1 Timoti 2
2
Korowii toma Mmarare dɛ asɔre tena wa
1Anɔ la aa tɔ sie mɛɛ ja asɔre tena kɛŋɔ báa teŋɛ a ta laanee kɛ hɛ́ɛ soŋe Korowii dɛɛ tɛ nomɛlbwa. Hɛ́ɛ soŋo dɛɛ jaamo wobɛlbwa ta. 2Hé soŋo dɛɛ tɛ koranar ne nɛra baa dɛ di nomonome bwa, ásɛ ya bwa so bosɔɔhna ta jeih ken, dɛɛ tomɛ Korowii ɡɛ aa chɛa, dɛɛ ɛ waa aa wera o be. 3Gɛɛ wera, dɛɛ lɛ ya Lɛɛ Korowii sie. 4O te dɛ nyin kɛŋɔ nomɛlbwa dɔ o nyu, ásɛ dɛ ba jemɛ kasinteŋ waa la. 5Anee kɛ Korowii beŋkpoŋii lole, dɛ dɔ nachiɡe beŋkpoŋ do o ne nɛwɛnyini baah ta, o ɡe ɛ nɛn. Onee Yeesu Kristo#Job 16:19-21; Jɔn 14:6; Weɛ 4:12 6waa kpɔ o te tɛ kɛŋɔ ba kpɔɔ charɛ nɛra bwa nyu la. Gɛ saŋ aa chɛ kɛŋɔ waa nɔ maɡre la taa a den chiɡ la. O ɛ ɡɛ a ɛ danseɛ dɛ chɔ le saŋ bɛlbwa. 7Anɔ waa Korowii lee mɛ ŋɔ ń lɔ a dawuro baɡle nɛra, dɛ́ berɛ ɛ Yeesu torome ɡe la. Kasinteŋii mɛɛ bol la, maa nyosone teŋe. Onee ɡela mɛɛ baɡle nɛra baa wola Juu tena ɛɛ la, ásɛ ba yarada Yeesu dɛ́ jemɛ kasinteŋ la.
8N dɛ nyin kɛ bobɛlbwa baala baa ɛ asɔre tena la laa ba te kpɔ bandisale ne wetɔŋla ta, ásɛ dɛ won ɛ nɛndɛɛɡa dɛ́ ir nɔɔra soŋe Korowii.
9Gɛ tentenee mɛɛ nyin kɛ dɛ haahna dɛ ba laala doe yaa, ba bɛ jwamanlaala ne laala a waa aa do bola dɛɛ do. Bá kpɔ laala aa maɡre ba ne, dɛ bɛ ba te kpɔ do nyuune ɛɛ aa dɛ ba kem ne, ne suuɡaswɛm koŋkwaare doe, ne yale a yoɡ aa kpeɡa liɡa ta.#1Pi 3:3-4 10Kɛ báa ɛ wedɛɛɡa kɛ haahna baa dɛ tomɛ Korowii. Ba wedɛɛɡa ɛɛ laanee dɛ́ ɡel ba do wer toli.
11A wer kɛŋɔ haahna ɛɛ pwɛr ba te, dɛ cheɡ deŋne dɛɛ no Korowii Waa baa dɛ baɡ ba la. 12N ta ŋwɛnɛ tɛɛ kɛŋɔ haahna di nomonome baala nɛɛ dɛɛ baɡle wa. A chɛ kɛŋɔ bá tɔ ba nyoa dɛɛ no, 13dɛkalkɛ Adamee Korowii tɔ sie ta mɔɔ dɛ ta o haah Hawa. 14Adam ɡe kwaraa laa Bɔnsam neɡre la. Hawaa o neɡre dɛ ɡel o ɛ wechɔɡa la.#Mum 3:6 15Kɛ dɛ haahna kpoŋe Korowii yarada bini kiŋkiŋ, dɛɛ nyin nɛn, dɛ laa ba te dɛɛ kpɔ wedoŋa ta, baa wesale ɛ aa, Korowii ɛɛ ɡeloo ba dɔ ba nyu ba lola ta.
Právě zvoleno:
1 Timoti 2: mzw
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.