MATHI 25
25
Ghala Tagha pi Ajühkaghape
1 #
Luk 12.35
Tsü tsüwi tang Kadiyyi na hati saben. Ciwi ghala meshu tagha na mathu nnikecanki sen nu shanyiwa ssiyale wa. 2Mathu meshu manga na kejüphon nu meshu manga na kemetsa. 3Kejüphonthu na mathu nnikecanki khuya, isala annitssü gilli khu meyala. 4Isala kemetsathu na mathu nnikecanki ghena annitssü pi ahikhu pongti chiya. 5Shanyiwa na gho minuten wa, tsalina ghalathu na kumu nu jen wa.
6“Isala ghaja non wi jisha nu ‘Ae, shanyiwa na gho tendha le! Ghala ma ssiyalo!’ 7Ghalathu ma tagha na shagha nu mathu nnikecanki cankiya. 8Tsaseng wi kejüphonthu na kemetsathu wi khi, ‘Nthu nnitssü pahan pi ikhang cülo, kepaghenanye ikhang nnikecanki na nyen wa tendha.’ 9Kemetsathu na luneng, ‘Nyele, ciwi ikhang ghena nu nthu ghena la sen qo nbenle. Wala kejeü pen wi nthu ghena pahan sheiyalo.’ 10Tsalina kejüphon ghalathu na annitssü sheiyale wa, nu mathu na wa kesa jü wi shanyiwa na ghoa. Ghala manga kiden sen nu kebenthu na ma gweghe keshanyi kemishu wi wa nu ajenka khenya.”
11“Tsaseng wi ghala kepathu na gho nu khi, ‘Apvüwa, Apvüwa! shachi pi ikhang la cülo!’ 12#Luk 13.25 Isala shanyiwa na luneng, ‘Hi atsentsa nthu kizaden, hi nthu nchüle!’ ”
13Jisu na khi, “Tsalina nthu kiden-kesha nu hie benlo, kepaghenanye nthu na atsathang nu matsüwa tsü nkechü ghena.”
Amagha kecheng pi Ajühkaghape
(Luk 19.11-27)
14 #
Luk 19.11-27
“Tsü tsüwi tang Kadiyyi na hati saben. Ciwi anyi kesü na ma jjen teshi nu kijünyi wa keten wi ma maghathu cichi nu ma keben pi mathu dhenchi. 15Ma mathu na saya kemehai qei wi pi mathu kesüsü gishü cü: ma pisaten manga pi kesü cü, pisaten keni pi kepawa cü, nu pisaten kesü pi kepawa la cü; isanu ma kijünyi wa. 16Amagha pisaten manga mukeyawa na wan tsü sen wa asensa nu pisaten manga kiyiya. 17Tsü makesü amagha pisaten keni mukeyawa la sen wa keni kiyiya. 18Isala amagha pisaten kesü mukeyawa na tsü sen wa ayyiku kesü wi chhüvhü, nu ma pvüwa pisa tsü pi kuthia.
19“Matsü kesie seng wi amaghathu pvüwa tsüna gho neng nu mathu na khati kiyiya khe ghangwa. 20Amagha pisaten manga mukeyawa na pisaten manga kiyi sen gho nu khi, ‘Apvüwa, no pisaten manga pi hi cüle. Ghangchilo, hi he wi manga kiyi yadha.’ 21Ma pvüwa na khi, ‘Mehaidha, no jühtsentsa kesen nu amagha kemehaiwa. No jühtsentsa sa nu pala kezeng-u wi noncca pi mehai kecü ghena hi no pi pala kejon noncca thsüden. Ghala hi gweghe anonghe yalo!’
22Tsaseng wi amagha pisaten keni mukeyawa na gho nu khi, ‘Apvüwa, no pisaten keni pi hi cüle. Ghangchilo, hi he wi keni kiyi yadha.’ 23Ma pvüwa na khi, ‘Mehaidha, no jühtsentsa kesen nu amagha kemehaiwa. No jühtsentsa sa nu pala kezeng-u wi noncca pi mehai kecü ghena hi no pi pala kejon noncca thsüden. Ghala hi gweghe anonghe yalo!’
24Tsaseng wi amagha pisaten kesü mukeyawa na gho nu khi, ‘Apvüwa, hi no kecügü nyi; no pi nkeyangchi wi lela wwiden, nu no pi nkivvüchi wi lela saghuden kesa hi chüben. 25Hi messi, tsalina npisa tsü sen wa ayyiku wi kuthile. Ghangchilo, npisa na he wi benle.’
26Ma pvüwa na khi, ‘No nkemehai nu kenontssü maghawa! No hi pi nkeyangchi wi lela wwiden, nu hi pi nkivvüchi wi lela saghuden kesa chüben kwale? 27Isathu, no ipisa pi apisajjen wi chitheng nu hi kegho neng wi ma midhon pi kekiyi saghu mukeya thsü-u. 28Khili ma wi apisa tsü khuya nu pi pisaten tagha kebenwa tsü wwa cülo. 29#Mat 13.12; Mrk 4.25; Luk 8.18 Kepaghenanye anyi thowa na pala pahan ben khe pi wwaneng cüden, nu ma ji ntsa benya thsüden. Isala anyi thowa na mangla nmi khe ma wi keu keben tsü lela sen bvüaben. 30#Mat 8.12; 22.13; Luk 13.28 Nu amagha mangla nkenyewa ha pi akhemi kejang wi khala chilo; ma ciwi qai nu ma yha kemeküli benden.’
Ajühkaghaten Sakhenwa
31 #
Mat 16.27; 19.28 “Anyi Tsawa na Kadimi sa kegho wi tangnyilothu tsüdi ma gweghe gho nu ma kadipen wi donki, 32nu ayyi wi mizzatentithu tsüdi ghola ma tuwi saghuben. Tsaseng wi ma anenikehie kesü na anenithu jawi khaghaneni kessishiya kesa ti tsüthu gishü pi akhang keni saben. 33Ma anyi ketsatanthu pi ma kwen ajewa chiya nu kepathu pi tavüwa chiyaben. 34Tsaseng wi Kadimiwa na anyi ma kwen ajewa kebenthu wi khiben, ‘Nthu iBa kesawegü kepvüthu! Ghala ayyi npi kesachi wina nthu ghena kiden ketheng kadiyyiwa ha ghong yalo! 35Hi ghama keben wi nthu na hi ghanja cü; hi dighe keben wi nthu na pi hi jjüya thsü; hi kijünyi sa keben wi nthu na hi ssi pi nthu jjen wi chiya, 36nu kemessü keten wi nthu na athsümeni pi hi mphi thsü; hi sanaa keben wi nthu na hi noncca, nu atssüzü sa keben wi nthu na hi ghangchi cü.’
37Tsaseng wi ketsatanthu na ma luneng ben, ‘Apvüwa, ikhang kusi no ghama keben wi pi no ghanja cü, nu dighe keben wi pi no jjüya thsü nu? 38Ikhang kusi no kijünyi sa keben muya nu no ssi pi ikhang jjen wi chiya, nu kemessü keben wi athsümeni pi no mphi thsü nu? 39Ikhang kusi no sanaa nyelela atssüzü sa keben wi no ghangchi cü nu?’ 40Kadimiwa na luneng ben, ‘Hi atsentsa nthu kizaden, nthu na kusi inyi hathu jawi kizza ntsawa kesü miwi ha sachi khe tsüna ighena sachile.’
41“Tsaseng wi ma anyi ma kwen tavüwa kebenthu wi khiben, ‘Nthu Anyiza kishen-keshi kepvüthu, hi wina bvülo! Atsaghang nu ma nyilothu ghena kiden ketheng anuphan annighajü wi tsü bvülo! 42Hi ghama keben wi nthu na hi ghanja ncü, nu dighe keben wi nthu na pi hi njjü thsü. 43Hi kijünyi sa keben wi nthu na nthu jjen wi hi ssi meya, kemessü keben wi nthu athsü pi hi mphi nthsü; hi sanaa keben nu atssüzü sa keben wi nthu hi noncca ncü.’
44“Tsaseng wi mathu na hati ma luneng ben, ‘Apvüwa, ikhang na kusi no ghama, dighe, kijünyi sa, kemessü, sanaa nyelela atssüzü sa keben mu nu ikhang na no kiqa ncüla nu?’ 45Kadimiwa na khineng ben, ‘Hi atsentsa nthu kizaden, nthu na kusi inyi hathu jawi kizza ntsawa kesü nkiqa cü mvu la khe tsüna hi nkiqa cü mvu lale!’ 46#Dan 12.2 Tsaseng wi hathu ha kesun pi anuphan kemeten wi chiaben, isala ketsatanthu na anuphan kahang wi waben.”
Právě zvoleno:
MATHI 25: RENGNBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
