Mak 3

Baa bɛl o nɔn aa sewa

(Mat 12:9-14; Luk 6:6-11)

1Yeesu la cheremi dea bela ja, dɛ baa bɛl o nɔn aa sewa lɔ bela. 2Dɛ nɛra bane lɔ bela dɛɛ nyin dɛ́ kpɔ waa dawɛ Yeesu nɛ. Asɛ baa nyiŋi kɛ wɛɛ chah baa laanee Ona Tɔpere la ta ásɛ ba dɔ o waa dɛ́ bol. 3Asɛ Yeesu yerɛ baa la o nɔn aa sewa la ŋɔ ó ir ba che ba sie.

4Belaa Yeesu bɔɔ ba ŋɔ, “Ɛrɛɛ Korowii Mmara la ɛɛ baɡle yaa ŋɔ yá ɛ Ona Tɔpere ta laɔ? A ɛ aŋwɛnɛ ta kɛ yaa ɛ nɛra wedɛɛɡa kɛɛ yaa ɛ nɛra wechɔɡa ɔ? A ɛ aŋwɛnɛ ta kɛ ya lɛ nɛra mkpa kɛɛ yá chɔɡ baɔ?” Waa bɔɔ ba ɡɛ la, ba ta wone bol wobɛlbwa.

5Asɛ Yeesu nyiŋi ba bwa, o baah di. Gɛ ba liire aa do toŋɡboŋ kohona la ta o sie lɛɛ. Anee o ŋɔ baa la be ŋɔ ó tɛr nɔn. Waa tɛr o nɔn la, dɛ o nɔn la berɔ do kpeɡri. 6Anomanta, Farisii tena la le cheremi dea la bini, asɛ ba ne Hɛrɔd nɛra la ka cheme dɛ vɔrɔwe Yeesu vɔrɔwa dɛ́ fee kpoo.

Gɛ nɛnlaa aa baa teŋɛ Yeesu nɛ

7Asɛ Yeesu ne o habɔteŋra le kaa Galilia Moo la ta. Belaa nɛnlaa bane baa le Galilia harɛ teŋɛ o nɛ. Nɛra baa le Juda harɛ 8ne Jerusalam ne Idumia harɛ ne Jɔɔdan Moo wee leebɔr, dɛ nɛra baa le bwɛjena Taaya ne Sidon pera bwa no o wa, dɛ ba o be. 9Nɛra la warɔ kohona, anomanta, Yeesu ŋɔ o habɔteŋra la be ŋɔ bá nyin ɡbera bɛl tɛo ó jo o bini ásɛ nɛra la che baŋ dɛ bɛ o nɛɛ tɔ. 10Waa chah nɛra kohona nomanta, weela tena la kar ta dɛ nyinu dɛ leɡe. 11Banɔ la kwaa aa dɛ ir ba nɛɛ la nao waa, ɡɛɛ ba choɡli o sie dɛ kpɔ takpeɡ dɛɛ bol waa o be, ŋɔ, “Henee Korowii Bie la!”#Luk 8:28 12Anee Yeesu kah ba ŋɔ ba bɛ o nɛnsoo baɡle.

Gɛ Yeesu aa le o toroma fi dɛ banɛ

(Mat 10:1-4; Luk 6:12-16)

13Asɛ Yeesu ka che bwe bɛl ta, dɛ yerɛ nɛra waa dɛ nyin, anee ba ba o be. 14Belaa o le ba bini fi dɛ banɛ dɛ ŋɔ bá teŋɛ o nɛɛ dɛɛ bol Korowii Wa. 15O ŋɔ baa dɔ kpeɡrii dɛɛ doŋi kwaa aa dɛ ir nɛra nɛ. 16Yeesu nɛra fi dɛ banɛ waa kpɔ ba laanee nɔ. Seemɔn waa pa o sɔn Pita la, 17ne Sebedii bii Jems ne o nime Jɔn waa pa ba ɡe sɔn Bɔanɛjes la, o munii kɛ Sikpeɡ Tena, 18ne Andriu ne Felep ne Batolomeo, ne Matiu ne Tɔmas ne Alfeɔs bie Jems, ne Tadeɔs, ne Seemɔn Sɛlɔt, 19dɛ Judas Eskareɔt wáa le Yeesu tɛ ba kpoo la.

Yeesu ne Bɛlsebul

(Mat 12:22-32; Luk 11:14-23; 12:10)

20Yeesu aa kaa dem la, nɛnlaa baa cheme o nɛɛ ja, o ne o habɔteŋra la ta bɔr dɔe dɛ́ di kwaa kwara. 21Belaa Yeesu nɛra aa noa la, ba ba kpɔɔ le ba baah, dɛkalkɛ nɛra dɛ bol ŋɔ o dɛ we choɡla.

22Asɛ Tɔnjerema bane le Jerusalam ba dɛ ba ŋɔ, “Bɛlsebul waa ɛ kwaa aa dɛ ir nɛra nɛɛ bwa kooro laanee tɛo kpeɡri o kpɔ dɛɛ doŋi kwaa la.”

23Anee Yeesu yer ba dɛ ŋɔ ba be ŋɔ, “Ɛrɛɛ Bɔnsam ɛɛ ba wona doŋi o tenten nɔ?” 24Dɛ sɛɡ ba ŋɔ, “Dɛ harɛ bɛl ta tena bini pere anɛ asɛ baa yo aa, o dɛ paɡre. 25Dɛ waane ba dem bɛl ta asɛ ba baah pere anɛ ba ɡbo ɛɛ yo aa, dem la aa won che. 26Dɛ Bɔnsam ɡe kora bini peraa, waa won che. O dɛ ba chɔɡa.” 27O berɛ ŋɔ, “Nomɛlbwa aa won jo bokpeɡa te dea dɛ́ ŋwɛ o laala, nemenɛ o tɔ sie won vɔrɔwo mɔɔ, dɛ́ won jo o dea dɛ́ pa o laala.” 28Belaa o ŋɔ ba be ŋɔ, “Kasinteŋ, Korowii won nɛra wechɔɡa ne nɛnhɛla baa dɛ ɛo la kpɔe dɛ́ kɛ ba. 29Kɛ nomɛlbwa waa ɛ Korowii Domadɛɛɡe la nɛnhɛla la te, waa kpɔ kɛo. Naate wechɔɡa ɛɛ dawɛ o nɛɛ saŋ bɛlbwaa.”

30Waa nɛra aa dɛ bol kɛ kwaa ir Yeesu nɛɛ la waa o bol ɡɛ waa nɔ.

Yeesu nya ne o nimanar

(Mat 12:46-50; Luk 8:19-21)

31Yeesu aa lɔ dem bela la, o nya ne o nimanar baa che buse dɛ tomɛ nɛn ŋɔ ó yerɔ. 32Dɛ nɛra warɔ dɛ so baro cheme, anee ba ŋɔ Yeesu be ŋɔ, “Nomoa, he nya ne he nimanar cheɡɛ buse dɛɛ yerɛ.”

33Asɛ Yeesu bɔɔ ba ŋɔ, “Umee n nya ne n nimanar ɔ?”

34Anee o laa nyu ir dɛ nyiŋi nɛra baa soɡa baro la, dɛ ŋɔ, “Hé na n nya ne n nimanar. 35Nomɛlbwa waa dɛ ɛ waa Korowii aa dɛ nyin laanee n nime ne n nimambie ne n nya.”

Právě zvoleno:

Mak 3: mzw

Zvýraznění

Sdílet

Kopírovat