Kaala 38
38
Kon baa dɛ fuh saraha kwaa o ta
1O kpɔ akaasia daa kwaa kon baa dɛ fuh saraha kwaa o ta dɛɛ tɛ Korowii. O jaŋne ne o paɡri bwa kɛrɛdɛ. O jaŋne ɛ naɡale anuanɛ ne tama, o paɡri ɡe ɛ ɡɛ tenten asɛ o daŋa ɛ naɡale anaarɛ ne tama. 2O sɛh kwaa aa paaɡa kɛŋɔ nyeɡlare do o loŋkoni anaarɛ la bwa ta. Daa beŋkpoŋii o kpɔ kwaa saraha kon la ne o kwaa aa paaɡe o ta la bwa dɛ kpɔ ayaawa ɛ a bwara. 3O kpɔ ayaawa kwaa o koŋkwaa bwa. O loɡa ne kon baa kpɔ dɛɛ pa tɔɔ ne loɡa baa do chal kɛɛ nee a bini dɛ ɛ dɛɛ merɛ o ta, ne bune baa kpɔ toh ola dɛ kwaa baa kpɔa dɛɛ buh nii. 4O kpɔ ayaawa ɛ kafola do saraha kon la ta. O kpɔɔ do o bini, o baah ta. 5O kpɔ ayaawa ɛ nɔnloɡa do kafola la loŋkoni anaarɛ la ta bá kpɔ dajaŋa la dɛɛ su a ta. 6O berɔ kpɔ akaasia daa kwaa dajaŋa dɛ ɛ ayaawa dawɛ a ta. 7Dɛ kpɔ dajaŋa la su nɔnloɡa aa lɔ saraha kon la baŋne anɛ la ta ba kpɔ dɛɛ cheo. Daa o kpɔ kwaa saraha kon la asɛ o bini chɔ bɔɔ.
Ayaawa loɡ kwaara wa
8O kpɔ ayaawa kwaa loɡbajen, asɛ kon waa chɔŋɛ o ta ɡe ɛ ayaawa. Toli bane baa lɔ Korowii Dea Cheremibɔr doonyoa dɛɛ ɛ toma la kpɔ ba ayaawa diɡi ba, bá kpɔ ɛa.#Kaa 30:17-21
Dembaah la
9O berɔ ɛ dembaah ja dɛ keo. O weekaŋle harɛbɔr pera la jaŋne ɛ naɡale lafa fifraanue, o do pateesanre baa kpɔ jisepondɛɛɡe sɔah. 10O paaɡe dachiɡri fifraanɛ, asɛ dɛ ɛ ayaawa loɡa fifraanɛ do a mune. O kpɔ suuɡapoŋa ɛ kwaa aa lawɛ pateesanre kpoŋe, ne kwaa aa bar dachiɡri la do daa la ta. 11O weekaŋle nyunduabɔr pera ɡe do ɡɛ tenten. 12O wee cholibɔr pera paɡri lɔ naɡale lafa fifraanuanɛ dɛ anue dɛ dɔ pateesanre, asɛ o paaɡe daa fi, loɡa fi do a mune ta. Dɛ kpɔ suuɡapoŋa ɛ kwaa aa lawɛ pateesanre kpoŋe ne kwaa bar dachiɡri la ta do daa la ta. 13Wee leebɔr pera ɡe paɡri lɔ naɡale fifraanuanɛ dɛ anue.
14Tɛnte Dea la dembaah doonyoa baŋ bɛl ta la, pateesanre a jaŋne aa ka tama a ɛ naɡale fifraanɛ dɛ atoroo o kpɔ saɡɛ bela, asɛ o paaɡe dachiɡri atoro loɡa atoro ɡe do a mune, 15asɛ pateesanre a jaŋne aa ka tama a ɛ naɡale fifraanɛ dɛ atoro do baŋ bɛl ɡe ta. Asɛ dɛ paaɡe dachiɡri atoro ayaawa loɡa atoro do a mune. 16Dembaah pateesanre la, jisepondɛɛɡe nee ba sɔah. 17Loɡa aa lɔ dachiɡri la mune la, ayaawaa o kpɔ ɛa. Kwaa aa lɔ dachiɡri la ta dɛ lawɛ pateesanre la kpoŋe ne kwaa aa bara la, suuɡapoŋa nee o ɛa, dɛ mwɛɛ suuɡapoŋa dawɛ dachiɡri la dor. Gɛɛ a do dachiɡri aa lɔ dembaah bela la bwa dɔ suuɡapoŋ kwaa ba kpɔ bara.
18O kpɔ jiseburum ne jisekɔl ne jiseswɛm ne jisepondɛɛɡe sɔh pateesan do dembaah doonyoa la ta. Dɛ nyarɛ do a ta kɛŋɔ nɛn waa dɔ a wejema aa dɛ ɛa la. O jaŋne lɔ naɡale fifraatoro asɛ o paɡri ɡe ɛ naɡale anuanɛ ne tama, kɛŋɔ dembaah la pateesanre paɡri aa doa la.
19O kpɔ dachiɡri anaarɛ ba paaɡe bela asɛ ayaawa loɡa anaarɛ do a mune. Asɛ ba kpɔ suuɡapoŋa ɛ kwaa aa lawɛ pateesan la kpoŋe ne kwaa aa bar dachiɡri la, dɛ ɛ ane dawɛ a dor. 20Kwaa baa kpɔa baŋre Korowii Tɛnte Dea bela ne anɔ la baa baŋra dembaah bela la, ayaawaa ba kpɔ ɛa.
Laala baa kpɔa kwaa Korowii Tɛnte Dea
21Gɛɛ koŋkwaa baa kpɔa kwaa Korowii Tɛnte Dea waa do. Mosisii do Lewi dea tena asɛ ba chwera bil. Arɔn waa ɛ sɔfo la, o bibaa Itamaa tɔ ba sie ba chwera.
22Uri bibaa Besalɛl nabaa Hur waa le Juda dea laanee ɛ wobɛlbwa ɡɛ Korowii aa do Mosis la. 23Dɛ Ahisamak bibaa Oholiab waa le Dan dea laanee ja o nɛ. O dɔ wejema dɛ won kwaa sɔeh, dɛ berɛ won nyara a do wer kɛrɛdɛ dɛ won sɔh kwaa dawɛ yal ta jiseburum ne jisekɔl ne jiseswɛm dɛ jisepondɛɛɡe ne.
24Suuɡaswɛm nɛra aa kpɔa ba tɛ Korowii ba kpɔ ɛ o Dea la toma tɔɡre ɛɛ ɡwaa kilore kaɡboŋii, ɡɛ baa maɡa bil Korowii Dea la.
25Suuɡapoŋa baa dɔa le ɡɛ saŋ nɛra baa kur ba la tɔɡre ɛɛ ɡwaa kilore kaɡboŋa atoro lafraanaarɛ, ɡɛ baa maɡa bil Korowii Dea la. 26Baala la bini bɛlbwa waa di bene fifraanɛ kɛɛ dɛ ɡwaa la, lɔ nɛra kaɡboŋa lafraanumɛl dɛ batoro, ne lafraanue fifraanue. Ba bini bɛlbwa kpɔ suuɡapoŋ fah ɡɛ baa maɡa bil Korowii Tɛnte Dea la dɛ kpɔ cha. 27Suuɡapoŋa a tɔɡre aa ɛ kilore kaɡboŋa atoro lafraanaarɛɛ ba kpɔ kwaa loɡa lafa baa kpɔa do dachiɡri aa lɔ Korowii Tɛnte Dea la mune ta, ne dachiɡri aa lawɛ pateesan waa tɔ Boɡoroŋ Tenten ta la mune ta. Suuɡapoŋa a tɔɡre aa ɛ kilore fifraatoro dɛ anaarɛɛ ba kpɔ ɛ loɡ la beŋkpoŋ bɛlbwa. 28Suuɡapoŋa a tɔɡre aa lɔ kilore fifraatoroo ba kpɔ kwaa kwaa aa lawɛ pateesanre kpoŋe dɛ do dachiɡri la ta, ne anɔ la baa kpɔa do a nyunduuni, dɛ anɔ la baa kpɔa ɛ kwaa aa dɛ bara.
29Ayaawa baa kpɔa ba tɛ Korowii la tɔɡre ɛɛ ɡwaa kilore kaɡboŋa anɛ lafraanaarɛɛ. 30Ayaawa nɔɔ ba kpɔ ɛ loɡa aa lɔ Korowii Dea Cheremibɔr doonyoa dachiɡri la mune ta, ne saraha kon dɛ kafola waa lɔ o bini dɛ o koŋkwaa bwa, 31ne loɡa aa lɔ dachiɡri aa bar dembaah la ne anɔ la aa lɔ o doonyoa la mune, ne kwaa baa kpɔa baŋre Korowii Tɛnte Dea dachiɡri la mune, dɛ anɔ la aa bar dembaah bela bwa.
Právě zvoleno:
Kaala 38: mzw
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.