Ezikẹẹrị 35
35
Ụya ọnị Ohomorihi vaa sị rị Anedomi
1 #
Ayị 34.5-17; 63.1-6; Ijer 49.7-22; Ezk 25.12-14; Emọ 1.11,12; Ọba 1.1-14; Ịma 1.2-5 Ezikẹẹrị kà, ẹkụhị ọnya, Ẹnẹyịmavara ộ kà a yị ọnị ka, 2Ọnị ozi-ọza ọ̀ và eyi ka ẹtẹ Edomi (Ịsẹyị) dị ọnị ọ̀ tụ́ ọ ohuvọ. 3Ọ kà, ọnị ọ̀ ka a yị Anedomi nịnị ka ọnị Ẹnẹyịmavara Ochẹtẹẹngụ ka. Ré, ẹwụ ataba Ịsẹyị, ọnịvị awụ ọnị vị̀ nị o. Ọnị vaa tana ụvọ za wụ, dị ọnị tụ wụ osusu, dị ọnị re vu wu ẹtẹ. 4Ọnị vee vu ẹkụra-ẹkụra awụ nịnị ẹtẹ, dị ọnị tụ ẹtẹ awụ nịnị osusu. Ịjọnọọ ụ vaa yẹ nịnị ka ọnị ọ vị Ẹnẹyịmavara nị. 5Ẹwụrị Anisirẹrị nịnị vị ọnịrẹyị ẹngụ pooro kẹnẹ. Dị ụ mẹ ka à wụ Anisirẹrị nịnị va ha, ụmẹ ọnị ẹngụkata tu wa nị. Ụmẹ ana a sị sị ụya ọdịrẹma rị wa agụvị ebira odivi ẹnịnị. 6Avọọ, àa vị ọnị Ẹnẹyịmavara Ochẹtẹẹngụ ọ yị vị Ohomorihi ana yara nị, vị u vee sú nịnị nị. Wẹ́ yị vaa ha, ka waa rị ịvị ọza ọ̀ yị wụ, ịrẹyị ọza ọyị wụ vị ana vaa dụ wụụ zị pooro. 7Ọ kà ẹkụra ene hi ịnị ataba Ịsẹyị vị ọnị ọnị vee vú ẹtẹ, dị ọnị wụ̀ avaba aza anaa zị avọọ paraahu. 8Ọnị vaa mẹ ka oku ẹ̀ gụ ịrẹsụ ataba Edomi, oku aza ana a wụ a maa kụ̀ ịrẹkụ vị ana vaa gụụ hi ịvị ataba ọnịrị inozi. 9Ọ kà ọnị vị ọnị vaa tụ wụ avosusu pooro zịna-zịna nị. Ọza ẹ́ yị ma vana ra ịnị ẹkụra awụ nịnị. Ịjọnọọ ụ vaa yẹ ka ọnị ọ vị Ẹnẹyịmavara nị. 10Ọnị ọ vị Ohomorihi Anijuda ọnịrị Anisirẹrị nịnị nị. Ama ẹwụ nịnị ka ẹ̀ wụ nịnị ọ nyị anẹkụra ẹyịva ẹnẹnị nị. 11Avọọ, àa vị ọnị Ẹnẹyịmavara ọ yị vị Ohomorihi ana yara nị, ọnị vee si wu nịnị ụta ọyịkụ ọnị ụ nyị hi aza anị nịnị, dị wee pe waa kụ ụhị agụvị ka wé yi sì ịrẹyị ẹnịnị nịnị. Ẹnịnị vaa yẹ ka ịsị ọnị ụ mẹ hi ẹnị ọnị aa sị ụya anịị rị wu nịnị nị. 12Ọ kà, ụ vaa yẹ nịnị ka ọnị, Ẹnẹyịmavara ộ wụ isiya ọnị waa mẹ nịnị ka, asị ataba-ataba ene hi Isirẹrị tu osusu, asị ọ hụrẹ ụvọ wụ nịnị ka waa gara a ha. 13Ọnị ộ wụ oto odivi ọnị wee wo nịnị, dị waa kà ịrẹyị ẹnẹ ẹ̀ yị vọrọọ hi ọnị nịnị. 14Ẹnẹyịmavara Ochẹtẹẹngụ ka, ọnị vaa tụ wụ nịnị osusu saka-saka, dị avaba anẹhẹ aa jẹ ka wa sị sẹ ẹdụ nịnị. 15Avaba anẹhẹ vaa jẹ anka ẹwụ nịnị mẹ raa jẹ ẹngụkata odivi me tù aza anị, Anisirẹrị nịnị. Ataba-ataba ene hi ẹtẹ Ịsẹyị ọnịrị avaba ẹtẹ Edomi vaa tu osusu. Ịjọnọọ avaba aza vaa yẹ́ ka ọnị ọ vị Ẹnẹyịmavara nị.
Právě zvoleno:
Ezikẹẹrị 35: EBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Ebira First Bible © Bible Society of Nigeria, 2014.