Ịdanịyẹrị 8
8
Ẹtẹ ọhụva ọnị Ịdanịyẹrị re ịnị ịpa ịdẹba ọnịrị ẹvụ ọnyara.
1Ịnị ịrayị ọhụta ọnị Iberisaza sị rị ohinọyị, Ịdanịyẹrị ka ọnị ô re ẹtẹ ụpẹ ọhụva. 2Ọ kà ọnị ô re ẹngụ anị ẹkụra ana aā hị́ Isusa ana vị aha ọ yị yaatụ ịjọva ẹtẹ Erami. Dị ọnị ré ka ọnị jẹẹ ụtọ irehu ana aā hị́ Urayi nị. 3Ọ kà ọnị mẹ kana eyi, dị ọnị ré ka ịdẹba ọnyara aanị jẹẹ ụtọ irehu ọnọọ nị. Ịdẹba ọnọnị ô nyị ọpanyị ọgọdọ-ọgọdọ ẹẹva, ama ọnyara ộ gọdọ huna ọsa nị. Dị a hị́ ka ana gọdọ hu aanị ó nyị ọdịrẹma nị. 4Ịdanịyẹrị ka ọnị ô re ka ịdẹba ọnọnị aa jị ayị vàa chi vàa hịrẹ ọnịrị eyi ọnyị eyi ọsa zị. Ẹ yị nyị uye ana zụ za a, ẹ yị rẹ nyị uye ana zụ jẹẹ zi ọ. Dị ịdẹba ọnọnị ê wùu zị, dị â mẹ ọ́ mẹ ze e eyi nị. 5Ọ kà ọnị mee yi rò ịrẹyị ẹtẹ ọnị ọnị ré aanị kẹnẹ dị ọnị ve ne re ka ịdẹ ọnyara ô ku echeechi hụrị eyi ọnị ọyịị̄ zị na ngụ ẹtẹ àa vẹ nị. Ịdẹ ọnọnị ộ ngụ avaba ịrẹsụ ẹtẹ zị, ó mee zwe echi vị ọ sị mẹẹ anka vị ahụ anị e yi tu ẹtẹ nị. Ô nyị ọpanyị ọnyara poporopo anị tụ ịnị akakana eyi anị ẹyịva. 6Ọ kà ọnị ô re ka ịdẹ ọnọnị ộ sị ụkata-ụkata àa tụra ka ịdẹba ana jẹẹ ụtọ irehu ịsọọnịị vẹ. 7Dị ọ sị ịrẹsụ ngwọ ọ nị, dị ọ sị ọyịkụ-ọyịkụ chi ịdẹba ọnọọ rị ẹtẹ, dị o chee ọpanyị ẹyịva nị. Ịdẹba ọnọọ ẹ yị kụkụ nyị ụkata ọ yị gẹ ẹ ịrẹvụ. Dị ọ za a, dị ọ kwọ ọ sisi ẹtẹ nị. Ẹ yị nyị ọza ana zụ dọ ọ hụrẹ ẹ ụvọ. 8Dị ịdẹ ọnọnị ọnị rẹ kụkụ e wù, dị aa mẹ kàrà-kàrà zị nị. Ộ maanị ta jẹẹ kẹnẹ, dị e che e ọpanyị nị. Dị ọpanyị ẹẹna nyị dọ e ne che aanị ịrẹsụ nị. Ẹnịnị vị ana va eyi ka aha irenyi-irenyi. 9Ịdanịyẹrị ka ọnyara ịnị ọpanyị ẹẹna ẹnẹnị ộ vàna nyí ụkata ẹtẹẹtẹrẹ ne tu ka ộ sị ụkata anị pịva yị Anijipiti ọnịrị Anipesiya beri Anipataya nịnị. Anisirẹrị nịnị vị ọnị ọ́ rẹ mẹ̀ ẹ yị bẹẹ. 10#Ẹtẹ 12.4Ộ mẹ ụkata pooro ne tu ka ọ̀ kụ́ ịrẹkụ ne tu aza Ohomorihi, ana vị ụzọmị ẹbẹẹba. Ộ gụ aza ẹnyị ẹnịnị hyẹdụ, dị ọ sị ahụ pịrị wa zẹtẹ nị. 11Ọpanyị ọnọọ ộ hyakụ kụ hịrẹ ọdọvịdị isoja ẹbẹẹba, dị ọ ka asị a kụkụ mẹ̀ ịsọvọ hi Ohomorihi a mẹ̀ vịdịị mẹ̀ ẹ eyinị-eyinị nị. Ịzị aā yàa hẹkẹ Ohomorihi vị ọnị ọ hyakụ du va hi ẹtẹ bẹẹ. 12Ana vọrọ ka aza Ohomorihi ẹ sịị mẹ̀ ịsọvọ hi Ohomorihi, dị ẹnịnị kụkụ aa mẹ ịvị nị. Aza ẹ yị kụkụ sị ịzẹyịza hẹkẹ Ohomorihi ama dị ee zee yị ọpanyị ọnọọ ịnị avaba ịsị aa mẹ nị. 13Ịdanịyẹrị ka, ọnị ộ vana wụ ka anggẹẹrị ọnya ộ họ̀ ọsa use ka, ịzị avaba ịsa ọnị ọnị maanị vaa yà nee tu? Ịzị aza vaa maanị mẹ ịvị naa za, dị aza ẹ yị kụkụ mẹ̀ ịsọvọ hi Ohomorihi? Aanị áa mẹ yị vaa kụ́ ahụụ hị́ aza Ohomorihi di ee du irehi anị vaa hi ẹtẹ nị? 14Ọ kà dị ọnị wụ anggẹẹrị ọsa mè tú ohi ka, avọọ ọ mẹ vaa yà dị ọ mẹ ẹkụhị akawụ beri ịrẹkẹẹchẹhị nị (2,300). Ịrẹma ọnọọ dị e ve tenyi irehi Ohomorihi anka ọ mẹ̀ vịdị yà nị.
Anggẹẹrị ana aā hị́ Igebirẹẹrị ộ mẹ̀ ẹhahi ẹtẹ ọnị Ịdanịyẹrị ré
15Ịdanịyẹrị ka ịjị ọnị sị ẹtẹ ọnọnị re, dị ọnị ê si ka ọnị ọ yẹ́ ịsị ẹ vị iruvo anị nị. Kẹnẹ dị ọnị ve ne re ka ọza ịnyara jẹẹ ọvịdị anị nị. 16#Irk 1.19,26Ọ kà dị ọnị vana wụ́ ka ọza ịnyara yà ụtọ irehu Urayi dị ọ hị́ ọza ọnọnị ka: Igebirẹẹrị! Dị ọ kà a yọ ka ọ̀ mẹ ẹhahi ẹtẹ ọnị ọnị re aanị yị ọnị nị. 17Ịzẹyịza dị Igebirẹẹrị kà pe ọnị nị. Ọ mẹ kà pe ọnị, angwa ô hí ọnị, dị ọnị hyẹdụ va eyi ku ẹtẹ nị. Ama dị ọ kà a yị ọnị ka, ọnị ozi ọza, ọnị ọ̀ yẹ́ ka ẹtẹ ọnị ọnị re aanị vị ịrẹyị ụmẹ ọnị ẹhẹ àaa vaa ta. 18Ọ kà, ọ́ maa ka ịrẹyịị yị ọnị dị ọnị va eyi ku ẹtẹ dị ara vavọọ dọ ọnị nị. Ama dị ọ́ za ọnị, dị ọ sị ọnị vọrọ jẹẹ nị. 19Dị Igebirẹẹrị kà a yị ọnị ka, ọnị aa sị zụ ọnị ịsị Ohomorihi vaa mẹ ịnị ọyịkụ anị. Ộ ka ẹtẹ ọnị re aanị vị ịrẹyị ụmẹ ọnị ẹhẹ àa va ta. 20Ọ kà ịdẹba ọnị ọnị re ene nyị ọpanyị ẹẹva aanị vị ẹnị ohinọyị Animediya ọnịrị Anipesiya ana vaa rị. 21Dị ịdẹ ọnọọ ọnị vị ohinọyị Anigirisi nị. Ọpanyị ana jẹẹ ịnị akakana eyi anị ẹyịva ọ vị ohinọyị ẹnịnị ịpaapa nị. 22Ọpanyị ẹẹna ene ve ne nyị tụ aha ene e che ikonyara hụrẹ aanị, ẹnị vị ohinọyị ẹẹna ana va naa rịị tụ́ ẹtẹ ohinọyị ịpaapa ọnọnị, ama ẹnịnị ẹ yị va nyị ụkata ọnị ọ nyị. 23Ịjị ụmẹ ohinọyị ẹnẹnị àaa vaa ta, dị ẹ kụkụ aa mẹ̀ ebira odivi kẹnẹ. Dị à va sị ụya rị wa, a vaa nyị ohinọyị ọkatẹngụ ọnya. 24Igebirẹẹrị ka ohinọyị ọnọnị vaa nyị ụkata ẹtẹẹtẹrẹ. O vee du ẹtẹẹ ha ene vee chire ọza angwa. Ịsị ee ze e eyi kẹnẹ ọ vaa mẹ nị. Aza ọkọọka beri aza Ohomorihi vị oni o vee vú ẹtẹ. 25Ọ kà agụvị ka ộ yẹ ọbọ, aza vị oni o vee vene kẹnẹ o me ze e eyi, dị ọ kụkụ ee wùu zị. Aza ẹnyị ẹ yị vaa kà rohi-rohi dị ò vu wa ẹtẹ. Ohinọyị ene huna avaba ohinọyị nịnị vị ọnị ọ hyakụ vaa kụ̀ụ hịrẹ. Ama ọza ẹ yị vaa bẹ ụvọọ tụ ọ ịrẹyị dị Ohomorihi o vu ọnị nyẹmba ẹtẹ. 26Ịdanịyẹrị kà, Igebirẹẹrị ộ kà a yị ọnị ka, ẹtẹ ọnị ọnị re ịnị ịrẹyị ịsọvọ ẹ́nẹnẹ ọnịrị oruva aanị vị ịzẹyịza anka a mẹ̀ mẹ ẹhahi anịị yị ọnị; ama ọnị ọ̀ sị tụ ịnị ayị da agụvị ka ụmẹ ộ yịị vọ gọdọ dị ọ̀ va mẹ. 27Ịdanịyẹrị ka ịrẹyị ọnọnị ộ za ọnị zizi, dị ọ vara ẹngụ aa zị ọnị nị. Ẹngụ ộ zị ọnị mẹ ẹkụhị chee, ịjị ọnị sị kwẹẹtẹ, dị ọnị naa mẹ̀ ụkọrọ ọnị ohinọyị sị yị ọnị nị. Ama ẹtẹ oni oni re aanị ô hi oni irenu; e yị re ye ọnị bẹẹ.
Právě zvoleno:
Ịdanịyẹrị 8: EBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Ebira First Bible © Bible Society of Nigeria, 2014.