Chhóng-sṳ Ki 50

1Yok-sit phu̍k chhai kiâ-pâ sṳ̂n-song kín-kieu, kín-chîm kì. 2Heu-lòi Yok-sit min-lin yî-sên yung yo̍k-é hiûn, fòng-chṳ́ kiâ-pâ Yî-set-lie̍t sṳ̂-thí fú-lan, yî-sên chhiu cheu án-ngiòng hi-cho. 3Kì-têu cheu kûi-thin ke sṳ̀-kiên, yung hiông-liau hiûn si-sṳ̍p ngit, vàn-sṳ̀n fòng-fú ke kûng-chok. Âi-khi̍p ngìn vi kì sú-hau chhit-sṳ̍p ngit.

4Sú-hau ke khì-mân, Yok-sit tui vòng ke kôn-yèn kóng: “Na-he ngì-têu fôn-hí, chhiáng ngì-têu chiông ngài ke fa chón-ko vòng: 5‘Ngâ-pâ lìm-chûng ke sṳ̀ ham ngài fat-sṳ, oi chiông kì mài chhai Kâ-nàm-thi, chhai kì vi chhṳ-kâ chún-phi ke fùn-mu tî-poi. Só-yî khiù ngì chún ngài hi mài-chong ngâ-pâ; sông-sṳ phan-hó, ngài chhiu chón-lòi.’ ”

6Vòng en-kóng: “Hó! Cheu ngì fat ke sṳ hi mài-chong ngiâ-pâ.”

7Án-ngiòng Yok-sit chhiu hi mài-chong kiâ-pâ. Vòng só-yû ke kôn-yèn, kiûng-thìn ke kôn-chóng, lâu Âi-khi̍p ke chóng-ló chhiòn-phu thèn Yok-sit hi. 8Yok-sit chhiòn-kâ, kì ke-têu hiûng-thi lâu kiâ-pâ ke kâ-chhu̍k, ya chhiòn-phu khiung-ha hi; chúng-he kì-têu ke se-ngìn-è lâu yòng-khiùn ngiù-khiùn liù chhai Kô-sân thi-khî. 9Thèn kì khiung-ha hi ke hàn-yû chhâ-chhui lâu khì-pîn-chhui, fî-sòng thai-chhṳn.

10Kì-têu lòi-to Yok-tan-hò tûng-phién ke Â-tha̍t vò-thàng, thai-kâ chhai ke-vi khôi-sâng thai-kieu; Yok-sit yu vi kiâ-pâ sú-hau chhit-ngit. 11Kâ-nàm-ngìn khon-tó liá yit thai-khiùn ngìn chhai Â-tha̍t vò-thàng ke chong-lî, chhiu kóng: “Âi-khi̍p-ngìn ke chong-lî án ngiàm-siuk ô!” Só-yî liá thi-fông ôn-to Â-pak-Ma̍k-sî#50:11 “Â-pak-Ma̍k-sî” yû “Âi-khi̍p-ngìn ke chong-lî” ke yi-sṳ., chhiu chhai Yok-tan-hò tûng-phién.

12Ngâ-kok ke-têu lai-é chûn-cheu â-pâ ke fûn-fu, 13chiông kì ke sṳ̂-thí yun-to Kâ-nàm-thi, chong chhai Man-li tûng-phién Ma̍k-pí-lâ lùng-tú; liá-ke lùng he Â-pak-lâ-hón tui Het-ngìn Yî-fut-lùn mâi ko-lòi cho fùn-mu ke. 14Yok-sit mài-chong kiâ-pâ heu, chhiu lâu ke-têu hiûng-thi pin chhâm-kâ chong-lî ke ngìn khiung-ha chón-hi Âi-khi̍p.

Yok-sit Ôn-ví Kiâ Hiûng-thi

15Yok-sit ke-têu hiûng-thi chhai â-pâ ko-sṳ̂n heu, fu-siông kóng: “Na-he Yok-sit fài-hen chhai sîm, cheu ngài-têu thèu-pái tui kì só-cho ke fái-sṳ lòi po-fu̍k ngài-têu, ngióng-pân chang-hó nè?” 16Só-yî kì-têu pai-thok ngìn hi lâu Yok-sit kóng: “Â-pâ lìm-chûng ke sṳ̀, 17kâu-tai ngài-têu lâu ngì kóng yit ki-fa: ‘Ngì ke-têu â-kô tet-chhui ngì, khiù ngì sa-miên kì-têu ke chhui-ko.’ Ngài-têu he ngiâ-pâ ke Song-ti ke phu̍k-ngìn; khiù ngì sa-miên ngài-têu só-fam ke chhui-ko.” Yok-sit thâng-tó liá fa chhiu kieu chhut-lòi.

18Heu-lòi kì ke-têu â-kô chhîn-sṳ̂n lòi-kien kì, phu̍k chhai kì mien-chhièn, kóng: “Ngài-têu lûng-chúng he ngì ke phu̍k-ngìn.”

19Yok-sit lâu kì-têu kóng: “M̀-sṳ́ kiâng; ngài kám cho-tet thoi Song-ti? 20Ngì-têu pún-lòi sióng-oi hoi ngài, chúng-he Song-ti ke yi-sṳ he hó ke, vi-tó oi sṳ̀n-chhiu kîm-pû-ngit ke kông-kín, lòi pó-chhiòn chhin-tô ngìn ke sâng-miang. 21Ngì-têu m̀-sṳ́ kiâng; ngài yit-thin voi cheu-ku ngì-têu lâu ngì-têu ke chṳ́-ńg.” Yok-sit kóng liá-chúng chhṳ̀-oi ke fa lòi ôn-ví kì-têu, sṳ́ kì-têu chhin ôn-sîm.

Yok-sit ke Sí

22Yok-sit lâu kiâ-pâ ke kâ-chhu̍k ki-siu̍k he̍t chhai Âi-khi̍p. Kì sṳ̍t-to yit-pak yit-sṳ̍p se. 23Kì yû khon-tó Yî-fap-lièn ke lai-é lâu sûn-é, ya-yû nám-ko Mâ-nâ-sî ke sûn-é, chhiu-he Mâ-kit ke-têu lai-é. 24Heu-lòi Yok-sit tui kì ke-têu hiûng-thi kóng: “Ngài chhâ-m̀-tô voi-sí lé! Chúng-he Song-ti yit-thin voi cheu-ku ngì-têu, tai ngì-têu lì-khôi liá-ke thi-fông, to Kì yin-hí pûn Â-pak-lâ-hón, Yî-sat lâu Ngâ-kok ke thi-fông hi.” 25Yok-sit yu ham Yî-set-lie̍t ke chṳ́-sûn fat-sṳ; kì kóng: “Song-ti yit-thin voi cheu-ku ngì-têu; yèn-heu ngì-têu oi chiông ngài ke kut-thèu tui liá-vi tai chón-hi.” 26Yok-sit yit-pak yit-sṳ̍p se ke sṳ̀ chang ko-sṳ̂n. Kì-têu yung yo̍k-é hiûn, fòng-chṳ́ kì ke sṳ̂-thí lan-thet, chiông sṳ̂-thí piong-ngi̍p kôn-chhòi, liù chhai Âi-khi̍p.

Právě zvoleno:

Chhóng-sṳ Ki 50: THV12Rdb

Zvýraznění

Sdílet

Kopírovat