Ezikẹẹrị 4
4
Asịyẹ Ijerusarẹmị mẹmẹ vaa sẹ ẹdụ
1Ezikẹẹrị ka, ẹkụhị ọnya, Ohomorihi ộ hị́ ọnị, dị ọ́ ka, ọnị ozi-ọza, ọ̀ na sị ịbụrọọkụ ọbanyị ọnya ana a sị ụmọpa mẹ, dị ọnị ọ̀ sị ọ jẹ ọvịdị ẹngụ anị nị ọ ka, ọnị ọ̀ va uhwoto Ijerusarẹmị tụ ọ. 2Ọ kà ọnị ya Ijerusarẹmị, ísoja mẹ họ̀ kara a. Ọnị mẹ ọvọ kara Ijerusarẹmị, ẹnẹ ẹ̀ yị vaa zẹẹ ka ọza ọnyọọnyị ò zwe. Ọ kà ọnị ọ̀ si zụ ịzị ọnịvị Ijerusarẹmị nịnị jị udi hi. Dị ọnị ọ̀ mẹ ezi ọnị ọnịvị Ijerusarẹmị nịnị gú jẹẹ na hịrẹ ọvọ Ijerusarẹmị ọnịrị ẹnya ịrẹkụ ẹnẹ ẹ sị ne ịrẹta ẹbanyị-ẹbanyị ọnị ẹ́ kụ jẹẹ. 3Ohomorihi ka ọnị ọ̀ sị enyusẹ ọgana dị ọnị ọ̀ sị jị ẹngụ anị ọnịrị akakana anka ọvọ avọọ nị. Ọnị ọ̀ và eyi ka Ijerusarẹmị, dị ọ̀ sị mẹẹ anka ọnị ọ kụ́ ịrẹkụ ve tu ọ, dị ọnị gù wa oze ịsọyịrị avọọ nị. Ọ kụ́ ịrẹkụ ve tu ọ, dị ọnị gù wa oze ịsọyịrị avọọ nị. Ọsọnị vaa sịị zụ Anisirẹrị nịnị ka ịrẹyị aa vẹ. 4Ohomorihi ka ọnị Ezikẹẹrị ọ̀ọ maanị sị ọ mẹ, ọnị ọ̀ sị akaha ụvọha anị na hụtẹtẹ. Ọnị vee kune ụya ọnị Anisirẹrị nịnị vaa rị tụra ọnị. Ọ kà ọpa ẹkụhị ọnị ọnị ọ̀ọ hụtẹtẹ vị, ọnị vaa vavọọ rị ụya ọnọọ nị. 5Ezikẹẹrị ka Ẹnẹyịmavara ộ kà a yị ọnị ka ọnị vaa vavọọ hụtẹtẹẹ dị ọnị rị ụya mẹ ẹkụhị ọ̀ jị ẹẹwụ ha ịnị akava (390). Ẹnẹyịmavara kà ẹkụhị ikonyara ọnị ọọ rị ụya, vaa jẹẹ yị ịrayị ọnyara yị Anisirẹrị nịnị. 6Ọ kà ẹkụhị ọnọọ ọ̀ọ sị gụ, ọnị ọ̀ vara akaha dị ọnị ọ̀ sị eyi ụvọrị rẹ hụtẹtẹ. Ọnị rẹ vaa rị ụya Anijuda nịnịị mẹ ẹkụhị ẹbẹẹva. Ẹkụhị ikonyi-ikonya vaa jẹẹ ụya ịrayị ọnyara yị Anijuda nịnị. 7Ohomorihi ka ọnị ọ̀ và eyi ka Ijerusarẹmị, dị ọnị oo re á mẹ họ̀ kara a. Ọnị ọ sị ụvọ tụ ẹhẹ dị ọ̀ kà ịsẹ ka e vee vú ọ ẹtẹ nị. 8Ọ kà ọnị vaa sụ́ ọnịị tịtẹ ụvị asị ọnị nyẹngụ vara akaha pooro, ẹ̀ yị vị ẹngụkata ọnọọ ọ̀ọ ta. 9Ezikẹẹrị ka, Ohomorihi ộ kà a yị ọnị ka ọnị ọ̀ kà ịsọyịrị ana aā hí ihwiiti ibaari, ẹza ihehe ọnịrị ijooro, dị ọnị ọ̀ kwọ̀ ọ vabẹ. Ọnị ọ̀ọ sị ọ kwọ vabẹ, dị ọnị ọ̀ sị mẹ apapa. Ọ kà ịsa ọnị ọnị vaa rị ịnị ẹkụhị ọ̀ jị ẹẹwụ ha ịnị akava ọnị ọnị vaa sị akaha eyi ụvọha hụtẹtẹẹ vị ọ vị ọnọọ nị. 10Ọ kà ịsa ọnị ọnị vaa rị vị ana vaa ngọ yị ọnị. Ẹhwị ịsọyịrị ụrata ịrẹvụ ịkụha ẹẹna avọọ ọnị vaa rị ụpẹ ọnya ẹkụhị nị. 11Enyi ọnị ọnị vee hú vị ana a rẹ vaa ngọ yị ọnị. Ẹhwị enyi ako ẹẹva avọọ ọnị vee hú ẹkụhị nị. 12Ohomorihi kà ịhyẹrẹ ọza ana sị wụ á vaa sịị kà ịra ịsọyịrị ẹnẹ ẹ yị ya anka akara ibaari avọọ nị. Ẹ yị avaba aza ọnị vaa mẹ̀ ịsa ọnọọ nị. 13Ẹnẹyịmavara kà ọnọnị ọ vaa sị zụ̀ ka aanị Anisirẹrị nịnị mẹ vaa rị ịsa enee du ọza ẹngụ ịzị ọnị vaa dụ wa ne hi nị. 14Ezikẹẹrị ka dị ọnị ka, tee! Ohomorihi Ananyị yị, ọnị ẹ́ yị vịdị du ẹngụ anị ẹngụ da ọ. Ọnị ẹ̀ẹ yị rị ịsa ene sú da; ọnị ẹ̀ẹ yị rị uye ọnị uye ọsa wụ da, dị ọnị ẹ́ẹ yị rẹ rị uye ana sị vụ da. 15Dị Ohomorihi va kà a ka, à kụkụ sị ịhyẹrẹ imaaru kà ịra ana aa sịị mẹ̀ ịsa anị, asị á kụkụ sị ịhyẹrẹ ọza mẹẹ nị. 16Di Ohomorihi rẹ kà a yị ọnị ka, ozi ọza, ọnị vee gu oze ịsọyịrị Anijerusarẹmị nịnị. Ayịhụrịnẹ-ayịhụrịnẹ ẹnịnị vanaa sịị sị agoro ngọ ịsa ẹnẹ ẹ yaa rị, ọnịrị enyi ene eyee hú nị. 17Ọ kà ọnị vaa mẹ ka asị ẹnịnị kụkụ re ịsa rị, dị a sị e re enyi hú. Ẹnịnị vee re ẹngụ dị ayị aa hụrẹ wa ịnẹ, dị ẹnịnị sú va ha agụvị ebira odivi ẹnịnị.
Právě zvoleno:
Ezikẹẹrị 4: EBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Ebira First Bible © Bible Society of Nigeria, 2014.