Ezikẹẹrị 31
31
Ịzị Ihwarawo nyị ụbanyị na za.
1Ezikẹẹrị ka, ịnị ẹkụhị ịpaapa ụhwẹ ọhụta ịrayị ana tụ ọ ịrayị ẹwụrọnya ana a za ẹnị ve hi Ịbabịrọnị, Ẹnẹyịmavara ộ kà a yị ọnị ka, 2Ozi-ọza, ọnị ọ̀ kà a yị ohinọyị Ijipiti ọnịrị avaba aza anị ka, waa da nyị ụbanyị kẹnẹ! Sị á va na zụ sị juwe awụ kẹ? 3Vị́ ụ sị mẹẹ anka ọchị Isida ana ya Ịrẹbanọnị avọọ nị. Ọchị Isida ọnọọ ộ há avọ ozoza-ozoza, dị ọ vị ihuhu tụ ịnị iriku nị. Ộ gọdọ pooro ịrẹsụ anị aa kà eguhi. 4Enyi hi ẹtẹ anaa mẹ ka ọọ hụ, Enyi iruvo ẹtẹ ee hú nị. Okuha vị enee sìị kara iruvo, dị eyee sì naa ngụ ịzị ọchị ana vọ hi ini uruku nị. 5Ka ọchị isida ọnọnị ô re enyi hú ẹtẹẹrẹ, dị ọ hụ huni ọchị ana vọ nị. Avọ anị ệ bụrụ, dị ẹ gọdọ wara-wara nị. 6Inomi irenyi-irenyi vị ana mẹ ịrẹngwẹ hi ịnị avọ anị, dị uye ini avị ee hi iruvo anịị ma ozi. Avaba anẹkụra ẹbanyị-ẹbanyị vị anaa vaa tụ́ ụhwọ́ ịnị ihuhu anị. 7Ọchị ọnọọ ọọ dà zoza kẹnẹ, ọchị ana maanị nẹba, dị ọ ha avọ wara-wara aanị. Ộ ha ẹpa ngụ ẹtẹ dị ẹpa anị na ngụ ịnị enyi ene hi iruvo ẹtẹ nị. 8#Oyn 2.9Ẹ́ yị nyị ọchị isida ana yà ịnị ụbazị Ohomorihi ana wụra juwe anị. Ẹ́ yị nyị ọchị ana aā hi ịhwaya à vị ọchị ẹnyẹẹnyị ọsa ana vavọọ há avọ da. Ẹ́ yị nyị ọchị ọnyọọnyị ịnị ụbazị Ohomorihi ana vavọọ zoza da. 9Ẹnẹyịmavara kà, ọnị ộ mẹ̀ ẹ ka ò zoza, dị ọ̀ há avọ. Avaba ọchị ana vọ hi ịnị ụbazị Ohomorihi, ana aā hí Edẹnị vị enee re e vụva. 10Booro aanị, ọnị Ẹnẹyịmavara Ochẹtẹẹngụ vaa kà a yị wụ, ịsị ẹ vaa mẹ ọchị ana maanị hụ, dị aa sị ịrẹsụ ka eguhi aanị. Â gọdọ hu avọọ, dị ọ kụkụ aa sị ẹngụ anịị tụ ẹba nị. 11Ọ kà ẹ́ yị nyị ịsị ọnị kụkụ aa sịị mẹ. Ọnị vaa hụrẹ ẹ ụvọ yị ohinọyị anẹkụra ọsa, ohinọyị ọnọọ vaa sị ụyaa rị ọ anka ọpa ebira ọhịmị ọnị ọ mẹ. 12Anẹkụra ọsa ẹnẹ ẹ̀ yị ma vayị ọza vaa ma a nya ẹtẹ, dị ẹ pàrà a hu. Avọ anị vee che nee hi ịnị avaba ataba ọnịrị inozi ene hi ẹkụra ọnọọ. Avaba anẹkụra ene vịdị ve hi ini uhuhu anị vee kwooze hụ ịzọọ. 13Inomi nịnị vaa vẹ vaa tụ́ ụhwọ́ ịnị ọchị ana ma aanị. Dị uye ịnị avị nịnị kụkụ aa kụ ahụụ hí avọ anịị parahu. 14Avọọ, hụrị ọyaanị na, ẹ́ yị ma vana nyị ọchị ọnyọọnyị anaa vanaa maanị hụ, ọ̀ọ́ daka hú enyi pooro. Ọchị ọnyọọnyị ẹ́ yị ma vanaa vavọọ nẹba. Avaba ẹnịnị vị ene vee súu ha anka ọza ịrẹyị ịrẹsụ mẹẹ nọ iro avọọ. 15Ẹnẹyịmavara Ochẹtẹẹngụ ka, ịhị ọchị ọnọọ ọ̀ọ́ vaa nọ iro aanị, ọnị vaa mẹ ka enyi ene hi iruvo ẹtẹ ọ̀ mụnẹ ẹ. Ọnọọ vaa sịị zụ ka, aa zị ẹngụ anị. Ọnị vaa mẹ ka asị irehu ọnịrị okuha ọrụrụ-ọrụrụ kuku sì tụ ẹhẹ. Ọnị vaa mẹ ka ịrahụ ọ̀ za ataba ene hi Ịrẹbanọnị dị ọnị mẹ ka avaba ọchị è sú, agụvị ka ọchị ọbanyị ọnọnị ô wusu. 16Ịjị ọnị ộ raa tụ ọ na ngụ iro, dị ọ sẹ ẹdụ nya ẹtẹ nị, avaba anẹkụra nịnị vaa wụ̀ ọ ịrẹyị, dị ọ za wa zizi. Avaba ọchị ene hi Edẹnị ọnịrị ọchị ọyịza-ọyịza ene hi Ịrẹbanọnị di e hú enyi ẹtẹẹtẹrẹ, ama dị ẹ vịdị sị sẹ ẹdụ, e vee re ọchị ọnọnị mẹ sẹ ẹdụ, dị ayị ẹnịnị ee hine. 17Ẹnịrị ọ vaa zị nọ iro nee tu aza ene vịdị wusu. Avaba aza ana vịdị hi ini uhuhu anị vị ana a vaa gara nee hi ịnị akakana anẹkụra ana vọ nịnị. 18Ohinọyị Ijipiti ọnịrị aza anị ẹ vị ọchị ọnọọ nị. Ọchị ene hi Edẹnị ẹ́ yị hyakụ vavọọ nẹba. Ẹnịnị ẹ́ yị hyakụ vavọọ ngụ ọza eyi bẹẹ. Ama, booro aanị, ọ vaa nọ iro anka ọchị ene hi Edẹnị, dị o ne tu aza ene ẹ̀ yị yẹ Ohomorihi ana a wụ a maa kụ̀ ịrẹkụ. Ọnị, Ẹnẹyịmavara Ochẹtẹẹngụ ọ kà avọọ nị.
Právě zvoleno:
Ezikẹẹrị 31: EBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Ebira First Bible © Bible Society of Nigeria, 2014.