Logo YouVersion
Ikona vyhledávání

MATHI 21

21
Khang ntsawa Sala Jerusalem wi Kedu
(Mrk 11.1-11; Luk 19.28-40; Jhn 12.12-19)
1Jisu nu ma sansikeyathu na Jerusalem tetsaki ghoya, mathu na Oliv Yikha wi Bethfage wi ghoya. Ciwi Jisu na ma sansikeyathu meshu keni kesun pi atu wi wa thsü, 2nu khi, “Nshinyi tuwi anyu wi tsü walo, nu nshinyi ciwi nyu na gada kesü nu ma zza pi ma kete wi hugi ketheng muyaben. Tsü lisha sen nu hi wi gholo. 3Keujüla nyu nshinyi keü lethu hati ma wi kizalo, ‘Apvüwa na ha keni nsenthu yishüben; ’ isathu ma wan tsü keni teshi pi wa thsüaben.”
4Hawa ha atusenjüh-kechüwa na kekhi tsü ntsakhiwa cenya thsüle kesalina sa:
5 # Zek 9.9 “Zion nyunutiwa wi kizalo,
ghangchilo, nthu kadimiwa na nthu wi gho tendha!
Ma satemeni nu gada kesü miwi donki,
nu gada zza aghala kesü miwi ben.”
6Tsalina sansikeya keni tsüna wala Jisu na manyi salo kekiza ti sa. 7Manyi na gada nu ma zza tsü ssi gho athsü pi tsü miwi shi nu Jisu pi ma miwi donki thsü. 8Anyitenti na mathu thsü pi alen wi shi, nu pahan na achanton wi ma cünathu shhü sen gho alen wi dha. 9#Zak 118.25-26 Anyitenti na Jisu tuwi wa nu aseng wi ketenthu na jisha nu khi, “Hosanna, David Tsawa! Anyiza na sawegü pi Apvüwa nyan wina gho ketenwa kecüwa salo! Hosanna, Kemisintsa!”
10Jisu na Jerusalem wi kedu wi anyunuti wi anyi maben la qhethiketen sa nu mathu na keü, “Hawa ha thowa nu?”
11Anyitenti na khineng, “Hawa ha atusenjüh-kechü Galilee wi Nazareth wina keghowa Jisu tsüle!”
Jisu na Kekinyijjen wi kewa
(Mrk 11.15-19; Luk 19.45-48; Jhn 2.13-22)
12Jisu na Kekinyijjen wi wa nu ciwi anyi pala pi jeü nu shei kebenthu tsüdi jügü pi bvü thsüa. Ma wala apisa kemiyili nu tuktur pi jeü kebenthu miz tsü pakhakuli, 13#Isa 56.7; Jer 7.11 nu mathu wi khi, “Ntsawajüh wi Anyiza na kekhi hati zhü theng, ‘Ijjen pi kekhie jjen le ciden.’ Isala nthu na tsü pi kaghanfüthu kekuthipen saben le!”
14Anyon nkemuthu nu accü nkemehaithu na Kekinyijjen wi ma wi gho nu ma mathu sa pi mehai cü. 15Keqhaikedi ntsathu nu Ayenkesansithu na Jisu na amankesathu kuli nu ghanyithu na Kekinyijjen wi “Hosanna, David Tsawa,” isala jisha keben kemu wi mathu leben-minu ntsa saya. 16#Zak 8.2 Tsalina mathu Jisu wi keü, “No mathu na mangwa khiben khe zaben ma?” Jisu na luneng,
“Anle, zaben le! Nthu na Ntsawajüh wi hati si meya kwe? No ghanyithu nu memethu sansi pi seng cencuya thsüdha.” 17Jisu na mathu teshi nu anyunutiwa wina Bethani wi wa aghaja ciwi ben wa.
Jisu Na Khhaghabvü ton Kishenkecü
(Mrk 11.12-14,20-24)
18Jisu na dhitsü ghanenwa wi mitu na anyunutiwa wi wha neng keten ma ghamaya. 19Ma alen kete wi khhaghabvü ton kesü muya nu ciwi wa nan mawa ketan khe ciwi mangla nmu. Tsalina ma achantonwa wi kiza, “No khiela nbi nbün nengdha!” Tsümeyi khhaghabvü ton tsüna jüwa.
20Sansikeyathu na ha mukeya wi mathu mansa nu keü, “Khatinu khhaghabvü ton ha wan jüwadha nu?”
21 # Mat 17.20; 1 Kor 13.2 Jisu na luneng, “Hi nthu kizaden, keujüla nthu na nkesütula nondi lethu, hi khhaghabvü ton ha miwi sa kechi tsüti nthu la saya mehai. Nu tsüti sakeya ketan nyela nthu na ayikha ha wi lela hati khiya mehai, ‘Ketsen sen wa atssükedone wi dulo,’ isa lethu tsüna tsüti sa shaben. 22Keujüla nthu na nondi lethu nthu kekhie wi mangwa khie khe muyaben.”
Jisu Kekhang Jjügi Kekeü
(Mrk 11.27-33; Luk 20.1-8)
23Jisu na Kekinyijjen wi gho neng; ma nyu sansi keben wi keqhaikedi ntsathu nu keshenpfüthu na ma wi gho nu keü, “No mangwa kekhang wina hathu ha saben nu? Thowa na kekhang ha pi no cü nu?”
24Jisu na mathu luneng, “Hi nthu wi pala kesü keü ten na hi kizalo, isathu hi la mangwa kekhang wina hathu ha saben khe pi nthu kiza na. 25Johan baptism tsüna Anyiza wina la anyi wina gho nu?”
Mathu ketanla mathu jawi kecücanliwa; “Ikhang na khatile khi nu? Keujüla ikhang na ‘Anyiza wina le’ khithu, ma hati khiben, ‘Isathu nthu mangkesa na Johan n-nondi nu?’ 26Isala keujüla ikhang na ‘Anyi wina le’ khithu, ikhang na anyithu messi, kepaghenanye mathu tsüdila Johan tsüna atusenjüh-kechü kesü le kesa nondiden.”
27Tsalina mathu na Jisu wi, “Ikhang na nchüle” isa luneng.
Ma mathu wi, “Isathu hi la mangwa kekhang wina hathu ha saten khe pi nthu kizaya nben,” isa khia.
Atsa Keni Pi Ajühkaghape
28“Khili nthu kemeshen tsü khati nu? Ciwi anyi kesü ma tsa keni ben. Ma wala keqhaiwa wi kiza, ‘Itsa nansü wala alli wi kulilo.’ 29Ma luneng, ‘Hi wa ntenle,’ isala nkhe wi ma seng meshen nengya nu ma wa. 30Abawa na tsaseng wi atsa kepawa wi wa nu tsü makesü khi. Ma khineng, ‘Iba anlo, hi waben,’ isala ma nwala. 31Manyi thowa na ma ba kenenwa tsü sa nu?”
Mathu khineng, “Atsa keqhaiwa tsüle.”
Tsalina Jisu na mathu wi kiza, “Hi nthu kizaden, khajana kekhüthu nu keqheza men kedsathu na nthu tuwi na Anyiza Kadiyyi wi wa tendha. 32#Luk 3.12; 7.29-30 Kepaghenanye Johan Baptizwa na gho alen kemeshonwa tsü pi nthu ccüca lela nthu na ma n-nondi; isala khajana kekhüthu nu keqheza men kedsathu na ma nondiya. Nthu na ha mu lela nthu leben khapeghe nu ma nondi meyala.
Alli Kedengathu Pi Ajühkaghape
(Mrk 12.1-12; Luk 20.9-19)
33 # Isa 5.1-2 Jisu na khi, “Ajühkhaghape kepa wi ha kina chilo: Ciwi alli pvüwa kesü na kemeshentsse ton pi sheng, aghapeng sa pi tsü vü, kisengtssü kemisügüpen ghena ayyiku kesü chhü, nu acatu kesü sa theng. Tsaseng wi ma alli tsü pi kedengathu kwen wi denga chi theng nu kijünyi wa. 34Kemeshentsse bi kewwi tsüwi ma nssümaghathu kesun pi kedengathu wi ma shei kemeshentsse bi khie wa thsü. 35Kedengathu na ma nssümaghathu tsü ghanya nu kesü kiccü, kesü pathia, nu alon pi kesü kecenthia. 36Anyi tsüwa na kheneng kishi miwi jiki nssümaghathu kesun chi nan kedengathu na tsüthu miwi la tsü makesü sa. 37Asakhenwa ma hati khi nu ma tsawa kesun pi mathu wi chi, ‘Mathu na itsawa nyuwakü metsiben.’ 38Isala kedengathu na atsawa mukeya wi mathu khokho wi khi, ‘Hawa ha alli pvüwa tsawale. Ghalo, ikhang wa ma pathi nu ma keben tsü khuya na!’ 39Tsalina mathu na ma ghan sen wa athsütsa wi ma pathia.
40Jisu na keü, “Alli tsü pvüwa na gho kedengathu tuwi khati saben nu?”
41Mathu na luneng, “Ma ghola anyi nkemehaithu tsü pathi metsiben, nu alli tsü pi matsü wi kemeshentsse bi ma shei pi ma cüya kesa kepathu cüaben.”
42 # Zak 118.22-23 Jisu na mathu wi khi, “Ntsawajüh na mangwa khiben khe si meya kwe?
‘Ajjen kesathu na pi ma men nkemi sala meya
mvula kesawa alon tsüna tsüdi miwi
donbvü ghangpvüwa sa shaghadha.
Hawa ha Apvüwa na sachi;
khatila amankesa kesü sadha nu!’
43Jisu na khi, “Tsalina hi nthu kizaden, nthu wina Anyiza Kadiyyi tsü khuya nu pi anyi matsü wi abi mehaitsü bünya ketenthu cüaben.” 44Anyi thowa na alon ha miwi qanca khe kecencha zigheaben, nu keujüla alon tsüwa na kesü miwi qanca lethu, tsü pakhhi pi ayyinikhu sa ben.
45Keqhaikedi ntsathu nu Farisithu na Jisu jühkaghapethu tsü zaya nu tsüna ma mathu cüki khibenle kesa chüya. 46Tsalina mathu na ma ghanyale sa. Isala mathu anyitenti na Jisu pi atusenjüh-kechüwa kesü sa keten ghena tsü messia.

Právě zvoleno:

MATHI 21: RENGNBSI

Zvýraznění

Sdílet

Kopírovat

None

Chceš mít své zvýrazněné verše uložené na všech zařízeních? Zaregistruj se nebo se přihlas