Ezikẹẹrị 47
47
Enyi anaa mẹ̀ ka ọza ọ̀ yara.
1 #
Iza 14.8; Ịjọ 7.38; Ẹtẹ 22.1 Ezikẹẹrị ka ọnọrụ ọnị ọnị maanị ré ịnị ẹtẹ ọnị ré aanị ộ rẹ sị ọnị varẹma vẹ enoze irehi Ohomorihi. Â nyị enyi anaa tụ̀ụ hụụ iruvo enoze ọnọọ, dị ee sìi zi oze eyi ọnị ọyịị̄ zịị hụrẹẹ vẹ nị. Irehi Ohomorihi vị ana và eyi ka oze avọọ. Enyi ọnọnị vị enee sìi vaachi hụụ iruvo eyi-ụvẹtẹ irehi Ohomorihi di aa parahu eyi-ụvẹtẹ ụta ịsọvọ nị. 2Ọ kà ọnọrụ ọnọnị ộ sị ọnị zị oze ọbanyị ana yà eyi ẹbẹẹba jịnẹ hụrị ẹngụ irehi Ohomorihi di ọ́ sị ọnị jesi kara oze ọbanyị ana và eyi ka oze ọnị ọyịị̄ zịị hụrẹ vẹ nị. Â nyị okuha oweyi oni enyi anị ê sìi tụ ẹhẹ hụrị eyi-ụvẹtẹ oze ọbanyị ọnọọ. 3Ọnọrụ ọnọọ ộ sị ọchị ọnị ọ sịị̄ mọ ẹtẹ, dị ọ́ sị mọ ẹtẹ ụgọdọ okuvọ akava rị ẹchẹhị vachi zi oze ọnị ọyịị̄ zịị vẹ nị. Ịjị ọ́ sị ọ mọ, dị ọ ka ọnị ọ̀ vavọọ ngụ enyi ọnọọ nị, ọnị ộ ngụ ọ, dị enyi ọnọọ zá ọnị ataahụ nị. 4Dị ọ rẹ mọ ẹ̀hụ okuvọ akava rị ẹchẹhị ọsa nị, ọ nị mẹ ngụ ọ, dị enyi anị zá ọnị idinku nị. Ộ rẹ mọ ẹ̀hụ okuvọ akava rị ẹchẹhị ọsa vachi, dị enyi anị zá ọnị ẹ̀hwị ọtẹ nị ọnị mẹ rẹ ngụ ọ nị. 5Ịjị ọ vana mọ okuvọ akava rị ẹchẹhị ọsa, enyi ọ́ sị nyịnẹ ana ahịka ọza ẹ́ yị zụ ngụ na jịnẹ ẹ̀ yị vị ọ́ mẹrị ọ. 6Dị ọnọrụ ọnọọ ka, ọnị ozi-ọza ọ̀ tangwa sị eyi pe avaba ịsị ẹnẹnị o. Dị ọ sị ọnị varẹma nọ ụtọ irehu nị. 7Ịjị ọnị tu ịzọọ, dị ọnị ré ọchị ọrụrụ-ọrụrụ ụtọ irehu eyi ẹnyị eyi ọsa nị. 8Ezikẹẹrị ka ọnọrụ ọnọọ ộ kà a yị ọnị ka, ozi-ọza, aanị enyi ọnọnị mee sì zi oze eyi ọnị ọyịị̄ zịị vẹ naa ngụ ẹtẹ Ijodani nị, dị ọ hụụ ịzọọ na ngụ ịnị oku ọnị ịsaā sú vaa hi nị. Ịjị enyi ọnọnị òo tu ini òkū ọnọọ, dị ọ mẹ ka eni ini òkū ọnọọ ana vị anaanọ, ọ̀ vara enyi ọyịza. 9Ọ kà ahatụraha ọnị okuha ọnọnị òo sì na ngụ, a vaa nyị uye ọnịrị ivovo irenyi-irenyi ịzọọ. Enyi ini okuha ọnọnị vaa mẹ ka enyi ini òkū ọnọọ ọ̀ vara enyi ọyịza; ahatụraha ọnị òo sì na ngụ vị ọ́ vaa mẹ ka ịsa ẹ̀ yara nị. 10Ozube ivovo nịnị vị ene vee hi uto oku ọnọọ; hụrị ẹkụra ana aā hị́ Enggedi huu na ngụ ịzị aā hị́ Enegirayimi vị ana aza vaa gara ọha ẹnịnị hịrẹ ọyị. Ivovo irenyi-irenyi vaa gụ ịzọọ anka ẹ́ mẹ gụ ịnị oku imeditareniya. 11Ọ kà ama enyi ịnị apasị ọnịrị enyi ini imisi ene hi ụtụụtọ oku ọnọọ yị́ vaa vị anaanọ. Ịnị ẹnịnị a vaa kụ anọ hụrẹ nị. 12#Ẹtẹ 22.2Ọchị irenyi-irenyi vee hi ụtụụtọ okuha ọnọọ eyi ẹnyị eyi ọsa ana aza vaa rị ẹtụtụ anị. Avị ẹnịnị ẹ́ yị vaa wọ̀rọ̀; ẹnịnị vị ana vaa tụ́ ẹtụtụ pooro kẹnẹ. Ụhụụhwẹ vị ọnị ẹnịnị vaa tụ́ ẹtụtụ ọwọọwa agụvị ka enyi enee sii hụụnị irehi Ohomorihi eyee hu nị. Ẹtụtụ ọchị ẹnẹẹ vị ana a vaa rị, dị aà sị avị ẹnịnịị mẹ aza ụkụ.
Ẹhwị ẹtẹ Anisirẹrị nịnị.
13Ẹnẹyịmavara Ananyị ụkata hu ka ẹhwị ẹtẹ ana á vaa gàa yị ịrẹsụ ẹwụrẹva ene hi Isirẹrị yị. Aza Ijosẹẹhụ vị ana vaa kụ́ oze ẹẹva. 14Ọ kà ọnị ộ vịdị sị eku hị́ ka ọnị vaa sị ẹtẹ ọnọnịị yị ohiku awụ nịnị. Ẹwụ nịnị ọ vanaa nyị nị. Gà a ẹbẹẹbẹ yị ẹngụ nịnị. 15Ẹhwị ẹtẹ awụ nịnị eyi ẹbẹẹba vaa kwẹẹtẹ hụrị Òkū Imeditareniya, dị o zi oze eyi ọnị ọyịị̄ zịị hụrẹ na ngụ ẹkụra ana aā hị́ Ihetironi ọ vaa hụụ ịzọọ naa ngụ ịzị aā hị́ Ihamati-Ipaasi, dị ọ na huu na ngụ ẹkụra ana aā hị́ Izedadi. 16Ẹwụ nịnị ọ vaa nyị ọ hụrị Izedadi naa ngụ ịzị aā hị́ Iberoti ọnịrị Isibirayimi nị. (Ẹkụra ẹnẹnị vị ana yà ịnị akakana ẹtẹ Ịdamasịkọsị ọnịrị Ihamati.) Ụ vaa nyị ọ huu naa ngụ ẹkụra ana aā hí Ihazẹrị-Ihatikoni ana ya ụtọ ẹkụra ana aā hí Ihawuranị nịnị. 17Avọọ ẹhwị ẹtẹ awụ nịnị eyi ẹbẹẹba mẹ vaa hụrị ịnị Òkū Imeditareniya naa ngụ ịzị aā hị́ Ihazari-Enoni nị. Ihazari-Enoni vị ana yà ẹ̀hwị ẹtẹ Ịdamasịkọsị eyi ọnị ọyị zịị vẹ, dị ọ́ sị Ihamati tụ eyi ẹbẹẹba nị. 18Ẹhwị ẹtẹ awụ nịnị eyi ọnị ọyịị̄ zịị vẹ vaa hụrị Ihazari-Enonii zị oze ịnị akakana ịzị aā hị́ Anigiriyadi ọnịrị ẹtẹ Isirẹrị; dị ọ na ngụ ịnị oku ana yà eyi ọnị ọyị zịị vẹ dị ọ huu naa ngụ ịzị aā hị́ Ịtama. Ẹhwị ẹtẹ awụ nịnị eyi ọnị ọyị zịị vẹ yị ọ. 19Eyi ụvẹtẹ vị ọnị ẹtẹ awụ nịnị vaa kwẹẹtẹ ẹ hụrị Ịtama na ngụ ịnị enyi ene hi ịzị aā hị́ Imeribati-Ikadesi; dị ọ vavọọ vatụra ẹhwị ẹtẹ Ijipiti na ngụ ịnị Òkū Imeditareniya. 20Ẹhwị ẹtẹ awụ nịnị eyi ọnị ọyịị̄ zịị naa ngụ ẹtẹ vee nyimaa hụrị Òkū Imeditareniya, dị ọ na ngụ aha ọnya ana và eyi ka ịzị aā zịị ngụ Ihamati. Ẹhwị ẹtẹ awụ nịnị yị o. 21Avọọ ụ mẹ vaa gà ẹtẹ ọnọnịị yị ịrẹsụ-ịrẹsụ ene hi ẹtẹ Isirẹrị nị. 22Ogu awụ nịnị ẹtẹ ọnọnị kụkụ vaa vị̀ pooro nị. Ụ vaa gàa tu anẹkụra ọsa ana rá vahụra wụ nịnị, dị ẹ kụ ezi ma hi ịdị awụ nịnị. Vị́ ẹnị rẹ kụkụ vaa sị mẹẹ anka ezi-ẹtẹ Isirẹrị avọọ. Ẹnịrị ịrẹsụ-ịrẹsụ ene hi Isirẹrị e vee du duu gà ẹtẹ ọnọnị àa gà a nị. 23Ẹnẹyịmavara Ananyị ụkata hu ka, ịzị ịrẹsụ ọnị anẹkụra ọsa ọnọọ rá vahụra ộ nyị ẹtẹ tụ, ịzọọ á rẹ vaa dà ẹtẹẹ anịị tụụ yọ nị.
Právě zvoleno:
Ezikẹẹrị 47: EBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Ebira First Bible © Bible Society of Nigeria, 2014.