Ezikẹẹrị 18
18
Ọza ana mẹ̀ ebira odivi, o vee su isu anị nị
1Ezikẹẹrị ka, ẹkụhị ọnya, Ẹnẹyịmavara ộ kà a yị ọnị ka. 2#Ijer 31.29Sị ẹ vị iruvo ọnị ọnị ee sii che ụhịrẹyị ka Ada ezi ệ rị ẹtụtụ ana sụrẹyị, dị ahịka ezi ẹnịnị anyị ẹnịnị ee henyi nị. 3Ẹnẹyịmavara Ananyị ụkata hu ka, àa vị ọnị ọ yị vị Ohomorihi ana yara nị, ẹnị Anisirẹrị e me vene che ụhịrẹyị ọnọọ ẹtẹ Isirẹrị. 4Ka, ọnị ọ nyị avaba aza nị. Aza ana ma ozi ọnịrị ezi ẹnịnị, ọnị ọ nyị wa vabẹ nị, avọọ ọza anaaa mẹ̀ ebira odivi, o vee sú isu anị nị. 5À kà a ka aa nyị ọza ọyịza, anaa mẹ̀ ịsa ana vọrọ, dị ọ vị ọnịzẹyịza nị. 6Dị ọza ọnọọ ẹ̀ yị ma mẹ ori ọnị Anisirẹrị nịnị aa mẹ, dị ẹ̀ yị ma rẹ rị ịsa ana sị mẹ̀ ịsọvọ ịnị ịrẹba nị. Ọza ọnọọ ẹ̀ yị ma sị ose ọza ẹnẹsa, dị ọnịrị ọnyẹnẹẹ ẹ̀ yị ma rẹ mẹ ụmẹ ọnị ọnẹẹ ee re ịsị ụhwẹ nị. 7Ọza ọnọọ ọ́ ma mẹ ẹvaya yị ọza, ama ịsị ọnị ọza ọọ sị va dọ ọ ịsa rere, vị ọnị ọọ varẹma yị ọza ọnọọ. Ọza ọnọọ ẹ́ yị ma mẹ ako yị ọza, òo re ọza ọnị ụngwẹ aa kụ̀, dị ọ dà ịsa yọ, ọza ẹnẹ ẹ̀ nyị ịta ku ẹngụ, dị ọ sị awuru yọ. 8Ọza ọnọọ ẹ̀ẹ ma sị ẹkẹhị rèré ọza dị ọọ dọ ọtụrọsarẹsụụ tụ ọ. Ẹ́ yị ma dọ ka ọnị ọ̀ mẹ̀ ebira odivi vụrụ-vụrụ, dị ahịka ịzẹyịza ọ sịị̄ mẹ̀ ọkarẹyị yị aza, ẹ̀ẹ nyị ịrẹyị nị. 9#Ire 18.5Ẹnẹyịmavara Ananyị ụkata hu ka ọza ọnọọ àa sị ịzẹyịza saasa ịrẹyị anị, dị aa mẹ ịsị ọnị ọda anị kà nị, ọza ọnọọ ọ vị ọnịrẹyịzẹyịza nị, avọọ, ọ vaa yara. 10À kà a ka ọza ọnọọ ộ ma ozi anaa mẹ jugu-juguu zị, dị ọọ̄ wụ̀ ọza, avịka ọọ mẹ ẹngụ ịsị edivi ana vọ, 11ana ada anị ẹ̀ yị ma mẹ nị, ozi ọnọọ aa rị ịsa ana a sị mẹ̀ ịsọvọ ịnị ịrẹba, dị aa sị ose ọza ẹnẹsa, 12aa mẹ ẹvaya yị ọnụya ọnịrị aza ẹnẹ ẹ̀ yị nyị ịsa, dị aa mẹ akoo yị aza nị. Ọza ọ̀ọ sị ịsa va dọ ọ ịsa rere, dị ẹ yị kụkụ va a ịrẹma yọ. Aa mẹ ori anaa nyị ọnị ịhyẹrẹ. 13Ọọ sị ẹkẹhị rèré ọza, dị ọ dọ ọtụrọsarẹsụ rawụ-rawụ tụ ọ. Ẹngụ aza ẹnẹẹ ẹ́ẹ́ zụ yara? Eyiye. Ẹ́ yị zụ yara o. Ẹnẹyịmavara kà agụvị ka ộ mẹ̀ ịsị ẹnẹnị anaa nyị ọnị ịhyẹrẹ aanị, vị́ a vaa wụ̀ ọ, dị ọnị ụvọta rị uru ẹngụ anị nị. 14Ama ozi ọnọnị ọnị ọ̀ọ rẹ ma ozi, ene re avaba ebira odivi ọnị ada anị mẹ, dị ẹ̀ yị hama a mẹ ẹngụ ịsa ẹnẹẹ nị. 15Ẹ́ yị ma mẹ ori ana Anisirẹrị nịnị aa mẹ. Ẹ́ yị ma rẹ rị ịsa ana a sị mẹ̀ ịsọvọ ịrẹba, Ẹ́ yị ma sị ose onose. 16Ẹ́ yị ma mẹ ẹvaya yị ọza ọnyọọnyị; ẹ́ yị ma rẹ ma ako yị ọza. Ẹ́ yị ma kà a ka ọza ọ̀ sị ịsa va jẹẹ dị ọnị ọ̀ va sị ẹkẹhị rèré e. Òo re ọza ọnị ụngwẹ aa kụ̀, dị ọ dà ịsa yọ, ọza ẹnẹ ẹ̀ yị nyị ịta ku ẹngụ, dị ọ sị awuru yọ. 17Ẹ́ yị ma dọ ka ọnị ọ̀ mẹ̀ ebira odivi vụrụ-vụrụ. Ọ̀ọ sị ẹkẹhị rèré ọza, ẹ́ yị ma dọ ọtụrọsarẹsụ tụ ọ. Vị ọọ̄ saasa ọda anị, dị aa mẹ̀ ịsa ọnị ọnị kà nị. Ẹngụ ozi ọnọnị ẹ́ yị vee su agụvị ebira odivi ana ada anị mẹ, vị ọ́ vaa yàra nị. 18Ama ada anị vee su isu ebira odivi ọnị ọnị-ụvọta mẹ agụvị ka vị ọọ̄ mẹ̀ azaa rị, dị aa mẹ ako yị ọhụva anị nị. Ịsị ẹnẹ ẹ̀ yị vọrọ ọọ̄ mẹ̀ ịnị akakana aza anị nị. 19Wee họ̀ use ka, sị ẹ vị iruvo ọnị ozi ẹ̀ yị sịị rị ụya ebira odivi ana ada anị mẹ? Iruvo ọ vị ka, ozi ọnọọ ộ mẹ̀ ịsị ene zoza dị ọ rẹ vọrọ. Ẹnẹyịmavara kà ộ sị ụvọ za ọda anị, dị ọ tangwa aa saasa wa nị; agụvị avọọ é yị vee sú. 20#Ọda 24.16Ọza ana mẹ̀ ebira odivi, o vee su isu anị nị. Ozi ẹ́ yị vaa rị ụya ebira odivi ada anị; ada ẹ́ yị vaa rị ụya ebira odivi ozi anị. Ọza ọyịza vaa rị ọgụ ebira ọyịza, avọọ ọza odivi mẹ vaa rị ụya ebira odivi anị nị. 21Ẹnẹyịmavara kà, ama ọza odivi ọ̀ọ va hụụnị ebira odivi anaa mẹ, dị aa saasa ọda anị, dị aa mẹ ịzẹyịza ọnịrị ịsị ana vọrọ nị; ịzẹyịza, ọza ọnọọ ẹ́ yị vee sụ, vị aa yàra nị. 22A vaa vagu avaba ebira odivi ọnị ọ vịdị mẹẹ yọ, dị ọ yara, agụvị ịsị ana vọrọ ọnị ọ vana mẹ. 23Ẹnẹyịmavara Ananyị ụkata hu aa họ̀ ka, ví wéé roo ka vị ayị anịị hine ka ọza odivi ee su nị? Éyiye, Ọnị òo re ka ộ và hụụnị ebira odivi anị, dị ọ́ yara nị, vị ayị anịị hine nị. 24Ama ọza ọyịza ọ̀ọ và hụụnị ebira ọyịza anị, dị ọ́ naa mẹ̀ ebira odivi anaa nyị ọnị ịhyẹrẹ ana ọza odivi aa mẹ nị, ọza ọnọọ ọ́ọ́ zụ yara kẹ? Éyiye de. Ẹ́ yị nyị ebira ọyịza ọnị ọ́ vịdị mẹ ana a vaa tamayị anị. Vị́ o vee sú nị, agụvị ka ẹ yị vị ana mẹ ịzẹyịza ọnịrị agụvị ka ọ vanaa mẹ̀ ebira odivi. 25Ama ẹwụ nịnị ka, ịsị Ananyị yị aa mẹ aanị ẹ́ yị vọrọ. Ẹnẹyịmavara kà avaba ẹwụ nịnị Anisirẹrị ẹ̀ sị ụtọ pe ẹtẹ. Vi wéé ro nịnị ka oze ọnị ọnị zịị mẹ ịrẹyị ẹ́ yị vọrọ nị? Ẹwụ nịnị aa mẹ ịsị ẹnẹ ẹ̀ yị vọrọ nị. 26Ọza ọyịza ọ̀ọ hụụnị ebira ọyịza anị, dị o nyima aa mẹ udivi nị; òo su, agụvị ebira odivi anị ó sú avọọ nị. 27Ama ọza odivi ọ̀ọ va hụụnị ebira odivi ọnị aa mẹ, dị ọ kụkụ aa mẹ ịzẹyịza ọnịrị ịsị ana vọrọ nị, ọ vaa dọ ẹhẹ anịị ha. 28Ka ộ zama ẹhẹ anị re, dị ọ và hụụnị ebira ọnị ọnị aa mẹ, ịzẹyịza, ọ vaa yara. É yị vee sú. 29Ama ẹwụ nịnị Anisirẹrị ka, ịsị Ananyị yị aa mẹ ẹ̀ yị vọrọ. Vị wéé ro ka ịsị ọnị aa mẹ ẹ̀ yị vọrọ nịnị nị? Ẹwụ nịnị ọ vanaa mẹ ịsị ẹnẹ ẹ̀ yị vọrọ nị. 30Avọọ, ẹwụ nịnị Anisirẹrị, Ẹnẹyịmavara Ananyị ụkata hu ka, ọnị vaa mẹ̀ ọkarẹyị yị ọzịnya-ọzịnyara awụ nịnị anka ịsị ọzọza mẹ. Ro ịnẹ varẹma, dị wa và hụụnị ebira odivi ọnị waa mẹ nịnị; Asị ụ zẹẹ ka ebira odivi awụ nịnị ò wú wu nịnị ẹtẹ. 31Sị ụvọ hụụnị ebira odivi ọnị waa mẹ nịnị, dị waa dọ ayị ọwọọwa ọnịrị ụhwẹ ọwọọwa nịnị. Ẹwụ nịnị Anisirẹrị, sị ẹ vẹ di wee sì ka we sú nịnị? 32Ẹnẹyịmavara Ananyị ụkata hu ka, ayị anị é yi hine ka ọzọnyị-ọzọnyị ò sú o. Avọọ, và hụụnị ebira odivi, dị wa yàra nịnị.
Právě zvoleno:
Ezikẹẹrị 18: EBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Ebira First Bible © Bible Society of Nigeria, 2014.