Ezikẹẹrị 5
5
Ezikẹẹrị ộ kụ́ ịrẹsụ anị
1Ezikẹẹrị ka, Ẹnẹyịmavara ộ hị́ ọnị ozi ọza ọ̀ sị ụhwọza ana rẹ, dị ọnị ọ̀ sị kụ́ ịrẹsụ anị ọnịrị ịrẹwa anka ịrẹkụ ana aza anaā kụ́ ịrẹsụ sịị̄ kụ́ ịrẹsụ avọọ. Ọnị ộ sị ọ kụ́, dị ọnị ọ̀ ngọ̀ ọ ịnị ịngọ. Ọnị ọ sị ọ ngọ, dị ọnị ọ̀ gà a tụ oze ẹẹta. 2Ẹnẹyịmavara kà ịjị ọpa ẹkụhị ọnị ọnị aa yà ịnị ẹngụkataa vị̀ ọọ sị gụ, ọnị ọ̀ sị oze ọnyara ịnị ẹyị anị ọnọọ, dị ọnị ọ̀ rị ọ ịra Ijerusarẹmị. Ọ kà ọnị ọ̀ rẹ sị oze ọnyara ọsa, dị ọnị ọ̀ sị ụhwọ yẹrẹ ẹ và hí ẹtẹ kara Ijerusarẹmị. Ọnị ọ̀ sị oze ọnyara ana vọ dị ọnị ò hira a và hí ịnị ahị, agụvị ka ọnị Ẹnẹyịmavara vaa tụ ụhwọọ dụ Anijerusarẹmị nịnị. 3Ọ kà ama ọnị ọ̀ sị chee ịnị ẹyị anị ọnọọ dị ọnị ò kuru ọ tụ akẹtẹ awuru anị. 4Ọnị ọ̀ rẹ sị chee hụụnị anị, dị ọnị ọ̀ va a hi ịra dị ẹ̀ rị ịra ịzọọ ịra vaa dàa nee kú avaba ẹtẹ Isirẹrị nị. 5Ẹnẹyịmavara Ana nyị avaba ụkata ka, ré Ijerusarẹmị nịnị. Ọnị ọ̀ mẹ ka ọ̀ yà ịnị akakana avaba ẹhẹ, dị ẹkụra-ẹkụra ana vọ ẹ̀ ra kara a nị. 6Ama Anijerusarẹmị nịnị ẹ́ ra kụ́ hịrẹ ọnị, ẹnịnị ẹ́ yị saasa ọda anị, dị é sị zụ̀ ka ẹnị e divi huni anẹkụra ana vọ nịnị nị. Ẹnẹyịmavara kà Anijerusarẹmị nịnị ê yi ọda anị tịtẹ, ẹnịnị ẹ́ yị saasa a. 7Ọ kà ẹwụ nịnị Anijerusarẹmị ọ̀ wụ́ ịrẹyị ọnị ọnị Ẹnẹyịmavara aa ka: Ka wẹ yị saasa ọda anị nịnị, dụ wẹ̀ yị rẹ mẹ̀ ịsa ọnị ọnị ka nịnị nị, ẹwụ nịnị ọ kụ ẹngụkata hi ẹtẹ huni anẹkụra ana vọ nịnị ana ra kara wụ nịnị nị. Ụ kụkụ aa mẹ ịsị anẹkụra ana vọ aa mẹ nini. 8Ẹnẹyịmavara kà ọnịrị ẹwụ nịnị Anijerusarẹmị ọ́ raa sị eyi gẹrị ẹngụ. Ọnị vaa sị́ ụyaa rị wụ nịnị dị avaba anẹkụra ana vọ nịnị è ré e. 9Ka waa mẹ ịsị ana a nyị ọnị ịhyẹrẹ nịnị, ọnị vaa sị ụyaa rị ẹwụ nịnị Anijerusarẹmị ẹtẹẹtẹrẹ. Ọ kà ọnị é yị vịdị vavọọ sị ụya rị wụ nịnị da, ọnị ẹ́ yị ma vàna rẹ vavọọ sị ụya rị wụ nịnị. 10#Arụ 4.10Ụyọrị ọnọọ, ada rị ozi nịnị vaa wụ̀ ẹngụụ rị Ijerusarẹmị. Ẹnẹyịmavara kà ọnị vaa sị ụyaa rị wụ nịnị, dị ọnị gara aza awụ nịnị ana vẹtẹ ne hi avaba aha. 11Ẹnẹyịmavara Ohomorihi ka, ọnị ọ̀ọ yị yá ịzọọ da, agụvị ka ẹwụ nịnị Anijerusarẹmị ọ́ raa sị ịsị edivi-edivi anaa nyị ọnị ịhyẹrẹ du irehi anị ẹngụ nịnị, ọnị ẹ́ yị vaa vayị awụ nịnị dị ọnị ọ̀ và wụ nịnị nẹtẹ. 12Ọ kà, achẹta awụ nịnị vị ọnị ụkụ ọnịrị ụngwẹ vaa wụ̀ wụ ha. Dị aa kụ́ ịrẹkụ va wụ achẹta awụ nịnị ọsa. Achẹta awụ nịnị ana vọ vị ọnị, ọnị Ẹnẹyịmavara vaa tụ̀ ụhwọ, dị ọnị dụ wa ne hi avaba aha. 13Aanị ọnị mẹ vaa kụ́ ayịị hi wa dị ọnị sị họ̀ oponu ịrẹyị ẹngụ anị, dị ayị anị ọ̀ nẹtẹ nị. 14Ọ kà ọnị vaa jị Ijerusarẹmị eburu eyi avaba anẹkụra ana kara wa; dị ọnị mẹ ka avaba aza anaa paraahu e kukuu nyị wu nịnị unyi. 15Ẹnẹyịmavara kà ịjị ọnị ọọ raa sị ọyịkụ-ọyịkụ sị ụya rị wụ nịnị, angwa vee hí avaba anẹkụra ana kara wụ nịnị, vị́ ụ vanaa nyị wa ịhyẹrẹ nịnị isiya nị. 16Ọ kà ọnị vee gù wu nịnị oze ịsọyịrị dị ụngwẹ ọ̀ kụ̀ wụ nịnị ẹtẹẹtẹrẹ. Ụngwẹ vaa kụ̀ wụ nịnị, dị ẹngụ kụkụ aa zị wụ nịnị anka ee rere che ọza ọpa ka asị wụ ọ avọọ. 17#Ẹtẹ 6.8Ẹnẹyịmavara kà ọnị vaa mẹ ka ụngwẹ ọnịrị uye edivi ẹ̀ wụ ezi ewu nini, dị ọnị rẹ mẹ ka ụkụ, ezigi ọnịrị ịrẹkụ ọ̀ vaa wụ̀ wụ nịnị va ha.
Právě zvoleno:
Ezikẹẹrị 5: EBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Ebira First Bible © Bible Society of Nigeria, 2014.