Ihoseya 1
1
Ihoseya ộ nyị ọsẹrẹka
1 #
2 Ohi 15.1-7; 2 Ịtọ 26.1-23;
2 Ohi 15.32-38; 2 Ịtọ 27.1-8;
2 Ohi 16.1-20; 2 Ịtọ 28.1-27;
2 Ohi 18.1—20.21; 2 Ịtọ 29.1—32.33;
2 Ohi 14.23-29
 nyị ọza ọnya aanị ana aa hị́ Ihoseya, ana vị ozi Ibeeri. Ẹnẹyịmavara ộ tụ́ ọ ụtụ ịnị ụmẹ ọnị Uziya, Ijotami, Ahazi, ọnịrị Ihezekaya nịnị sị mẹ̀ ohinọyị Ijuda vọ yị ẹngụ. Ịnị ụmẹ ọnọọ gẹdẹ-gẹdẹ, Ijerobowami ozi Ijowasi ọnị rẹ sị vị ohinọyị Isirẹrị nị. 2Ịnị ụmẹ ọnọọ, Ẹnẹyịmavara nyima aa tụ Ihoseya hi Anisirẹrị nị. Ọ́ kà Ihoseya ọ̀ na nyị ọsẹrẹka, dị ọ ma ezi ẹngụ ọza ẹnẹsa yọ. Ộ kà ọ vavọọ mẹ, dị ọ sị zụ Anisirẹrị nịnị mẹmẹ para ọnị hu naa hẹkẹ ori. 3Agụvị avọọ dị Ihoseya na nyị ọsẹrẹka ọnya aanị ọnị ịrẹha anị rị Igoma ana vị ozi Idibirayimi nị. Dị ọsẹrẹka ọnọọ zyẹẹ, dị ộ ma ozi ọnọrụ yị ọ nị. 4#2 Ohi 10.11Dị Ẹnẹyịmavara kà Ihoseya ọ̀ yị́ ozi ọnọọ Ijezirẹẹrị. Ộ ka agụvị ka ọ yị vee ku dị ọnị ọ̀ sị ụya rị evere Ijehu agụvị aza anị ọnị Ijehu wụ̀ Ijezirẹẹrị. Ọ kà agụvị avọọ ọnị vee vu Anisirẹrị nịnị ẹtẹ. 5Dị Ẹnẹyịmavara kà ịhị ọnọọ vị ọnị ọnị vee che ọkịta ọnịrị ọpa ẹnịnị ha eyi ịrẹkụ inozi Ijezirẹẹrị nị. 6Dị Igoma rẹ varẹma zyẹẹ dị ọ ma ozi ọnẹẹ nị. Dị Ẹnẹyịmavara kà yị Ihoseya ka ịrẹha ozi ọnọọ ọ rị Iro-ruhama ọnị iruvo anị ọ vị “Ẹ yị nyị ayamva”. Ẹnẹyịmavara kà ọnị ọ yị kụkụ vaa vayị Isirẹrị dị ọnị ọ hyakụ vaa vagu wa. 7Ama ọnị vaa vayị evere Ijuda, dị ọnị dọ wa ha agụvị ka ọnị ọ vị Ẹnẹyịmavara ana vị Ohomorihi ẹnịnị nị. Ẹ yị vaa nyị ka ẹ kụ ọpa ọnịrị ọkịta, ụ̀hwọ̀ ọnịrị umaata nọ ịrẹkụ, dị ẹ sị dọ ẹngụ ẹnịnị ha. 8Ịjị ozi ọnọọ sị vịra, dị Igoma rẹ zyẹẹ ọsa, dị ọ ma a ọnọrụ nị. 9Dị Ẹnẹyịmavara yị ozi ọnọọ ịrẹha ka Iro-Amị ọnị iruvo anị vị “Wẹ yị vị aza amị”. Dị ọ kà Anisirẹrị nịnị ẹ yị vị aza anị, dị ọnị ẹ yị rẹ vị Ohomorihi ẹnịnị nị.
Eyọtụra Anisirẹrị
10 #
Iro 9.26
Anisirẹrị nịnị vaa rụrụ anka àarẹ ịnị òkū ọnị ọza ẹ yị yẹ ịrịka anị. Ịzị a ya kà a ka ẹnịnị ẹ yị va aza anị, a rẹ vaa hị́ wa ezi Ohomorihi ana yara nị. 11Anijuda ọnịrị Anisirẹrị nịnị vaa vabẹ, dị ẹ nyị ọdọvịdị ọnyara yị ẹngụ ẹnịnị. Dị ẹ varẹma dọ ẹtẹ ẹnịnị agụvị ka ẹkụhị Ijezirẹẹrị vaa nyị ẹngụ anị.
Právě zvoleno:
Ihoseya 1: EBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Ebira First Bible © Bible Society of Nigeria, 2014.