Ezikẹẹrị 43
43
Ẹnẹyịmavara ộ vavẹ ini irehi Anị
1Ezikẹẹrị ka ọnọrụ ọnọnị mẹ maanị sị ọsọnị mẹ ta, dị ọ́ sị ọnị va jẹẹ oze ọbanyị irehi Ohomorihi nị. Oze ọbanyị ọnọọ vị ana và eyi ka eyi ọnị ọyịị̄ zịị hụrẹẹ vẹ. 2#Ezk 10.3,4,18,19; 11.22,23; Ẹtẹ 1.15Ezikẹẹrị ka ọnị mẹ yà ịzọọ, ọnị ô ré Ohomorihi Anisirẹrị mẹ hụrị eyi ọnị ọyịị̄ zịị vẹ aa vẹ, ọnịrị ụbanyị anị, ọnị ộ wụ ọngwẹ Ohomorihi maa sụrẹyị anka okuha ọbanyị enee sì avọọ. Dị ụbanyị anị ọnọnị mẹ ka avaba ẹtẹ ọọ zẹtẹ nị. 3Ọ kà ẹtẹ ọnị ọnị ré aanị vị ana sị mẹẹ anka ẹngụ ọnị ọnị ré ụmẹ ọnị Ohomorihi sị ve vú Ijerusarẹmị ẹtẹ. Ô re vene ẹngụ ẹtẹ ọnị ọnị ré ụtọ irehu Ịchẹẹba ụmẹ ọnya aanị. Dị ọnị ne ẹngụ anị nyẹtẹ, dị ọnị và eyi ku ẹtẹ nị. 4Ụbanyị Ẹnẹyịmavara ọnọnị ộ zị oze ọbanyị ana ya eyi ọnị ọyịị̄ zịị vẹ aanị ngụ ịnị irehi Ohomorihi. 5Ụhwẹ Ẹnẹyịmavara ộ sị ọnị kwẹẹtẹ, dị ọ́ sị ọnị na ngụ ịnị ohweje ana ya ịnịnẹ nị. Dị ọnị ré ka avaba irehi Ohomorihi vị ohihi yị igirima Ohomorihi nị. 6Ezikẹẹrị ka, ọ́za ọnọọ mẹ vavọọ yị jẹẹ pe ọnị dị ọnị wụ́ ka Ẹnẹyịmavara ya ịnị irehi Ohomorihi aa kà ịrẹyị yị ọnị eyẹhẹ ka, 7ozi-ọza, ọnị Ẹnẹyịmavara ọ́ raa sị aga ohinọyị hi ẹtẹ ịzị ẹnị o. Ịzị ẹnị ọnị vaa rá ịnị akakana Anisirẹrị nịnị, dị ọnị vị ohinọyị ẹnịnị pooro nị. Anisirẹrị nịnị à vị ohinọyị ẹnịnị ẹ́ yị ma vana na mẹ̀ ori. Ẹnịnị é yị me vene ne oku ohinọyị ẹnịnị tụ ịzẹnị, dị ẹ̀ sị mẹ̀ ụhị nyị ịrẹha ọnị Ẹnẹyịmavara. 8Ohinọyị ẹnịnị ệ mẹ ẹbanoze ọnịrị oze irehi ẹnịnị, dị ẹ́ và wa eyi ka oze irehi ọnị Ohomorihi gẹdẹ-gẹdẹ, dị ahịka ugene kẹnẹ ọ jị ọnịrị wa ịnẹ nị. Ẹnịnị aa sị ịsị eenyisi ẹnẹ ẹ́ yaa mẹẹ du ọnị ịrẹha, agụvị avọọ ọnị sị ọyịkụ-ọyịkụ vu wa ẹtẹ nị. 9Ẹnẹyịmavara kà ẹnịnị ẹ̀ hụụnị ori ọ̀ yị mẹ ọgọnị, dị ẹ̀ kụ́ oku ohinọyị ẹnịnị noze rịrị ọnị. Ẹ̀ẹ vavọọ mẹ, vị ọnị vaa rá pe wa pooro nị. 10Ezikẹẹrị ka Ẹnẹyịmavara ộ kà a yị ọnị ka, ọnị ozi-ọza ọ̀ kà a yị Anisirẹrị nịnị irehi Ohomorihi ọnọnị mẹmẹ yà. Ẹnịnị è jị eyi ngụ á mẹmẹ mẹ̀ eto ana a sị da a, dị ụhị ebira odivi ẹngụ ẹnịnị ọ̀ nyị wa. 11Ụhị ịsị ẹ́ mẹ àa nyị wa, dị ọnị Ezikẹẹrị ọ̀ mẹ ẹhahi avaba eto irehi Ohomorihi ọnọnị yị wa. Ọnị ọ̀ mẹ̀ ẹhahi oze ana hụụnị irehi Ohomorihi ọnọnị na jịnẹ ọnịrị oze ana a zịị̄ ngụ ọ yị wa. Ọnị ọ̀ mẹ̀ ẹhahi avaba anị mẹmẹ yà yị wa beri avaba ọda irehi ọnọọ yị wa. Ọ kà ọnị ọ̀ chẹrẹ ọda ẹnẹẹ tịtẹ eyi ẹnịnị, agụvị ẹnịnị ẹ̀ ré ka ẹnị aa saasa wa. 12Ọda ana a mẹ tụ ịnị irehi Ohomorihi ọnọnị yị. Avaba ẹtẹ ana tịtẹ kara a, ịrẹsụ ataba vị Óhomorihi o.
Ụta ịsọvọ
13 #
Kụra 27.1,2; 2 Ịtọ 4.1 Á mẹ mọ ụta ịsọvọ, aanị ọ́ mẹ yà nị. Ịsị ọnyọọnya a sị mọ ọnịrị Irehi Ohomorihi nị. Ẹhwị okuvọ-okuvọ a si mọ ọ nị. Ụgana ọnịrị ụnẹba iruvo ụta ọnọọ ọnị ó si hi ẹtẹ vị okuvọ ọnya-ọnya. Dị a nyị enyusẹ chee aanị ana a sị kara a ụtọ nị. 14Eyi-ụvẹtẹ ụta ọnọọ, hụrị iruvo va ngụ ịrẹsụ vaa nẹba ẹ̀hụ ahụ ẹẹta rị ẹjịjị. Ịpa ana vatụra a va gana ụtụụtọ chee aanị huna ana ya ụvẹtẹ anị. Ọ vaa nẹba ẹ̀hụ ahụ ịhịmba avọọ. Ịpa ana rẹ vatụra ọsọnị rẹ vaa gana ụtụụtọ chee aanị huna a. 15Ana ya ẹbẹẹba aanị vaa nẹba ẹ̀hụ ahụ ịhịmba avọọ. Ịnị anị a vaa yaa rị ịsị ịsọvọ ịra nị. Ọpanyị ẹẹna ana da hụrị ẹhẹ ịnị ọgọgọ ẹyịna ụta ọnọnị ẹ nẹba hụụnị avaba ịrẹsụ anị ana vọ nị. 16Ụgọdọ ọnịrị ụgana ịrẹsụ ụta ọnọnị vị ẹbẹẹbẹ. Ẹ̀hụ ahụ ohurẹẹwụ avọọ eyi ọnya-ọnya vị nị. 17Ụgọdọ ọnịrị ụgana ịpa ịnị akakana ụta ọnọnị rẹ vị ẹbẹẹbẹ. Ẹ̀hụ ahụ ohurẹẹna rị ẹjịjị eyi ọnya eyi ọnya vị nị. Â nyị enyusẹ chee aanị ana a sị kara a ụtụụtọ. Ụgana enyusẹ ọnọọ vị ẹ̀hụ achẹva okuvọ avọọ. Ụvẹtẹ anị vị okuvọ ọnya kara ẹngụ. Ịzị a zịị̄ hịrẹ ụta ọnọnị vị ana a mẹ tụ eyi ọnị ọyịị̄ zịị vẹ.
Ọ̀yị sị ụta ọnọọ tụ irenyi yị Ohomorihi
18 #
Kụra 29.35-37
Ezikẹẹrị ka Ẹnẹyịmavara ộ kà a yị ọnị ka, ọnị ozi-ọza ò batọ ịrẹyị ọnị ọnị aa kà. Ịjị àa sị ụtọ ọnọnị dà, ọnị Ezikẹẹrị ọ̀ sị ọtirenyi yị ọnị. Ọnị ọ̀ rị ịsọvọ ịra ịnị anị, dị ọnị ò che ịsụpa ana a sị mẹ̀ ịsọvọ sẹ ẹ. 19Â nyị ẹnị ohirẹsụ irehi Ohomorihi ana vị Anireevi; Evere ọnọrụ ana aā hị́ Ịzadọkị ẹ̀ vị nị. Ẹnẹyịmavara kà ẹnị ẹnẹẹ kẹnẹ ẹ vaa vẹ ọvịdị anị vaa mẹ̀ ụkọrọ yị ọnị nị. Ọ kà, ọnị ộ mẹ̀ ẹ ọda yị ọnị Ezikẹẹrị ka ọ sị ụnọ ọnya yị wa dị ẹ̀ sị mẹ̀ ịsọvọ agụvị ebira odivi ana aza mẹ. 20Ọ kà Ezikẹẹrị ọ̀ ka ịsụpa ọnọọ dị và a kụ ọpanyị ana ya ịnị ọgọgọ ẹyịna ụta ọnọọ; ọnịrị ọgọgọ-ọgọgọ ịpa akakana ụta ọnọọ, dị ọ̀ rẹ ka a kụ ụtụụtọ jesi kara a. Ọ kà ọ̀ọ maanị mẹ̀, ọ vaa mẹ̀ ka ụta ọnọọ ọ nị, dị ọ rẹ sị ọtirenyi yị ọnị. 21Ọ kà Ezikẹẹrị ọ̀ sị ụnọ ana a sị mẹ̀ ịsọvọ agụvị ebira odivi aza aanị, dị ọ sị ọ tụ ẹhẹ hụrị aha ọnịnị, dị ọ̀ sị ọ nọ ịzị a vịdị dà tịtẹ ịnị ẹtẹ irehi Ohomorihi, dị ọ̀ na rị ọ ịra. 22Eyinẹhẹ anị, ọ̀ sị ịdẹ ẹnẹẹ nyị ịsị aa zị, dị ọ̀ sị mẹ̀ ịsọvọ agụvị ebira odivi aza. Ọ kà Ezikẹẹrị ọ̀ ka ịdẹ ọnọọ ku ụta ọnọọ anka ọ mẹ̀ mẹ ụnọ ana a vịdị wụ, dị ọ̀ sị mẹ ka ọ̀ nị. 23Ezikẹẹrị ka Ẹnẹyịmavara ộ kà a yị ọnị ka, ọnị ọ̀ọ sị ọnọọ mẹ ta, ọnị ọ̀ sị ụnọ anaa hụụ vẹ ọnya ọnịrị ịdẹba ọnyara. A sị á nyị ịsị aa zị ẹnị ẹyịva, 24dị ọnị ọ̀ sị wa va yị ọnị. Ẹnị ohirẹsụ irehi Ohomorihi vee che anọ ku wa, dị ẹ rị wa ịra. Ịsa a sị mẹ̀ ịsọvọ yị Ohomorihi ẹ̀ vị nị. 25Eyinị-eyinị, dị ọ mẹ ẹkụhị ịhịmba ọnị Ezikẹẹrị vaa sị ẹvụ ọnya, ụnọ ọnya ọnịrị ịdẹba ọnyaa mẹ̀ ịsọvọ agụvị ebira odivi ana aza mẹ nị. Asị a nyị ọnị ịsa zị ịnị ịsụpa ẹnẹẹ o. 26Ẹkụhị ịhịmba ẹnị ohirẹsụ irehi Ohomorihi nịnị vaa vavọọ tenyi ụta ịsọvọ ọnọọ tụ irenyi, dị ẹ̀ mẹ ka ọ̀ wụra mẹ̀ ịsọvọ ịnị anị nị. 27Ịhị ẹkụhị ịhịmba ẹnẹẹ ẹ̀ẹ sị gụ, ohirẹsụ irehi Ohomorihi nịnị vee nyima hụrị ịhị ẹ tụ ọ ẹkụhị ịhịnta va na, dị ẹyaa mẹ̀ ịsọvọ anaa rị ịra ịrẹsụ ụta ọnọọ ọnịrị ịsọvọ ana aza va mẹ ka ẹnịrị Ohomorihi ẹ̀ zụụ mẹ uzee. Ịjọnọọ ayị anị vee hinee tu wa. Ọnị Ẹnẹyịmavara Ochẹtẹẹngụ ọ ka avọọ nị.
Právě zvoleno:
Ezikẹẹrị 43: EBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Ebira First Bible © Bible Society of Nigeria, 2014.