MARK 3
3
Akwen kecügüshü Nyi Kesü
(Mat 12.9-14; Luk 6.6-11)
1Tsaseng wi Jisu na kheneng Sinagog wi du nan ciwi akwen kecügüshü nyi kesü ben. 2Anyi pahan na ciwi Jisu na Sabbath tsathang wi nyu sa pi mehai cüthu ma kimenni cüle kesalina hieben. 3Jisu na kecügüshüwa wi, “Shagha nu he atuwi gholo,” kizachi. 4Tsaseng wi ma anyithu wi keü, “Sabbath tsathang wi pala kemehai kulila nkemehai kuli nu? kahangli kesü hangshayala pathi kesa ayen ben nu?”
Isala mathu na mangla nkhila. 5Jisu na ma leben minu nu mathu ghang kevüli, isala ma mathu ghena hathana, kepaghenanye mathu na leben-dhu nu sazziben. Tsaseng wi ma anyi tsüwa wi khi, “Nkwen changchilo.” Anyi tsüwa na ma kwen changchi nan tsüna mehai nengya. 6Farisithu na Sinagog teshi nu bvüa nu wala Herod nyithu pahan ssinu mathu Jisu pathiale kesa acho sa.
Aghajü Ghüsa wi Anyitenti Kesü
7Jisu nu ma sansikeyathu na Galilee Ghajü ghüsa wi wa nu anyitenti keti na ma nieden. Mathu na Galilee, Judea, 8Jerusalem, Idumia yyi, nu Jordan yyi khhakawa, Tur nu Sidon nyunutithu kevü wina gho. Anyi hathu tsüdila Jisu kekuli cüki zaya nu ma wi gho. 9#Mrk 4.1; Luk 5.1-3 Anyitenti na di ntsa sa nu nyu na ma cütenthu keyishü ghena Jisu ma sansikeyathu wi ma ghena ahun kesü kiden cülo kiza. 10Ma anyi kejon sa pi mehai kecü ghena kesakinaathu tsüdila ma kidhenyale ma wiwa kekheli waben. 11Nu anyi nkemehai ghamu ssi ketenthu na ma mukeya wi mathu ma tuwi khulidu magha nu, “No Anyiza Tsawa le!” khi.
12Jisu na nkemehai ghamuthu satekü nu ma cüki khi pi thola nkiza lalo kesa kiza.
Jisu na Apostelthu Taghakeni Kessikeya
(Mat 10.1-4; Luk 6.12-16)
13Tsaseng wi Jisu na ayikha kesü miwi kiya nu anyi ma nie ketenthu ci pi ma wi chiya. Mathu na ma wi gho, 14nu ma meshu Taghakeni kessiya nu mathu nyan pi Apostel ciya. Ma mathu wi kiza, “Hi nthu pi hi gweghe ben thsü, nu kesun pi ajühkemehaiwa la khi wa thsü, 15nu nthu na atsaghangthu jügüya kemehai kekhang benya thsüle kesalina hi nthu kessiyadha.”
16Hathu na ma kessikeya Taghakeni: Simon (Jisu na ma pi Pitor le ci kesawa); 17Zebedee tsa keni James nu Johan (Jisu na manyi nyan pi Boanerges ma jjügi “Atsankeshigü Nyithu”) ci; 18Andria, Filip, Bartholoma, Mathi, Thoma, Alfia tsa James, Thaddaya, Kanaan nyiwa Simon, 19nu Jisu kematsawa Iskariot Judah.
Jisu nu Beelzebul
(Mat 12.22-32; Luk 11.14-23; 12.10)
20Tsaseng wi Jisu na ajjen wi wha neng. Kheneng anyitenti keti kesü na saghuya kesalina mathu na kedsajjü tsü nmu. 21Anyithu na, “Ma deja wadha le,” kekhi ghena ma theghithu na tsü za keya wi ma nonccayale wa.
22 #
Mat 9.34; 10.25 Jerusalem wina kegho Ayenkesansithu pahan na hati khiben, “Beelzebul ma wi benle! Atsaghang kediwa na kekhang pi ma cü nu ma tsüghena mathu jügüshiya ben.”
23Tsalina Jisu na mathu ci pi ma wi chi nu ajühkaghape khi pi mathu kiza, “Khati nu Satan na Satan jügüshiya mehai nu? 24Keujüla diyyi kesü na gishü zighe pi aghisa ben lethu, diyyi tsüwa tsüna nganya nben. 25Keujüla atheghi kesü na gishü zighe pi aghisa lethu, atheghi tsüwa tsüna qancaaben. 26Tsalina keujüla Satan diyyiwa tsüna gishü zighe lethu, tsüna nganya nben isala qanca, nu asakhen saaben.
27“Thola anyi kezü kesü jjen wi dula ma tsanqaithu khusen bvüya nben, isala ma atuwa sa anyi kezüwa tsü bhenya lethu ma wa ma jjen tsü yasaya mehai.
28“Hi atsentsa nthu kizaden, anyithu kesamithu nu mathu na nkemehai kekhithu tsüdila teshi pi cüya mehai. 29#Luk 12.10 Isala thowa na nkemehai khi pi Kemetha Ghamu shun khe khiela kesami teshi pi cüya nben, kepaghenanye ma anuphan kesami tsü sadha.” 30(Jisu na ha kekhi ha anyi pahan na “Ma nkemehai ghamu kesü ssiten le” kekhi ghena.)
Jisu Jja Nu Ma cünyuthu
(Mat 12.46-50; Luk 8.19-21)
31Tsaseng wi Jisu jja nu ma cünyuthu na gho akhemi wi ngan nu wa ma cichilo kesa nyu kesunchi. 32Anyitenti na Jisu vüla donkiben, nu mathu na ma wi, “Ghangchilo, njja, ncünyu nu ntssüggüthu na akhemi wi ben, mathu na no ciben.”
33Jisu na luneng, “Thowa na ijja, nu icünyuthu nu?” 34Ma anyi ma vüla donki kebenthu ghang nu khi, “Ghangchilo, hathu hana ijja nu icünyuthu le! 35Anyi thowa na Anyiza na ma ya sa thsü mvu keben tsü saten khe tsüna icünyu, itssüggü, nu ijja le!”
Právě zvoleno:
MARK 3: RENGNBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
