛ a dii kuoruŋ deeŋ aŋ ka pɩpɩ dɔŋɔ. Ba harɩŋ lɛ kuoro dɔŋɔ ma jaŋ bɩra dii kuoruŋ, ʋ bɩ jaŋ nagɛ faafaa kuorie-la, ʋ jaŋ yuo dii kuoroo batori. 25Ʋ jaŋ bʋl wɩaa lɩɩ Wɩa sɩ kɩɩ kʋŋkala harɩŋ, aŋ nyagɛ Wɩa nɩaa bil, aŋ wʋwalɩmɛ dɩ ʋ kɛŋ wombii-la Wɩa sɩ bile dɩ ba tuto wɩaa bɩrɩmɛ. Ba jaŋ joŋ Wɩa nɩaa hɛ ʋ nɩsɩŋ lɛ jɩsɩŋ batori arɩ kpaa magɛ dɔŋɔ. 26Ama Wɩa jaŋ dii ʋ sarɩya, a laa ʋ doluŋ kala a cheyu a kaa mʋ wuu. 27Ba jaŋ joŋ doluŋ arɩ kuoruŋ yuŋuŋ kala sɩ hɛ dʋnɩa lɛ a pɩ Wɩa sɩ kɩɩ kʋŋkala nɩaa. Ba kuoruŋ doluŋ bɩ jaŋ dɛrɛ. Kuoroo kala sɩ hɛ dʋnɩa lɛ jaŋ to ba niiŋ a tɩma pɩpɩba.” 28Wɩɩ-la dɩdɛrɩŋ nɛ ŋ-la. Mɩ-na Danɩɛl tʋɔbɩɩnaa walɩmɛmɛ nɛ woruŋ, mɩ sɩaa biri, ka mɩ joŋ wɩɩ-la hɛ mɩ tʋɔŋ lɛ.
Právě zvoleno:
DANƖƐL 7: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014