Ezikẹẹrị 22
22
Ebira odivi ana aa mẹ Ijerusarẹmị
1Ezikẹẹrị ka Ẹnẹyịmavara ộ rẹ kà a yị ọnị ka, 2Ọnị ozi-ọza, ọnị oo tenyi ẹngụ ka ọnị aa mẹ̀ ọkarẹyị yị Ijerusarẹmị agụvị aza ana aa wụụ ha ịzọọ aanị? Ọnị ọ̀ sị zụ̀ wa gedebee avaba ịsị edivi ẹnẹ ẹ yaa mẹ. 3Ọ kà, ọnị kà a yị Anijerusarẹmị nịnị ịsị ọnị Ẹnẹyịmavara Ananyị ụkata hu aa kà ka: ka wa raa wụ anda awụ nịnị ẹnẹmẹhị, dị ụ rẹ raa sị ori ọnị waa mẹ du ẹngụ awụ nịnị ẹngụ nị. Ụmẹ awụ nịnị aa vẹ (ọnị ụ vaa rị ụya nịnị). 4Waa rị ịvị nịnị agụvị aza ọnị ụ wụ nịnị, dị ori ọnị ụ mẹ nịnị rẹ sịị ụ nịnị du ẹngụ nị. Agụvị avọọ, ụmẹ awụ nịnị aa vẹ, eyi awụ nịnị ọ sị nị. Ịsị ẹ mẹ ka ọnị ọ̀ mẹ ka anẹkụra ana vọ nịnị ẹẹ kụ́ wụ nịnị isiya, di ee nyị wu nịnị unyi ọ vị ọnọọ nị. 5Anẹkụra ana gụrị ẹwụ nịnị ọnịrị anẹkụra ene noze tara wụ nịnị vị enee nyị wu nịnị unyi, agụvị ka wẹ́ yị ma saasa ọda nịnị. 6Wee re, avaba ọdọvịdị Anisirẹrị nịnị vị ana sị ayị tụra ụkata ẹnịnị, dị ẹyaa wụ̀ azaa ha kẹnẹ. 7#Kụra 20.12; Ọda 5.16; Kụra 22.21,22; Ọda 24.17Ẹ́ yị nyị ọza Ijerusarẹmị ana sị ụbanyị ada anị ọnịrị ọnyị anị. Waa mẹ azọga nịnịị rị. Dị waa mẹ ehunaa yị osoku nịnị ọnịrị ezi-oku nị. 8#Ire 19.30; 26.2Wẹ́ yị sị ụbanyị yị aha ọnịnị Ohomorihi nịnị, dị wẹ̀ yị rẹ sị ụbanyị yị ẹkụhị ụhwọtụ anị nịnị nị. 9Aza ẹnyị ịnị ẹngụ awụ nịnị vị enee du azaa zị ụvị dị aa wụ̀ aza ẹnẹẹ. Aza ẹnyị ịnị awụ nịnị aa nọ ịrẹsụ ataba naa rị ịsị aa sị mẹ̀ ịsọvọ yị ori nịnị. Dị ahịka ịsị ọchẹngụ aza enyi èe sì kẹnẹ ẹẹ mẹ nị. 10#Ire 18.7-20Aza hi ịnị ẹngụ awụ nịnị anaa sị́ ose ada anị. Dị aza ẹnyị aa sị ụkata-ụkata pe ọnyẹnẹẹ enee ré ịsị ụhwẹẹ mẹ nị. 11Aza ẹnyị awụ nịnị aa sẹ̀ ịrẹka, dị aza ẹnyị aa sị́ ose ozi ẹnịnị nị. 12#Kụra 23.8; Ọda 16.19; Kụra 22.25; Ire 25.36,37; Ọda 23.19Aza ẹnyị awụ nịnị aa dọ ọza ẹkẹhị naa wụ̀ ọza. Aza ẹnyị ọ̀ọ sị ẹkẹhị rèré ọnọhụva anị Anisirẹrị, dị ẹ dọ ọtụrọsarẹsụ ọdẹngụ tụ ọ. Avọọ ẹ́ maa me ehunaa yị ẹngụ dị ẹyaa sịị nyị ẹkẹhịị hu avọọ nị. Ẹnẹyịmavara Ananyị ụkata hu ka, ayị anị ô hí wa. 13Ọ kà ọnị vaa kụ̀rà ụvọọ kụ wa ịrẹsụ agụvị ogu ẹnẹ ẹyaa zị oze ẹnẹ ẹ̀ yị vọrọọ kụụ gụ ọnịrị agụvị aza ẹnẹ ẹ́ wụ aanị. 14Ọ kà ịjị ọnị ọ̀ọ tana ụvọ za wụ nịnị, wéé ro ka, ụ kụkụ yị vaa nyị ọtụtụrụma jẹẹ nịnị? Wéé ro ka, ụ yị vaa nyị ụkataa jẹẹ nịnị? Ẹnẹyịmavara kà ọnị mẹ kà a aanị, avọọ ọnị mẹ vaa mẹẹ nị. 15Ọnị vaa gara wụ nịnịị hi avaba ẹkụra, dị ọnị dọ wụ ebira odivi awụ nịnị va ha. 16Avọọ, anẹkụra ana vọ ẹ́ yị ma vana sị ụbanyị yị wụ nịnị. Ama ụ vaa yẹ nịnị ka ọnị ọ vị Ẹnẹyịmavara nị. 17Ezikẹẹrị ka Ẹnẹyịmavara ộ kà a yị ọnị ka 18Ozi-ọza, ẹ́ yị nyị Anisirẹrị nịnị kụkụ wụra ọnị mẹ o. Vị́ ẹnịnị kụkụ sị mẹẹ enyusẹ irenyi-irenyi ana vọ hi aha ana a yaa kà ịraa hi enyusẹ avọọ nị. Ẹnịnị vị ana sị mẹẹ ịdọtị ana a hụ̀ hụụnị enyusẹ ana aā hị́ isiriva avọọ nị. 19Avọọ ọnị Ẹnẹyịmavara kà, ẹnịnị mẹ kụkụ sị vara ịsị ẹnẹ ẹ̀ yị nyị ịsị ọ wụra mẹ nịnị avọọ aanị, ọnị vaa kụ waa gụ Íjerusarẹmị, 20anka a mẹẹ kụ enyusẹ irenyi-irenyi gụụ hi ịzị a yaa kà ịraa hi enyusẹ avọọ. Ọnị vaa kụ ayịị hi wụ nịnị, dị ọnị mẹ wụ nịnị pẹpẹpẹ anka a mẹẹ kà ịra hi enyusẹ dị ọ na avọọ. 21Ịzẹyịza, ọnị vaa kụ waa gụ Ijerusarẹmị, dị ọnị kà ịra pe wa iruvo, dị ọnị sị ọyịkụ mẹ wa pẹpẹpẹ. 22Ọnị vaa mẹ wa pẹpẹpẹ vàa hi ẹtẹ Ijerusarẹmị anka a mẹẹ kà ịraa hi isiriva dị ọ na và hi ịzị aā yaa kà ịraa hi enyusẹ avọọ.
Ebira odivi ọnị ọdọvịdị Anisirẹrị nịnị mẹ
23Ezikẹẹrị ka Ẹnẹyịmavara ộ rẹ kà a yị ọnị ka. 24Ozi-ọza, ọnị ọ̀ kà a yị Anisirẹrị nịnị ka, ẹkụra ẹnịnị ẹ́ yị vị nị, agụvị avọọ, ọnị vaa sị ụyaa rị wa agụvị ka ọnị aa kụ ayịị hi wa. 25Ẹnị ọdọvịdị ẹnịnị vị ana sị mẹẹ idu enee nowu kara uye ọnị ọ za, dị aa nàa a rị avọọ. Ẹ́ kụ aza wụ; dị ẹ́ kụ ogu ọnịrị ẹnya akàaka o me zee wa eyi nị. Ẹ́ sị anẹẹ ọrụrụ-ọrụrụ jị osoku và hí ịnị ẹkụra. 26#Ire 10.10Ọdọvịdị irehi ẹnịnị ẹ́ yị saasa ọda anị. Ẹnịnị sị ụbanyị yị ịsị ọnịnị (ana vị Ohomorihi). Ẹnịnị ẹ́ yị zẹẹ ka à yẹ ịsị ana vị ọnịnị tụ irenyi yị ịsị ana vọ. Ẹnịnị ẹ́ yị kọ ọ yị aza ka ẹ̀ yẹ ịsị ana nị ọnịrị ẹnẹ ẹ̀ yị nị. Ẹnịnị ẹ̀ yị rẹ sị ụbanyị yị ẹkụhị ụhwọtụ anị nị. 27Ẹnị ọdọvịdị ene hi ịnị ịjọva vị ana sị mẹẹ anka akatapooro ana wụ̀ uye, di aa na rị avọọ. Ẹnịnị vị anaā wụ̀ aza agụvị ẹnị ẹ̀ sị nyị ẹkẹhị. 28Ọnịsẹ ẹnịnị ệ jị avị ku ebira edivi ẹnẹnị, ẹ́ yị kà a. Vị́ ẹnịnị sị mẹẹ anka aza enee ku ugene ọda ọvwọọvụ avọọ nị. Ẹtẹ ene eyee re, ọnịrị ịsẹ ẹnẹ ẹyaa ka vị apẹ osusu. Ẹ ka Ẹnẹyịmavara Ananyị ụkata hu ọ tụ́ ẹnị ụtụ nị, ama ọnị Ẹnẹyịmavara ẹ́ yị tụ wa ụtụ. 29Opisa ẹnịnị vị anaa mẹ ọzaa rị, dị ẹyaa mẹ akoo yị aza. Ẹnịnị vị anaā mẹ ehunaa yị onosiye ọnịrị anẹkụra ọsa nịnị. 30Ẹnẹyịmavara kà, ọnị ô si ọza-ịnya ịnị ẹngụ Anisirẹrị nịnị anaa kà a ka, à kụ́ ebira odivi ẹnẹnị kwooze, ama ọnị é yị re. Ọnị é yị re ọza ana hyakụ nyẹngụ hụvị ẹtẹ Isirẹrị va da ịpẹ ka asị ọnị vu ọ ẹtẹ. 31Avọọ, ọnị vaa kụ ayịị hi wa, agụvị avaba ịsị ẹnẹ ẹ́ mẹ; dị ọnị sị ọyịkụ-ọyịkụ vu wa ẹtẹ anka ịra mee vu ịsa ẹtẹ avọọ. Ọnị Ẹnẹyịmavara Ananyị ụkata hu, ọ ka avọọ nị.
Právě zvoleno:
Ezikẹẹrị 22: EBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Ebira First Bible © Bible Society of Nigeria, 2014.