Kaala 27
27
Kon baa fuh saraha o ta dɛɛ tɛ Korowii
1Korowii berɔ ŋɔ Mosis be ŋɔ, “Kpɔ akaasia daa kwaa kon baa ɛ saraha o ta dɛɛ tɛ mɛ. Gel o jaŋne ne o paɡri bwa ɛ beŋkpoŋ. O jaŋne ɛ naɡale anuanɛ ne tama, o paɡri ɡe naɡale anuanɛ ne tama. O daŋa ɡe ɛ naɡale anaarɛ ne tama. 2Sɛh o loŋkoni anaarɛ la bwa á kaa nyundua tama kɛŋɔ nyeɡlare ken. Daa beŋkpoŋii chɛ kɛ he kpɔ ɛ saraha kon la ne o nyeɡlare bwa, kpɔ ayaawa ɛ o bwara.
3Kpɔ ayaawa ɛ o kwaa bwa, o loɡa baa kpɔ dɛɛ pa o tɔɔ, ne soofire ne loɡa baa do chal kɛɛ nee a bini dɛ ɛ dɛɛ merɛ o ta, ne bune baa kpɔ toh ola dɛ kwaa baa kpɔ dɛɛ buh nii. 4Kpɔ ayaawa ɛ kafola do o ta, dɛ́ berɛ kpɔ ane ɛ nɔnloɡa do o baŋne anaarɛ bwa ta. 5Kpɔ do saraha kon la bini, o baah ta. 6Kpɔ akaasia daa ɛ dajaŋa haa kpɔ dɛɛ cheo, dɛ́ kpɔ ayaawa ɛ a bwara. 7Kpɔ daa la su nɔnloɡa aa lɔ saraha kon la baŋne anɛ la ta bá kpɔ dɛɛ cheo. 8Daa chɛ kɛ he kpɔ kwaa saraha kon la, dɛ́ ɡel o bini chɔ bɔɔ ɡɛ tenten maa chaɡle bwejen la doa la.
Korowii Tɛnte Dea dembaah wa
9Ɛ dembaah ja n Tɛnte Dea la ta dɛ́ keo. O weekaŋle harɛbɔr pera bela jaŋne ɛ naɡale lafa fifraanue, ásɛ dɛ dɔ pateesanre baa kpɔ jisepondɛɛɡe sɔah kɛrɛdɛ, 10ásɛ dachiɡri la ɛ fifraanɛ, ayaawa loɡa fifraanɛ do a mune ta. Bune aa lawɛ dachiɡri la kpoŋe la bwa chɛ kɛ he kpɔ suuɡapoŋa ɛ a bwara. 11O weekaŋle nyunduabɔr pera la ɡe chɛ kɛ o jaŋne ɛ naɡale lafa fifraanue, dɛ́ dɔ pateesanre ásɛ o dachiɡri ɛ fifraanɛ ayaawa loɡa do a mune ta. Bune aa lawɛ dachiɡri la kpoŋe la chɛ kɛ he kpɔ suuɡapoŋa ɛ a bwara.
12Dembaah wee cholibɔr pera chɛ kɛŋɔ o paɡri ɛ naɡale fifraanuanɛ dɛ anue dɛ́ dɔ pateesanre, ásɛ dɛ dɔ dachiɡri fi ayaawa loɡa fi do a mune ta. 13Dembaah wee leebɔr ɡe chɛ kɛŋɔ o paɡri ɛ naɡale fifraanuanɛ dɛ anue. 14Pateesanre a jaŋne aa ka tama a ɛ naɡale fifraanɛ dɛ atoro laanee chɛ kɛ a do doonyoa baŋ bɛl ta, ásɛ dachiɡri la ɡe ɛ atoro, ásɛ ayaawa loɡa atoro do a mune ta. 15Ásɛ pateesanre a jaŋne aa ka tama á ɛ naɡale fifraanɛ dɛ atoro ɡe do o baŋ bɛl, ásɛ dachiɡri la ɛ atoro ayaawa loɡa atoro do a mune ta.
16Dembaah doonyoa bela la chɛ kɛ ó dɔ pateesan o jaŋne aa ɛ naɡale fifraatoro, bá kpɔ jiseburum ne jisekɔl ne jiseswɛm dɛ jisepondɛɛɡe sɔɔh. Ásɛ nɛn waa dɔ kwaa nyara wejema ɛa dawɛ a ta, ásɛ dɛ dɔ dachiɡri anaarɛ loɡa anaarɛ do a mune ta. 17Dembaah dachiɡri la bwa chɛ kɛ á dɔ suuɡapoŋ kwaa baa kpɔa lawa kpoŋe, ásɛ ayaawa loɡa do a mune ta. 18Dembaah la jaŋne chɛ kɛ ó ɛ naɡale lafa fifraanue, ásɛ o paɡri ɡe ɛ naɡale fifraanuanɛ dɛ anue. O pateesanre chɛ kɛ bá kpɔ jisedɛɛɡa sɔah a nyundua kaala ɛ naɡale anuanɛ ne tama, ásɛ o dachiɡri loɡa la bwa ɛ ayaawa baa kpɔa ɛa. 19N Tɛnte Dea la bini kwaa kar aa jaa ba kpɔ dɛɛ ɛ o bini toma ne kwaa baa kpɔa baŋro, ne anɔ la baa kpɔa baŋre dembaah bela bwa chɛ kɛ bá kpɔ ayaawa ɛa.
Noo baa kpɔ do kandea daa ta
20Do Israel tena bá kpɔ ɔleve nodɛɛɡa baa harama ba tɛɛ he do numoli aa lɔ kandea daa la ta la ta, ásɛ a won hɔe dɛ bɛ dɛɛ dime bwa. 21N Dea Cheremibɔr pateesan waa lɔ N Ne Nɛwɛnyina Fɔo Daka la habɔɔ la, Arɔn ne o bibaalaa chɛ kɛŋɔ bá nyiŋi kandere la ta aa hɔ Korowii sie le jɔmɔra ba le chɔɔ bwa. Gɛ waa nɔ chɛ kɛ á ɛ Mmara dɛ́ chɔ le tɛ Israel tena ne ba naanar baa ka ba bwa.”
Právě zvoleno:
Kaala 27: mzw
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.