Kaala 24
24
Korowii ne o nɛra fɔo baa fɔwa wa
1Korowii berɔ ŋɔ Mosis be ŋɔ, “He ne Arɔn ne Nadab ne Abihu dɛ Israel nomonome fifraanuanɛ la teeh bwe ba n be. Hé che bojaŋ tama dɛɛ tom mɛ.#Kaa 28:1 2Hen Mosis ɡbosoroo chɛ kɛŋɔ he ba n jwɛh, ba te laa. Bɛ ɡel Israel tena kar la bɛlbwa teeh ŋɔ wɛɛ ba n bee.”
3Mosis aa la nɛra la be dɛ ka bol Korowii waa ne o Mmarare bwa ba be la, ba bwa kpɔ taa beŋkpoŋ sɛh ŋɔ, “Wobɛlbwa Korowii aa bol la, yaa ɛɔ.” 4Mosis chwerɛ komɛlbwa Korowii aa bola.
Tɔ aa dɛ per chɔmbibii la, o iro dɛ kwaa saraha kon tɛ Korowii bwe la lɔɡa, dɛ paaɡe bwea fi dɛ anɛ a che tɛ Israel deene fi dɛ anɛ la. 5Asɛ o tomɛ Israel bonɔɔna ba ka fuh kwaa ɛ saraha, dɛ kpoo nabali ɛ deŋnesɔɔhna saraha tɛo. 6Mosis kpɔ kwaa la chale la pera do loɡa bini, asɛ dɛ kpɔ a kar la merɛ saraha kon la ta. 7Ate, dɛ kpɔ Korowii Ne Nɛwɛnyina Fɔo Tɔn la kure baɡle nɛra la. Ba bwa sɛh ŋɔ, “Yáa ɛ wobɛlbwa Korowii aa ŋɔa laanee, yaa dɛɛ teŋɛ a taa.”
8Belaa o berɛ kpɔ chal la merɛ nɛra la nɛ dɛ ŋɔ, “Chal nɔɔ ɡela fɔo he ne Korowii aa fɔwa dɛ ŋɔ hɛɛ dɛɛ teŋɛ o Mmarare ta la won che tɛ heya.”#Mat 26:28; Luk 22:20
9Ate, Mosis ne Arɔn ne Nadab dɛ Abihu ne Israel nomonome fifraanuanɛ la bwa teeh kaa bwe la doa, 10dɛ ka na Korowii Israel tena aa dɛ tomɛ la. Harɛ waa cheɡɛ o ta la ɛ bobɛl baa mao bwea ne o ir nyundua, dɛ do ɡereŋ kɛŋɔ bwedɛɛɡe baa dɛ yerɔ safaaya la, dɛ ɛ burum kɛŋɔ nyundua ken. 11Kɛ Korowii ta Israel nomonome la wobɛlbwa ɛɛ. Ba na Korowii dɛ ta so le dɛ di kwaa dɛ nyɔ sen.
12Asɛ Korowii ŋɔ Mosis be ŋɔ, “Teeh ba bwe nɔ doa, dɛ́ ba soŋni n be bonɔ. Mɛɛ tɛɛ bwepɛle maa chwerɛ me Mmarare haa dɛɛ teŋɛ a ta, ásɛ nɛra la ka hweli dɛ́ jemɛ waa maa do ba a ta.”#Kaa 32:15-19
13Ate, Mosis ne Josua waa dɛ chao la kpɔ ba te le kaa Korowii be bwe la doa.#Kaa 17:9 14Mosis aa dɛ ba lee kaa la o ŋɔ nomonome la be ŋɔ, “Hɛ́ɛ kpa yaa bonɔ ka tel kɛŋɔ yaa berɛ ba he be. Arɔn ne Hur aa lɔ he be nɔ, hé bini bɛlbwa ne o dɔŋ dɔ waane aa, hé kpɔ la ba be.”
15Mosis aa dɛ teeh Sinai Bwejen la, bam baa bɔle o bwa, 16asɛ Korowii jirima tɔ o bwa. Tɔpera anumɛl dɛ bam la ta bɔle bwe la bwa ɡɛ, asɛ tɔpenuanɛ wee ta la, Korowii bol waa le bam la ta dɛ yerɛ Mosis. 17Israel tena te be la, Korowii jirima aa lɔ bwejen la doa la do kɛŋɔ nii aa won kwaa chɔɡa kohona la ken. 18Mosis jo bam la bini dɛ teeh kaa bwejen la doa. O soɡe bela tɔpera fifraanaarɛ chɔɔ ne jwaana.#Mat 4:2
Právě zvoleno:
Kaala 24: mzw
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.