Luk 4
4
Gɛ Bɔnsam aa daah Yeesu na wa
(Mat 4:1-11; Mak 1:12-13)
1Yeesu aa le o Korowii nee sɔe la bɔr Jɔɔdan Moo ta dɛɛ kaa dem la, Korowii Domadɛɛɡe la ir o nɛ, dɛ kpɔɔ kaa pua hɛŋle ɡbo harɛ ta, asɛ o ka do bela tɔpera fifraanaarɛ. 2Asɛ Bɔnsam ka daahno na a ɡɛ tɔpera nɔ ta. Dɛ waa komɛlbwa di, anomanta, a habɔɔ la, dɛ lɔr lawɔ.
3Bela la, Bɔnsam ŋɔ o be ŋɔ, “Dɛ henee Korowii Bie la kpela aa, ɡel bwe nɔ berɛ paanoo hé di.”
4Anee Yeesu chaŋo ŋɔ, “Korowii Tɔn baɡlɔ ŋɔ, ‘Kondikwaa ɡbo laa dɛɛ tɛ nɛn mkpa.’ ”#Mma 8:3
5Asɛ Bɔnsam berɛ kpɔɔ ka chɔŋɛ bobɛl waa do kɛŋɔ bwejen bɛl doa, dɛ baɡlo harɛ nɔ ta bela bwa kora dii aa lole ɡale o sie ta, 6dɛ ŋɔ o be ŋɔ, “Dɛ he kpɔ duure tɛ mɛ naa, mɛɛ kpɔ a kpeɡri ne a kondɔɔh bwaa tɛɛ, dɛkalkɛŋɔ a bwa sekwaraa lɔ n nɔn ta. Nɛn maa dɛ nyin laanee n kpɔ dɛɛ tɛ. 7Dɛ he kpɔ duure tɛ mɛ naa, a bwa dɛ ba he kwaa ɛɛ, he di a kpeɡri.”
8Anee Yeesu ŋɔ o be ŋɔ, “Korowii Tɔn baɡlɔ ŋɔ, ‘Dɛɛ duu N Naa Korowii dɛɛ tomɛ o ɡbo.’ ”
9Belaa Bɔnsam kpɔɔ kaa bwɛjen Jerusalam, dɛ kpɔɔ ka cheɡ Korowii Dea la nyundujaɡla, asɛ dɛ ŋɔ o be ŋɔ, “Dɛ henee Korowii Bie la kpela aa, che bonɔ dɛ́ jah le harɛ, 10dɛkalkɛ Korowii Tɔn baɡlɔ ŋɔ,
‘Korowii ɛɛ ɡeloo o nyundua toroma
ɛɛ nyiŋi he nɛɛ kɛrɛdɛ.#Yel 91:11-12
11Baa lawɛɛ haa wola nakpala kwaraa lɔ.’ ”
12Anee Yeesu chaŋo ŋɔ, “Korowii Tɔn baɡlɔ ŋɔ, ‘Bɛ N Naa Korowii daah na.’ ”#Mma 6:16
13Bɔnsam aa daah Yeesu ŋwɛnɛ bɛlbwa ta kɛ ó fe ɛ wechɔɡa dɛ kahonɛ la, o ɡelo dɛ kaa tama mɔɔ.
Yeesu toma mun pae Galilia harɛ ta
(Mat 4:12-17; Mak 1:14-15)
14Dɛ Korowii Domadɛɛɡe kpeɡri lɔ Yeesu nɛ, asɛ o berɛ la Galilia harɛ. Belaa o waa perɛ baah bela bwɛɛre la bwa ta. 15O la ba cheremi deene bini dɛ ka bol Korowii Waa nɛra be, ba bwa kpɛɛro.
16O ba Nasarɛt bela baa dɛɛro la, asɛ ɡɛ o yon dɛɛ ɛ Ona Tɔpere bɛlbwa la, o la cheremi dea, dɛ ir che ŋɔ ó kure Korowii Tɔn la.#Mat 13:53-58; Mak 6:1-6 17Asɛ ba kpɔ Korowii keame Aesaya tɔn la ba do o nɔn ta. O pili tɔn la, dɛ na bela baa chwera ŋɔ,
18“Korowii Domadɛɛɡe la ir n nɛ,
dɛ lee mɛ ŋɔ ń ba bol Amanesoma baɡle nyaara,
dɛ́ ŋɔ nɛra baa laɡ ba yoma, ne nɛra baa do ba dea be ŋɔ
ba Lɛɛ balɔ, dɛ́ ɡel nyoŋa sibie pili
ba won dɛɛ na, dɛ́ lɛ nɛra baa dɛ ɛɛ ba
hɔhɔrɔwa la le ba dɔma nɔn ta,#Aes 61:1-2
19asɛ dɛ ɡel nɛra bwa jemɛ kɛ
tɔpere Korowii aa dɛ ba o nɛra Lɛɛ la telo.”
20Ate, Yeesu kure tɔn la tonɛ dɛ laa tɔ, dɛ kpɔ do nɛn waa dɛ nyiŋi cheremi dea bela la nɔn ta, dɛ so harɛ. Asɛ nɛra baa lɔ cheremi dea bela la bwa kpɔ sie pa o nɛɛ dɛɛ nyiŋu fuuu ken. 21O berɔ ŋɔ ba be ŋɔ, “Fini, waa haa noa le Korowii Tɔn bini nɔ chiɡo ɡɛ Korowii aa bola ŋɔ aa ɛo la.”
22Belaa nɛra la bwa kpɛɛro. Ba nyoa kpo ɡɛ o nyoa ne wobol aa soma la, asɛ ba ŋɔ, “Josef bie la laa nɔ naa?”
23Anee Yeesu ŋɔ ba be ŋɔ, “N jemɔ kɛŋɔ hɛɛ sɛɡ mɛɛ ŋɔ, ‘Tɛɛɡa te, chah he te. Gɛ yaa noa kɛ he ɛ Kapeeneɔm la, ɛ ane he ɡbaɡba bwɛɛ bonɔ ɡe.’ ”
24Dɛ ŋɔ ba be ŋɔ, “Kasinteŋ, Korowii keame ta sɔn dɔe o ɡbaɡba bwɛ. 25N dɛ ŋɔ he be ŋɔ, ɡɛ saŋ Korowii keame Elaeja fa aa lole hwel che bene atoro korobie anumɛl bwaala aa wola nɛ, asɛ lɔr chole harɛ la bwa ta la, dɛ luhaahna warɔ dɛ do Israel tena bini,#1Ko 17:8-16 26kɛ Korowii ta Elaeja tomɛ ba bini bɛlbwa be. Luhaah bɛl waa lɔ Sidon harɛ bwɛɛ bɛl baa yerɔ Sarefat la ɡbo bee o tomɔ. 27Gɛ saŋ Korowii keame Elaesa fa aa lole la, dɛ Israel tena weechɔɡa ane aa chɔɡ ba bwadabii warɔ. Kɛ o ta ba bɛlbwa chaeh. Siiria harɛ baa Naaman ɡboo o chah.”#2Ko 5:1-14
28Nɛra baa lɔ cheremi dea bela la aa no waa nɔ la, dɛ bwaawee laɡ ba. 29Dɛ ba bwɛɛ la chɔŋɛ bwe ta. Ba iro dɛ tɛɡre Yeesu le bwɛɛ la ta, dɛ kpɔɔ ka che bwe la doa bobɛl waa wila su, dɛ́ fee taɡɔ ta, ásɛ o nyu ba yaɡɛ harɛ. 30Anee o valɛ jo nɛra la baah, dɛ valɛ o tetoora kaa.
Baa bɛl kwaa aa dɛ ir o nɛ
(Mak 1:21-28)
31Yeesu la Galilia harɛ bwɛɛ bɛl baa dɛ yerɔ Kapeeneɔm la ta, dɛ kaa baɡ ba Korowii Waa Ona Tɔpere ta, 32asɛ ɡɛ waa dɛ baɡle Korowii Waa la ɛ ba bwa nyokpoa, dɛkalkɛŋɔ dɛ o dɛ bol waa kpeɡri ne.
33Cheremi dea bela la, dɛ baa bɛl lɔ bela, kwaa ɛɛ ir o nɛ, asɛ o do lɔŋɔ ŋɔ, 34“Aa! Yeesu Nasarɛt te, bɔkwaa hɛɛ nyin ya be nɔ? Ya chɔɡaa he ba kɛɛ? N jemɛ he nɛnsoo. Henee Korowii Biɡoroŋ waa ŋɔa ŋɔ o dɛ ba bala la.”
35Anee Yeesu kɔr kwaa la aa lɔ baa la nɛɛ la ŋɔ, “Hé tɔ nyoa dɛ́ le o nɛ!” Belaa a lɔ baa la bil nɛra la siwi ta. A ta on wobɛlbwa ɛɛ, dɛ le o nɛɛ dɛ kaa.
36Nɛra baa lɔ bela la bwa nyoa kpoo, ba ŋɔ dɔŋa be ŋɔ, “Bɔkwa waa nɔɔ! Hé na ɡɛ baa nɔ aa kpɔ kpeɡri bol waa baɡle kwaa aa dɛ ir nɛra nɛɛ asɛ a kaa!” 37Anomanta, Yeesu waa perɛ baah bela bwɛɛre la bwa ta.
Yeesu chah nɛndamanta bane
(Mat 8:14-17; Mak 1:29-34)
38Yeesu le cheremi dea bela dɛ la Seemɔn dem, dɛ Seemɔn helahaah bwara wɔrɔbɔ tenten, asɛ ba bol o waa Yeesu be ŋɔ ó chaoh. 39Belaa o la weela te la be o chɔɔbɔr, dɛ ka che o jwɛh, dɛ kɔr o weela la, asɛ a le o nɛ o bwara sɔɔhno, buɡ la ta, o ir dɛ daa kwaa tɛɛ ba.
40Wee aa dɛ jo la, nɛra baa dɔ chamene tena baa we weela bwa soo siwi la kpɔ ba ba Yeesu be, asɛ o kpɔ o nɔɔra dawɛ ba nɛɛ dɛ chah ba bwa sekwaraa. 41Kwaa aa dɛ ir nɛra nɛɛ la le ba nɛɛ pirim. Aa dɛ le dɛ a dɛ dooɡe lɔŋɔre dɛɛ ŋɔ, “Henee Korowii Bie la!” Yeesu kah kwaa la, o ta ɡelɛ a bol wa, dɛkalkɛŋɔ a jemɔ kɛŋɔ onee Kristo la Korowii aa baɡɛ nyoa ŋɔ wɛɛ tomɔɔ ó ba lɛ o nɛra la.
Yeesu Korowii waa bola cheremi deene bini
(Mak 1:35-39)
42Bɔr aa dɛ chaah la, Yeesu le bwɛɛ la ta, dɛ ka so bela nomɛlbwa aa wola toole. Dɛ nɛra iro dɛɛ nyin o bɔr. Baa nao la, ba ta on ŋwɛnɛ tɛɛ kɛ o kaa bobɛlbwa, dɛ ŋɔ o be ŋɔ ó ɡel ba ne o so. 43Anee o ŋɔ ba be ŋɔ, “A chɛ kɛŋɔ ń bol Korowii Kora Amanesoma la bwɛɛre ane ɡe ta, dɛkalkɛŋɔ anee Korowii tom mɛ ŋɔ ń ba ɛ.” 44Anomanta, o valɔ dɛɛ bol Amanesoma la dɛɛ baɡle nɛra cheremi deene bini Juda harɛ bwa.
Právě zvoleno:
Luk 4: mzw
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
