MATHI 26
26
Acho sa pi Jisu Keshun
(Mrk 14.1-2; Luk 22.1-2; Jhn 11.45-53)
1Jisu na pala hathu ha tsüdi khi pi nyu kesansi seng wi ma sansikeyathu wi khi, 2#Bvü 12.1-27 “Nthu na chükeben ti ghanan keni seng wi Shhukeya Kho tsü sa wa tendha, nu ciwi Anyi Tsawa tsü pi kross miwi jenlo kesalina ghan pi nyu kwen chiaben.
3Tsaseng wi keqhaikedi ntsathu nu keshenpfüthu na Keqhaikedi Kemisiwa Kaifa jjen wi kemetuli, 4nu kuthila Jisu ghanya nu ma pi shü thsüale sa. 5Mathu khi, “Anyithu jawi kivvü nshagha thsüle kesalina ikhang na akho sa keben tsü wi ha sa yishüle.”
Bethani wi Adeli pi Jisu Kenyen
(Mrk 14.3-9; Jhn 12.1-8)
6Jisu na Bethani wi anyi kesü agükedsanaa kebenwa Simon jjen wi wa ben. 7#Luk 7.37-38 Jisu na dsajjütu keben wi nza kesü na adeli hankedemvu ma men kedhu pi alabaster hikhu pongti chi sen gho ma li wi meyisha chi. 8Sansikeyathu na ha mukeya wi mathu leben minu nu khi, “Mangkesa na adeli ha tsüdi dedi ben nu? 9Adeli ha pi apisa wi jeü ya nu pi ketha-u ncüla!”
10Jisu na mathu na mangwa khiben khe chüya nu mathu wi khi, “Nthu mangkesa na nzawa ha kivvü ben nu? Ma ighena pala tsikemehai nu kesau sachidha. 11#Aye 15.11 Kepaghenanye nthu na keshüthangla ketha-uthu gweghe benden, isala nthu na keshüthangla hi gweghe ben nben. 12Ma npi wina hi pi vhüa keten ghena kidenya thsüle adeli hankedemvu pi igwo nyen cüdha. 13Hi atsentsa nthu kizaden, ayyi maben wi ajüh kemehaiwa ha pi kekhi wi ma kekuli cüki ha khiben.”
Judah na Jisu Matsa cüle Cenkeya
(Mrk 14.10-11; Luk 22.3-6)
14Tsaseng wi sansikeyathu Taghakeni jawi kesü ma nyan Iskariot Judah tsüna keqhaikedi ntsathu wi wa, 15#Zek 11.12 nu khi, “Hi Jisu ghan pi nthu cüthu nthu na mangwa pi hi cüben nu?” Mathu na rükatssü changha si pi ma cüa. 16Tsü nten na Judah na Jisu ghan pi mathu kwen wi chiale kesa matsü kemehai ghangwa.
Jisu na Sansikeyathu Ssinu Shhukeya Kho Tsse Kedsa
(Mrk 14.12-21; Luk 22.7-14; Jhn 13.21-30)
17Azimi nkechi mesa pi kemishu kho tsathang atuwa wi sansikeyathu na Jisu wi gho nu ma keü, “No ikhang yala khiewa wala nghena Shhukeya Kho tsse kedsa ghena kidenya thsü mvu ben nu?”
18Jisu na hati khi nu mathu kesun pi wa thsü, “Anyunutiwa wi anyi kesü wi tsü walo, nu hati ma wi kizalo, ‘Kesansiwa na khiben, itsüwa tsüna ghodha, hi nu hi sansikeyathu na njjen wi Shhukeya Kho tsü saden.’ ”
19Sansikeyathu na wala Jisu na mathu kekiza ti Shhukeya Kho tsse tsü kidenya.
20Minulen wi Jisu nu ma sansikeyathu Taghakeni na gho donki nu tsü dsa. 21Mathu na dsajjü keben wi Jisu na khi, “Hi atsentsa nthu kizaden, nthu meshu kesü na hi matsa shaben.”
22Sansikeyathu na mathu hathana ntsa sa nu mathu kesüsü na ma wi keü, “Apvüwa, no ntsakhiwa hi khi nbenshe?”
23 #
Zak 41.9
Jisu na luneng, “Meshu kesü hi gweghe akhu kesü wi amesa dsa kebenwa tsüna hi matsa shaben. 24Ntsawajüh kekhi ti Anyi Tsawa na shüaben, isala anyi Anyi Tsawa matsa kesawa ghena tsü khatila qhethiketen saten nu! Anyi tsüwa ghena tsü ma pvügha nkeghowa ma ghena mehaidha le!”
25Judah nyu kematsawa na ma wi keü, “Apvüwa, no ntsakhiwa hi khi nbenshe?”
Jisu luneng, “No tsüti khidha.”
Apvüwa Ssinu Kemishu
(Mrk 14.22-26; Luk 22.14-20; 1 Kor 11.23-25)
26Mathu na dsajjü keben wi Jisu na amesa be kesü khuya nu kesawegü khiechi, pakhhiya, nu pi ma sansikeyathu cü nu khi, “Ha khupi dsayalo, hawa ha igwo.”
27Tsaseng wi ma ahyi kesü pieya nu kesawegü khiechi nu pi mathu cü nu khi, “Nthu tsüdila ha pi jjüyalo, 28#Bvü 24.8; Jer 31.31-34 hawa ha ijjü, anyi kejon kesami teshi pi cüle kesa ghena keji kechi Anyiza wi cenkethenjühwa tsü. 29Hi atsentsa nthu kizaden, hi iBawa Kadiyyi wi nthu gweghe kisengtssü ketheüwa kejjü tsathang npi kecu chu hi kisengtssü ha khiela njjü nengdha.”
30Tsaseng wi mathu akhwi kesü sa nu Oliv Yikha wi wa.
Pitor na Nkhilaketen Jisu na npi wi Kekhi
(Mrk 14.27-31; Luk 22.31-33; Jhn 13.36-38)
31 #
Zek 13.7
Tsaseng wi Jisu na mathu wi kiza, “Shita wi nthu tsüdila hi teshi nu bvüaben, kepaghenanye Ntsawajüh na khiben, ‘Hi anenikehiewa pathi, nu khaghanenithu tsüna bvüzigheaben.’ 32#Mat 28.16 Isala hi hangneng-keshagha seng wi nthu tuwi na Galilee wi wa benla ben.”
33Pitor na Jisu wi khi, “Mathu tsüdi no teshi lela hi tsü khiela no teshi nbenle.”
34Jisu na Pitor kiza, “Hi atsentsa no kizaden, shita wi awegü npi kekhou tuwi no kecheng tughu hi nchüle khiaben.”
35Pitor na luneng, “Hi khiela tsüti khi nben, hi no gweghe lela shüaben le!” Nu sansikeyathu kepa wi la tsüdi tsü makesü khia.
Jisu na Gethsemane wi Kekhie
(Mrk 14.32-42; Luk 22.39-46)
36Tsaseng wi Jisu na ma sansikeyathu ssinu apen kesü Gethsemane kesa wi tsü wa nu ciwi ma mathu wi kiza, “Hi ka wi wa kekhie sa keben jü hewi donki benlalo.” 37Ma Pitor nu Zebedee tsa keni ssiya nu ma gweghe wa. Lebengükeccü nu ahathakina na ma miwi gho, 38nu ma mathu wi kiza, “Ileben güccü mtsü nu shü keten ti sadha. Hewi ben nu hi hieben lalo.”
39Ma tsü miwi keu wha nu ayyi wi nkhwendu nu kekhie sa, “Iba, keujüla saya mehai lethu, hi wi ketizenkesa hyiwa ha khuya cülo! Isala hi kenen ti nye, no kenen ti sayalo.”
40Tsaseng wi ma sansikeyathu ma kecheng wi gho neng nan mathu jen keben muya; nu ma Pitor wi kiza, “No kecheng khati nu amighe kekihhe kesü jü ketanla hi hie meya nu? 41Nthu na kemechu wi ndule kesalina hieben nu kekhie saki benlo. Aghamu wi anonghe ntsa saben, isala asajjü wi tsü nchaladha.”
42Jisu na kheneng wa kuti kekhie sa, “Iba, keujüla hi ketizenkesa hyi ha nkejjü tsü sen bvüya nben lethu, no kemeshen ti sayalo.” 43Ma kheneng gho nan ma sansikeyathu jen keben muya; mathu nyon nküchala benla.
44Kheneng Jisu na mathu teshi nu wa kecheng tughuwa kishi kekhi jüh makesü khi pi kekhie sa. 45Tsaseng wi ma kheneng sansikeyathu wi gho nu khi, “Nthu na khili la cca jenben kwe? Ghangchilo, Anyi Tsawa tsü ghan pi kesami nyithu kwen wi chia keten matsüwa tsüna ghodha. 46Shaghalo, ikhang wha na. Ghangchilo, anyi hi matsale ketenwa tsüna hewi tendha le!”
Jisu Ghankeya
(Mrk 14.43-50; Luk 22.47-53; Jhn 18.3-12)
47Jisu na ajühkhitu keben wi sansikeyathu Taghakeni jawi kesü Judah tsüna anyitenti ssinu gho. Mathu na keqhaikedi ntsathu nu keshenpfüthu wina kesun kechi, njünnu nu achanghonthu sen nu gho. 48Judah na azensu kesü pi mathu cü theng; “Hi wala anyi kesü kimang chi lethu tsüna nthu ma ghanyale kebenwa tsüna ma ghanyalo.”
49Judah na meshonqhe Jisu wi wha nu khi, “Kesansiwa, kecca ya no ssi ketenwa salo,” isanu ma kimangchi.
50Jisu na luneng, “Ipvüshangwa, no mangwa sale ghoben khe wan sayalo!”
Tsaseng wi mathu ghola Jisu ghan pi bhenya. 51Jisu gweghe ketenthu meshu kesü na njünnu hanshi pi Keqhaikedi ntsawa magha khuna handhia. 52Jisu na ma wi khi, “Annu pi nlicen wi chiyalo. Njünnu sen ketenthu tsüdila njünnu wi shüaben. 53Hi iBa wi kekiqa khiechi lethu, ma wan tangnyilo süpahizithu taghakeni miwi kesunchi cüa keben tsü no nchü kwe? 54Isala tsüti sa lethu khati nu Ntsawajüh na tsüti sabenle khi keben tsü sacenya mehai nu?”
55 #
Luk 19.47; 21.37 Tsaseng wi Jisu na anyitenti wi khi, “Nthu na hi pi ayen kepakhhi nyi kesü ti sa nu njünnu nu achanghonthu sen nu hi ghanyale ghoben kwe? Hi atsathangla Kekinyijjen wi donki nu nyu sansi lela nthu na hi ghan meya. 56Isala atusenjüh-kechüthu na Ntsawajüh wi zhü ketheng tsü sacenya thsüale kesalina ha tsüdila saben.”
Tsaseng wi sansikeyathu tsüdila ma teshi nu bvüa.
Jisu na Ajühkekaghaten tuwi kewa
(Mrk 14.53-56; Luk 22.54-55,63-71; Jhn 18.13-14,19-24)
57Jisu ghan keyathu na ma ssinu Keqhaikedi Kemisiwa Kaifa jjen wi wa, ciwi Ayenkesansithu nu Keshenpfüthu tsüdila saghuben. 58Pitor na demija wi Keqhaikedi Kemisiwa jjen ccühha kecu wi ma nie wa. Ma ciwi dula aghikehiethu gweghe donki nu khati saten khe ghang ben. 59Keqhaikedi ntsathu nu ciwi kemehu maben la Jisu pi shü thsüale kesalina ma kesami bhaben; 60isanu anyi kejon na shagha milikemesa cüki khi lela mathu thola ma kesami mu meya. Asakhenwa meshu keni shagha 61#Jhn 2.19 nu khi, “Anyi hawa ha kekhi na, ‘Hi Anyiza Kekinyijjenwa ha yasa nu ghanan kecheng jü wi tsü saneng cüya mehai le!’ ”
62Keqhaikedi Kemisiwa na shagha nu Jisu wi khi, “Mathu na no kekimenni jüh hati khi keben ha no mathu luneng nten kwe?” 63Isala Jisu na ccen benwa. Keqhaikedi Kemisiwa na kheneng ma wi khi, “Hi khili hang kebenwa Anyiza nyan wina no pi kishen thsüben: no Anyiza Tsawa Messiya tsü la, pi ithu kizalo.”
64 #
Dan 7.13
Jisu na ma luneng, “No tsüti khidha. Isala hi nthu tsüdi kizaden, khili nten na nthu na Anyi Tsawa na kekhang ntsawa kwen ajewa donki nu tang wi akulukeshü miwi gho keten mu ben le!”
65Keqhaikedi Kemisiwa na ma thsü mezüqhe nu khi, “Ma Anyiza kethenjüh khiben! Ithu na ha miwi chüza kepa wi nsen la mehaidha! Nthu na khili ma Anyiza kethenjüh kekhi zayadha! 66#Lev 24.16 Nthu khatile khiten nu?”
Mathu luneng, “Ma sazzidha nu pi nshü thsüthu yishü.”
67 #
Isa 50.6
Tsaseng wi mathu na ma mmi meshuki nu ma kiccü; nu ma cen kecüthu na 68khi, “Messiya, thowa na no kihhe ben khe khi nanlo! pi ikhang kizalo.”
Pitor na Jisu Nchüle Kekhi
(Mrk 14.66-72; Luk 22.56-62; Jhn 18.15-18,25-27)
69Pitor na accühha na ameiwa donki keben wi Keqhaikedi Kemisiwa maghale kesü na ma wi gho nu khi, “No la Galilee nyiwa Jisu tsü gweghe den.”
70Isala ma mathu tsüdi tuwi na, “Hi no mangwa cüki khiben khe nchüle,” luneng chia; 71nu ma accühha kedulen wi tsü shhua. Maghale kepawa na ma muya nu anyi ciwi kebenthu wi khi, “Ma la Nazareth nyiwa Jisu tsü gweghe tenle!”
72Pitor na kheneng ma nchüle khi nu luneng, “Hi kishen nu khiben hi anyi katsü nchü le!”
73Matsü keu seng wi anyi ciwi ngan kebenthu na Pitor wi gho nu khi, “No la mathu jawi kesü sa metsi. Kepaghena nye njüh kekhi wina no ghan yaben.”
74Tsaseng wi Pitor na khi, “Hi kishen nu atsentsa nthu wi kiza ben le! Keujüla hi atsentsa nkhi lethu Anyiza na hi meten kecüwa salo! Hi anyi katsü nchü le!”
Tsü meyi awegü na khou shagha, 75nu Pitor na Jisu ma kekiza jüh tsü meshenya: “Awegü npi kekhou tuwi no kecheng tughu hi nchüle khiaben.” Ma akhemi wi shhula qai shüca wa.
Právě zvoleno:
MATHI 26: RENGNBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
MATHI 26
26
Acho sa pi Jisu Keshun
(Mrk 14.1-2; Luk 22.1-2; Jhn 11.45-53)
1Jisu na pala hathu ha tsüdi khi pi nyu kesansi seng wi ma sansikeyathu wi khi, 2#Bvü 12.1-27 “Nthu na chükeben ti ghanan keni seng wi Shhukeya Kho tsü sa wa tendha, nu ciwi Anyi Tsawa tsü pi kross miwi jenlo kesalina ghan pi nyu kwen chiaben.
3Tsaseng wi keqhaikedi ntsathu nu keshenpfüthu na Keqhaikedi Kemisiwa Kaifa jjen wi kemetuli, 4nu kuthila Jisu ghanya nu ma pi shü thsüale sa. 5Mathu khi, “Anyithu jawi kivvü nshagha thsüle kesalina ikhang na akho sa keben tsü wi ha sa yishüle.”
Bethani wi Adeli pi Jisu Kenyen
(Mrk 14.3-9; Jhn 12.1-8)
6Jisu na Bethani wi anyi kesü agükedsanaa kebenwa Simon jjen wi wa ben. 7#Luk 7.37-38 Jisu na dsajjütu keben wi nza kesü na adeli hankedemvu ma men kedhu pi alabaster hikhu pongti chi sen gho ma li wi meyisha chi. 8Sansikeyathu na ha mukeya wi mathu leben minu nu khi, “Mangkesa na adeli ha tsüdi dedi ben nu? 9Adeli ha pi apisa wi jeü ya nu pi ketha-u ncüla!”
10Jisu na mathu na mangwa khiben khe chüya nu mathu wi khi, “Nthu mangkesa na nzawa ha kivvü ben nu? Ma ighena pala tsikemehai nu kesau sachidha. 11#Aye 15.11 Kepaghenanye nthu na keshüthangla ketha-uthu gweghe benden, isala nthu na keshüthangla hi gweghe ben nben. 12Ma npi wina hi pi vhüa keten ghena kidenya thsüle adeli hankedemvu pi igwo nyen cüdha. 13Hi atsentsa nthu kizaden, ayyi maben wi ajüh kemehaiwa ha pi kekhi wi ma kekuli cüki ha khiben.”
Judah na Jisu Matsa cüle Cenkeya
(Mrk 14.10-11; Luk 22.3-6)
14Tsaseng wi sansikeyathu Taghakeni jawi kesü ma nyan Iskariot Judah tsüna keqhaikedi ntsathu wi wa, 15#Zek 11.12 nu khi, “Hi Jisu ghan pi nthu cüthu nthu na mangwa pi hi cüben nu?” Mathu na rükatssü changha si pi ma cüa. 16Tsü nten na Judah na Jisu ghan pi mathu kwen wi chiale kesa matsü kemehai ghangwa.
Jisu na Sansikeyathu Ssinu Shhukeya Kho Tsse Kedsa
(Mrk 14.12-21; Luk 22.7-14; Jhn 13.21-30)
17Azimi nkechi mesa pi kemishu kho tsathang atuwa wi sansikeyathu na Jisu wi gho nu ma keü, “No ikhang yala khiewa wala nghena Shhukeya Kho tsse kedsa ghena kidenya thsü mvu ben nu?”
18Jisu na hati khi nu mathu kesun pi wa thsü, “Anyunutiwa wi anyi kesü wi tsü walo, nu hati ma wi kizalo, ‘Kesansiwa na khiben, itsüwa tsüna ghodha, hi nu hi sansikeyathu na njjen wi Shhukeya Kho tsü saden.’ ”
19Sansikeyathu na wala Jisu na mathu kekiza ti Shhukeya Kho tsse tsü kidenya.
20Minulen wi Jisu nu ma sansikeyathu Taghakeni na gho donki nu tsü dsa. 21Mathu na dsajjü keben wi Jisu na khi, “Hi atsentsa nthu kizaden, nthu meshu kesü na hi matsa shaben.”
22Sansikeyathu na mathu hathana ntsa sa nu mathu kesüsü na ma wi keü, “Apvüwa, no ntsakhiwa hi khi nbenshe?”
23 #
Zak 41.9
Jisu na luneng, “Meshu kesü hi gweghe akhu kesü wi amesa dsa kebenwa tsüna hi matsa shaben. 24Ntsawajüh kekhi ti Anyi Tsawa na shüaben, isala anyi Anyi Tsawa matsa kesawa ghena tsü khatila qhethiketen saten nu! Anyi tsüwa ghena tsü ma pvügha nkeghowa ma ghena mehaidha le!”
25Judah nyu kematsawa na ma wi keü, “Apvüwa, no ntsakhiwa hi khi nbenshe?”
Jisu luneng, “No tsüti khidha.”
Apvüwa Ssinu Kemishu
(Mrk 14.22-26; Luk 22.14-20; 1 Kor 11.23-25)
26Mathu na dsajjü keben wi Jisu na amesa be kesü khuya nu kesawegü khiechi, pakhhiya, nu pi ma sansikeyathu cü nu khi, “Ha khupi dsayalo, hawa ha igwo.”
27Tsaseng wi ma ahyi kesü pieya nu kesawegü khiechi nu pi mathu cü nu khi, “Nthu tsüdila ha pi jjüyalo, 28#Bvü 24.8; Jer 31.31-34 hawa ha ijjü, anyi kejon kesami teshi pi cüle kesa ghena keji kechi Anyiza wi cenkethenjühwa tsü. 29Hi atsentsa nthu kizaden, hi iBawa Kadiyyi wi nthu gweghe kisengtssü ketheüwa kejjü tsathang npi kecu chu hi kisengtssü ha khiela njjü nengdha.”
30Tsaseng wi mathu akhwi kesü sa nu Oliv Yikha wi wa.
Pitor na Nkhilaketen Jisu na npi wi Kekhi
(Mrk 14.27-31; Luk 22.31-33; Jhn 13.36-38)
31 #
Zek 13.7
Tsaseng wi Jisu na mathu wi kiza, “Shita wi nthu tsüdila hi teshi nu bvüaben, kepaghenanye Ntsawajüh na khiben, ‘Hi anenikehiewa pathi, nu khaghanenithu tsüna bvüzigheaben.’ 32#Mat 28.16 Isala hi hangneng-keshagha seng wi nthu tuwi na Galilee wi wa benla ben.”
33Pitor na Jisu wi khi, “Mathu tsüdi no teshi lela hi tsü khiela no teshi nbenle.”
34Jisu na Pitor kiza, “Hi atsentsa no kizaden, shita wi awegü npi kekhou tuwi no kecheng tughu hi nchüle khiaben.”
35Pitor na luneng, “Hi khiela tsüti khi nben, hi no gweghe lela shüaben le!” Nu sansikeyathu kepa wi la tsüdi tsü makesü khia.
Jisu na Gethsemane wi Kekhie
(Mrk 14.32-42; Luk 22.39-46)
36Tsaseng wi Jisu na ma sansikeyathu ssinu apen kesü Gethsemane kesa wi tsü wa nu ciwi ma mathu wi kiza, “Hi ka wi wa kekhie sa keben jü hewi donki benlalo.” 37Ma Pitor nu Zebedee tsa keni ssiya nu ma gweghe wa. Lebengükeccü nu ahathakina na ma miwi gho, 38nu ma mathu wi kiza, “Ileben güccü mtsü nu shü keten ti sadha. Hewi ben nu hi hieben lalo.”
39Ma tsü miwi keu wha nu ayyi wi nkhwendu nu kekhie sa, “Iba, keujüla saya mehai lethu, hi wi ketizenkesa hyiwa ha khuya cülo! Isala hi kenen ti nye, no kenen ti sayalo.”
40Tsaseng wi ma sansikeyathu ma kecheng wi gho neng nan mathu jen keben muya; nu ma Pitor wi kiza, “No kecheng khati nu amighe kekihhe kesü jü ketanla hi hie meya nu? 41Nthu na kemechu wi ndule kesalina hieben nu kekhie saki benlo. Aghamu wi anonghe ntsa saben, isala asajjü wi tsü nchaladha.”
42Jisu na kheneng wa kuti kekhie sa, “Iba, keujüla hi ketizenkesa hyi ha nkejjü tsü sen bvüya nben lethu, no kemeshen ti sayalo.” 43Ma kheneng gho nan ma sansikeyathu jen keben muya; mathu nyon nküchala benla.
44Kheneng Jisu na mathu teshi nu wa kecheng tughuwa kishi kekhi jüh makesü khi pi kekhie sa. 45Tsaseng wi ma kheneng sansikeyathu wi gho nu khi, “Nthu na khili la cca jenben kwe? Ghangchilo, Anyi Tsawa tsü ghan pi kesami nyithu kwen wi chia keten matsüwa tsüna ghodha. 46Shaghalo, ikhang wha na. Ghangchilo, anyi hi matsale ketenwa tsüna hewi tendha le!”
Jisu Ghankeya
(Mrk 14.43-50; Luk 22.47-53; Jhn 18.3-12)
47Jisu na ajühkhitu keben wi sansikeyathu Taghakeni jawi kesü Judah tsüna anyitenti ssinu gho. Mathu na keqhaikedi ntsathu nu keshenpfüthu wina kesun kechi, njünnu nu achanghonthu sen nu gho. 48Judah na azensu kesü pi mathu cü theng; “Hi wala anyi kesü kimang chi lethu tsüna nthu ma ghanyale kebenwa tsüna ma ghanyalo.”
49Judah na meshonqhe Jisu wi wha nu khi, “Kesansiwa, kecca ya no ssi ketenwa salo,” isanu ma kimangchi.
50Jisu na luneng, “Ipvüshangwa, no mangwa sale ghoben khe wan sayalo!”
Tsaseng wi mathu ghola Jisu ghan pi bhenya. 51Jisu gweghe ketenthu meshu kesü na njünnu hanshi pi Keqhaikedi ntsawa magha khuna handhia. 52Jisu na ma wi khi, “Annu pi nlicen wi chiyalo. Njünnu sen ketenthu tsüdila njünnu wi shüaben. 53Hi iBa wi kekiqa khiechi lethu, ma wan tangnyilo süpahizithu taghakeni miwi kesunchi cüa keben tsü no nchü kwe? 54Isala tsüti sa lethu khati nu Ntsawajüh na tsüti sabenle khi keben tsü sacenya mehai nu?”
55 #
Luk 19.47; 21.37 Tsaseng wi Jisu na anyitenti wi khi, “Nthu na hi pi ayen kepakhhi nyi kesü ti sa nu njünnu nu achanghonthu sen nu hi ghanyale ghoben kwe? Hi atsathangla Kekinyijjen wi donki nu nyu sansi lela nthu na hi ghan meya. 56Isala atusenjüh-kechüthu na Ntsawajüh wi zhü ketheng tsü sacenya thsüale kesalina ha tsüdila saben.”
Tsaseng wi sansikeyathu tsüdila ma teshi nu bvüa.
Jisu na Ajühkekaghaten tuwi kewa
(Mrk 14.53-56; Luk 22.54-55,63-71; Jhn 18.13-14,19-24)
57Jisu ghan keyathu na ma ssinu Keqhaikedi Kemisiwa Kaifa jjen wi wa, ciwi Ayenkesansithu nu Keshenpfüthu tsüdila saghuben. 58Pitor na demija wi Keqhaikedi Kemisiwa jjen ccühha kecu wi ma nie wa. Ma ciwi dula aghikehiethu gweghe donki nu khati saten khe ghang ben. 59Keqhaikedi ntsathu nu ciwi kemehu maben la Jisu pi shü thsüale kesalina ma kesami bhaben; 60isanu anyi kejon na shagha milikemesa cüki khi lela mathu thola ma kesami mu meya. Asakhenwa meshu keni shagha 61#Jhn 2.19 nu khi, “Anyi hawa ha kekhi na, ‘Hi Anyiza Kekinyijjenwa ha yasa nu ghanan kecheng jü wi tsü saneng cüya mehai le!’ ”
62Keqhaikedi Kemisiwa na shagha nu Jisu wi khi, “Mathu na no kekimenni jüh hati khi keben ha no mathu luneng nten kwe?” 63Isala Jisu na ccen benwa. Keqhaikedi Kemisiwa na kheneng ma wi khi, “Hi khili hang kebenwa Anyiza nyan wina no pi kishen thsüben: no Anyiza Tsawa Messiya tsü la, pi ithu kizalo.”
64 #
Dan 7.13
Jisu na ma luneng, “No tsüti khidha. Isala hi nthu tsüdi kizaden, khili nten na nthu na Anyi Tsawa na kekhang ntsawa kwen ajewa donki nu tang wi akulukeshü miwi gho keten mu ben le!”
65Keqhaikedi Kemisiwa na ma thsü mezüqhe nu khi, “Ma Anyiza kethenjüh khiben! Ithu na ha miwi chüza kepa wi nsen la mehaidha! Nthu na khili ma Anyiza kethenjüh kekhi zayadha! 66#Lev 24.16 Nthu khatile khiten nu?”
Mathu luneng, “Ma sazzidha nu pi nshü thsüthu yishü.”
67 #
Isa 50.6
Tsaseng wi mathu na ma mmi meshuki nu ma kiccü; nu ma cen kecüthu na 68khi, “Messiya, thowa na no kihhe ben khe khi nanlo! pi ikhang kizalo.”
Pitor na Jisu Nchüle Kekhi
(Mrk 14.66-72; Luk 22.56-62; Jhn 18.15-18,25-27)
69Pitor na accühha na ameiwa donki keben wi Keqhaikedi Kemisiwa maghale kesü na ma wi gho nu khi, “No la Galilee nyiwa Jisu tsü gweghe den.”
70Isala ma mathu tsüdi tuwi na, “Hi no mangwa cüki khiben khe nchüle,” luneng chia; 71nu ma accühha kedulen wi tsü shhua. Maghale kepawa na ma muya nu anyi ciwi kebenthu wi khi, “Ma la Nazareth nyiwa Jisu tsü gweghe tenle!”
72Pitor na kheneng ma nchüle khi nu luneng, “Hi kishen nu khiben hi anyi katsü nchü le!”
73Matsü keu seng wi anyi ciwi ngan kebenthu na Pitor wi gho nu khi, “No la mathu jawi kesü sa metsi. Kepaghena nye njüh kekhi wina no ghan yaben.”
74Tsaseng wi Pitor na khi, “Hi kishen nu atsentsa nthu wi kiza ben le! Keujüla hi atsentsa nkhi lethu Anyiza na hi meten kecüwa salo! Hi anyi katsü nchü le!”
Tsü meyi awegü na khou shagha, 75nu Pitor na Jisu ma kekiza jüh tsü meshenya: “Awegü npi kekhou tuwi no kecheng tughu hi nchüle khiaben.” Ma akhemi wi shhula qai shüca wa.
Právě zvoleno:
:
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.