Mateo 28
28
Jatz anq'in Jesús kyxol kyimni
Marcos 16.1-8; Lucas 24.1-12; Juan 20.1-10
1Tb'ajlenxitzun ju q'ij te ojlab'l, ch'ixtoq qsqix tuj tnejel q'ij te seman, e ul Mariy aj Magdala tuk'ix juntl Mariy ke'yilte pantyón. 2Ex tzaj jun kyaqnajnab' nimxix; porke ku'tz jun t-anjel Qman tuj kya'j; tej tkub'il el ti'n ju ab'j ttzi pantyón ex kub' qe' tib'aj. 3Ik ke'yin twitz ik tza'n tqan q'ankyoq, atzunju t-xb'alun saq ke'yin ik tza'n ttxa che'w. 4Atzun qe soldad in che xq'uqin e jaw lu'lun tu'n tchi anjel, mer ik tza'n kyimni e ok. 5Atzunte anjel xi tma'n kye xu'j:
—Mi'n che xob'e, porke b'a'n wu'ne in che jyone ti'j Jesús aju jaw q'o'n twitz crus. 6Mi a'l tzalu, ma jaw anq'in ik tza'n o tma. Kytzaje, kyke'yinxe jatum kub' q'o'n t-ximlal. 7Kyxi' naje, kymanxe kye t-xnaq'tzb'en kyja': Ma jatz anq'in kyxol kyimni, ex lu kxel nej kywitze tu'n kypone tuj Galilea; atzun k'okel kyke'yine, che chikuye kye t-xnaq'tzb'en. Lu ma txi nma'ne kyeye, chi anjel kye xu'j.
8Atzun kye xu'j e ajtz ttzi pantyón in che xob' ex nim in che tzalaj; e je'x naj q'ol tqanil kye t-xnaq'tzb'en Jesús, in che ojqelan wen. 9Ex matoq kyja' kyxi', lu Jesús ok noj kywitz, e je'x tq'olb'e'n. Atzun kye xu'j e pon laq'e' ttxlaj, tzaj kychle'n tqan, ex e k'ulun twitz. 10Xitzun tma'n Jesús kye:
—Mi'n che xob'e; kyxi'ye, kyq'onxe tqanil kye wermaniye tu'n kyxi' tuj Galilea, ex atzun chin okel ke'yine kyu'n.
Aju xi kytx'olb'a'n qe soldad
11Matoq kyja' kyxi' qe xu'j, at junjun kye xq'uqil e je'x tuj tnam ex xi kyq'o'n tqanil kye nejenel kye pal ti'j tkyaqilju otoq b'aj. 12B'ajtzun kychmon kyib' qe nejenel kye pal kyuk'ix qe kytijil xjal, e yolin ti'j kyxolx, xi kyq'o'n nim pwaq kye soldad, 13ex xi kyma'n kye:
—Kymanxe kye xjal: E ul qe t-xnaq'tzb'en te qonik'an ex etz kyelq'a'n t-ximlal matoq in qo tane, che chikuye. 14Qatzun ma tb'i gobernador jlu, kb'antel ti'j qu'ne tuk'il tu'ntzun kykolpaje, che chi qe nejenel kye pal.
15Xitzun kyi'n soldad pwaq ex kyb'incha ik tza'nx tzaj q'ma'n kye. Aju yol lu ma tz'el tqanil kyxol xjal judiy, ex ax yol in kyma'n ja'lo.
Aju kyaq'un apostol kyaj tq'o'n Jesús
Marcos 16.14-18; Lucas 24.36-49; Juan 20.19-23
16Atzun kye junlaj xnaq'tzb'en e pon tuj Galilea twi witz jatum otoq txi tma'n Jesús kye. 17Tejtzun tilwaj Jesús kyu'n, e k'ulun twitz; ex at junjun jawje' kyk'u'j. 18Pontzun laq'e' Jesús kytxlaj ex tma:
—Ma tzaj q'o'n woklene ti'j tkyaqilju at tuj kya'j ex twitz tx'otx'. 19Kyja'tzun kyxi'ye, kymanxe kye xjal tu'n kyok te nxnaq'tzb'ene kyuj kykyaqil nasyon, ex tu'n kyb'yan kyu'ne tuj tb'i Dios Mamb'aj, ex tuj nb'iye aqine K'wa'lb'aj, ex tuj tb'i Xewb'aj Xjan; 20kyq'onxe xnaq'tzb'il kye tu'n tjapun kyu'n tkyaqilju ma txi nma'ne kyeye. Ex lu qine chin tele kyuk'ile tkyaqil q'ij akutzun in japun b'aj mankb'il tq'ijlalil. Ikxwitju.
Právě zvoleno:
Mateo 28: MAMNO
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
